04/05/2026
تیرہ سال۔۔۔! یہ محض ایک عدد نہیں، ایک پوری دہائی کی ریاضت ہے، جو خیبر پختونخوا کے سنگلاخ چٹیلی و برفیلی راستوں سے لے کر دور افتادہ سکولوں کی دہلیز تک پھیلی ہوئی ہے۔ بطور استاد، میں اعتراف کرتا ہوں کہ ہم اساتذہ اور مانیٹرنگ اتھارٹی کا رشتہ ناچاقی کا شاخسانہ رہا ہے۔ کبھی کبھار ان کا تلخ لہجہ، اپنی حدود سے تجاوز اور وہ "حاکمانہ" تیور جن سے ہمارے اساتذہ اکثر نالاں رہے، اپنی جگہ ایک حقیقت ہیں۔ مگر آج جب میں اپنی پیشہ ورانہ انا کے حصار سے باہر نکل کر دیکھتا ہوں، تو مجھے اس "سخت گیر پہرے دار" کے پیچھے ایک سہما ہوا انسان نظر آتا ہے، جس کی حقیقتیں دیگر تمام حقائق سے برتر ہیں، اور وہ حقیقت یہ ہیں کہ تیرہ سالہ ریاضت و جدوجہد اور اپنے فرائض منصبی کو تندہی سے ادا کرنے کے بعد بھی ان کا اپنا گھر آج تک مٹی کے ڈھیر پر کھڑا ہے۔
اس حقیقت سے کون پہلو تہی کر سکتا ہے کہ ان تیرہ سالوں میں تعلیمی جمود کے برفیلے تودے اگر کسی نے پگھلائے ہیں، تو وہ یہی مانیٹرنگ اتھارٹی ہے۔ انہوں نے نظام کو "نظم" سے آگے بڑھ کر "جمالیاتی غزل" بنایا، سکھایا، مگر ریاست نے ان کی اپنی زندگی کو "نثر" بنا کر چھوڑ دیا۔ دوسروں کی حاضری کا حساب رکھنے والے ان ہاتھوں میں تیرہ سال بعد بھی اپنے حق کا کوئی "سروس رولز" نہیں۔ دوسروں کے وقت کی مانیٹرنگ کرنے والوں کی اپنی زندگی کا سورج ڈھلنے کو ہے، مگر ان کے نصیب میں نہ پروموشن کا سویرا ہے، نہ پنشن کی چھاؤں۔
ہنگو کی مٹی نے جب سیف اللہ خان کو اپنے اندر سمویا، تو دراصل اس نے ایک انسان کو نہیں بلکہ ایک "نظام کی بے حسی" کو دفن کیا۔ تیرہ سالہ وفاداری کا صلہ اگر یہ ہے کہ مرنے والے کے کفن کے لیے ساتھیوں کو دستِ سوال دراز کرنا پڑے، تو سمجھ لیجیے کہ ریاست اب "ماں" نہیں بلکہ ایک "بے رحم ساہوکار" بن چکی ہے جو صرف وصولی جانتی ہے، ادائیگی نہیں۔
بعد اس کے اپنے جائز حقوق کیلئے مانیٹرنگ آتھارٹی کے نمائندوں کی طرف سے ایک منظم مگر دھیما احتجاج شروع ہوا، حق مانگنے والے انہی ہاتھوں میں آدھی رات کو شوکاز اور برخاستگی کے پروانے تھمانا شروع ہوئے جو یہ ثابت کرتا ہے کہ انتظامیہ کے پاس دلیل ختم ہو چکی ہے۔ یہ "شوکاز نوٹسز" ان ملازمین کی توہین نہیں، بلکہ اس قانون کی تذلیل ہے جو کہتا ہے کہ ہر مزدور اپنی اجرت اور تحفظ کا حقدار ہے۔ یاد رکھیے! جس قلم سے آپ دوسروں کا مستقبل مٹانے کی کوشش کر رہے ہیں، وہی قلم کل تاریخ کے کٹہرے میں آپ کے خلاف کل گواہی دے گا۔
ہم اساتذہ ہیں، ہم نے ان کی سختیاں جھیلی ہیں، مگر ان کی "محرومی" کا تماشائی نہیں بن سکتے۔ کہ یہ چند سو افراد کا نہیں بلکہ سیکنڑوں ہزاروں گھرانوں کا نوحہ ہیں، اور اگر آج ان ہزاروں خاندانوں کے مستقبل سے یونہی کھلواڑ ہوتا رہا، تو کل کو یہ مانیٹرنگ نظام صرف کاغذوں میں زندہ رہے گا، روح اس سے رخصت ہو چکی ہوگی۔
اے ایوانوں میں بیٹھے منصفوں! یاد رکھو کہ "مجبور انسانوں سے مضبوط نظام نہیں بنتے"۔ ان کے مطالبات خیرات نہیں، ان کا لہو پسینہ ہیں۔ انہیں سروس سٹرکچر دیجیے، انہیں تحفظ دیجیے، اس سے پہلے کہ ان کی آہیں تمہارے بنائے ہوئے اس پورے تعلیمی ڈھانچے کو ہی بھسم کر دیں۔
انصاف میں تاخیر دراصل ایک خاموش قتل ہے، اور ہم اس قتل پر خاموش نہیں رہ سکتے۔
والسلام۔
