MIER Chitral

Home
Pakistan
Chitral
MIER Chitral

MIER (Mother-tongue Initiatives for Education and Research) is a non-governmental and non-profit organization.

Mother-tongue Initiatives for Education and Research (MIER) is a non-governmental and non-profit registered organization aims at promoting and preserving Chitrali languages. It has been established with a view to document, preserve and promotes the hitherto neglected/disregarded aspects of cultures and languages existing in District Chitral. Khowar being the lingua franca of the area is the first focus of our study. Since its inception in May, 2010 the organization has achieved the following milestones in this regard:
• Publication of First Khowar Calendar
• Khowar Nama---a prose journal in Khowar
• Compilation of MLE (Multi Lingual Education) Premier
• Compilation of the First Khowar Primer (Khowar Qaida)
• Participation in Khowar Curriculum Workshops

Our Current Activities:
• Publication of Khowar Calendar for 2014, adorned with innovative (surprising) cultural touches
• Publication of the fourth issue of Khowar Nama
• Compilation of MLE (Multi Lingual Education) Textbooks
• Developing Typology of Khowar language
• Translation of 30 selected Khowar Folklores into English

18/08/2026

کھوار اوچے ثقافتو پین رشتہ

نیویشاک: ڈاکٹر عنایت اللہ فیضی (تمغئہ امتیاز)

ماہرانان بو پرانو رائے اسپہ کارا شیر کی ہر زبان تان ژاغو اوچے رویان ثقافتار نیسی شیر۔ کیہ ژاغو رویان نیشیک روپھیک کیچہ کی اوشوئے ہتے نیشیک روپھیکہ حاجتہ گیاک اژناریان سار الفاظ گنی زبان ساؤ باؤ شینی۔ ݯھترار اوچے غذرا قدیمار رینی، استور، کھول اوچے خورا رویان ثقافتو حصہ بہچاؤ گیتی شینی۔ نمونہ پاشئیکو بچین ہمو چھورین سار گنیرو الفاظان نیویری ای ژاغا انگیتی لاڑیسی کی زبان اوچے ثقافتو کیچہ پین رشتہ شک بیرائے۔ دوروالی اوچے اݰکارو بچین رینی حالئیک دہقانیو دی ضرورت، مال روݯھیکو دی ہݰتان ضرورت۔ کھوارا بو الفاظ اوچے محاورہ رینی حالئیکو طریقار گنی شینی۔ ہیتان موژار ڑائے ݯاکئینی پاشئیکو بچین جوش الفاظان ایگان کوری لاڑیسی۔
1. اڑوشون (رینیو ماڑ)
2. ماڑی (جوست رینی)
3. رینی ہوئے (ہِش کیاغ ہتوغو ہوستی نو ہائے، لوؤتے جواب نو لیتائے)
4. رینی ژو کرومیک (امبوہ روئے ای بیتی بے ترتیب، بے طریقہ
کوروم کوریک )
5. رینیو څھیرا بیک ( ہر کوس دیش بیتی غیچہ دوݰ بیک )
6. رینیو دُور غیرئیک ( بے سق کوروم)
7. رینیو سوم کوڑ دیک (دوری ای بندو غیچہ دوݰ کوریک )
8. کوڑ دیک ( رینیو بوتیک، ݮینݮیرا دیک)
9. پوئیو ویتھوک استوریو رینی (ہر ایوالیو سوم تھوشیاک بندہ )
10. رینی رائیر راہچی کاسیر ( کورومغار بندہ کوس لوؤتے پرواہ نو کوروئے)

ہیہ زائیلہ استور دی قدیم زمانار گنی ہیہ انوسہ پت ݯھترارا حال باک رویان بچین بو حاجتی مال حساب بیتی گویان۔ کھوارو بو الفاظ اوچے محاورہ، متل استورو سوم ݯوکی گیتی شینی۔ ای کما الفاظ، محاوران اوچے متلان ݯت لاڑیسی۔

1. چسپہ پیڅھیک ( ہیٹہ اساک استورو دوسیکو بچین شیمینیو جوڑینجی کوری استورو گردانوتے پاریچھی، ایغو سورین نیزی گوڑوتے انگیتی استورو ٹک شنہ کوریک )
2. چپ دیک (غرامار بوغاوا راہو پیڅھی نیپون بیک )
3. پڑینج نیسیک ( غولو موژا ایوالوتے لوؤ جم موقع نیسیک )
4. ہوری الیک ( بے قابو، بے دوا بیتی درونگار لو دیک)
5. پورنچ ( بے شرافت، بے اعتبار )
6. وے جیلاؤو ( تان چیتہ بیگ، لو کار نو کوراک)
7. غاپی کوریک ( ہیٹہ اساک استورو دوسی سیمینیو ایویس کوریک)
8. آنو ٹیکہ ریویش (وخت شوخڅیرار پویہ کوشش)
9. ویخیکو بیار کوریکو ہونوتے خݰاپ کوئے (نوژان بندو سوم ہمدردی مو کورے )
10. تو زوندرے اوا زوندرے استورو کا ہون دوئے ( نسل اوچے نسبو سورا تکبری پونہ بہچئیر )

ݯھتراری دہقاونو زندگیہ کھول دی دورو برابرا حاجت۔ کھوارو بو الفاظ اوچے محاورہ، متل کھولار گنی شینی، ای کما اپاک لوان چموٹہ اݰمارئے لاڑیسی۔

1. دائے (باوان کھولو نسہ ایغو ٹیکہ دیتی ساؤزئیرو سون)
2. چقار (جوانگوڑان سوم گون دیرو غیاروم ہورو گنی دایار باؤ یو پیڅھونی)
3. میر (کراماک لیشان تان نسین غیردئے کراماک لوٹھورو )
4. لونگ باؤ کی ځاہ اوشونی، ای کما غیردیکار اچی باؤ بوݯھوریکو کراماک لیشان لاکی گناسان یو درے ݯوݯھوئیکو نام
5. پلال (گناس کی پھوک ہونی ژو امیشتی توݰو کھولو باربر موژا ایغو ٹیکہ دیتی پھونیکوتے واہڅئیرو ڈوک)
6. پھوک (باوان لیݯھیکار اچی گناسن پلوم )
7. تھرینگوڑ (تروئے انگوڑان سوم درونگ گون شیرو غیاروم، ہے سورا پلالو پھونی توݰو پھار نیزینی )
8. ݯھاؤر ( کھولو نسین ماژی پھوکو موژوتے انگیکو بݰ لوٹ ماژینی)
9. اوݯھور (پلالو پھونیکار اچی توݰ پھار کی نیسائے موڑا بہچیروتے اوݯھور ریسی)
10. شونگولو (ژو صفا بیتی پھار نیسیکار اچی موڑا بہچیروتے شونگولو ریسی، ہورو داپھئیکو قفہ ژو ہیرار دی بوئے )
11. دار کوٹی (شونگولو داپھئیکار اچی موڑا بہچیروتے دار کوٹی ریسی وا ہورو مالانتے درینی )
12. پیسون (کھولو پونگہ توݰو پھیستیو دیکار اچی بہچیرو پلوم )
13. نیاسک (کھولار توݰو پھیستیو دیکو بچین ساؤزئیرو څڑاخدوری )
14. پھی (ژو صفا کوریکو بچین گانہ دریکو بݰ غیاروم )
15. غربیل (ژو صفا کوریکو بچین لوٹ پورون )
16. پھیرانی (توݰو سیری کوئیی الیکو بچین لوٹ غیاروم )
17. توݰ دیک (انگریزانان حکومتہ چھاؤنیہ اولاغو ذمہ داروتے توݰ دیتی واغوتے انتظار کوریک )
18. توݰ کھوشون (امبوہ روئے غول تزی کوری ہوازا کوریکو نام )
19. توݰ پھونیک بے فائدہ، فضول کوروم کوریک
20. نہ راشو سوری نہ توݰو ہݰ بندہ کی ہسے ہݰ کیہ حسابہ نو گوئے
(نہ تین میں نہ تیرہ میں)
21. راش صفا ژو ڈوک

ہیہ قسمہ دہقانو دورو سوم برابر حاجت خورا جوݰونو بویان۔ خورو بو اشناری کھوارا روزمرہ، محاورہ اوچے متل غیری شینی۔ لوؤ اسکوردی کوری ہمی ای کما نامان لاڑیسی۔

