MIER Chitral

کھوار سفر نامہ: قزاقستانار گنی ازبکستانہ پت

جوؤ پڑاؤ: آستاناری گنی گراگنڈہ پت
نیویشاک: نورشمس الدین

ریل راہی بیتی تمامو وخت ہوئے۔ پھوک مدا پروشٹی ریلو شیشا نیݰی لوڑیکو آستانو لوٹ لوٹ عمارت، روئے، اوݯھی وا موٹر غیچی گیاؤ اوشونی ہینسے ہتیت کیاغ کورا نیکی۔ آستانہ بغائے۔ کراگنڈو انتظار شیر۔ بیری غیچ الیپھیکو ژاغہ پت میدان۔ نگہہ کورا ݯھیتور غیچی گونیان،زیادہ خالی۔۔ کورا گھاس اوچ کورا نو۔ شامو دوپیدو، میدانو موژو ریل دے بیران۔ پھار نسہ یور ځہیچ باؤ گویان۔ ہݰ سایران کی چھوئے اوچے روشتی گݯ ݯوکیک کونیان۔ پھوک مدا اچہ چھوئے روشتیو موڑا دوئے۔ ہیس دُنیو دستور مگر ای وختہ ہر کورا چھوئے نو بوئے۔ بیری کندوری چھوئے باؤ کی گویان ریلو اندرینی ہانی تان روشتی زیادہ بویان۔ بیری خاموشی باؤ گیکو اندرینی ہواز رانہ ران زیادہ بونیان۔ بیری دنیا روپھی شیر رے ساران مگر اندرینی حرکت بند نو۔ روشتی، ہواز وا حرکت زندگیو علامت۔ بیری چھوئی اوچے خاموشیو لوڑیکو سار اندرینی گیک جم۔

ہیہ اندرینی مہ نسی تروئے ژون خور اسونی۔ ایوالی پروشٹہ نیشی موبائل کیتیران۔ جوالی ہے ٹیکٹو تن بستران ساؤزینیان۔ ہنیسے تھیسوم انگیتی سوری دیکو وا موڑتو درئیکو څادار، ورازنی ہنو وا ای څیق تاؤلیہ اسپتے پرانی اوا تان ہیتن ساؤزے ہیا کولی بیتی اسوم مہ نسین ہمی روئے دی تان دنیا مست۔ میتان سوم سلام دُعا بی شیر جم بلاتی کی ہوئے میتان بارا پیستے لو دوم۔ ہنیسے اسیکہ دیانی۔

نورلی ژولہ تان ݯوکی شروع کوسی۔اوا بسی نیشی نورلی ژولہ توری اسیتام۔ بسہ یو خومیتام کی شئے نا پُرسان معاملہ۔ نورلی ژولو دواہتو بیلہ تان بس سٹاپ۔ ہر منٹہ مختلف نمبرو بس گونیان اوچے بینیان۔ روئے اسٹیشنار سامانان بارے یو نیسی شہرو ویݰکی بوغاک بسی نیشاؤ بینیان یا شہرار گیاؤ ہیرا یو خومی اندرینی بنیان۔ میٹرو ٹرینو اسٹیشن دی ہے گوݯہ تن جو قدمہ شیر مگر ہیس چالو نوما بوئے ہیہ سال اگست مسی افتتاح شیر رینیان۔ بس اسٹاپ ریلوے اسٹیشنو بیلہ تان۔ اسٹیشنو ختان تان نو نسین خور ختان دی نوغ۔ اسٹیشنو نیݰیاری لوڑیکو تان اندرینی خور کیہ معاملہ بوئے رے ساران، واقعی ہݰ دی۔ ہیس نوغ اسٹیشن مگر بینیان ہیراری نوغ اوچے پرانو کھاڑ قسمو ریل۔ ہے اسٹیشن اوچے پرانو اسٹیشنو موژی ہݰ تان فرق کیچہ کی نوغ اوچے پرانو آستانو موژی۔ بلڈنگ ہتو دی بو لوٹ مگر ڈیزائن اوروسو وختو۔ ہسے تروئے بیشیر سال پرانو بیرائے ہمو جوش سال دی نو بی شیر۔ نوغ دورو مطابقہ ڈیزائن کوری شیر۔ دنیا بو امبوخ ملکان ایئر پورٹان سار دی جدید وا ہر سہولتہ مڑاغ۔ ہیراری ملکو اندرینی لوٹ شہران تے وا ملکار نیݰیوتے دی ریل بینیان۔ قزاقستانو سفان سار جدید اسٹیشن۔

زندگیو تمام سہولتن ہے اسٹیشنو اندرینی دیتی اسونی۔ بیشیر قسمو کیفے تان شینی۔ ژیبیک پیکو ہر معاملہ برابر۔ درونگار ہال باک رویان بچے پوریکو ہوٹل دی ملاو بوئے مگر لاونج تن ہانی ݰئیلی وا پرسکون ساؤزے شیر کی پوریکو بچے ہوٹل گنیکو ضرورت دی شاید نو۔
اوا اسٹیشنو اندرینی گیتی لوڑی ہوس بیرو بیراتام ۔ ہنیہ لوڑیتام کی ریل راہی بیکو تے جوش منٹ بہچی شیر۔ تیزے پلیٹ فارمو مݰکی ہتیرا توریتام۔ فکس ٹیمہ ریل راہی اریر۔ جوش اوشٹ گھنٹہ ہیا شمکنتہ تارور۔ ہتیعار چھوچھین ازبکستانی بیم۔

ازبکستانی بیکو بچے قازقستانو کیہ دی شہرا کی ریلی نیشین ہوئے آخری بیر قزاقستانو شِمکنت رے شہرا تان۔ شمکنتار کارہ ، بسہ وا ریلہ نیشی ازبکستانی بین بوئے۔ شمکنتار پھار بوغاوا کارہ بیکو وخت کم لیگوران، ریل تروئے گھنٹہ اوچے پھت کوسی سَریا گاش رے ای لوٹ دیہہ بیران۔ وا ہیغار ایمیگریشن بیکار اچی تھے ازبکستانہ داخل بین بویاں۔ قزاقستانو علاقہ پاکستانو سار چھور گنا زیادہ لوٹ، آبادی بو کم۔ پورا مُلکہ جو کروڑ روئے دی نکی۔ عذاب ہݰ کی ہے قافہ روئے دی کا مشرقہ آباد کا مغربہ، کا شمالہ کا جنوبا۔ ژاغہ میدان بیکین ایغو نسہ توریکو بچے جم وا ارزان ذریعہ ریل۔ ہتیعین قزاقستان ریلا مڑاغ۔ پیستے لو دیتی اسیتام دی مہ خیالہ ریل دی جو قسمہ شینی ای نوغ ای پرانو۔

نوغان تے تالگو ٹرین رینیان، ہمیت تیز وا ہر حوالہ نوغ۔ پرانانتے لوکل ٹرین رینی ہمیت اوروسو زمانو۔ ہمیت تالگوان مقابلہ آرامہ کاسینی څیق لوٹ ہر اسٹیشنہ روپھونی۔ لکہ ہش جوݰور کی ہمیت بونیار ریشنو بوغاوا چت پھار کوشٹا بی اچی یی چرون اوریرا دی توری تھے اف بینی۔ چرون اوچے کوراغا خسوخس زیئتہ دی روپھیک تھے بوختو ٹیکہ لکھی شیر۔ کوس خفا نو کونی، غُوز کاسینی کم کرایا گنینی، غریبو تے واہڅ۔ کم پیسہ گنی دی راہی مقررہ وختہ کونی ہر ژاغہ مقررہ وختہ تارونی ریل صاف ستھرا وا پرسکون۔

