18/09/2019
ہم کیا چاہتے۔۔آزادی ہے حق ہمارا آزادی۔ ہم چھین کے لیں گے ۔ آزادی۔ بھارت سے لیں گے آزادی۔ شہیدوں اور غازیوں کی سرزمین باغ کے در و بام، کھیت وکھلیان،عمارات و سٹرکات آزادی کے نعروں سے گونج اٹھے۔آزادکشمیر پرائیویٹ سکولز و کالجز ایسوسی ایشن کے زیر اہتمام طلباء اساتذہ کی باغ کی تاریخ کی ایک بڑی آزادی کشمیر ریلی اسپرنگ فیلڈ کالج باغ بائی پاس سے گیاری چوک تک نکالی گئی جس میں ہزاروں طلبہ و اساتذہ شریک ہو کر اپنے فلک شگاف نعروں سے بھارت کو ناکوں چنے چبوانے کا پیغام دے رہے تھے اور مقبوضہ کشمیر میں اپنے مظلوم بھائیوں اور بہنوں کے ساتھ اظہار یکجہتی کر رہے تھے۔ریلی کی قیادت ایپسکا کے مرکزی ،ضلعی اور تحصیل کے عہدیداروں کے علاوہ تمام پرائیویٹ تعلیمی اداروں کے سربراہان کررہے تھے۔مقررین نے اقوام متحدہ اور عالمی طاقتوں سے مطالبہ کیا کہ وہ مقبوضہ کشمیر میں ڈھائے جانےوالے مظالم کو رکوائیں ۔ ڈیڑھ ماہ سے کشمیریوں کو دنیا سے کاٹ کر رکھ دیا گیاہے ۔اور وہاں انسانی جانوں کا بڑا المیہ رونما ہو رہا ہے۔دنیا اپنی آنکھیں کھول کر ان مظالم کو دیکھے۔کشمیر کا بچہ بچہ کٹ مرے گا مگر ہندوستان سے آزادی حاصل کر کے دم لے گا۔ایک قرار داد کے ذریعے سیاسی اور فوجی قیادت سے مطالبہ کیا گیا کہ وہ کشمیر کی آزادی کے لئے فیصلہ کن کردار ادا کرے ۔ہم افواج پاکستان کے شانہ بشانہ کھڑے ہیں ۔