1. ݯیق خورو بیٹونیو موڑا بخ نیزیرو بوخت
2. ݯیقار نیسیک حدار شاخڅئیک
3. تان ݯیقہ نِکی حدار شاخڅئے اسور
4. کھائے ݯھوتیو یا پیݰیرو گیہت
5. ٹخاؤک غیریک نو چھینی لو دیتی ایھہ گنیک
6. ڈورا بیک څیقو اہتی بیک
7. گنان اوسنئیک کوس شورئے خور کوسوم کھوٹئیک
8. روشوئیک کیہ کورمو پورا کوری سامانان بڑاڅھئیک
9. نہ ڈورو نہ مالینیو بندہ کی بے حساب ہوئے
10. خورو نیسورا غیچ دیتی ویبوتو بے اعتبارو سورا اعتبار کوری نقصان
اوسنئیک

کھوار اوچے ثقافتو پین رشتہ نامو سورا ہیہ مضمون ای پھتو کاڑی کوشش جوݰونو بار۔ جام جام روئے ہیہ سلسلو پروشٹی التی اشٹوکو، انجارمو، پیارمو، ژیبارمو، غیارمو اوچے خور اژناریان مثال گنی اسپہ علمہ اضافہ کورونی۔

پیشکش: #مئیرݯھترار

16/08/2026

کھوار سفر نامہ: قزاقستانار گنی اُزبکستانہ پت
اوشٹو پڑاو: شِمکنتار گنی ژیبیک ژولیا پت
نیویشاک: نور شمس الدین

شِمکنتہ ٹیکسی نیشی ازبکستانو ویݰکی بیمان۔ نماز دیگرو وخت بیری یور کھوٹی بیران اوچے ویریع بویان۔ سخت ݰئیلی میدان ۔ ہر ویݰکی اوݯھی۔ ہیہ موٹر اسپہ باؤنڈریہ اف لاکوئے۔ ہتیرا پیدل پھار نیسی خور گاڑی نیشی ازبکستانو دارلخلافہ تاشقندو تے بیم۔ مگر ای ملکار ای ملکی بیک آسان نو۔ بو روئے راستانی کی ریلہ بو وخت کی لیگیتائے دی ایمیگریشن آسان بویان۔ پیدل بو رش بویان۔ مگر پیدل ای ملکاری ای ملکی بیک متے جہازا یا ریلہ بیکو سار نوژان سارے اوا ٹکسیہ تن راہی بیتی اسُم پتہ نو ایمیگریشن والا ایی رویو سُم کیہ سلوک کونیان۔ خیر تھے ہتو ہتے وختہ لاڑیسی۔ نو ہوئے اچی گیتی شِمکنتہ جہازی نیشی بین بوئے۔

فی الحال پستے لُو دوم کی شِمکنتہ ہنونو انوس کیچہ بغائے وا کیاغ پوشیتم۔

شِمکنت دی پرانو شہر بیرائے مگر طرازو سار عمرا ہزار سالین څیق بیرائے۔ ہیہ قدیم وختہ طرازو بہکی مشہور دی نو بیرائے۔ ہتغین ہیا کیہ پرانو عمارت پوشین نو بویان۔ ژالینہ اوچے میرات مہ گنی مو پورونیتانی۔ چشٹو وختہ یرسالان دی ہائے۔ ہتوتے ہیا طرازو غون نو بیرائے ریکو ران کی ہو وجہہ شیر۔ کیہ وختہ کی طراز آباد اوشوئے ہتے وختہ شمکنت نو اوشوئے۔ ہمو مشرقو ویݰکی بلکہ ہموݰ کی ریتم آسان کی طرازار گیاوا شمکنتار نیوف جوش کلومیٹر پروشتی ای قصبہ گویان۔ تو ہتے نسو یو نیسی گیتی اسوس۔ سیرام ہتو نام ہسے ہتے وختو پڑاو اوشوئے۔ ہنیسے شمکنت بولونجی ہاتی توری شیر۔ سیرام ہاتیے قدیمو کھنڈرات تتے ملاؤ بونی۔ شمکنتہ نہ قدیمی بلڈنگ لیس نہ روئے نہ دقیانوسی خیالات۔ تہ آستانو رویان سار ہمیت چھور قدم پروشٹی اسونی ریتائے۔

اوا شِمکنتہ پورا انوس کوسیتم۔ شِمکنت پروشٹی ترکستان صوبو حصہ بیرائے ہنیسے وفاقو حصہ جوݰو نو بویان۔ جنوب مغربو سفان سار لوٹ شہر وا موجودہ وختو قازقستانو تجارتی مرکز الماتی اچتو ہمو لمبر شیر ریکو بوسی۔ ترکستان صوبو پونگہ ہیہ شہر شیر۔ یعنی شمکنتاری شمال وا شمال مغربو ویݰکی ہے علاقہ پورا ترکستان صوبہ۔ قازقستانہ واحد صوبہ کی ہیرا ہنیسے دی مسلمانن ہتے حکومتو وختو عمارت ہے صوبا شک بیرانی۔ ژالینہ ہیہ صوبہ و بیرائے ہیس ران کی مہ شہرو نام ترکستان وا ہیس ترکستان صوبو دارلحلافہ۔ پورا قازقستانہ واحد شہر کی ہیرا ہزار سال پرانو عمارت ہنیسے دی زندہ سلامت شینی وا ہانی بو پرانو مذہبی مراکز شینی کی مہ ہے شہرو تے روحانی شہر رینیان ریتائے۔ ازبکستانار اچی کی ہاؤ تہ گنی اوا اوچے میرات ایہہ بیسی مہ دُورا بس بیتی گوسی۔ مگر اوا اچی گیاوا ہیہ پونین نو گومن کی گیرو بیاتم بیم۔

دورا بس بوسی رے ست کوریک دی اولو مرتبہ پوشیتم۔ ہو مطلب ہݰ نو کی بسو ژاغہ لیک مشکل۔ خاص کوری کوساؤ بی کورا بس بیکو بچے سنٹرل ایشا پریشان بیکو ضرورت نیکی۔ بو طریقہ وا ذریعہ شینی۔ مگر وختہ تانتے ژاغہ پھار نے پیݯھئیلیک۔ ہیہ موسمہ کوساک دویو بو۔ بسیو بچے اولو نمبرا ہوٹل شینی۔ دُنیو خور حصان غون ہوٹل ہیا دی ہر ژاغہ ہر زئیلہ ملاؤ بونیان۔ بو مہنگا دی، مناسب دی وا گزارہ وال دی۔ ہے بارا درونگار نو کوسی۔ ہے اچتو ہوسٹل شینی۔ چھڑا کوسک دویو ڈاقان یا کوموران یا گروپہ کوسک ملگریان اکثریت ہوسٹلین ہال بونی۔ ہوسٹلہ غیژی کمرہ کی گنیتاؤ مناسب ہوٹلان قیمتہ۔ ہوسٹلین موژہ کمرہ دی بوئے وا غیژی نفری یا تان بچین الگ کمرہ دی بُک کوریکو بوئے وا ای کمرو اندرینی غیژی بسترہ دی بُک کوریکو بوئے۔ سفان سار آرزان ذریعہ جوش جو ژونان موژا ہے کمرہ والا کمرئی بیڈ۔ ہمی موژایو کمرہ پھتی ہوسٹلین ڈاقان اوچے کورموران الگ الگ دی بونیان وا موژایو دی۔ ہوسٹل بُک کوراوا ہے تمام معلومات فوٹوان سم جوستہ ملاو بونی۔ عام طورا ہوسٹلین موژا کمرہ مخصوص جینڈرو کمران سار آرزان۔ اکثر ہوسٹلین ݰاپیک ملاؤ نو بویان ہین کچن شیر بیری بی کیاغ انگیتی تانتے پاچے ژیبیکو بوس۔ ہوسٹلین ہال بیکو ہیہ دی بو مزیدار تجربہ بویان۔ رنگہ رنگہ روئے پوشین بویان۔ مہ ازبکستانہ زیادہ بسی ہوسٹیلین شینی۔

ہمیتن سار علاوہ ہال بیکو بچے ژاغہ گنیکو بچے وا ای خور جم طریقہ کاؤچ سرفنگ رے اپلیکشن شیر۔ ہتے مددو سورا کورا بی کوستے مینو بین بویان۔ مختہ مینو نو کیاہ پیسہ دیتی مینو۔ یعنی ہݰ کی کیہ ژاغا بیکو کا تہ تن دُورا ہالیران۔ تہ اوچے ہو موژی اولہ تن فیصلہ بویان کی کما وخت کیہ ݰاپیک تتے دوم وا کیچہ بسترا تہ پورئیم۔ وا بدلہ تسار کما روپیہ گنیم رے۔
اوا شِمکنتہ ہیہ طریقو کوری اسیتم۔ کاؤچ سرفننگہ متے نورتاس بیکنظروف رے ای ڈق تن اپارٹمنٹہ ہل بیکو ژاغہ دیتی اسیتائے۔ سفرار جوش بس پروشٹی مہ اوچے ہتو موژی فیصلہ بیتی اوشوئے۔ متے رے اسیتائے کی مہ سم جو کمرہ شینی۔ ای اوا پاریمن ایغو تتے دوم ای بسو تے۔ واش روم اسپہ موژایو بوئے۔ ݰاپیک تتے نو دوم۔ تانتے کیاغ انگیتی کی پاچے اویوئے مہ کچنو استعمال کوریکو بوس ہے بچے پیسہ تسار نو گنیم۔ ای چھوئے پوریکو بچے سوت ہزار ٹینگا کرایہ تہ سار گنیم۔ ٹینگا قازقستانو کرنسیو نام سوت ہزار ٹینگا پاکستانی چھور ہزارار پھوک زیادہ روپیہ ساؤز بونیان۔ پورا سفرا سفان سار آرزان ژاغہ ہیہ متے ملاؤ بیتی اوشوئے۔

