Galiyat Development Authority, Abbottabad

ڈائریکٹر جنرل گلیات ڈویلپمنٹ اتھارٹی محمد فواد کی ہدایات اور ہائی کورٹ ایبٹ آباد بینچ کے احکامات کی روشنی میں ڈائریکٹر بی سی اے کی نگرانی میں گلیات ڈویلپمنٹ اتھارٹی نے نتھیاگلی میں غیر قانونی تعمیرات کے خلاف کارروائی کرتے ہوئے غیر قانونی ڈھانچہ مسمار کر دیا جبکہ متعدد غیر قانونی کیبن سیل کر دیے گئے۔
بلڈنگ انسپکٹر توصیف احمد نے کارروائی کی قیادت کرتے ہوئے قواعد و ضوابط کی خلاف ورزی کرنے والوں کے خلاف سخت اقدامات اٹھائے۔ کارروائی کے دوران غیر قانونی تعمیرات اور تجاوزات کو ختم کیا گیا جبکہ متعلقہ افراد کے خلاف قانونی کارروائی بھی عمل میں لائی گئی۔
جی ڈی اے حکام کے مطابق گلیات میں غیر قانونی تعمیرات کسی صورت برداشت نہیں کی جائیں گی اور خلاف ورزی کے مرتکب افراد کے خلاف بھاری جرمانے عائد کیے جائیں گے۔ حکام نے کہا کہ گلیات کے قدرتی حسن، ماحولیات اور ماسٹر پلان کے تحفظ کے لیے غیر قانونی تعمیرات کے خلاف آپریشن بلاامتیاز جاری رہے گا۔

ڈائریکٹر جنرل گلیات ڈویلپمنٹ اتھارٹی محمد فواد کی ہدایات اور ہائی کورٹ ایبٹ آباد بینچ کے احکامات کی روشنی میں ڈائریکٹر بی سی اے نے گلیات کا تفصیلی دورہ کیا اور مختلف جاری ترقیاتی و انتظامی سرگرمیوں کا معائنہ کیا۔
دورے کے دوران انہوں نے مختلف مقامات پر جاری کاموں کا جائزہ لیا اور متعلقہ افسران کو ہدایت کی کہ منصوبوں کی بروقت تکمیل، معیار اور ہائی کورٹ ایبٹ آباد بینچ کے احکامات پر عملدرآمد کو یقینی بنایا جائے۔
ڈائریکٹر بی سی اے نے پولیس چوکی خیراگلی کا بھی دورہ کیا، جہاں انہوں نے پولیس حکام سے ملاقات کی اور گلیات ڈویلپمنٹ اتھارٹی کے فیلڈ سٹاف کے ساتھ مکمل تعاون یقینی بنانے کی ہدایت کی تاکہ سیاحوں کی سہولت، ٹریفک نظم و ضبط، تجاوزات کے خاتمے اور عوامی خدمات کی فراہمی کو مزید مؤثر بنایا جا سکے۔
انہوں نے کہا کہ گلیات میں سیاحوں اور مقامی آبادی کو بہتر سہولیات کی فراہمی، ماحولیات کے تحفظ اور ہائی کورٹ ایبٹ آباد بینچ کے احکامات پر مؤثر عملدرآمد کے لیے تمام اداروں کے درمیان باہمی تعاون ناگزیر ہے۔ اس موقع پر متعلقہ افسران نے جاری سرگرمیوں اور انتظامی امور کے حوالے سے بریفنگ بھی دی۔

گلیات ڈویلپمنٹ اتھارٹی، انویٹرز مونٹیسری سکول سسٹم، یوتھ پارلیمنٹ پاکستان اور پاکستان تحریک نوجوانان کے اشتراک سے مری روڈ اور چنار روڈ میں صفائی مہم کا انعقاد کیا گیا۔ مہم میں سکول کے طلبہ نے بھرپور جوش و خروش کے ساتھ حصہ لیا اور علاقے کو صاف ستھرا رکھنے کے عزم کا اظہار کیا۔

صفائی مہم میں گلیات ڈویلپمنٹ اتھارٹی کے اسسٹنٹ ڈائریکٹر احسن حمید، چیئرمین پاکستان تحریک نوجوانان و یوتھ پارلیمنٹ پاکستان اسامہ ندیم قریشی، نیمل کے سی ای او بلال حمید، میڈیا کوآرڈینیٹر حمداللہ خان اور میکس لرننگ ہوم کے شاہد جدون،انویٹرز مونٹیسری سکول سسٹم کی کواڈینٹر سمیت دیگر افراد نے شرکت کی۔

اس موقع پر مقررین نے کہا کہ صفائی نصف ایمان ہے اور صاف ستھرا ماحول صحت مند معاشرے کی بنیاد ہے۔ انہوں نے کہا کہ نوجوان نسل میں صفائی، ماحول دوستی اور سماجی ذمہ داری کے شعور کو فروغ دینا وقت کی اہم ضرورت ہے۔ مقررین نے طلبہ کی بھرپور شرکت کو سراہتے ہوئے کہا کہ ایسے اقدامات نہ صرف ماحول کے تحفظ میں مددگار ثابت ہوتے ہیں بلکہ نئی نسل میں مثبت شہری رویوں کو بھی فروغ دیتے ہیں۔

مہم کے دوران شرکاء نے مری روڈ اور چنار روڈ کے اطراف صفائی کی، جبکہ شہریوں میں صفائی کی اہمیت اور ماحول کو آلودگی سے پاک رکھنے کے حوالے سے آگاہی بھی فراہم کی گئی۔ تقریب کے اختتام پر شرکاء نے ایبٹ آباد کو صاف، سرسبز اور خوبصورت سیاحتی خطہ بنانے کے عزم کا اعادہ کیا۔