27/07/2026
ایک لڑکا اپنی ماں سے ناراض تھا اور اس سے بات نہیں کرتا تھا۔ ایک رات اس کی ماں کا انتقال ہو گیا۔
جب بیٹے کو خبر ملی کہ اس کی ماں فوت ہو گئی ہے تو وہ بہت زور زور سے رویا اور بے حد غمگین ہو گیا۔ کچھ دیر بعد لوگ آئے اور اس سے کہا: "جنازے کا وقت ہو گیا ہے، اسے قبرستان لے چلتے ہیں۔"
جنازہ اٹھایا گیا، بیٹے نے روتے ہوئے چارپائی کو کندھا دیا اور قبرستان کی طرف روانہ ہو گیا۔ جنازے کی نماز ادا کی گئی، پھر ماں کو قبر میں اتار دیا گیا۔ لوگوں نے بیلچے اٹھائے اور قبر پر مٹی ڈالنا شروع کر دی۔
بیٹا قبر کے کنارے غم سے نڈھال بیٹھا تھا، کیونکہ اس کی ماں ہمیشہ کے لیے اس سے جدا ہو چکی تھی۔ کچھ ہی دیر میں قبر تیار ہو گئی، مولوی صاحب نے دعا کروائی اور کہا: "اللہ تعالیٰ انہیں بخش دے۔"
پھر سب لوگ اپنے اپنے گھروں کو واپس چلے گئے، صرف ایک غم زدہ بیٹا پیچھے رہ گیا۔ کچھ دیر بعد وہ بھی اداس قدموں سے وہاں سے روانہ ہوا اور اپنی ماں کو تنہا چھوڑ آیا۔
ابھی وہ دس بارہ قدم ہی چلا تھا کہ اسے یوں محسوس ہوا جیسے اس کی ماں پکار رہی ہو: "میرے ناراض بیٹے! واپس آ جاؤ، مجھ سے صلح کر لو۔"
اسی لمحے لڑکا گھبرا کر نیند سے جاگ اٹھا۔ وہ پسینے میں بھیگا ہوا تھا اور اپنے آپ سے کہنے لگا: "خدا خیر کرے، میں نے کتنا خوفناک خواب دیکھا ہے۔"
رات کا باقی وقت وہ ڈر کے مارے سو نہ سکا۔ اس نے دل میں ارادہ کیا کہ صبح ہوتے ہی اپنی ماں سے صلح کر لے گا۔
جب صبح ہوئی تو وہ دوڑتا ہوا اپنی ماں کے کمرے میں گیا تاکہ اسے بتا سکے: "ماں! میں نے رات خواب دیکھا کہ آپ فوت ہو گئی ہیں۔"
لیکن ماں نے کوئی جواب نہ دیا۔ وہ ماں کے پاس بیٹھ گیا اور بولا: "ماں! کچھ تو بولیں، آج کے بعد میں کبھی آپ سے ناراض نہیں ہوں گا۔"
مگر افسوس... اس کی ماں واقعی دنیا سے جا چکی تھی۔ 🥹💔
دوستو! اس دنیا میں ماں جیسی نعمت دوبارہ نہیں ملتی۔ جن کے والدین زندہ ہیں وہ ان کی قدر کریں، ان سے محبت کریں اور ان کا دل نہ دکھائیں۔ اور جن کے والدین اس دنیا سے جا چکے ہیں، اللہ تعالیٰ ان کی مغفرت فرمائے۔
آمین یا رب العالمین۔ 🤲