اوا شمکنتو تے گیاوا راہا اف خومی طرازو موژی کوساوا ہے ڈق متے میسج اریر۔ مہ ہو ݰم انوسو ای بجا توریلیک اوشوئے۔ ہے لو مہ ذہنار نیسیرو بیرائے۔ آوا ہوتے لو پھریتم ہموݰ کیس ساؤز ہوئے رے اوا گور چھویو گوم۔ بیکو ریتائے کی سہی شیر مگم مسٔلہ ہݰ کی ہنون جمعہ شیر اوا نائٹ اوٹ کوم۔ یا چھوچھو پونچ ݯھوئے بجا گوم وا گور پیشینہ پت پاریم۔ لہذا مہ اوچے تہ ملاقات نو بیکو امکانات زیادہ۔ تو گور چھویو گوسن ہانیو تے اوا کلبو تے بوغدو بوم۔ اپارٹمنٹو لوکیشن خود تہ سم شیر، دواہتو کھولاؤ کوریکو کوڈو تتے انزیمن۔ ہیرا گیتی دواہتہ ہیہ کوڈو کی پراؤ اپارٹمنٹ کھولاؤ بوئے تو ہی ہال بوس۔ ایی توری خسماتی کی نیتاؤ کرایان متے انزا۔ اپارٹمنٹی ہل بیکو بچے جو دانہ ہدایات پرائے۔ اولو چھویو گیارہ بجار اچی دوڑ میوزک نو ݯاکا جوؤ مہ باروچی خانو کی استعمال ارو بوغاوا تن خشٹاران تان نیگی بو وا تن کچران شانہ ڈسٹ بینو پیݯھے۔

اوا جوش ای بجہ ہو اپارٹمنٹہ توری پوری اسیتم۔ میزبان نو اسیتائے، چھویو ہایہ نوا کیہ خبر لوڑیتم دی نو۔ زیادہ قزاقن روٹین ہݰ۔ جمعہ بوہ کلبو تے بینی درونگ چھوئے پی پھونی میدا بیتی چھوچھو پونچ ݯھوئے بجا گیتی برخ بومتو دونی وا شامہ پت ایہہ نو روپھونی۔ ہیس گیتی پوری اسیتایہ نو خور کورا بی پوریتائے کیہ خبر پتہ نو۔ اوا نیوف بجا روپھی تیار بیتی تن ہتے سفرو ملگیریان انتظارا اسیتم۔ جوش بجہ بیکو تہ گوݯو روپھی اسوسی رے میسج ارینی بیکو یو نیسیتم۔ میت دی ہے ݰویا ہل باؤستانی۔ ہتے سم یو نیسی کوسیتم درونگ انوس۔

شمکنتو روئے استانہ اوچے طراز رویان سار بو خور۔ استانہ روئے بو اوݰک ضرورتار غیر کیہ لو نو دونی۔ فروخ ٹور ویل کمنگ نو۔ خاص کوری خور ملکو رویان سُم کیہ خاص ایہہ نو گانینی۔ شمکنتو ہمیت خور بیرانی۔ نوژان رے ہوݰ کوری تان تہ نسہ گونیان۔ کوستے انگریزی کی نو گیاؤ اوشوئے دی تہ سُم مشقول بیکو کھوش کونیان۔ کوستے کی گویان ہتیت تھے وا کیہ پھیک بیکو غراض نیکی۔ شمکنتو رویاں سخت خوش بیرائے نوژان رویان سُم لو دیک۔ کوساوا کا دی گیتی ہیلو ہائے تو کوراری ہائے کیانی بوسن رے بشار کونیان۔

شمکنت پورونی نماز دیگرار پھوک پروشٹی میرات اوچے ژالینہ یانڈیکس مݰکے مہ ہاتی نیتانی۔ اسپہ پاکستانہ اوبر یا کریم و غون یانڈیکس ہمیتن ٹیکسی سروس۔ یانڈیکس والوتے ہیہ ذمہ داریو پرانی کی ہمو شمکنٹ ریلو اسٹیشنو بیلہ التی ازبکستانوتے بوغک ٹیکسی نیشا۔ ہے یانڈیکس والا مہ مقررہ ژاغا یو خامیئکو سم ٹیکسی ڈرایئوران مہ اپھیکو ہانی۔ بالکل پاکستانو غون مہ پھار یی راکھیݰتانی۔ ہانی ہوݰ اریتم کی ہیت سف ازبکستانو ہے بونڈریو تے بینیان۔ ہیہ لوو میرات متے دیتی اسیتائے وا راستائے کی کار گاڑی کی ہوئے ۳۵۰۰ ٹنگہ دیت منی بس کی ہوئے ۲۵۰۰ ہیت تہ نیژیکو چق بونی انگارا۔ غیزی تن گنی بیم رینی نو تن را۔

خائے تھے ای ویݰکی میراتو نصیحت ای ویݰکی تہ برارو قصہ خوانیہ کوٹ گنیکو تجربہ اوا دی موبائل نے گوگلہ ترجمہ کوراو بارگین شروع اریتم۔ ہے موژی ای څیق ژور ہیرا گیتی ہاتے ٹیکسی والان تے کیاغ رے تیتن پھار نے۔ متے انگریزا تو مہ سُم گے پھارو بی مشقول بوسی اوا تہ فسیلیٹیٹ کوم ریتائے۔

ہے ژورو نام اولژان بیکانوا بیرائے۔ ازبک بیرائے جوش ای جماعتہ سبق راک بیرائے وا استانہ ہو کایو ژاؤ اژیکو ہتو سُم دُورو کورمہ مدد کوم رے ای جو ہفتو بچے گیرو بیرائے۔ مزو لو ہݰ کی ہیس دی ویزین ہے ریلہ تن آستاناری گیرو بیرائے کورا کی اوا گیتی اسیتم۔ ایک دمہ متے ریتائے کی اوا نستہ میگا پیلینٹ رے ہے لوٹ شاپنگ مالو بیلہ تہ پوشی اسیتم ۔ شمکنتہ اوا دی نوژان مگر مہ سُم ملگیری اسیتائے۔ تہ سُم دی کا مدد کوراؤ اوشونی۔ سو متے پتہ تتے زبان نو گویان اوا انگریزی بومان تہ سو مدد کوریکو بچے تہ ایی مݰکیتم۔

اوا ہانی خوشان ہوتم کی وا لو نو دیت۔ بیکو تاشقندو تے بیمان ریکو سُم ای منٹ رے دے پھارو ای گاڑٰیو نسہ بی منٹار دی کم وختہ دے اچی مہ نسہ گیتی گاڑی ہوئے گے ریتائے۔ ہتیرا بیکو ہتے گاڑی والا پروشٹو سیٹو مہ نیشیتائے۔ اچو ای ہے ژور، ای جم لوٹ عمرو واوی وا ای خور خاتون ای څیق ژورو ݰیکہ نیشے نیشی اسیتائے۔ نہ کرایو لو ہوئے نہ اوا بشار اریتم۔ گاڑی راہی اریر۔ پھوک مُدا اچہ اوا اچی کوری کرایہ کیہ حساب ریکو تہ ۳۵۰۰ اسپہ ۳۰۰۰ ہزار رے ہوسیتائے۔ ہݰ کو ریکو کینو اچو گے ہیاہ واؤ چھیو بیتی ۳۵۰۰ دویان ریتائے۔

مگر اوا پروشٹو سیٹو سو بو خوشان اوشوتم واؤتے کورا لاکومن۔ راہ لعل نسین چھور ویݰکی اوݯھی اچی ژاغو بارا مشقول باک نفری اسور کیاوت ہوݰ نو کوری ازبکستانو باونڈریا توریتم۔ دی اصل معاملہ ہیہ شیر کیا۔ پسہ جائے نمازان یو گانور جم ڈانگ دعا کورور ورنہ قومی ریکارڈ کیہ آسانیا پھار نیسیکو بݰ نو اللہ خیر کورار پھار کی نیسیرو بیراتم پیساتے قصہ کوم۔

پیش کش: #مئیرݯھترار

09/08/2026

کھوار سفرنامہ: شمالی افریقا کوسیکو قصہ!
اولو قسط
نویشاک: احمد فراز

شمالی افریقو ای ملک تیونس ہتو ایئرپورٹہ یو خومی راہین گیاوا ہݰ سریتائے گویا کی اسلام آبادار پنڈیو ویݰکی بیمان۔ پون ہݰ تان، دُور دی ہتے قسمہ تان سریئتانی بس فرق ہانی غیچی ہائے کی روئے عربیہ لُو دیاؤ اوشونی۔ ہنون ہیا گیتی مہ جُو ہفتہ ہوئے۔ ہمی جُو ہفتان موژی کندوری ژاغہ کی پوشیتم، کندوری رویان سُم کی مشقول ہوتم وا کندوری خور مشاہدہ ہونی ہے سفان ایتو دیتی ہمونیہ پت ہیہ نتیجا توریتم کی ہیہ ملک لوڑیکو پاکستانو غون مگم پاکستانو سار بو خور۔ کیچہ بیتی خور ریکو!