تالگو نوغ وا جدید ریل۔ ہمیت کاسینی دی تیز وا اسٹیشینن روپھونی دی کم وخت۔ بلکہ صرف لوٹ اسٹیشنن چت روپھونیان۔ ہیہ ریلی جو نفریان موژا کمرہ دی شینی چھوردی وا غیژی نفریو دی۔ وا کمرار علاوہ خالی سیٹ دی شینی بسان غون۔ ہیرا نیشی بین دی بوئے ہو کرایہ کم۔ نیوف جوش گھنٹو بچے ہیت بو جم کھولاؤ سیٹ بے غش نیشین بویان۔ اوا شمکنتار پھار ریلہ کی باتم ہݰ سیٹ گنی بیم ہسے ݰوئے ژاغہ ہیا پھوک دودیری وا چھویو سفر اوشوئے ہتعین پوریکو بݰ سیٹ گنی اسوم موژو دیاؤ پھوک ٹوک بین بوئے رے۔ ہائی نیسیکو سم نوغ څدار ورازنی وغیرہ دونیان۔ ریلی اوݰک پیݯ اوغ شیر تانتے چائے کافی ساؤزے پیکو بوس۔ صفا واش روم، مناسب رسٹورنٹ ریلو اندرینی شینی۔ یعنی پیک ژیبیکو معاملہ بلکل برابر۔

قزاقستانہ ہر شہرا بلکہ تقریبا ہر لوٹ دیہا دی ریل توری شینی۔ مگم عام کی لو پھریتم ہیہ ریلو تروئے لوٹ وا مصروف رہ شینی۔ ہیتن موژی جو رہ قدیمو سلک روڈان قسمہ رو ساؤز بیتی شینی۔ اولو رہ یی ناسو گویان۔ مشرقی ویݰکیار یعنی روسو سائیبریا و علاقار قازقستانہ داخل باک ہے راہین گوئے۔ چایئنار گیتی دی ہیا راہہ دین بویان۔ ہمو1930 عیسویا روس ساؤزیرو بیرائے۔ Turksibہمو نام۔ یعنی ترکستان سایئبریا روٹ۔ ترکستان قزاقستانومغربی حصہ۔ بو تاریخی ژاغہ۔

شِمکنت ترکستانار پھوک رو مشرقو ویݰکی گیتی ای لوٹ شہر۔ ہیہ راہو تے ہاتے قدیمی شمالی سِلک روڈو ای نوغ شکل ریکو بوسی۔ لکہ ہݰ جوشور کی ہیہ رہ قازقستانو مشرقو ویݰکی ایہہ ورازا شروع بیتی پونگہ بی الماتی رے شہرا توری ہے پونگین پھار بی جنوب مغربہ شِمکنتہ بی ہیغار ازبکستانو دارولخلافہ تاشقندا تاروران۔ قدیم ہتے سِلک روڈ دی ہموݰ تن بیرائے بس فرق ہݰ بیرائے کی ہسے اولہ شِمکنتہ بی چوکتو بی روسو موژین پھار نیسی یوکرین موژی یوروپو مشرقی حصو سم توراؤاستائے۔ مگر اچہ رو ہے شِمکنتہ موڑو بی تاشقندا بی ہتیعار اف بی ثمرقند وا بُخارو موژین بوغاک کیہ مرکزی راہ کی اوشوئے ہتیرا دی تورا ؤاستائے۔ عام طورا سلک رہ کی رینیان ہتیت ہے مرکزی راہو لوؤ دونیان۔ قدیمو ہے سِلک رہ کاروبارو بچے ساؤز بیتی اوشونی، موجودہ ہیہ ریلان راہو اورُوس تن حکومتو وختہ ہے شِمکنتی وا ازبکستانی فصل خاص کوری کپاس ()کیݰی ہاتیتان پوشی لیرو غون کوری تانتے الیکو بچے ساؤزیرو بیرائے۔

مسئلہ ہیا دی سِلکو تن بیرائے۔ ازبکستانو تے ہتے وختہ "کپاسو ریاست" راوا بیرانی۔ ہیرا کیݰیرو کپاسان شِمکنتہ انگیتی ہیا شیروان سم کوری تن کارخانہ زاپ ساؤزے ریلہ دیتی اوروس تانتے الاوا بیرائے۔ یعنی راہان یا ریلان ساؤزیکہ ہوست سلکو تن شیرائے۔

ای رہ پھار نسو یعنی مغربو ویݰکی اروسار یو گویاں۔ قازقستانو پھار نسو تروئے صوبان "اکتُوبے"، "قَزَل اوردا" وا "تُرکستان" و موژو یو نیسی گویان۔ ہے نسو درے گیتی ازبکستانی بوغاکاان لوٹ بیچان دی شِمکنت ۔ یعنی قازقستانو پھار نسو درے گین ہوئے یا یی نسو یا مہ غون موژو درے شِمکنتہ نو بی ریل ازبکستانی بیکو کیہ لو تن نکی۔ ہین مغربو ویݰکی پھار آخری کونو ای خور رہ شک بیرائے ہسے دی ازبکستانی نیساک بیرائے۔ قزاقستانو ہے ریجنو نام منگیستاؤ وا ہیس ازبکستانو ای خود مختار ریجن "کراکل پاکستان" و سم ملاو بویان۔ نیوشیکا Karakalpakistan بویان رینیان ہو قراقالپاقستان۔ مگر بو کم ریل ہو بوغاک بیانی وا کیہ بو معروف رہ نو بیرائے ہیس۔

روسار قزاقستانو موژو درے کی گین ہوئے لوٹ پڑاؤ قزاقستانو دارلخلافہ آستانہ۔ ہیا جوؤ لوٹ وا مصروف راہ۔ روسو مشہور شہر پِیٹرسبرگ وا روسو دارلخلافہ ماسکواری ریل ہیہ راہو کوسی آستانو تے گونی۔ ہموغار تھے خور ژاغان تے بینی۔ ہیہ ہے روڈو سار بیشیر سال اچہ ساؤزے شک بیرائے۔ آستانہ ریلی نیشی شمال مغربو ویݰکی تھروسکی کی باؤ جو بسہ روسو دارالخلافہ ماسکوا تورین بویان وا ہیہ آستانار جنوبو ویݰکی بی کرغزستان، ازبکستان وا ترکمانستانی بین بوئے۔ ہیہ راہ جنوبو ویݰکی گیتی شُو رے ای ژاغہ بیران۔ ہتیرا مشرقو ویݰکیار گیاک Turksib رہ الماتیہ گیتی فروسکی ویݰکی چھیتی ہے شُوا گویان۔ یعنی شُو رے ہے اسٹیشنہ مشرقی راہ اوچے مرکزو موژو گیاک راہ اییہ تارونیان۔ ۔

اوا تالگو ریلی نیشی موژو گیاک ہیہ راہو بیمان۔ ہیہ راہہ شُوا توریکار پروشٹی تروئے لوٹ اسٹیشن شینی۔ کراگنڈہ، ژانارکا وا سَریہ شارغن۔ تالگو لوٹ اسٹیشنہ روپھوئے ہر اسٹیشنہ نو۔ جو اسٹیشینن سورین نیسائے ہیہ اچتو کراگنڈہ گیلیک۔ شاپیرو لوؤ دیکو گوئے راردو۔ کراگنڈہ ریکو سم ریلو رفتار کم ہوئے۔ پسہ دی تن رفتارو کم کورور اوا دی موقعاری فائدہ اوسنے ݯت گوݯو خومی اسٹیشنو ویڈیو ساوزے انسٹاگرامو تے اہیہ نئیم۔ ریل کی اچی راہی اریر کوشش کوری ہے ہائی نو بی پسہ گنی ازبکستانی بیم۔