اولو انوس چھوچہ روپھی ݯھوئیی کوریکو ݰوئے بازارو ویݰکی بغاتم۔ دُکانی اوتی دربت پھیک بیتی ہل ہوتم۔ ہی جُو کیمیریان اسیتانی، لوڑیکو ای نان وا ی ژور سریتائے۔ مہ ہش خیال ہوئے کی ہمیت البت کیاغ گانینیان وا دُکاندارو ویسی اسونی۔ اوا دی پھیک بیتی ویسی ہل ہوتم۔ ہے موژی ہے ژور مہ سار بشار اریر کیاغ گنیسان رے؟ مطلب ہیت واقعی نان اوچے ژور بیرانی وا ای بیتی دکانداری کوراک بیرانی۔ مہ سوم ہے ژاغو دینار نو اوشونی وا بنکا بی ایکسچینج کوریکو نو بیتی اسیتم۔
بیکو ہے ژور مت ریر کی کیاغ کی گنیسان گنے پیسہ خیر تو اسپہ مینو! اوا تو شکریو ادا کوری پاونڈ توتین دیکو نو ریتائے۔ اوا بار بار گنے ریکو کالکولیٹر او مہ پاشے ریتائے کی ہمونی پیسہ ہونی کیاوت کی بنکا بی پیسہ گنیتاؤ مت دیت۔ ہیہ کیہ ای واقعہ نو بلکہ ہیہ ژاغہ عوراتن بو زیادہ دکانداری کونیان۔ صرف دکانداری تان نو بلکہ زندگیو ہر شعبا عورت اوچے کولانو برابر شریک اسونی۔ ہیسوم جوستہ لوڑین کی بویان بو مہمان نواز روئے۔

ہوٹلہ بغاؤ، یا ٹیکسی ڈرائیورو سم مشقول ہو یا خور کورا دی بی تان لوؤ کی پراؤ ݯھوم ہوسی تتے مرحبارینی وا بو ݰئیلی طریقہ تہ سم مشقول بونی۔
ہیغار علاوہ اوݯ رنگہ دواخت اوچے کھڑکی وا پھوک اشپیرو عمارت ہیہ ژاغو ݰئیلیو مزید ݰئیلی کونیان۔ اشپیرو بیکو وجہو وا دی ہوݰ کورین بویان کی ہیہ ژاغہ بو زیادہ گرم مگم دواختان اوچے کھڑکیان اوݯ رنگ کھیوتین رے کیا دراکہ دین نو بویان۔ خیر کیاغ کی شیر بو ہردی ݯوکونو وا ݰئیلی سارینییان۔

سیدي بوسعید رے بو مشہور ژاغہ اسپہ ݰویہ تان شیر۔ ہیرا تقریباً پورا عماراتن رنگ اوچ اوچے اشپیرو۔ ہے ژاغہ سمندروتے دی ݰوئے شیر بیکو ہیس ہو مزید ݰئیلی کویان۔ ہو بارا ہݰ لو دونیان کی ہے ژاغہ ای مشہور صوفیو نامہ لکھی شیر۔ ہیرا ہورو زیارت دی شیر۔ یک شمبے انوس ہی کوساؤ بی اسیتام مگم کیہ پونگ پیڅھیکو ژاغہ نو لیتم ہانی زیادہ روئے اسیتانی کی وا بشر موکو۔

پاکستانہ کوئٹہ ہوٹلیان غون ہیہ ژاغہ دی ہوٹل بو زیادہ شینی وا عربی زبانہ ہیتانتے “المقھیٰ” رینییان۔ ہیغین کولانو زیادہ غیچی گونییان وا خاص کوری شامو وختہ ہیرا نیشاؤ چائے پییاؤ مشقول بونییان۔ ہیہ زبانہ چائیوتین “شائے” رینی وا چائے اسپہ چایو غون نو چایو ݯھیرا نو دونیان وا پھوک خال دی خور ساران۔
تیونسو ݰاپیکو بو مزہ شیر ہے بارا مہ خیالہ گیاک قسطہ تفصیلو سورا مشقول بوسی۔ ہنیسے مختصر ہانی لو پساتے دوم کی ہمیت دی اڑغانی برار گینیان غون ݰاپیکہ کوئے اسونی۔

پیش کش: #مئیرݯھترار

02/08/2026

“نان تَت کی نو ݯھیݯھئتائی دار بُوخت ݯیݯھئینی”
نیویشاک: طارق اقبال

بوغدو تروئے چھور مسو موژی ݯھترارا تقریباً جوش یا جوش پونج ژور گینی وا ژیژاؤ تان سورو ماریتانی۔ وا ہیہ سلسلہ تاحال جاری شیر۔مختلف مکاتب فکرو روئے ہے باریہ تان خیالاتان اظہار کونیان واا مختلف وجوہات بیان کونیان۔
کا ریران کی محبت کوری تان جذباتان قابو کوریکو نو بونیان وا ناکامی بیکو ہے ویݰکی بینیان۔کا ریران کی جذباتہ گیتی بدکاریو ویݰکی بینیان اور رشتہ نو بیکو تان غلطیو کھوشتئیکو بچین بریکو ترجیح دونیان۔
کا ریران کی اژیلی سبق ریران وا نان تتان توقعاتان مطابقہ رزلٹ نو گیکو نان تتان قہرو برداشت کوریکو نو بیتی تن بوکی زی درینیان۔
کا کیہ وجہ بیان کویان کا کیہ وجہ رے لو دویان۔ ہمو وجوہات دی بونی لیکن مہ خیالہ ہو سفان سار لوٹ وجہ خاندانی تربیت شیر۔

اسپہ ای زمانہ ای برارو منگنیو سلسلہ بغاتم۔تمام رسوم ادا بیکار اچی اسپہ گنی دُوری اوانی۔دُوری بی ژورو ژاناک ہوتم۔ہتے موژی نیشی اسیکہ ہتے ژورو نان لو شروع کوری ہتے ژورو اشپاشورو مخاطب اریر۔
اے برار اوا بو خوشان مہ ژورو رشتہ پسہ خاندانہ ہوئے لیکن ای لوو تتے دیک مݰکیم کی مہ ہیہ ژور کوئے دوسیکو نو بوئے۔اوا ہمو بو ناز و نخرو سورا وغشی کوری بردئے اسوم۔وا پستے ہیہ درخواست کی مہ ژورو ݯاکئے کیہ کوروم مو کورا ؤر۔

ہیہ لوؤ دیکو ہتے میکی سور ݱینگئے بالکل صحیح لہ مہ ژور اسپہ ژور وا ہو کو کورمئیسیان ریکو مہ ژان نو تھیئی ہتے بیچیوتے ریتم کی، اے بیچی تو تان ژورو خوران تے مختاج کوری موشانتے دوسانہ؟ ہیہ موشوتے کیچہ کوری خدمت کوئے ہیغار دی زیادہ تان سورو کیچہ کوری ساتیر۔ہورو ہر کورمو بچین خورو موخی لوڑیلیک بوئے۔ہیہ لوؤ دیکو ہتے بیچی مہ اویوئے فقط۔ہے ژور مہ ہتے لوؤ غون پُھک مودہ ݰئیلی ہل ہوئے ہتے سُم ہے دُوری ناچاقی شروع ہونی۔

اسپہ ݯھترارا تن سورو مریکو وجہ صرف و صرف دُورو تربیت شیر۔اسپہ ہنیسے دی یورپ امریکہ حتیٰ کی پشاور اسلام آبادو غون دی ترقی نما کوسی وا ہتے رویان طرزِ زندگیو اپناؤ کوریکو کوشش کوسیان۔ہݰ کوریکو بچین اسپہ اژیلی ݯھترارو ماحولو مدنظر لکھی تربیت نو کوسیان بلکہ ہے شہرانتے لوڑی کوسیان۔کا ریران کی نان تتان تان اژیلان سم دوستی کوریلیک، کا ریران کی ہتیتان موژا اعتماد پیدا کوریلیک تاکہ ہسے ہیتان غیچھو اوتی لو دوئے، کاریران کی اژیلی تان ہر لوو نان تتان تے دیار وغیرہ۔

ہمی سف لو ݯھترارو ماحولو سم فٹ نو؟ بلکہ دُنیو کیہ دی کونہ اژیلی اوچے نان تتان موژی دوستی نو بوئے بلکہ ہیتان موژی احترام اوچے خوف و رشتہ بوئے۔اژیلی تتو غیچو اوتی کی لو پرائے ہتو تے ݯھترارو ماحولہ موخار گیاک ریر۔ وا اژیلی تتو موخار کی ہائے ہتو لوؤ کیچہ کوری کار کوئے۔لوؤ کار کی نو اریر ہسے دورو کورمہ کیچہ بیتی ہوست درونگئیر۔

جوولو ای نوع روایت شروع بیتی شیر کی ژورو ݯاکئے یا ژاؤو ݯاکئے کوروم کوریکو نو لاکوسیان۔ہݰ بیکو وجہین ژور موشو دورا بی وا ژاؤ خور ماحولہ بی ہر کورومو بچین محتاج غیچی گویان وا ہر کورومو بچین خورو موخی لوڑی ہل بویان۔ہے وجہین کیہ ماحولہ کی بیران ہتے ماحولہ ایڈجسٹ بیکو نو بویان۔

ترویو لو چونکہ وغشی بیکو وجہین ژور کی اسور موشو دورا بی تان ژانو خبارا گیکو نو بویان، اچی پھوک لو بیکو تان نان تتانتے شکایت کویان،ہݰ بیکو ہو نان تَت ہو موشو دُورا کوری مداخلت کونیان، ہے وجہین ہورو اوچے ہورو موشو وا موشو خاندانو موژی ناچاقی پیدا بویان۔ہے ناچاقی ڈپرین ساؤز بویان وا ہے ژور ڈپریشن بیتی غلط قدم گنیکہ مجبور بویان۔

چھورو لو ہیتان کی نو کوسیان اژیلیان کتابی کیڑا غیرئیکو کوشش کوسیان۔وا سبقو موژی اسیکہ اسپہ ہیتان اخلاقی، معاشرتی اور سماجی تربیتو سورا توجہ نو دوسیان۔ ہیغار دی زیادہ اژیلی صحیح نمبر گنیکو نو بیکو خور رویان اژیلیان مثالو دیاؤ ہتیتان دیرئیسیان۔ہݰ کوریکو ہے اژیلیو موژا احساس کمتری پیدا بویان وا ہے احساس کمتری ہورو ڈپریشنہ مبتلا کویان۔ہے وجہین دیتی نان تتان قہرو برداشت کوریکو نو بیتی اژیلی ہݰ قدم گنیکہ مجبور بویان۔

پونجو لو مہ اژیلی اف کی نیسیتاے شوم ݯھیݯھور رے بیری نیسیکو نو لاکوسیان۔ ہݰ کوریکو ہے څیق تان مصروفیاتان خور اشناریان ویݰکی الویان چونکہ ہتو سُم مصروف بہچیکو بچین کیہ ذریعہ نو بہچوران وا صرفی ای ذریعہ سوشل میڈیا وا موبائل بہچوران اچی ہتو چالئیکو بچین انٹرنیٹ شیر وا قیمتی موبائل ہوستہ شیر تھے ہے اژیلی کمرو اندرینی ہل بیکہ مجبور بویان۔اچی اسپہ احساس کمتریو شکار روئے ہمی اشناری اسپہ ہوستہ گیکو کیاغ سریران۔
ہݰ کوریکو ہتو مصروفیت صرف ای کمرو اندرینی بند بویان وا موبائل اوچے انٹرنیٹہ مختلف انٹرٹینمنٹ سرچ کویان۔ انسان کی مصروف ہل نو ہوئے مختلف خیالات ہتو دماغہ گونی۔اچی ہنیسے روئے لائیک اوچے ویوز گنیکو بچین اخلاق باختہ وا فحش ویڈیوز اپلوڈ کونیان۔وا ہے اژیلی ہے ویڈیوان لوڑی کہلی ستو دی بویان، صحت دی خراب بویان وا اخلاقی معاشرتی تربیتاری محروم بویان۔

“نان تت کی نو ݯھیݯھئتانی دار بوخت ݯھیݯھئنی” ہیہ لو نویشی گنیکو بݰ لو اژیلیان څیق اسیکہ تان دورو مختلف کورمان ہتیتان ݯاکئے کوریلیک۔وا ہے کورمان کوراؤا ہیتان نگرانیو کوریلیک وا ہتیتان ݯھیݯھئیکو کوشش کوریلیک۔ کیہ کورومو کی اریر ہتو شیریستو کوریلیک وا ہتو کورمو تعریف کوریلیک۔تاکہ ہتیت گیاک وختو بچین کوستے مختاج نو بونی اوسنی دیکو ژاغو ہوݰ کونی۔ پونگ بُوختہ شیخی کی پرائے ایہہ روپھونی۔وا ہر کوروم تان ہوستین کوریکو اہل بونی وا ہیغار دی زیادہ ہیت مصروف بہچونی۔مصروف کی بہچاتانئ غلط خیالات دماغہ جنم نو گونی۔ہݰ کی نو ہوئے نان تتان ژاغا دار بوخت ݯھیݯھئینی۔

پیش کش: #مئیرݯھترار

27/07/2026

کلام بہ زبانِ شاعر
شاعر: افضل اللہ افضلؔ

بُلبلو نغمان بشارو موکورے
ققنوزو ہنگان بشارو موکورے

کمانہ تیران پوشی ہردی شانیر
ظالمو غیچھان بشارو موکورے

تہ پاشے اوا دنیا تنہا ای روئے
مہ پاشے رویان بشارو مو کورے

ای قطرہ چکستو شونہ نم نو ہوئے
نُوریرو کھوٹان بشارو موکورے

یورو ساری روشت اوا تہ لوو دوم
تان ساری تو تان بشارو موکورے

پُر کشش منظر ریکو مہ پروشٹہ تو
مہ ساری خوران بشارو مو کورے

بیرون کی تہ غیچی گومان پک تازہ
دورون مہ زخمان بشارو موکورے

تہ مراد حاصل کی رنگِ بوا ہوئے
گمبوریو ځوخان بشارو موکورے

حسینوؑ پوشاؤ کی کربلا بغاؤ
یزیدو قومان بشارو مو کورے

افضلوؔ ژانو سورا کیہ حال الاؤ
وا کوسار ژانان بشارو موکورے

پیشکش: مئیرݯھترار

26/07/2026

نیویارکو بیرموغ لشٹو سئیل
نیویشاک: کمال اے جمیل

22 جولائیو انوس اوا تان جو نویسگینیان توصیف علی شاہ اوچے اعزاز علی شاہو سُم بیتی نیویارک ریاستو صدر مقام البانیو تے ݰوئے ای بو شئیلی سئیلو ژاغا بغاتم۔ ہیہ ژاغہ اسپہ بیرموغ لشٹو غون ای ݱانگ زومو ٹیکہ شیر۔ ہمو نام "جون بائنڈ تھیچر پارک"۔
ہیہ نیویارک وا البانیو زوم جنگلہ مڑاغ، آرمانو بچین دی کورا "ڑاغ" زوم غیچی نو گویان، پورا ڈُوم ادراخ۔ تھیچر پارکہ پت ہݰ سرک ساؤزینو بیتی شیر کی آرمان چھیوران۔