پیش کش: #مئیرݯھترار

شیرخانو آزادی (آخری قسط)
نیویشاک: مستنصر حسین

بریژایو ژوربسو موشو بو لوٹ ذمہ داری درازے اسیتائے۔ ہے لوؤ دیکو دی ہیس تان سار شاراو اوشوئے، کوریکو گمبوری خان میکی اوچے شاپیر خانو کیہ ردِعمل بوئے رے ہوت جم اندازہ اوشوئے۔ ہنیسین ہر ای سیکنڈ ملکھونو زندگیو بچین اہم اوشوئے۔ ملکھون نا امیدیوتے تھان دیتی تان پیغامو دورہ تارے پھوک محکم بیتی اسیتائےمگر ہوت ہے تکلیفیار نیسیک ناممکن ساراو اوشوئے۔

ملکھونو گومیت نست ہے لو و تان بوک(ژور بسو) سوم پرائے، ہیس تان ملکھونو سوم رابطو مسلسل کوششہ اسیتائے مگر ہے حالتہ بوئے رے گمان نوکوراو اوشوئے۔ ژور بس دی آسمنار لشٹہ پرائے۔ آخر فیصلہ ہݰ ارینی کی ایگان کوری دورو کولانان سوم موش لو دوئے وا عورتانان سوم بوک۔

ہے انوس چھاغو دیکوت تان ژور بس نانو، درزی کائیو ، شک کائیگنیان وا مرگستو(روژایو) سوم دی ٹیلیفونہ لو پرائے۔ ہیت سف ملکھونو حالاتو بارا کار کوری غمزدہ وا ہتو ہیتغار نیزی انگیکو بچین امادہ ہونی۔ مسٔلہ کولانان اوشوئے، شاپیر خانو ژانہ کیاغ اوشوئے کیہ خبر مگر "کیہ چارہ، ہیس تو جزا، پیچ پونگین روپھی بی آستائے" ریتائے۔ گمبوری خان میکیو و نسہ جو بس لو اژین تان نو ہوئے، تروئیو انوس جمار پھوک لو و شروغ کوریکو سوم تان، اشپاشور آسمانہ چوکیتائے۔ نہ لو و پورہ کار اریر بس شروغ ہوئے، جمارو دی آپکی پیستائے، ہیہ دوروت کی ہائے اوا ہوتو ماریم ریتائے۔ گمبوری خان میکیوت ہیہ لو و دی واضح کورین نو ہوئے کی ملکھون دوروت کھیو گویان، ہتیغار نیزی انگیلیک رے۔
بوت بیکو شاپیر خانو نان شاپیر خانو تاتوت پکہ کاردو بیرائے، چھوچی بیکو جماروت نیسائے۔ سخت جنجال کوری جماروت "تو بیش نفری مہ دورو موژی لو نو دیت" ریکو جمار پیڅھی تان دوروت بغائے۔

دورو حالت ہنیسن پروشٹو سار دی ویشیراو ہوئے، سفان فروخ 12 بجہ، لو کیاغ ریکو دورو عورتان خور کیاغ مشکینیان وا کولانو خور کیاغ۔
ہش بیتی شاپیر خانوت ہتو بوکو دی تھامامو کال ہانی ،پھوک نان توسوم دیمیتائے، شاپیر خان عورتانان ڈالہ ہائے۔ شاپیر خان بی گومیتو خیشے آلائے۔ ݯھوئے بس پورہ ہونی گمبوری خان میکیو کیہ پستیکو راہ نو ہوئے۔آخری چھویو سف سفو بیتی گمبوری خان میکیوت اݰقالی کوریکو ہیس راضی ہوئے، مگر شرط ہݰ کی ملکھونو نیزی دوروت نو انگیتی ہاسٹلہ پچھین بوئے۔
چھوچین شپیر خان دی دفتروت نو بائے سف دوری نیشی ملکھونو کالوت انتظار کوراو اوشونی، ہݰ بیتی پیشین بیکو ملکھون کال اریر۔ شاپیر خان تان توسوم لوا چوکی تو دلاسہ دیتی تہ اچی انگوسی ریتائے، ملکھونو پتو، تو موشو موبائیل نمبر وا خور مغلوماتان دی گنیتانی۔ مگر تاتو شرطو لو و ہتوت نو پرانی۔
ملکھون سفان نمبرن نیویشی گنتائے وا کالو بند ارینی۔ شاپیر خان تان گومیتو گنی ای رشتہ دار پولیس افسرو نسہ بائے، وا ہتو ہدایتہ شہرہ بی دیہو ای وکیلو پوشیتانی وا قانونی راہو اختیار ارینی ۔

تھمامو وقت پھار بائے، عدالتی کاروائی دی ہونی تھے ملکھونو ججو پروشٹہ بیانوت مشکیتانی۔ملکھونو موش دورا تان تھویکو ہاتو پازہ تارے نگاہ کی طلاق مشکیمان ریتاو تہ ماریم رے،کیہ لوان کی دیلیک ہتو چیچھے گنی عدالتہ ہائی۔
ہیغار نست پیشیہ دی ملکھونو موش شاپیر خانو دھمکی دیتی اسیتائے"ملکھونو کی الیک مشکمیان ہو لاشو پست دوم تازہ الیکو نو بومی "رے، ہے انوس دی شاپیر خانوت ہے لو و تان دیتی عدالتوت ایہ بغائے۔

ملکھون ہے زیدانار آزادیو فیصلو کوری استائے، بہتی یا تازہ ہو ہے موشو سار نیسلیک اوشوئ۔ ججو پروشٹہ ہے ڈاقو تمام دھوکہ وا دھمکیان لوان واضح پرائے۔ جج حالتو ہوش اریر فوری ہو آزاد کوری دوروت آلیکو حکمو پرائے۔ ملکھونو موش قہرو موژی ہے ہائی پرائی، ملکھونو ماریکو دھمکیو پرائے۔ جج ہو 2 ہفتہ پولیس تحویلہ لکیھکو حکمو پرائے۔
عدالت برخواست ہوئی، ملکھونو موش ہیرہ پیڑینگی اریر "اوا ای نو ای انوس ملکھونو لاشو پیسہ دورہ تاریم " رے شوت چھوئیکو، پولوساں رکھیشی ہو گیٹہ پچھان ارینی۔

ہیہ حالتو پوشی گمبوری خان میکی دی تان شرطو روخسیتائے، سف ای بیتی دورو ویشکی بغانی ۔ ہنیسن دور دی ملکھونوت تنگ بیتی اوشوئے، ہو موش ہو کیانی کوئی رے دورو روئے ہو ہاسٹلوت نو ویشیکو پکا فیصلو ارینی، دیہو رویان سار شاری دورار بیری نو نسیر، وا دوری گیاکان موڑار کمرائی بند حال بوئی۔
سالوت ہائےملکھونو ہیہ روٹینار نیکو کیہ ذریعہ غیچی نو ہائے۔
خدایو مہربانی ملکھونو بیریو ملکوت ویزہ نیستائے، تنخواہ دی جم ہال بیکو ژاغہ، جہازو ٹکٹ اچی ہوسوم 2 خور ہو ملگیری کموران ، دورو روئے دی محکم ہونی ملکھونو ہیا روٹین کیہ بدل بویا رے، ملکھونو موخہ دی پھوک ژینگی ہائے۔ تھے ہے انوس دی ہائی ،نان اوچو تات جوست بیتی ملکھونو ایر پورٹہ التی پرویزی ہانی۔ ہے انوس گمبوری خان میکیو دوری پرانو خوشانی اچی گیک شروغ ارینی۔