تھیچر پارکو ٹیکہ بی لوڑیکو ای بو خور منظر، گدیری کوریکو بݰ ݰئیلی، خدائے پاک کندوری ݰئیلی ہیہ ژاغوتے دیتی اسور لوڑی حیران بوسان۔ یو کوری البانی شہرو وا نسار نس ژاغان کی لاڑیسان جنتو منظر ساریران۔ صفائی وا نظموضبط ہانی اعلیٰ معیارو کی کیہ لو دوم۔
گوݯ گوݯا لوٹ لوٹ دوربین ݯوکی شینی ، 25 پیسہ ہتے دوربینو پیݯھیکو البانی شہرو وا نسار نس علاقان تہ نسہ انگیتی تہ پاشیران۔
ہیرا ہیارا سیئل دویان نیشیکو بچین ݰئیلی بینج اوچے میز لکھی شینی، ہتے نسہ تان چُمور دیدانگ، کیاغ پچئیک لچھئیک کی مݰکیتاؤ آسانیو سورا بوئے۔
پارکو اندرینی ای بو درونگار پیدل کوسیکو بچین واکنگ ٹریک ساؤزینو بیتی شیر۔ یومونو جام ٹیپ ہیم دیکو تھے ہیہ ژاغا گیتی "اسکیئنگ " چُرغہ دیکو بندوبست دی شیر۔
ہے پارکہ ای لوٹ کھولاؤ ہال شیر، ہتے اندرینی دی بنج اوچے میز شینی۔ ہے نسہ تان سئیل دویان اسقانیو بچین باتھ روم ساؤزے شینی، ہانی اعلیٰ معیار وا بہترین انتظام کی عقل حیران بویان ۔ حرام لا کی کا ہے باتھ رومان ٹوٹیان نیزی اسونی، نیزیک پھارو شار ، کا ہاتی دوسی نو اسونی، نہ دی کا بجلیو کیہ اشناریو، دروازو یا خور کیہ دی اشناریو سم دوسی دوسیرو بونیی رے نو ساران ۔

اسپہ ہیا کی بیسیر ٹوٹی یا بلب خیر، ہے دروازان تان دارک نو بہچے سیر۔
ہے ہانی لوٹ پارکہ دُنیو روئے گیاؤ بینیان مگر حرام کی ہیرا کورا ای کاغذ، یا کورا ای پلاسٹکی بوتل کی پوشیتام۔
جنگلو پوشی آرمان کٹر ہوئے، قسمہ قسم پھوردو، کان لاواش، گمبوری تہ ہیرا ہیہ را تہ غیچی گونی۔
ہے پارکہ ای بورڈا نیویشی اوشوئے کی ہیہ پارکو حدودا 170 قسمہ بوئیکرا اسونی۔
کندوری مدا پت کی ہیہ پارکو اندرینی ہل ہوتم ذہنہ ہیہ سوال تان اوشوئے کی اسپہ کیہ وخت قدرتی وسائلان ہموݰ جم طریقا حفاظت کوسی، اسپہ موژا کیہ وخت ہموݰ ڈسپلن گوئے کی کیہ اشناریوتے نقصان نو تاریسی، صفائیو سورا توجہ دوسی۔
کیہ ژاغا کی کولرو ناسا لکھیرو پلاشٹک گلاسو سوم لوٹ جنجیر بوتی ہتو چھوغیار بچ کوریکو کوشش کورینو باؤاوشتائے ہتیرا قدرتی وسائل او چے قومی امانت وا کھیو محفوظ بہچونیان۔

اللہ پاک اسپتے انصاف دیار۔ آمین

23/07/2026

گوجر مشقولگی

نیویشاک: محمد نبی چترالی

اسپہ ای واٹس ایپ گروپ شیر . لیٹریلی، ہتیرا ایگانہ سخت دلچسپ سین بونی۔ پڑھا لکھا روئے اسونی وا ایگانہ مزیدار گپ شپ بوئے۔ ہے ای انوس ڈائریکٹر صاحب کیہ لوا قہری بیتی جوادوتے ریتائے کی، "پھیک نوبوسانا اے گوجر۔" جواد بھائیو پِسہ نو پوشیرو بومی وا مہ دی شاید نو پوشی اسومی، ہیس پِسہ غلطی اسپہ نو، اسپہ خو تان فُل فارما اسوسی۔

خائے تھے اوا اوچے مہ سوشل ورکر برار ہے لوا سخت احتجاج اریتام۔ مہ منطقی موقف ہݰ اوشوئے کی ہر دخت موش گوجر نو بوئے، کیمیری دی نو بوئے وا ہر ݰئیلی موش اوچے ہتو کیمریو 'کھو' بیک دی ضروری نو۔ سوشل ورکر برار اسلامو حوالو سورا ہو دوسیتائے کی اسلامہ تعصب نِکی۔ خدائے اسپہ انسان اریر وا اچی قبائل اوچے رنگہ تقسیم اریر تاکہ ایغو ہوݰ کوسی کی کا گوجر وا کا کھو۔ جواد ہے موژی گیتی اسپہ غیرت دیکو کوشش اریر کی مہ خیر شیر پِسہ قومو وا رنگو سوال شیر، اسپہ دی اسٹینڈ گنیتام۔ ڈائریکٹر صاحب تان وضاحتو پیش اریر وا اسپہ قبول اریتام۔

ڈائریکٹر صاحبو وضاحت ہیہ اوشوئے کی اوا دخت رے ہوتے گوجر نو رے اسوم بلکہ مِہرو سورا رے اسوم۔ تان وضاحتو تائیدا ہسے جین زیو حوالو پرائے۔ بقول ڈائریکٹر، کومورو تان دوستوتے مہر کوری 'مہ گوجر' رینیان۔ لہٰذا ہیہ لفظ اسپہ ہیہ دورا مہر، محبت، نماکینی وا دلربائیو استعارہ بیتی شیر۔ پِسہ احتجاج نو، فخر کوریلیک۔ قومی اعزاز ہیس۔

ہے وضاحتو دیکو اسپہ قہر بغائے بلکہ فخر ہوئے۔ دی ای لوا پھوک دونیکہ پھریتام کی اسپہ سچ مچ گوجر دی بیتی کا اسپتے مہ گوجر نو ریتانی، اسپہ کا گنتانی دی نو، کھاڑ اڑغانی اویتام۔ (اوانی ہتیت دی نو) یادش بخیر!
ای دفعہ اسپہ شاعر سراج ساحل متے رے اسیتائے کی ہتوتے دی مہر کوری 'مہ گوجر' راک بیرائے. مگر ستم بالائے ستم ہیہ کی اسپہ ہیت دی کورا اسپتے 'زما گوجر' نو رے اسونی۔ انمول پلار، حمید پلار رینیان۔ تت نو بیکہ پت جون ایلیو محبوبو غونہ، آپ، وہ، جی را استانی۔

مشقولگی لہ۔
دوݰ سخت بوݰیکہ اوا بائیکہ دروسار گیاؤ اسیتام۔ شیشی کوہو تار رے ژاغا شیر ہیرا گیتی لوڑیتام کی تروئے ڈاقان سخت بوݰیکہ روڈتو دے ایہہ بینیان۔ پھوک کھوٹ وا چھوئیی غونی دی اوشوئے وا ہے ڈاقان اسیتانی دی کافی دخت۔ کم سے کم مہ غیچی ہݰ ہانی۔ اوا بائیکو ہتیتان نسہ روپھے گوجر وارا چالو ہوتام کی تروئے کھاڑان نو بوم الیکو، ایوالو کا گیور۔

ہے ڈاقان درونگار مہ موختو لوڑی وا ایغو موختو لوڑیکہ پرانی۔ ہتیتان موژا ایوالی متے کھوارا ریتائے: اے برار تو ݯھو، اسپہ دور ہیا تان شیر وا اچی اسپہ گوجر دی نو۔ تہ بو شکریہ!

اوا دی ہتیتان شکریو ادا کوری روان ہوتام۔ اوّلی پھوک شرمندگی محسوس اریتام وا اچھار خوشان خوشان فیل اریتام۔ شرمندگی ہݰ کی غلطی ہوئے وا ہے بدرقہ ڈاقان اوا گیکار اچی مہ سورا ہوسی ڈراما کورونی وا ای خور خیال دماغی گیکو خوشان ہوتام وا فخر محسوس اریتام ہسے ہݰ کی اوا کیہ احساسِ کمتریو اݰکار نو اساک بیریتام۔ کا کی دخت بیتی مہ روئیتو پرائے، دوسی گوجر وار کوریکو بومان۔ جون ایلیو محبوبو ہتے شرم، دہشت، جھجھک وا پریشانی نِکی مہ موژا۔
خائے تھے مشقولگی پوروزیتائے وا کورا گپ شپ دوسی زندگی کی بیرائے۔۔۔۔

پیشکش: #مئیرݯھترار

20/07/2026

کھوار سفر نامہ: قزاقستانار گنی اُزبکستانہ پت

سوتو پڑاو: طرازا گنی شِمکنتہ پت
نیویشاک: نور شمس الدین

طرازو لوڑی شامو 6 بجہ بیکو اچی اسٹیشنہ گیتی اسیتم۔ پاؤ کم سوت بجہ بیکو ریل راہی بیتی اوشوئے تروئے گھنٹہ اوچے پھتہ شِمکنتہ تارور۔ نیوف بجہ بیتی شیر بیری ہاؤل چھوئے باؤ گویان گھنٹہ اچہ ٹونگ ٹانگ بوئے۔ ہائی گرمیو موسمہ ہموݰ ۔ جوش بجہ بیکو ہاؤل چھوئے بویان اچی چھوچو چھور بجا یور تاروران۔ یومونو شامو پونچ بجہ نو بیکا پت تن چھوئے بویان اچی چھوچی اوشٹ بجا دی کہ یور توریکو راہ نکی۔

خائے تھے اوا آخر کار ہنون چھویو شمکنت رے ہے شہرا تارومن۔ ہیرا مہ بس بیکو ژاغہ اسٹیشنار پھت گھنٹو پونہ شیر۔ یعنی اوا جوش ای بجو عملہ تن ژاغا تاروم۔ بوت اوچے پیشینو ݰاپیکو ایتو دیتی پونج بجہ طرازا ژوتی اسوم۔ وا طرازو موژی کوسی خسمت دی بیتی اسوم۔ ہتیعین شمکنتہ بی چاغ بوم۔ بیری چھوئے بیکین نیݰی لوڑی کیاغ پوشیکو غراض نکی۔ خالی نیشیکو سار طراز کیچہ بیرائے وا کیاغ پوشیتم رے پستے لو دوم۔ مشقول باؤ کی بغاتم سفر آسان بوئے۔

طراز ژامبیل صوبو دارالخلافہ بالکل کرغزستانو طلاس رے صوبو سوم ݯوکی شیر۔ریل طرازو تے گیاوا وا طرازار شکمنتو تے بوغاوا کرغزستانو باڈرو گوݯو بیران۔ طرازا پت زوم شینی کرغزستان اوچے قزاقستانو موژی طرازار گنی شمکنتہ پت میدان ژاغہ۔ طرازار پھار نیسی کرغزستانی کی نیسیتاو گھنٹو پونہ طلاس رے کرغزستانو مشہور شہر شیر۔

جو سال پروشٹی جو ہفتہ ریسرچو کیہ کوروم اوشونی ہتیتان کوری اخیرا گیتی کرغزستانو شمال مغربو ویݰکی بی طلاس یونیورسٹیا ای کانفرنس اوشوئے۔ اوا پروفیسر ڈاکٹر میرافضل تاجک اوچے پروفیسر دیشون شماتوف قیادتہ ہی بی اسیتم۔ مہ ہتے کانفرنسہ بوغیلیک اوشوئے ڈاکٹر میر صاحب اچی قازقستانو تے ہائے اوا اوچے ڈاکٹر شمتوف ای بیتی بِشکیکار گاڑی نیشی پونچ گھنٹا طلاسہ تورتم۔

طلاس شہرا کانفرنسو منتظمین اسپہ ہوٹلین تارئیتانی۔ ہے کانفرنسہ شرکت کورارک روئے سف سنٹرل ایشو مختلف ملکار اوشونی ای اوا خور ملکار۔ ہغین دیتی ہے منتظمین مہ سم کوئے نو بیچیتانی۔ جم ݰاپیک اسپاتے دیتی بوتا پورور رے فارع بیکو اوا تن کمرا بی پوریکو تیاریا اسیتم دواہتہ کا ٹھخیتائے۔ کھولاؤ اریتم کی ہوٹلو اسٹاف کومورو۔ بو معذرت کوری ریتائے کی سر تہ نسی ہیہ کمرائی خور مینو دی اسور ہسے گُور چھویو تارور لہٰذا دواہتو اچھاوار بند نو کوری پورے۔ سورا نالی جام رے پوری تان تان سوم لوا ݯوکی منتظمینان تے ٹاراؤ کیاوت اوراری بوغدو بیراتم۔ ݰ راؤ کی ای ویݰکی متے تو اسپہ مینو رے ہر کا مہ سوم کوئے نو بیچئیتامی ای ویݰکی متے غیژی کمرا نو دونیان۔

تھے خیر چھوچی انگہہ ہوتام کی ہے ویݰکی بیڈا ای ݰئیلی نوجوان پوری موبائل کیتیران۔ اوا پھار لوڑیکو سلام کوریتائے۔ اوا تن تعارف کوریکو چق بیکو ہوسی ریتائے کی نور متے تہ بارا لو دیتی اسونی شکریہ کی تو اسپہ ملکہ کانفرنسہ شرکت کوریکو بچے ہاؤ۔ اوا بوکھوشش کوری ہواز نو کوری ہیا گیتی پورتم۔ سخت خوشان ہوتم تو پرسکون پوری استاؤ تہ اورارو مہ وجہیں خراب نو ہوئے۔ جواب اوا خوشان بیتی شکریہ رے تن تعاروف دی کی کوس ریکو ریتائے کی اوا حکومتو ویݰکیار خصوصی ہیہ کانفرنسو بچے بشکیکار گیتی اسوم۔ مہ نام اولان مامبیتاگونوف وا اوا کرغزستانو تعلیم اوچے سائنسو وزیر۔ ہیس تن تعارفو کوریکو بوتہ تان تان تے ٹارئیک مہ یادی گیتی مہ سخت شرم ہوئے۔ ہݰ رے کی ملکو وزیر غیژی کمرہ نو مݰکی اسور اوا قومی عادتار مجبور مفت خور بیتی لوٹ غیچ کوراؤاوشتم۔

ہے انوس تن ہسی باوا مشقولگیو موژی مامبیتاگونوف صاحب طلاسو تاریخو بارا مہ سم مشقول بیتی ریتائے کی طلاس اسپہ بو تاریخی ژاغہ۔ بو قدیمار آباد۔ 751 عیسویا عباسی خلافت او چے چینی تانگ سلطنتو موژی کیہ ژانگ بیتی نتیجہ ہیہ علاقہ یعنی ہیہ ویݰکی طلاسہ پھار ویݰکی طرازا عرب مسلمانن حکومت مضبوط ہوئے ہسے طلاسہ بیتی اوشوئے وا ہتے ژانگ طلاسو ژانگو نامہ تاریخہ مشہور۔ ہے مشقولگیا ہموݰ دی معلوم بیتی اوشوئے کی طلاسو ژانگار پروشٹی اموی دورا حاکم خراسان قتیبہ بن مسلم ثمرقند اوچے بخارو سو جوستہ ماورالنہرو کافی ژاغان گنی اموی خلیفہ ولید بن عبدالمالکو کوݰکی دیرو بیرائے مگر ای کما سال اچہ ولیدو څیق برار سلیمان خلافتہ گیتی ہتو اوچے قتیبہ و موژی ناچاقی بیکو ازبکستانو فرغانہ قتیبو تن فوج تو ماریرو بیرائے۔

ہیہ واقعار ای کما سال اچا اموی حکمرانن شکست بیتی عباسی خلافت ساؤز بیکو سو طلاسو ہے ژانگ بیرو بیرائے۔ ہے نتیجہ نہ صرف سنٹرل ایشاو اکژیتی علاقو عباسی مسلمان حکمرانن گنیرو بیرانی بلکہ چایئنو مغربو ویݰکی بولانجاؤ بیکو کیہ بے ہنگم طریقہ کی چولی شیرائے ہتیرا دی پولوغ بیرو بیرائے۔

ہے انوس تن کانفرنسو ژاغا ای پروفیسر طلاس اوچے طراز و تعلیمی تاریخو بارا مقالہ پیش اریر۔ چشٹو وختہ اوا ای کما اشناریان وضاحت مݰکی ہے پروفیسرو نسہ روپھی مشقول باوا وزیر تعلیم دی ہتیرا ہائے۔ وزیر تعلیم ہیرا گیتی ہاسیو وختو لوو اچی انگیتی ہتے طلاسو ژانگو بارا اوا کیہ لو کی دیاؤ اوشتم ہتیتن پروفیسر صاحب تتے مذید واضح کوئے ریکو ہاتے پروفیسر جوابہ ریتائے کی ہیت سف سہی مگر ژانگو اہمیت ہیہ نو کی مسلمانن جیت ہونی وا سنٹرل ایشیا اسلامی ریاست قائم ہوئے۔ بلکہ ہموݰ کی طلاسو ژانگو وجہین بخارا اوچے ثمرقند تاریخہ ہمیشو بچے زندہ بہچیتانی وا پورا وسطی ایشا اسلامی تاریخہ ای مقام لیتائے۔ ہیہ لوؤ ہوݰ نو اریتام ریکو ریتائے کی بخارا اوچے ثمرقندو گزشتہ جوش اوشٹ شور سالاری جو پہچان شینی۔ ای تجارتی وا ای علمی۔ جدید تاریخہ دی ہیہ لو ثابت کی طلاسو ژانگار پروشٹی کاغذ سازی صرف چینہ باؤشوئے وا طلاسو ہے ژانگہ عباسی فوج چینو کیہ قیدیان کی دوسی اسونی ہے قیدیان موژی کاعذ سازیو کاریگران دی اسیتانی۔ ہیتان مددو سورا وا ہیتن سر تربیت گنی ثمرقندا کاعذ سازیو اولو کارخانہ ساؤز بیرو بیرائے۔ ہیہ ہتے وختو مسلم دنیا اولو کاغذو کارخانہ بیرائے۔ ہمی لووان دیتی پروفیسر ریتائے کی ۔ ہتے وختہ علمی ترقی نو بیروا ثمرقند اوچے بخارا تتے کاروان سرائے ملاو بیسنی مگر شاید نا امام بخاریو لیسو، نہ عمر خیام کورا بیسیر وا نہ ابن سینا و کا ژانیسینی۔ ہے لوؤ دیکو مہ رومیٹ وزیر اولان مامبیتاگونوف مہ موختو لوڑی ریتائے کی، " نور! مہ ہاتے لو تن ہویا نو؟ تتے رے اسیتام ہیس ژانگہ جیت بیک نو علمو دروازان کھولاؤ کوریک اوشوئے"۔