لش بیتی ملکھونو پونگ دی نوغ ژاغہ چوکیتانی، دپادپ دورت پیسہ انزیکہ پرائے، گمبوری خان میکیو شانہ گاڑی، عالیشان دور، ژور بسوت دی شاپیر خان دور تیار اریر ،پیسہ ملکھون انزیکو۔ تھے اللہ شاپیر خانوت اولاد دی پرائے ہو بوک (مرگست )دی ہش بیتی پکہ نوکری گنی شاپیر خانو دفترو گوچہ ڈیوٹی شروغ اریر، وا اژیلیو دی ای بیتی خیالو لکیھکا پرانی۔ شاپیر خانو نان دونان نوغ چاکے کی ہاسیر چھیر اولیر، ملکھون زاق کائیو پیسان دی توت پرائے، گمبوری خان میکیو واسکٹو اوچو کوٹو رنگان ہنیسن اشمارے کورا تاریکو بش نو ہونی، دیہا کا دی کی لحاز بوئے یا کیہ ہش معاملہ بوئی ملکھون ہتو دی خیالہ بیتی پیسہ انزیر۔

ملکھون ہنیسن دورو گل گلزار غیریتائے وہ دیہا دی ہر مجبوردارو تات اوچو نان غیریتائے،
مگر تان ژانو دشمان ساوز بیتی آستائے۔ ملکھونو پروشٹہ کیہ وخت کی پھار شوخسی اوشوئے ہیس ہو زندگیو خالو ہمیشو بچین نیگونو کوری اوشوئے، ہو زندگیو ہنیسن اولانو ترجیح وخت پھار شخڅیک اوشوئے۔ نا چھویو اورارو نا انوسو سکون، ناچار ملکھون پھوک ہردیو خور کوم رے نیشو دنیا قدم لکھیتائے، پھوک بیتی پھوک بیتی ہو طلب زیادہ ہوئے، ہس ہو استعمالو ذیادیتائے آخر ای وخت ہاش ہائے کی ملکھونوت ہوموشو ژیرہ چاکیرو اشروان ژاغو نشہ گنیتائے۔

ملکھونو 3 سال بیتی اوشوئے دوروت دی نو گیتی، ہو جو وجہ اوشونی، ای وجہ ملکھون راو اوشوئےکی دورو رویانتین پتہ کی ہوئے ہتیتان ہردی شینیر، جو و وجہ ملکھونوت ڈاکٹران جواب دیتی استانی، ہیس دوناو اوشوئے دورہ بی چھٹی تیرے گیاوا ہسپتالی کوریلیک بوئے، کی ہوئے مہ اچی یی گیکو نو لاکونی ہے پیسہ اوچے گاڑی زمینان سوم بیتی مہ علاجوت نو بونی، دورو روئے اچی غریب بونی۔

تان خوشانیان سار اشتروخیرو ملکھون دورو رویان بچین تان ژانو سورا انگیتی دوروت گیک نو مشکاو اوشوئے، آخری سال ملکھونو کال دی کم ہونی پیسہ انزیک دی کم ہونی، ہیس ذیاد ڈیوٹیوت دی بیکو نو بیتی بے خودہ بیتی پوراو اوشوئے۔
ملکھونو نازک قالیپوت آخیر ژار باڑیتائے وا ای انوس ملکھون ہمیشو بچین تان نازک غیچھان یو نیشیتائے۔ دیہا کوری خبر پرانی وا گمبوری خان میکیو دوری ہے ݰا خبرو گنی دیہو کولانو ہانی۔
ملکھونو لاش ٹھیک 3 بسہ دورا تورتائے مگر ہو ہتے سابقہ موشو ہوستین نو بلکہ ہوت ویزہ دیرو کمپنی ہو ݰیلی کوری ہو آخری رسوماتان ادا اریر۔ ملکھونو تمام غیارمار گنی زپان سوم کوری ہیلتھ انشورنسو مدا بو امبوخ پیسان دی کمپنیو اہلکار انگیتی ملکھونو دورو رویانتے حوالہ ارینی۔ ملکھونو عمرو مقابلہ ہو یادو ووری ہو دورو رویان وا شوئے بیروان ژانو پالیکو بچین غیر فانی بیرائے۔

ملکھون نازک اشناری نو بہچور اوشک ژاغا
ملکھون مشکیر نازک ہوا
...... پسہ کوستے کی ہیا کہانی شاپیر خانو کم ملکھونو ذیاد سریران پسہ ملکھونو ہے موشو کردارو ٹیکہ دی غور کوریلیک بوئے، کو ریکو ہیہ کہانیہ اصل شاپیر دی ہیس اسور وا آزاد دی۔

نوٹ: (ہیہ کہانیو تمام کردار وا واقعات خیالی شینی، کیہ کردار یا واقعہ کوس حقیقی زندگیو سم کی ناگہان دی ہم آہنگ بیتی شیر ہیس اتفاقی بوئے)

پیش کش: #مئیرݯھترار

ݯھترارو میاں میٹھو برادری
فرید احمد رضا
میاں میٹھو برادری، ہیہ ہتے مکس نیاب جنریشن کی ہمیتان موژا ایکسار گنی زیا پت سف شامل اسونی۔ہیہ برادریو ای خوبی ہسے ہیہ کی ہیہ رنگ و نسل زبان ، وا ملک مذہب وا فرقہ مختلف بیکو سوم جوستہ دنیو ہر گوݯہ موجود اسور۔ہیہ نیاب نسلو کوروم صرف ای ، ہسے ہیہ کی ہمیت صاحب بہادرو ہر کورمو،ہر ای سرگرمیو بچین مثبت جواز پیدا کونی۔سرگرمی صحیح یا غلط ہے سوم ہیہ برادریو کیہ تعلق نیکی۔ہمیتان ڈیوٹی صاحب بہادرو ہر ای سرگرمیو بچین مثبت جواز پیدا کوریک۔
میٹھو برادری، صاحب بہادرو ہر ای حرکتو تین وال، ہیس کیہ حرکت کی اریر،ہسے ،کیچہ وا کیہ قسمہ کی اریر ہسےصحیح۔ ہیہ فیملیو ہر ای ممبر ہیہ انتظارا اسور کی کیہ وت صاحب بہادر ،تھرینݯکور ،وا ہے حرکتو بچین مثبت جواز پیدا کوری ہتو تصویر گنی فیس بکہ دیتی ۱۰۵ لائک حاصل کوری صاحبوتین رپورٹ دونی ۔
ہیہ برادریو ہر ای نفریو ہیہ ارمان وا خواہش دی کی صاحب بہادر تان ہوشو ہواسہ اسیکہ رویان پروشٹہ اشارہ کوری ہو تان نسہ کی مݰکیر وا ہیس گیتی سورو پست کوری فروخو ہو کارو گوݯہ انگیتی ہو لوؤ کارکوئے ، ہیس ہو کارا کیہ لو دوئے، چاہے ہے لوؤ بیری بی مینوانتین پکوڑا انگیکو بارا کو نو بویان۔ کیہ وت کیہ وت ہیت ہیہ آرمانو دی کونی کی ،نازور کی ݯھوم ہوسی ہیتان موختو لاڑیر،وا ہے وختہ ہیس کوس ݯاکے تصویر نیزیر ،وا ہے نقشہ ہو اڈیا ہتے وختہ پت بہچور کلہ پت کی ہیس ہوسار توری افسر و سوم تصویر نو نیر یا ہے افسر تان ژاغاری بدل نوبوئے۔
میٹھو برادریو اراکین تان سورو ہمیشہ صاحب بہادروتین ݰوئے پاشیکو کوششہ بونی ۔ بعض وختان سورا ہیت عوامو پاشیکو بچین نماکین حرکت دی کونی۔ ای انوس ہے برادریو ای نفری پونین فونو کارا دیتی کوسوم لودیاؤ بوغاوا بیرائے، پونا کا ہو روئیتو دیتی بشاروال کوریکو، صاحب کالا اسور رے ہوستین اشارہ کاردو، ہے موژی ہو فونا الارام بوشیرو ، ہیس چنگی فونو کارا دیتی صاحب کالا اسور رے تان سورو مصروف پاشیے رویان متاثر کواراوا بیرائے۔
میٹھو برادریو ممبرانان حرکت ہتے وختہ ہوسیکو بݰ بوئے کیہ وت کی پرانو بدل بیتی نوغ صاحب بہادر علاقوتین گیکو بچین پونہ کی پرائے، ہیت تان سورو زار سما کونی ،تتین ہݰ ساریر کی صاحب بہادر افار نو بلکہ ہیتان موژار لوڑی کوس گنینیان لا ۔ ہے انوس ہیت ایوال ایوالیو دیش دی پاشینی، کوریکو کی صاحب بہادرو سوم اولانو ملاقات وا ہوسوم ݰوئے روپھی تصویرو سورا ہیتان مستقبلو کارکردگیو انحصار بوئے۔
عموماً ہیت صاحب بہادرو کردارو اوچے دیانتو ہموݰ لاڑینی کی صاحب افسی اسیکہ چائے ہوتین انگیکو ہیس چایو تان ہوستین ایھ گنیتائے، اوغو تان گلاسو دریتائے، سلام کوریکو ہتو سلامو کیچہ گنیتائے,پونہ موشوتین تان سلام اریر،گاڑیار یوخوماوا دواہتو تان ہوریتائے، وغیرہ وغیرہ ، صاحب بہادر کو س سلامو کی گنیتائے دی وا نو کی گنیتائے دی ہیتان ہے بچین مثبت جواز تیار شیر۔ صاحب بہادر افسی اسیکہ کوس سلامو کی نوگنیتائے ،ہو جواز ہݰ کی ہیس ہانی مصروف ہو بریکو غوش نیکی۔ سلامو جوابو کی پرائے، ہو جواز ہݰ بوئے، ہیس ہانی پستہ وازیغ کی ہر گیرو نفریو سلامو تان اپاکین گنیران وا کوس ہوبچین سلامو جوابو دیکو ضرورت نو پاریران ۔
میان میٹھو افسی اوتیکو کی صاحب بہادر کروئے کوٹ کی انجی اسیتائے، ہے کروئے کوٹ انجیک ذوقو اوچے عقل مین بیکو نݰانی ، ݰا کوٹ کی انجی اسیتائے ہو عوامو سوم محبت، څہچ کوٹ کی انجی اسیتائے فرض شناس بیکو االغرض ہیس کندوری رنگہ زاپ کی انجیتائے ہوشیارو اوچے عقل مینیو جواز ہیتان سوم تیار شینی ۔القیاس ای انوس ای میاں میٹھو صاحب بہادرو کمرائی اوتیکو صاحب بہادر واش اسیتائے، ہتوتین دی مثبت جواز پیدا کوری صاحبو ہموݰ ریئے خوشان کاردو کی ،فرض شناس افسر روئے نو اسیکہ واش رومی بی تان وختو بچت کوئے ، وا ہے سوم ہیہ لوؤ دی بیݰیرو کی ہموݰ خیال لاکھاک وا فرض شناس افسرو ملکو ترقیہ بو اہم کردار بیلیک۔
ہیہ قسمہ میاں میٹھو برادریو ہر ای ممبرو الک سٹائل وا الک انداز، وا ہیتان ہر لوصاحب بہادرو تانتین ݰوئے پاشیکو بچین شیر وا بیان دی ہݰ کونی کی ہیتان صاحب بہادرو سوم نیشیک روپھیک ہیتان نو ہتو ضرورت وا خواہش ۔
میٹھو برادری صاحب بہاردرو جو صفاتان ضرور بیان کونی ای سادگی وا جوؤ ہیتان اسلامو سوم محبت۔مثالو طور ا ہیہ فیملیو ای ممبر صاحب بہادرو سادگیو ہیہ لوؤ بو فخرو سورا پرائے کی اسپہ پونہ ہوٹلہ چائے ای قسمہ پیالو پیتام ، وا ہیغار دی اپاک شیرین میاں میٹھو برادریو ای سنئیر اہم رکن ہموݰ دی ریتائے کی اسپہ صاحب بہادرو سوم بیتی دوروتین بوغاوا ڈرائیور اوچے صاحبو کھاڑان اشپیرو زاپ انجی اوشونی،ہیس ہانی سادہ طبیعتو موش۔
ہموݰ ہموݰ قیمتی وا قومو مفادو لوان ہیت میڈیا انگیتی ہیتاتین "فخر۔۔۔۔۔۔۔ے چھترار" لقبو دیکو دی تماہ گار بونی وا ہیہ لو دی غور کوریکو بݰ کی ہموݰ القاباتان سورا ہے" قابل فخر روئے "خوشان دی بونی وا ہیت ہیتان قدرو اوچے عزتو دی ہݰتان کونی کیہ قسمہ میاں میٹھو برداریو اہل کار ہیتان کونیان۔
ہنیسے ہے برادریو اہیمتو ہوݰ کوری ہر ای ڈیپارٹمنٹو صاحب بہادر، تان ڈیپارٹمنٹو اندرینی تانتین میاں میٹھو دوسی اسونی ،کی ہیت ہیتان ہر ای حرکتو اوچے سرگرمیو ریکارڈ کوری عام رویان پروشٹہ انگونیان ۔مگم لوٹ لو ہیہ کی ہیہ سورا میاں میٹھو برادریو اہمیت وا دی کم نوبیتی شیر واہیتان اہمیت اوچے عزت پروشٹوغونہ تان برقرار شیر۔
ہیہ قسمہ زمانو ضرورتو پروشٹہ لکھی ہر ای صاحب بہادرو تان تان میاں میٹھو اسور وا ہے میاں میٹھوؤ اولین ذمہ داری ہیہ کی ہیس صاحب بہادرو ہر ای کورموتین مثبت جواز پیدا کوئے ، وا ہو سف صاحب بہادرانان سار نیک وا باکردار پاشیر۔
میاں میٹھو برادریو ممبران ہتے وختہ پت تان ذمہ داریو انجام دونی کلا پت کی صاحب بہادر بدل بیتی راؤلیاری بیری نونیسیر ۔ کیہ وت کی ہیس ہے ٹنلاری اف نیستائے ہے وختہ ہمیت آزاد ۔دی ہنیسے ہمیت ہمی لوان دی دونی کی ہیس گیاوا کیچہ بیتی گیتی اسیتائے وا بوغاوا کیچہ بیتی باغائے۔ہے وختہ ہمیت مختلف پراجیکٹان صورتہ حالو سورا دی لب کشائی کونی۔ کیہ وت کیہ وت بو جذباتی بیتی ہو جیپھو قائی بیتی بیکو بارا دی تان رایو اظہارو کونی ۔ ہے سوم جوستہ نوغ صاحب بہادرو سوم ہیتان ڈیوٹی لیگور وا ہر ای جم صفات ہے نوغ صاحبو موژا پیدا کوریک ہو اولین فرضی منصبی ساوزبوئے۔ہیہ قسمہ میاں میٹھو برادریو علاقو بچین قومی وا اخلاقی خدمات جاری و ساری بہچونی ۔
پیش کش: #مئیرݯھترار

کھوار سفر نامہ: قزاقستانار گنی ازبکستانہ پت
اولو پڑاو: آستانہ اوچے نورلی ژو
نیویشاک: نور شمس الدین

قزاقستانو دارلخلافہ آستانہ بسی نیشی اسوم۔ نورلی ژولوتے بیمان۔ نورلی ژول ریلو اسٹیشنو نام۔ آستانہ ریلو جو اسٹیشن شینی۔ پرانو اسٹیشنوتے آستانہ ون رینیان نوغوتے نورلی ژول یا آستانہ ٹو۔
آستانہ ریل دی جُو قسمہ شینی ای نوغ ای پرانو۔ آستانہ تان دی ہݰ، نوغ اوچے پرانو جُو حصہ شینی۔ بو ݰئیلی شہر موژو سین بیران۔ سینو نام دریائے ایشم مگم ہیہ ژاغو روئے ہوتے یاسیلو سین دی رینیان۔

سینو فروسکی ویݰکی پرانو آستانہ کھوڑی ویݰکی نوغ ۔ مگر ہیا نوغ اوچے پرانو رے آستانہ نامے سینو ہوتے بونڈری کوریک بوختہ لکیر نو۔ بو ژاغہ ہیت ایغو موژی نیسی قڑینجہ مینجی دی بیتی شینی۔ خاص کوری نوغ آستانہ سینہ پھار نیسی پرانو آستانو نسین پیڅھیرو ژاغان سورا دی قبضہ کوری اسور۔ وا ہݰ دی کی فروسکی ویݰکی یعنی پرانو آستانو دی سینو نستو ورازار پونگا نوغ آستانو غون کوری اسونی۔ ہین سینار پھوک دودیری کی بغاؤ پرانو آستانہ واقعی پرانو رے ہوݰ کورین بویان۔

آستانو موژو بوغک ہیہ سین قازقستانو ای لوٹ شہر گراگنڈہ و نسہ کورا شروع بیتی یو گیتی موژو اف نیسی روسہ بی دریائے ارتشہ دویان۔ ارتش دریا چینہ شروع بیتی آستاناری مشرقو ویݰکی سیمی اوچے پاولدار نامین قازقستانو جو مشہور شہران موژو درے تھے ایہہ بی اُروسہ داخل بویان۔

قازقستانہ تمامو شہران ہݰ پوشیتم دریا شہرو موژو بیران۔ خاص کوری سیمی اوچے آستانو تھے برابر موژو تن۔ آستانو موژو بوغک ایشمو سین شمالو ویݰکی بی سیمی اوچے پاولدارو موژو درے روسا گیرو ارتشو سینو سوم جوست بویان۔ ہے ارتش اچی خور کیہ دریاہو سم جوست بیتی ایہہ بی بحر منجمد شمالیہ بیران۔ اوغ ݯوکتو بوغدؤ غون ساران۔ ایہہ بی ریکو۔ اسپہ ݯھترارو غون اوغ سف ای ویݰکی نو بینیان۔ ہیہ کیہ سین جنوبہ شروع بیتی شمالو ویݰکی بیران کیاغ شمالہ شروع بیتی جنوبو، کورا مشرقار مغرب وا کورا مغربار مشرقو۔
ملک لوٹ، کورا جنوب ژانگیہ شیرا ریکو، کورا شمال اسمانتو شیر ، کورا مغرب ایہہ پھورا نایور وا کورا مشرق۔ اوغان قصوو درونگار نو کوم نگہہ اباتھہ بوسی۔ اچی گیور بسی تان نیشیسی۔

خائے تھے بس آستانو شہرو موژو بیران۔ نست شہر ژانک بیک جم مہ خیالہ۔ سین آستانو براق موژتو چھینی شیر۔ سینو ای ویݰکی نوغ ای ویݰکی پرانو آستانہ۔ ہیا ۵۱ نمبرو بس سینو کھوڑی ویݰکی نوغ آستانو موژو اف بیران۔ اف موژا بی یو خومی ۵۰ نمبرو بسی کی نیشتم ہیس مہ گنی سیرا پھار نیسی اچی ݯوکتو بی نورلی ژولہ بیر۔

سینو کی تقسیم جوݰیتم نورلی ژول پرانو آستانہ گویان۔ مگر پرانو آستانہ څیق شہر اوشوئے ہیہ پرانو آستانو ورازہ انگیتی بیابان ژاغو جوش سال پروشٹی آباد کوری ساؤزے شیر۔ ہے نسین آبادی دی سف نوغ۔ پرانو ہیش کیاغ ہیرا نکی۔ جو آستانان موژو دریاہو کورا دی بی لوڑیکو بالکل دریاہ نو سریر۔ ژویو غون کوری آسونی ہو۔

نسین ݰئیلی کوسیکو ژاغہ۔ سالہ چھورمس ہیس یوز ݯاکوران۔ اپریل مسو آخرار گنی اگستو آخرا پت ہے موژتو رویان بچے کھشٹی وا درمیانہ سائزو کروز کاسینیان۔ مگر اوغ اوݰک بیکین کورا سینو اوتیکو یا اوسنیکو سسٹم نیکی۔ پاؤلدار اوچے سیمیا ہݰ نظام دی شیر۔ خاص کوری پاولدارو دریا بو ݰئیلی کوری بیچ ساؤزے شینی۔ سمندرا بوغدؤ غون سریران۔ روئے اف بی اوغو کیچئین بیتی ای نیسی شوغورا لاہتونیان۔

آستانہ ہݰ کی لوہتین ہوئے دی بوار بو ای مس ہݰ لوہتین بوئے۔ اوغ اوچے موسم کھاڑ اوݰک بیکین دیتی ہیا اوغو اوتی ای کی نیستاو اوزی بریکو تاب۔

ہے اوݰک سینو ٹیکی درزینار دی زیادہ سیر شینی۔ چھوچو ݯھوئے بجار گنی بوتو جوش بجا پت سرکاری بس پورا شہرو نیسین غیردی بہچونیان۔ مختلف نمبرو بس مختلف راہا کاسینی۔ آستانہ بسہ سفر کوریک بو لوٹ سہولت بلکہ بعض وخت تن گاڑیہ بیکو سار دی بسہ کوسیک جم ساران۔ بس امبوخ کاسینیان ہیتن رہ الگ وخت مقرر عام گاڑی والا بندے انگیتی بسو راہی نو نیسینی۔
عموماً ہݰ پاشیش کی مرسڈیز والا ٹریفکہ بیشیر منٹ پھساؤ اسور ہتے نسو بس انگار نیسی بیران مگر ہیس تن ہے گاڑی بسو روڈی نیزیکو نو بوئے۔ کی نیستائے تن چالن ہو رے موبائلہ نہ صرف میسج گوئے بلکہ جوش منٹ اچہ تہ اکاونٹہ پیسہ چھیتی حکومتو اکاونٹہ بغانی رے دی میسج گوئے۔ عام گاڑیانتے ہے رہ بند صرف ایمبولینس ہے راہو استعمال کونی۔ ملکو دارلخلافہ بیکو باوجودا پولوسانان، فوجیان، بیورکریٹ یا سیاستدانان پروٹوکولو گاڑی ہائی نو پوشی اسوم ہاتیت ہو بینیا نوا کیا خبر۔

بس اسٹاپہ بیکو نیشیکو ژاغہ شیر۔ سف اسٹاپین ختان دی ساؤزے شینی۔ اوݰاکیہ اندرینی روپھی یا نیشی بسو انتظار کوس۔ بسی کیہ کولانو عورتو الگ سیٹ نو۔ ہیں اکابیرانان اوچے اسپیشل رویاں بچے ژاغا شیر۔ موبائلہ بی لوڑیکوتت پتہ بوئے کی کیہ نمبرو بس کیہ ٹیمہ کیہ ژاغہ راہی بوئے وا کیہ ٹیمہ کورا تارور رے۔
ہزار اوچے قسمہ بس شہرو موژی غیردی شینی۔ ڈرایئور شیشو ختانی اسور کیلنڈیر یا کرایہ گانک کا نکی۔ بسی ہیرا ہیا کیوآر کوڈݯاکے شینی۔ روئے ایہہ نیسی کیوآر کوڈ اسکین کوریکو تیتان اکاونٹہ پیسہ چھیتی حکومتو اکاؤنٹہ بیران۔ بو کم کا خاص کوری څیڅیق اوچے اکھابیر بسو کارڈ دی استعمال کونیان۔ کرایہ دیکو دی شاباشی دیاک کا نکی نو دیکو دی بشار کوراک کا نکی مگر اوا ای دفعہ دی کوس کرایہ نو دیکو نو پوشیتم ۔ ایہہ نیسیکو کو سم موبائلو پھار کوری داسینی یا کارڈو ہتے مشینہ دونی۔ بس تو نیسی اف خومیکو کرایہ ۱۱۰ ٹینگا۔ چاہے جو منٹ پونہ بعاؤ یا جو گھنٹہ۔

قازقستانو روپیہ و نام ٹنگا۔ ساٹھ پاکستانی روپیہ دیکو ای شور اوچے جوش ٹینگا بویان۔

آستانہ نامو قولہ نوغ اوچے پرانو۔ نوغ آستانو ہر گنزولو مختلف ڈیزائن و آسمانو سر ݱانگ بلڈنگ، پرانو آستانہ اورسو وختو ہتے پستامبا ختان، نوغ آستانہ کندوی څاکے ژاغہ جدید دور و شاپنگ مالز پرانو آستانو گنزولین څیق څیق دکان۔ نوغ آستانو روڈ فراخ، پون غوسان رہ الگ، سائکلان رہ الگ، بسان رہ الگ۔ پرانو آستانہ ای قسمہ رہ، نوغ آستانو راہان ناسین بلڈنگ پرانو آستانو راہان نسین کانلاوش، نوغ آستانہ شیشہ اوچے سیمنٹ پرانو آستانہ گمبوریو اوچے گھاس، نوغ آستانہ گیاک وختو مݰقری پرانو آستانہ بوغدو زمانو نݰانی۔ مگر نوغ اوچے پرانو آستانہ ہر حسابہ ایعو سار خور دی نو۔ پھاتی اشناری ایعو غون دی مثلا کھاڑ صفا، گندگی ہاتیی دی نو پاشیس ہائیی دی نو۔ انجاروم اوچے پیاروم ہیتن اوچے ہمیتن موژی کیہ خاص فرق نکی۔ کھاڑ تن دنیا مست ہفتہ پونچ بس گوردوغو غون کوروم کونی۔ جو بس مکمل عیاشی۔ خاص کوری ادینو بوتہ څیق سو لوٹو دورا نو تھییونی۔ درونگ چھوئے کوسی ژوتی "پی" پھونی براخ بومتو دیتی ہفتو شام بیکو ہاؤل ہوشہ گونی۔

آستانو لوان دیتی آوا دی آستانہ والان غون ہوشار نیسی دیخ کی نو نورلی ژولو نسین نیسی بیم۔ بس آرامہ گانیتائے۔ پھارو ہیرا نارواہ لوٹ شیشہ بلڈنگ شیر۔ تیرا لیلوٹ کوری نورلی ژول نیویشی شیر۔ ہیہ آستانو ہتے نوغ ریلوے اسٹیشن۔ بشیر منٹ اچہ ہموغاری ای ریل قازقستانو ترویو نمبرا لوٹ شہر شمکنتو تے بیران۔ اوا ہیے ریلی نیشی شیمنکتہ بیم ہتیرا دامہ نے اوہتی انوس ازبکستانی بیمن۔
بس روپھیتائے اوا تن بیکھان بارے اف خامیم۔ پیسہ دی دامہ ناؤر۔ اندرینی بی ریلی کی نیشتم تھے پیساتے اسٹیشن اوچے ریلو قصان کوم۔

پیش کش: #مئیرݯھترار

اشٹوکان اہمیت
نیویشاک: کلثوم رضا

اشٹوک کوریک ذہنی وا جسمانی طورا صحت مند بہچیکو بچے بو ضروری بعض رویان خیال ہیس خالی وختو ضیاع وا بعضو خیال خور کیہ بیکو نو بیتی خالی اشٹوک کونیان۔

اشٹوک کوریکو فائدہ بو شینی، ذہن تیز بوئے، جسم صحت مند بہچور۔۔انسانو موژہ صبر و چے برداشت پیدا بوئے، تان موژی اتفاق پیدا بوئے،وا ہار جیت بیکو ذندگیو حصہ جوشین بوئی۔۔۔
ای مکالہ ای سی ڈی ٹیچر ٹریننگو موژی "گیور کی اچی پھوک بوسی۔۔۔دور کوری اشٹوک کوسی" بشاونو ݯت کار کوریکار اچی تان څیقیہ کاردو اشٹوکھان وا ہتیتان طھریقان بارا کیہ وت کی مشقولگی ہوئے، تھے ہر ہتے اشٹوک کیھو کی اسپہ پھوکیہ کوراوتام، بے فائدہ نو سریتانی۔۔

ہے اشٹوکھان ایگان کوری تان ذہنہ انگیکو ہر اشٹوکھو تنہا فائدہ غیچی ہانی۔۔۔کیچہ کی اسپہ شپیر کیڑی تان کوراوتام ہتیرا ای نان کیڑی باوتائی، ہتے اچتو پونچ،ݯھوئیےاژیلی کیڑی باوتانی وا ای شپیر باوتائے۔۔۔۔ہے نان کیڑی تان اژیلیانتے راوتائی کی پیسہ سف مہ اوان و ڈانگ دوسی لاکور ۔۔۔کوریکی شپیر اسپہ سورا پرائے پیسہ مہ اوانار نے الیکو نو بائے۔۔۔۔تھے ہے اژیلی نانو اوانو ڈانگ دوسی لاکاوتانئ۔۔۔شپیر ہے ویݰکی یا ویݰکی گیاو ویرکھوان سورا حملہ کوروئے وا نان ہے ویݰکی یا وݰکی بوغاو تان اژیلیان ہے شپیرو سار اوشٹوریر۔۔۔۔کیہ اژیلی کی پھوک سستی کوری نانو اوانار نساوتانی شپیر ہتے اژیلیو دوسی الاوتائے۔۔۔پھوکیو زمانہ ہیس ای اشٹوک ساریاؤاتائے ،ہنیسے دونیکو ہے شپیر کیڑی اشٹوکہ تان کندوری حکمت کھوشت بیرانی۔

ای ہہݰ کی نانو اوانو ڈانگ دوسی تو پھوو چھونی کی ہال ہو تہ سورا شوم وخت کی ہائے ہتے نان تہ بچ کوکو بچے ہر مشکلو پروشٹہ ریپھوئے۔

جوؤ حکمت ہیرا ہش شیر کی پروشٹہ گیاک افتو تے لوڑی تان سورو ہے ہائی التی خلاص کوریکو کوشش۔۔۔
ترویو نگہ کی تو تان ہے نانو اوانوو پھار لکیتاو مصیبتو سو دوچھار ہوس۔

کیچہ کی مثالی اسپہ پروشٹہ چھترارو اقدار وروایات وا دینی تعلیمات اوشونی وا اسپہ زورگینی ہے اچتو اسیتانی ۔۔۔تھے چھترار و ہے قدر و روایات ہو پاژالیو کوری شپیرو سار ہو بچ کوراو انگیاوشتانی۔۔۔۔ہنیسے اسپہ زور گینی چھترارو ہے قدران کیہ نو جوݰی کی پھار لکیتانی ہوݰ کو کی شپیر غاری ہونی۔۔۔۔۔
پروشٹی کورا ای لو کارا اوشوئے کی، کیہ وت کی پائے پژال و سار آزادی مݰکیرو برائے سفو سار نست شپیر تو لوو مہقول کاردو برائے۔۔۔۔کوریکو کی وے پژالو پائے زیبیکوتے آسان .

ہنون کی لڑیسیان اسپہ ژورگینی کی اشٹوکھو میدانہ گیتی تان اقداران پیڑنگی دیتی تان سورو آزاد جݰونیان اصلہ ہیت تان ڈیکی تان واژین دونیان۔۔۔ پھوک دونور کی، کاکی پیسہ ہے میدانہ انگیتی پسیتے آزادیو حق شیر رینیان ہیت کاکا تان دورو عورتاننتے ہے آزادیو دیتی اسونی۔۔۔۔۔۔۔پیسہ میدانہ اشٹوکھے نسار نس نیشی ہے واہ واہ کوراک عورتو تے آزادی دیلی ،انگارا ہیت ٹنشن بیتی خود کشی کونیان رے ناقص دلیل دیاک کولانان سار کا ہیہ بشارو کورور کی۔۔۔ہے عورتو دوری دی کیہ چیت شیرا۔۔۔۔میراثہ کیہ حق شیرا۔۔۔ای دفعہ تہ سار نست کورا کہاکو ڈیکو ایہی گنی ژوتی اسورا، یا کورا چھیرو سورارو تتین دیاوا مو مہ کایوتے دیور راسومیہ رے۔

تھے پتہ بوئے کی ہو ہے تہ آزادیو بچے لو دیک تہ حقہ وا کو ہو تان حقہ رے۔
عورتو حق تو میدانہ انگیتی پھتوکی انجاروم انجے اشٹوک کورئیک نو کیہ توتے اختیار رائے دیک،تو ݯکے تو کوریکو بݰ کورمو کورے ہتوتے شاباشی دیک، ہتوتے میراثہ حق دیک،تو اچاہ پروشٹہ تو حفاظتو کوری ہتوتے عزت دیک.... نو کی تو میدانہ اشٹوکھے دنیا اسپوک آخرتہ انگاروتے حوالہ کوس۔

چھترارو تان قدر شینی ہیہ فرقہ فرقہ بیتی ایوال ایوالیو چموٹ پاشے ہے قدرو پھورو تان ہوستار کی الین ہوئے،ہے گراونڈو نسار نس ہے واہ واہ کوراک تان واق کوریکی نو توری ڈیکو کی نو الدو برانی یا دا

پیش کش: #مئیرݯھترار

امامو آمد: ای کما اپک لو

نیویشاک: احتشام الرّحمٰن

عقیدت اوچے محبتو بو پہلو شینی۔ ہیتان موژاری ای ݰئیلی پہلو امامو دیدار۔ ہیرا امامو ماناک تان ژان، مال و دولتو خرچ کوری نہ صرف شرکت کونیان بچونکہ ہے بچین تیاری دی کورونیان۔ ہیرا بو بے تحاشہ پیسہ، مال وا ریسورسز استعمال بیتی ہے ݰئیلی مذہبی وا روحانی دیدار انجاموتے تاروران۔

تاہم بعض روئے امامو آمدو موقعا اسماعیلی مسلکو ہے عقیدتو سورا اعتراض کونیان وا ہے اعتراض کوراک سادہ وا ہوݰ نو کوراک روئے۔ کیچہ کی تبلیغیان اجتماعو وختہ یا قربانیو ٹیمہ قربانی کوراکان سورا پھتی برار گینی اعتراض کورونیان ہے پیسان دیتی خور کیہ فلاحی کوروم کاردوا جم بیسیر رے۔ ہیتان ہے لوؤ دی کیہ اہمیت نِکی کوریکوکی عقیدت اچے محبتو ہیش کیہ متبادل نِکی۔ مگم ہیہ لو دی ضروری کی عقیدت اوچے محبتو حدود بیک ضروری۔ حدودار نیݰی کیہ دی اشناری کی ہوئے معاشرا فساد بولونجیر۔ ہیغین دیتی عقیدت اوچے محبتو اظہار کوریکہ حکمت اوچے دانائیو پہلوان ہمیشہ پیشِ نظر لکھیلیک۔

ݯھترار ݰئیلی وا تان موژی محبتو سورا حال باک رویان ژاغہ۔ ہیا ایوال ایوالیو احترام وا ایوال ایوالیو مذہبی جذباتان خیالو لکھی حال بیلیک وا اسپہ رشتہ کیہ نو کیہ قسمہ بیتی ایوال ایوالیو سوم تاروران۔

امامو دیدارو موقعا بعض روئے اباتھہ لو دی دونیان مگم ہے لوان ہیت نادانیہ، کم علمیہ اوچے کم عقلیہ دونیان۔ ہیتان امامو تعلیماتان یا اسماعیلی مسلکو عقائدان سوم کیہ تعلق نِکی۔

کیچہ کی بعض برار گینی تبلیغہ بی گیتی تان نادانیو وجہین فتویٰ دونیان ہݰ لو دیاک دی ہے قسمو روئے۔ باؤجود ہیہ کی تبلیغاری گیاوا خصوصی احکامات دیونو بویان کی پسہ فتویٰ نو دیور رے لیکن جذباتی برار گینی فتویٰ دونیان تان۔

اسماعیلی برار گینی دی امامو محبتاری زیاد تان کم علمی وا نااہلیو وجہین دیتی ہݰ لو دونیان کی ہتیت اسلامو تعلیماتان سوم متصادم بونیان یا معاشرا فسادو وجہ بونیان.

ہیہ سلسلا اسماعیلی مسلکو لوٹھوروانتے گزارش شیر کی ہݰ کیہ دی قسمہ سوشل میڈیا ٹیرو پٹارو لوان سورا پابندی ݯاکئیانی وا ہݰ انتشار پیدا کوراکان سار خبردار بانی تاکہ کیہ دی غلط فہمی کیہ دی قسمو ہردیو چیتہ وائے کوریکو بݰ واقعو سبب مو بار۔

ہے قسمہ تان سنی مسلکو لوٹھوروانتے دی گزارش شیر کی ہیہ موقعا نگہہ کیہ نااہل ہݰ کیہ دی قسمو حرکت کی اریر دی فی الحال ہے اشناریو مسٔلہ نو ساؤزئے، څیق دی ہو نو پراݯگیے، بحثہ نو پیڅھی قانونوتے حوالہ کوریلیک تاکہ امامو آمدو موقعا کیہ دی بدمزگیوتے موقع نو نیسار۔

سنی وا سماعیلی ای بیتی ایوال ایوالیو سماجی وا مذہبی تقریباتان بچین ہمیشہ ایغو سوم یوان بیتی گیتی اسونی وا ہے وجہ کی ݯھترارا مذہبی وا مسلکی ہم آہنگی ملکو شک علاقان سار بو جام شیر وا ہیہ اسپہ پھوک ݯھترارو ہمیشو بچین امنو اوانہ بہچئیکو ذریعہ دی شیر۔

ہے بچین گزارش کی مذہبی اوچے مسلکی ہم آہنگیو پروشٹی التی اسپہ تان جام روایتو برقرار سوتیلیک تاکہ کوس غیچ اسپہ پرامن ماحولو سوم نو ݯوکار وا اسپہ ہمیشہ امنو گوڑی ݯوکی حال بام۔

پیش کش: #مئیرݯھترار