طرازو تاریخی اہمیتو پھوک رو اندازہ دی ہے مشقولگیا متے بیتی اوشوئے۔ ہے پروفیسر تن رے اسیتائے کی ہیہ طلاسہ پھار نیسی قازقستانی کی نیستاؤ طراز رے ژاغہ شیر بوار بو شور کلومیٹرو فاصلہ شیر۔ ہے ژانگو وختہ طراز چینو فوجی چھاؤنی بیرائے۔ ژانگار اچی سِلک روڈا بیکین دیتی ثمرقند اوچے بخارو وا بَلخو غون تجارتی مرکز دی۔ اگرچہ طرازا ژانگ نو بی شیر مگر طلاسہ چین شکست بیکو ہتیت طرازو دی پیݯھی اچی بی اسونی وا ہے قسمہ طلاسہ مسلمانن حکومت بیکین طراز دی لش لش بیتی اسلامی سلطنتو قبضہ گیتی شیر۔ لہٰذا ہمݰ ریک غلط نو کی سنٹرل ایشا مسلمانن حکومت ماورالنہرار نیݰی کیاوت کی نیستائے سفان سر نست ہتو اثر طلاس اوچے طرازو سورا بی شیر۔

اوا ہیہ سفرا دی کرغزستانی نیسیم مگر طلاسہ نو بیم خور راہین کوسی اچی گوم۔ بس شرط ہیہ کی ویزہ کی پرانی درخواست دیتی اسوم۔ ہنیسے بغیر ویزا طلاسی نیسیرو بیراتم اچی گوسی۔
خائے تھے طرازو آبادی 4 لاکھ اوچے پھت مگر شہر 2 ہزار سال پرانو۔ قزاقستانو رقبہ زیادہ مگر فصلو بچے ای کما ژاغہ جم۔ ہتیتن موژی طرازو نسار نس زمین دی بیرائے۔ جنوبو ویݰکی دریائے طلاس ہیہ شہرو نسین میدانی علاقو آباد کوری شیر۔ اسلامی تاریخہ طرازو ذکر طلاسو سوم جوستہ ژانگ طلاس وجہین گویان مگر ہیہ شہر تاریخی حوالہ ہیغار دی پروشٹی آباد بیرائے۔ تمام مورخین ہیہ لووا متفق کی طراز کم از کم جو ہزار سال اوچے پھت پرانو شہر۔ وا دریائے طلاسو نسہ آباد بیکین اول چینی سلطنتو آباد چھاؤنی اچی سلک روڈو ای لوٹ پڑاو بیرائے۔طراز ہانی پرانو بیکو باوجودا ہتے وختو کھنڈراتن نو لیتم۔ مہ سوم وخت کم اوشوئے۔
ٹو جیس ای کمہ ژاغا پاشاؤ اوشوئے مگر شہرار بو نیݰی اوشونی۔ ٹو جیس ہمیتن گوگل میپو غون اشناری وا نابلد کوسک دویان مشکل کشا۔
پرانو بلڈنگن نو پوشیکو باوجودا بو ہݰ بلڈنگ پوشیتم کی ہتیت قزاقستانو ہے لوٹ شہرین نکی۔ ہتان لوڑی قدیم مسلمانان فن تعمیرو ای جھلک غیچی ہائے

قازقستانو دارلخلافا چھور سال ہل ہوتم۔ رینیان ہوتے مرکز مگر شیر کافی ژانگ ۔ بو جدید شہر۔ برطانیہ وا یورپو دی ای کما ملکین بی اسوم ای دَرزین شہران دی پوشی اسوم مگر آستانو انداز ہیش کورا نکی۔ بس تکلیف ہانی کی پونچ مس ہیم دویان۔ ہیس الگ لو کی شہر بند نو بویان کاروبار زندگی متاثر نو بویان بشلی نو بیران کوٹ انجی دوری کا نو نیشینیان۔ اوݰاکی کی بویان دی بیری بویان۔ دُوران، شاپنگ مالان، ہوٹلان اندرینی ہتے قسمہ تن گزارہ زاپ انجاؤ نیشینینان۔ بیری موسم منفی 30 بیکو دی اژیلیان گنی آئس کریم ژیباؤ شاپنگ مالی اسونی۔

آستانارعلاوہ شمالو ویݰکی قستانایے رے صوبہ شیر۔ ہے نامہ تن لوٹ شہر صوبو دارالخلافہ۔ ای ملگیریو وجھین کم وختو بچے ہے شہرا دی بی اسیتم ۔ مشرقو ویݰکی دی پاولدار وا سیمی رے شہرا بی اسوم۔ قازقستان ہے باقی ژاغان سار ہے جنوب مغربی حصہ بو خور بیرائے۔ موسمو حوالہ گرم فصل جم پیدا باک بیرائے۔ مگر سفان سار زیادہ خور شہر و انفراسٹرکچر وا ہتیغار دی خور رویان فکری رجحان۔

باقی قازقستان فن تعمیرو یا انسانی فکرو حوالہ کی لوڑتاؤ بو جدید دورو سوم برابر بلکہ پھاتی حوالہ بو پروشٹی۔ خاص کوری ہے ای کما لوٹ شہران کھیو لوؤ کی توری پھریتم۔ ہے شہرین رویان طرز زندگی بو خور۔ مطلب اوا ہݰ نو ریمن کی طراز شہر پورا قدیم۔ شہر جدید تن مگر شہر موژی کوسیکو پھتی بلڈینگ ہتے ہزار سال پرانو وختو اندازا ساؤزےشینی۔ روئے دی سف دقیانوسی نو مگر آستانو مقابلہ کافی مذہبی رجحان لکھک۔ حیران بیکو بݰ لو ہیہ کی طراز ریلو اسٹیشنار شہرا بیکو سوم ای نفریو تے ہیلو ریکو السلام علیکم ریتائے۔ بو وخت اچہ کا سلام کوریکو ہواز کارا دیتی قسمہ سریتائے۔ خور قزاقستانہ ہیلو ہائے شیر خاص کوری استانہ۔۔
آستانہ بیشیر سال پرانو کیاغ نکی۔ نوغ زمین آباد کوری نوغ فصل کیݰیرو غون رویان خیالات وا شہرو نظام ای کما سالو نوغ شیلوغ ساران۔ مگر طرازا بلکہ ہیا علاقہ ترکستانو ویݰکی کافی تاریخی مذہبی ورثہ غیچی گونیان ۔

شمکنت تھے ترکستانو دارلخلافہ تن بہچی شیر۔ ہیس البت څیق دی خور بوئے تھے ہیرا ای بس اسوم بلکہ سران ہݰ کی شمکنتہ تورتم مہ خیالہ۔ ریل لش گنیتائے، گاڑیہ لوڑیکو دی توریکوتے جوش پونچ منٹ بہچیتائے رے سران۔ چھوئے دی گُور ہوئے پسہ دی پورور اوا ہیرا ای اپارٹمنٹ بُک کوری اسوم ہاتیرا بی چاغ بوم۔ چھویو خسماتی نے انوسو شِمکنتو ژاناک بوم۔ نمازدیگارا ہموغاری ٹیکسی نیشی ازبکستانو باڈروتے بیمین۔ ہے گاڑی نیشی بوغاؤا شِمکنتو لوان پیستے دوم۔

پیش کش: #مئیرݯھترار

Address

New Hayat Market Bypass Road 2nd FloorNear TCS Office Chitral
Chitral
17200

Telephone

+923469183598

Website

http://www.khowarchitral.com/

Alerts

Be the first to know and let us send you an email when MIER Chitral posts news and promotions. Your email address will not be used for any other purpose, and you can unsubscribe at any time.

Contact The School

Send a message to MIER Chitral: