Ang Iskolar

𝗘𝗗𝗜𝗧𝗢𝗥𝗬𝗔𝗟 | 𝗣𝗮𝘆𝗮𝘀𝗼 𝘀𝗮 𝗦𝗲𝗻𝗮𝗱𝗼

Mula sa dating tinitingalang Senado, tila isang malaking komedya ang itinanghal sa bulwagan nito ngayong linggo simula ika-11 hanggang ika-13 ng Mayo, 2026. Sa halip na seryosong deliberasyon, mga personal na bangayan at kakatwang drama ang nanaig sa pagpupulong. Nagmistula itong sirkong ang talakayan ay tungkol lamang sa kanilang mga personal na interes. Ito ba ang mga ipinagmamalaki nating mga lider na maghahatid sa atin ng hustisya at kapayapaan? Karapat-dapat bang ipagkatiwala sa kanila ang kinabukasan ng mga susunod na henerasyon? Sa mga pangyayaring ito sa Senado, tama bang sila ang mga nakaluklok ngayon sa puwesto?

Ating nasubaybayan ang mainit na tensyon sa pagitan nina Sen. Francis “Kiko” Pangilinan at Sen. Robinhood Padilla sa plenaryo noong Martes. “I will file a complaint,” wika ni Padilla matapos pagtaasan ng boses ni Pangilinan habang pinag-uusapan ang isyung umiikot kay Sen. Ronald “Bato” dela Rosa. Sa kanyang pagiging dating action star, tila nadala rin niya ang pag-uugaling ito sa loob ng bulwagang lohika ang dapat namamayani. Imbes na batas at talino, emosyon at angas ng isang aktor ang mas pinaiiral sa institusyong binuo para sa katwiran.

Hindi rin nakatulong ang naging tugon ni dela Rosa sa kaniyang pagdalo noong Miyerkules. "Kung hindi ako papasok hinahanap niyo ako diba? Ngayong papasok ako tatanungin niyo ako bakit ako pumapasok,” sagot niya sa media. Naniniwala kaming ang paid absences ng senador ay isang halimbawa ng korapsyon. Galing sa kaban ng bayan ang ipinapasweldo sa kanila—salaping dugo’t pawis ng mamamayan na nagiging pambakasyon lamang ng mga buwaya.

Lalo pang naging kahindik-hindik ang sitwasyon nang himukin ng National Bureau of Investigation (NBI) si dela Rosa na sumuko sa arrest warrant ng International Criminal Court (ICC). Ayon kay NBI Director Atty. Melvin Matibag, marapat sanang mapayapang harapin ng senador ang batas gaya ng hiling nito sa mga kriminal noong siya ay nasa law enforcement pa. Ngunit sa halip na sumuko, nagmatigas ang senador. Tila nakalimutan na niya ang kanyang mga nakaraang maton na pahayag tulad ng "Make my day" at ang hamong magpaaresto sa ICC; ngayong narito na ang warrant, bigla siyang naduwag at nagtago. Ang insidenteng ito ay humantong sa habulan sa loob mismo ng Senado, kung saan umalingawngaw ang putok ng baril na nagdulot ng lockdown sa institusyon.

Sa halip na maging ehemplo ng pagsunod sa batas, ipinakita ng mga opisyal na ito na may nakalaang special treatment para sa mga nasa itaas, habang ang ordinaryong mamamayan ay mabilis na nagagapos sa kamay ng katarungan. Ang ganitong pag-iwas ay hindi katapangan—ito ay paglapastangan sa sagradong institusyong kaniyang kinakatawan. Kung ang mga tagagawa ng batas mismo ang unang lumalabag at nagtatago rito, anong mensahe ang ipinaabot nito sa sambayanan? Dahil sa paghabol ng dayuhang korte sa isang lokal na mambabatas na pinoprotektahan ng sarili nating sistema, nag-iiwan ito ng malaking mantsa sa ating soberanya. Darating na lamang ba tayo sa punto na maging ang buong mundo ay mawawalan na ng tiwala sa ating bansa?

Sa bawat segundong kanilang inuubos, unti-unting gumuho ang tiwala ng taumbayan sa integridad ng Senado. Hindi kailangan ng bansa ng mga aktor, pugante, at mga payaso sa gobyerno; ang kailangan natin ay mga tunay na lingkod-bayan. Nawa’y maging leksiyon ang pangyayaring ito upang tayo’y maging wais sa bawat boto na ating ibibigay. Huwag magpaalipin sa bulok na sistema, bagkus ating isipin ang kapakanan ng masa.

𝗗𝗜𝗕𝗨𝗛𝗢 | Grace Isabelle Sarmiento

𝗕𝗔𝗟𝗜𝗧𝗔 | 𝗧𝗲𝗻𝘀𝘆𝗼𝗻 𝘀𝗮 𝗦𝗲𝗻𝗮𝗱𝗼, 𝘀𝘂𝗺𝗶𝗸𝗹𝗮𝗯 𝗺𝗮𝘁𝗮𝗽𝗼𝘀 𝗮𝗻𝗴 𝗽𝗮𝗴-𝘂𝘀𝗮𝗱 𝗻𝗴 𝗶𝗺𝗽𝗲𝗮𝗰𝗵𝗺𝗲𝗻𝘁 𝘁𝗿𝗶𝗮𝗹 𝗻𝗶 𝗩𝗣 𝗗𝘂𝘁𝗲𝗿𝘁𝗲

Naging mainit ang isyu sa Senado matapos ang pagpapatuloy ng impeachment trial ni Vice President Sara Duterte at ang pagbabalik ni Senador Ronald “Bato” Dela Rosa, ngayong linggo.

Inaprubahan ng Kamara ang rekomendasyon ng House Committee on Justice na i-impeach muli sa ikalawang pagkakataon si VP Duterte. Umabot sa 255 ang pabor, 26 ang kumontra, at siyam ang nag-abstain sa naganap na botohan. Dahil lumampas ang bilang sa kinakailangang 106 na boto o ⅓ ng mga miyembro, opisyal nang dinala sa Senado ang Articles of Impeachment noong Miyerkules.

Nahaharap si Duterte sa mga alegasyon ng culpable violation of the Constitution, graft and corruption, betrayal of public trust, bribery, at iba pang high crimes. Samantala, mariing itinatanggi ng kampo ng Bise Presidente ang mga akusasyon. Binigyang-diin nila na ang mga reklamong ito ay walang sapat na batayan at bahagi lamang ng pamumulitika ng kaniyang mga kritiko.

𝗣𝗮𝗴𝗽𝗮𝗽𝗮𝗹𝗶𝘁 𝗻𝗴 𝗹𝗶𝗱𝗲𝗿𝗮𝘁𝗼
Kasabay ng paghahanda para sa paglilitis, nagkaroon ng pagbabago sa liderato ng Senado. Nahalal si Sen. Alan Peter Cayetano bilang bagong Senate President sa botong 13-9, kapalit ni Sen. Vicente “Tito” Sotto III. Kasama ring inihalal si Sen. Loren Legarda bilang Senate President Pro Tempore at si Sen. Joel Villanueva bilang acting majority leader.

Naganap ang botohan sa pagbabalik ni Sen. Ronald “Bato” Dela Rosa na isa sa mga bumoto kay Cayetano. Humihingi si Dela Rosa ng protective custody sa Senado laban sa posibleng pag-aresto ng International Criminal Court (ICC) dahil sa kampanya laban sa ilegal na droga ng nakaraang administrasyon. Nanindigan ang senador na gagamitin niya ang lahat ng legal remedies habang naghihintay ng Temporary Restraining Order (TRO) mula sa Korte Suprema.

Tinutulan naman ng Philippine Coalition for the International Criminal Court (PCICC) at ilang legal experts ang paggawad ng proteksyon kay Dela Rosa. Argumento nila, walang ligal na batayan ang Senado upang magsilbing santuwaryo laban sa isang opisyal na may 'arrest warrant'.

𝗛𝗶𝗱𝘄𝗮𝗮𝗻 𝘀𝗮 𝗦𝗲𝗻𝗮𝗱𝗼
Bago ang tensyon sa labas ng plenaryo, nagkaroon ng matinding pagtatalo sa loob ng session hall sa pagitan nina Sen. Robin Padilla at Sen. Francis "Kiko" Pangilinan. Nag-ugat ito sa hiling ni Padilla na talakayin agad sa pagdinig ng Senado ang tangkang pag-aresto kay Dela Rosa.

Giit naman ni Pangilinan, nailipat na ang usapin sa Committee on Rules upang hindi maantala ang ibang nakalinyang agenda ng Senado. Nagdulot ito ng sigawan at bantaan ng ethics complaint sa pagitan ng dalawa. Nanindigan si Pangilinan na normal ang pagtataas ng boses sa debate at nagbanta ng kontra-reklamo laban kay Padilla dahil sa paglabag sa decorum. Kinumpirma naman ng Office of the Sergeant-at-Arms (OSAA) na walang pisikal na suntukang nangyari sa dalawang mambabatas.

Isinailalim sa lockdown ang gusali ng Senado matapos makarinig ng mga putok ng baril sa ikalawang palapag noong gabi ng Miyerkules. Ayon sa Presidential Communications Office (PCO), nagmula ang unang warning shot sa OSAA dahil sa girian sa pagitan ng mga guwardiya ng Senado at mga armadong law enforcement personnel na nagtangkang pumasok sa complex upang isilbi ang warrant kay Dela Rosa.

Inihayag ni Senate President Cayetano na ang institusyon ay "under attack" at pinabulaanan ang mga espekulasyon na planado o "drama" lamang ang pangyayari. Sa kabilang banda, kinondena ni Senador Risa Hontiveros ang insidente at nanawagan na huwag gamitin ang kapangyarihan ng institusyon upang takasan ang pananagutan sa batas. Walang iniulat na nasugatan sa mga mambabatas, at kinumpirmang nakalabas na si Dela Rosa sa compound bago mag-umaga noong Huwebes.

Samantala, inaaasahang matutuloy ang session sa Senado para sa impeachment trial ni VP Duterte sa Lunes.

𝗨𝗟𝗔𝗧 | Jon Jedwin Pineda at Alezanah Niway Eleazar
𝗣𝗔𝗚𝗪𝗔𝗪𝗔𝗦𝗧𝗢 | Lebron Lejano
𝗣𝗔𝗚-𝗔𝗔𝗡𝗬𝗢 | Hisham Narag

𝗕𝗔𝗟𝗜𝗧𝗔 | 𝗧𝗩 𝗕𝗿𝗼𝗮𝗱𝗰𝗮𝘀𝘁𝗶𝗻𝗴 𝗧𝗲𝗮𝗺 𝗻𝗴 '𝗔𝗻𝗴 𝗜𝘀𝗸𝗼𝗹𝗮𝗿', 𝗻𝗮𝗴-𝘂𝘄𝗶 𝗻𝗴 𝗽𝗮𝗿𝗮𝗻𝗴𝗮𝗹 𝘀𝗮 𝗨𝗣 𝗼𝗻 𝗔𝗶𝗿

Nakamit ng TV broadcasting team ng 'Ang Iskolar' ang ilang parangal sa ginanap na "On Air: TV broadcasting competition and masterclass" ng UP Broadcasting Association sa UP Diliman ngayong araw.

Nakuha ng kanilang grupo ang ikatlong pwesto sa Best Technical Application. Nakamit naman ni Areal Iringan ang ikatlong pwesto sa Best News Anchor.

Layunin ng patimpalak na ito na mahubog ang kakayahan ng mga journo ang kanilang husay sa pagbabalita, mapanuring pag-iisip, at masalamin ang tunay na kalagayan ng balita sa telebisyon sa pamamagitan ng pagtutulungan.

𝗨𝗟𝗔𝗧 | Jon Jedwin Pineda
𝗣𝗔𝗚-𝗔𝗔𝗡𝗬𝗢 | Hisham Narag

𝗕𝗔𝗟𝗜𝗧𝗔 | 𝗧𝗩 𝗕𝗿𝗼𝗮𝗱𝗰𝗮𝘀𝘁𝗶𝗻𝗴 𝗧𝗲𝗮𝗺 𝗻𝗴 '𝗔𝗻𝗴 𝗜𝘀𝗸𝗼𝗹𝗮𝗿' 𝗸𝗮𝘀𝗮𝗱𝗼 𝗻𝗮 𝘀𝗮 𝗨𝗣 𝗢𝗻-𝗔𝗶𝗿 𝟮𝟬𝟮𝟲

Matapos mapabilang ng TV broadcasting team ng 'Ang Iskolar' sa isa sa sampung mga paaralan mula sa Luzon na maglalaban-laban sa isasagawang competition ng UP Broadcasting Association na "On Air: TV broadcasting competition and masterclass," sasabak na ang kanilang grupo para sa huling bahagi ng competition, bukas May 11, 2026.

Dinaluhan ito ng ilan sa mga batikang mamamahayag tulad nina Danilo Arao at Adrian Ayalin na nagbahagi rin ng kanilang karanasan sa larangan ng pamamahayag

Naghahanda na ang buong grupo, sa pangunguna ni G. Alvin D. Mendaros upang mas mapaghusay pa at mapatalas ang kakayahan bago sumabak sa paligsahan.

Mula sa aming mga puso, pagpapala sa inyo, TV Broadcasting Team!

𝗨𝗟𝗔𝗧 | Lebron Lejano
𝗣𝗔𝗚-𝗔𝗔𝗡𝗬𝗢 | Hisham Narag

𝗜𝗦𝗞𝗢𝗠𝗜𝗞𝗦 𝟬𝟬𝟏: 𝗔𝗻𝗴 𝗜𝗻𝗮 𝗻𝗴 𝗶𝘀𝗮? 𝗮𝘆 𝗶𝗻𝗮 𝗻𝗮𝘁𝗶𝗻𝗴 𝗹𝗮𝗵𝗮𝘁!

Sa mga inang todo kung kumayod,
nagtiyaga’t nagsipag para sa kanilang mga nilag—este alaga
Alagang-alaga habang nasa sinapupunan pa lamang,
Hanggang ngayon, na tatapak na sa panibagong mundong dala ang sulo ng pag-asa.

Sila na nagsilbing ilaw ng tahanan na tanglaw tungo sa ating mga pangarap. Bitbit nila ang pag-asa na mas nagpapatatag sa ating kalooban upang magpatuloy na lumaban at makipagsapalaran sa hirap ng buhay.

Sa mga inang hindi kayang tiisin ang anak,
Ibinuhos ang dugo’t pawis, mapunan lamang ang pangangailangan.
Sa mga inang hindi napapagod at naglalaan ng oras,
upang makinig at turuan tayong maging mabuting tao.

Kaya ngayong 𝗔𝗿𝗮𝘄 𝗻𝗴 𝗺𝗴𝗮 𝗜𝗻𝗮, Mommy, Nanay, Mama, at kung ano pa mang tawag sa kanila. Ipagdiwang natin ang katatagan at kagitingan ng kanilang puso’t isipan. Kulang ang salitang “Salamat” sa inyong dedikasyon sa lahat ng inyong ginawa para sa ikabubuti ng inyong pamilya.

Kaya naman, kung saan mang entablado natin sila makita ay taas noo natin silang palakpakan at ipagmalaki sa lahat. Sapagkat, ang Ina ng isa? ay ina nating lahat—may iisang nais na makitang masaya sa buhay ang kanilang mga anak na inaruga’t iningatan.

𝗗𝗜𝗕𝗨𝗛𝗢 | Morielle Gwen Garcia
𝗣𝗔𝗡𝗨𝗟𝗔𝗧 | Lebron Lejano

𝗞𝗢𝗟𝗨𝗠 | 𝗞𝗮𝘀𝘆𝗮 𝗽𝗮 𝗯𝗮?

Sa gitna ng lumalalang gulo sa pagitan ng mga bansa, bakas sa hindi maipintang mukha ng mga manggagawa ang pangamba, hindi lamang dahil sa giyera, gayundin sa kanilang mga bulsa. Sa bawat pagtaas ng presyo ng langis — sumasabay rin ang paghagupit ng presyo ng mga bilihin. Tila isang bagyong tatangayin ang kahuli-hulihang sentimo ng mga pilipinong hindi tiyak kung may maihahain pa ba sa hapag kinabukasan. Sa patuloy na pagtaas ng mga bilihin at mabagal na pagtaas ng pasahod ay tiyak na napatanong ka na rin sa sarili ng “Kasya pa ba?”

Batay sa datos na inilabas ng Philippine Statistics Authority (PSA) noong ika-5 ng Abril, bumagsak sa 75 sentimos ang Purchasing Power of the Peso (PPP) kung ikukumpara sa piso noong 2018 o pagbaba ng humigit kumulang 33.3%. Matindi ang naging epekto nito sapagkat sa tuwing humihina ang PPP, tumataas ang mga bilihin at mas naghihirap ang mga Pilipino. Kung dati’y ang sardinas ay nabibili sa halagang 17 pesos, ngayon ay nagkakahalaga na ito ng 22 pesos. Ang mas nakakabahala pa ay ang mabagal na pagtaas ng sahod. Ayon sa Department of Labor and Employment (DOLE), ang minimum wage para sa mga non-agricultural worker ay 537 pesos na kung ikukumpara sa kasalukuyang minimum wage ay umangat lamang ng 29.4%. Ang mga numero na ang nagsasabi sapagkat kung tatantyahin ay mas maliit nang 3% ang iyong kinikita kung ikukumpara noong 2018. Maliit man, ito ay isang malinaw na indikasyong kulang ang pagtaas ng sahod ng mga Pilipino.

Ikaw man o ako, damang-dama natin ang hirap ng lahat lalo na ang mga nagtatrabaho upang tulungan ang kani-kanilang mga pamilya. Ngunit sa ganitong panahon, ang pag-ahon sa kahirapan ay suntok sa buwan sapagkat ang bawat piso ay siguradong masisimot mula sa inyong mga pitaka dulot ng mahal na gastusin at mababang sahod.

Ayon sa ulat ng Philippine News Agency (PNA), higit isang milyong mga driver na ang nabigyan ng fuel subsidy ng pamahalaan habang patuloy naman ang pagbibigay ng ayuda ng Department of Social Welfare and Development (DSWD) sa mga kapos ang kita sa pamamagitan ng mga programa tulad ng Ayuda sa Kapos ang Kita Program (AKAP) at Pantawid Pamilyang Pilipino Program (4Ps) upang matugunan ang kasalukuyang krisis.

Nagpataw din ng price freeze ang Department of Trade and Industry (DTI) para sa mga pang-araw-araw na pangangailangan na tatagal hanggang sa ika-10 ng Mayo habang isinusulong naman ng mga mambabatas ang pagtataas ng tax exemption sa taunang kita ng mga mamamayan alinsunod sa Tax Reform for Acceleration and Inclusion (TRAIN) law upang matulungan ang mga middle-income earners sa kasalukuyang lagay ng ekonomiya.

Gayunman, sa kabila ng mga aksyon ng pamahalaan, para sa akin ay mahirap sabihing ang mga programang ito ay konkreto, epektibo at makatutulong upang maibsan ang kahirapan. Oo, ang mga programang ito ay nakatutulong sa mga Pilipino lalo na sa mga itinuturing na poor, vulnerable, at disadvantaged sector. Subalit kung titingnan ito para sa pangmatagalang epekto, ito ay kulang na kulang. Hindi makakabangon ang mga pamilya sa pamamagitan ng kakaunting tulong mula sa pamahalaan, at mas lalong hindi magiging mabuti ang pag-asa sa gobyerno upang matugunan ang mga pangangailangan.

Batay pa sa DOLE, 695 pesos ang kasalukuyang minimum wage para sa mga non-agriculture workers para sa mga naninirahan sa Metro Manila o halos 18,000 pesos kada buwan. Kung ikukumpara sa “cost of living” sa Metro Manila, ay mapipilitan kang magtitipid kung ikaw ay isang minimum wage earner. Ngunit kung magpapatuloy pa ang labis na pagtaas ng bilihin, saan ka pupulutin kung mananatiling mababa ang iyong sahod?

Ilan sa ating mga kababayan ay lumuluwas patungo sa iba’t ibang bansa upang magtrabaho sapagkat kulang ang sahod sa ating bayan upang matustusan ang mga pangangailangan ng kani-kanilang pamilya. Batay sa estadistika mula sa Department of Migrant Workers, patuloy ang pagtaas ng bilang ng mga Pilipinong nangingibang bansa dahil dito. Gayunpaman, kahit na malinaw na mababa ang sahod sa Pilipinas, kung mananatiling nakapako ang pagtaas ng sahod, matitigil din ang pag-unlad ng bansang unti-unti nang nililisan ng mga mamamayan upang makaahon sa kahirapan.

Lumipas na ang halos isang taon nang huling itinaas ang sahod ng mga manggagawa. Ilang numero na ang nadagdag sa presyo ng mga bilihin. Gayunman, tila hindi pa rin napupukaw ang atensyon ng mga mambabatas. Ang sambayanang Pilipino ay hindi lamang nakaasa sa mga programa ng pamahalaan, marami ang napipilitan dahil sa kulang na pasahod at sobra-sobrang pagtaas ng mga bilihin.

𝘒𝘶𝘯𝘨 𝘵𝘶𝘯𝘢𝘺 𝘯𝘢 𝘮𝘢𝘺 𝘮𝘢𝘭𝘢𝘴𝘢𝘬𝘪𝘵 𝘴𝘢 𝘢𝘵𝘪𝘯 𝘢𝘯𝘨 𝘱𝘢𝘮𝘢𝘩𝘢𝘭𝘢𝘢𝘯, 𝘩𝘪𝘯𝘥𝘪 𝘴𝘢 𝘮𝘢𝘭𝘢𝘭𝘢𝘬𝘪𝘯𝘨 𝘬𝘶𝘮𝘱𝘢𝘯𝘺𝘢 𝘥𝘢𝘱𝘢𝘵 𝘯𝘢𝘬𝘢𝘵𝘶𝘰𝘯 𝘢𝘯𝘨 𝘮𝘨𝘢 𝘢𝘬𝘴𝘺𝘰𝘯𝘨 𝘪𝘴𝘪𝘯𝘶𝘴𝘶𝘭𝘰𝘯𝘨 𝘬𝘶𝘯𝘥𝘪 𝘯𝘢𝘴𝘢 𝘮𝘨𝘢 𝘮𝘢𝘯𝘨𝘨𝘢𝘨𝘢𝘸𝘢𝘯𝘨 𝘯𝘢𝘨𝘵𝘢𝘵𝘳𝘢𝘣𝘢𝘩𝘰 𝘶𝘱𝘢𝘯𝘨 𝘮𝘢𝘵𝘶𝘨𝘶𝘯𝘢𝘯 𝘢𝘯𝘨 𝘮𝘨𝘢 𝘱𝘢𝘯𝘨𝘢𝘯𝘨𝘢𝘪𝘭𝘢𝘯𝘨𝘢𝘯. 𝘏𝘪𝘯𝘥𝘪 𝘢𝘺𝘶𝘥𝘢 𝘢𝘯𝘨 𝘮𝘢𝘨𝘭𝘢𝘭𝘢𝘨𝘢𝘺 𝘯𝘨 𝘱𝘢𝘨𝘬𝘢𝘪𝘯 𝘴𝘢 𝘩𝘢𝘱𝘢𝘨𝘬𝘢𝘪𝘯𝘢𝘯. 𝘔𝘢𝘬𝘢𝘵𝘢𝘳𝘶𝘯𝘨𝘢𝘯𝘨 𝘴𝘢𝘩𝘰𝘥. Dito mawawala ang tanong na “kasya pa ba?”

𝗣𝗔𝗡𝗨𝗟𝗔𝗧 | Vince Gallardo
𝗣𝗔𝗚𝗪𝗔𝗪𝗔𝗦𝗧𝗢 | Jon Jedwin Pineda
𝗣𝗔𝗚-𝗔𝗔𝗡𝗬𝗢 | Jeanina Dominique Pineda

𝗕𝗔𝗟𝗜𝗧𝗔 | 𝗚𝗔𝗟𝗜𝗡𝗚 𝗡𝗚 𝗣𝗨𝗡𝗢𝗡𝗚 𝗥𝗘𝗛𝗜𝗬𝗢𝗡!
National Capital Region, Muling Kinilala sa NSPC 2026

Matapos makipag tagisan ang mga manunulat at mamamahayag ng NCR, matagumpay muling nasungkit ang ikalawang pwesto sa pinakamahuhusay na rehiyon.

Nakamit din ng ating rehiyon ang unang pwesto na pinakamahusay sa Elementary level, at ikalawang pwesto sa Secondary group categories.

Isa itong pag-arangkada mula sa ikalimang pwestong pagkilala noong NSPC 2025, at patunay sa mas maalab na pagharap ng mga mamamahayag pangkampus sa loob at labas ng entablado.

𝗨𝗟𝗔𝗧 𝗔𝗧 𝗣𝗔𝗚-𝗔𝗔𝗡𝗬𝗢 | Hisham Narag
𝗠𝗚𝗔 𝗟𝗔𝗥𝗔𝗪𝗔𝗡 | Ma. Cecilia Atok

𝗕𝗔𝗟𝗜𝗧𝗔 | 𝗧𝗩 𝗕𝗿𝗼𝗮𝗱𝗰𝗮𝘀𝘁𝗶𝗻𝗴 𝘁𝗲𝗮𝗺 𝗻𝗴 𝗘𝗾𝘂𝗶𝗹𝗶𝗯𝗿𝗶𝘂𝗺, 𝗺𝘂𝗹𝗶𝗻𝗴 𝘂𝗺𝗮𝗿𝗶𝗯𝗮 𝘀𝗮 𝗡𝗦𝗣𝗖 2026

Matapos ang mahigit limang taon ay muling nakatuntong sa entablado ng National Schools Press Conference ang mga delegado mula sa Valenzuela City School of Mathematics and Science, kasama ang mga delegado mula sa Punturin Senior High School at Far Eastern University.

Nasungkit ng kanilang grupo ang ikalimang puwesto para sa pinakamahusay na produksiyong pantelebisyon mula sa labing-walong rehiyon sa buong bansa.

Sa indibidwal na gantimpala, nakamit ni Kurt B. Estrella ang ikaapat na pwesto para sa pinakamahusay na direktor pantelebisyon. Sa group awards, nasungkit naman ng kanilang grupo ang ikaapat na pwesto sa technical application at developmental communication.

Patunay lamang ang mga gantimpalang ito sa husay at dedikasyon na tangan-tangan ng mga delegado upang mairepresenta ang rehiyon ng National Capital Region sa pinakamataas na entablado para sa mga batang journo.

𝗨𝗟𝗔𝗧 | Lebron Lejano
𝗣𝗔𝗚-𝗔𝗔𝗡𝗬𝗢 | Hisham Narag
𝗠𝗚𝗔 𝗟𝗔𝗥𝗔𝗪𝗔𝗡 | Ma. Cecilia Atok

𝗦𝗔 𝗠𝗚𝗔 𝗟𝗔𝗥𝗔𝗪𝗔𝗡 | Sa masiglang pagbubukas ng National Schools Press Conference (NSPC) 2026, pumarada ang mga kalahok kabilang ang National Capital Region (NCR) kahapon, ika-13 ng Abril sa SM Ormoc, Leyte.

Libo-libong campus journalists mula sa iba’t ibang rehiyon sa bansa ang dumalo sa kompetisyon upang makilahok sa iba’t ibang patimpalak sa pamamahayag.

Layunin ng limang araw na kompetisyon na itampok ang mahalagang papel ng mga kabataang mamamahayag sa pagiging mapanuri at maging boses ng katotohanan.

𝗨𝗟𝗔𝗧 | Majella Atheena Aguila
𝗣𝗔𝗚-𝗔𝗔𝗡𝗬𝗢 | Hisham Narag
𝗠𝗚𝗔 𝗟𝗔𝗥𝗔𝗪𝗔𝗡 | Alvin Mendaros

𝗟𝗔𝗧𝗛𝗔𝗟𝗔𝗜𝗡 | 𝗦𝗶𝗻𝗼 𝗮𝗻𝗴 𝗧𝘂𝗻𝗮𝘆 𝗻𝗮 𝗠𝗮𝗴𝗶𝘁𝗶𝗻𝗴?

“Araw ng Kagitingan…”

Pormal na inialay para sa mga sundalong nagbuwis ng buhay sa Bataan noong Ikalawang Digmaang Pandaigdig.

Sa kasalukuyan, samu’t saring mga tao ang makikita’t makikilala. Sa loob man o labas ng pamantasan–bawat isa sa kanila, dala-dala ang isang kwento ng kagitingang hindi makukwestyon ninuman. Halika’t kilalanin natin ang ilan sa kanila…

𝗦𝗶 𝗦𝘂𝗻𝗱𝗮𝗟𝗢𝗟𝗢

Matagal nang nagseserbisyo sa kanilang kampo. Tila nakita na niya ata ang bawat klase ng bala at bomba na pilit inaasinta ang buhay na kaniyang inalay para sa bayan.

Ang tanging hiling lamang niya ay matapos na ang bawat gulo’t giyera at makauwi na sa kaniyang pamilya.

𝗦𝗶 𝗠(𝗡)𝗮𝗿𝘀 𝗘𝗱𝗲𝗻

Hindi na siguro mabilang sa mga kamay niya ang dami ng mga pasyenteng inalagaan niya. Mula sa sundalong naputukan ng bomba sa paa, matandang pilit na lumalaban sa kanilang karamdaman, hanggang sa isang ina na nagluwal ng panibagong buhay sa mundong ibabaw.

Naalok na magtrabaho sa ibang bansa–ABA, mapapabilib ka dahil dalawang dekada na siyang nag-aalaga at nagbubuhos ng puso sa bawat pasyente. Hindi siya natukso ng mas mataas na sahod sa ibang bansa, sapagkat para sa kanya, ang tunay na kayamanan ay ang ngiti ng mga taong gumaling, ang pasasalamat ng mga pamilya, at ang karangalang maging bahagi ng kanilang laban at tagumpay.

𝗦𝗶 𝗧𝗮𝘁𝗮𝘆 𝗧𝗦𝗨𝗽𝗲𝗿

Pinalaki ng kalsada’t minulat sa mga busina na tila isang musika ng pag-asa sa kaniyang asawa at mga anak. Gigising pa ng mas maaga sa pagsalubong ng haring araw at uuwi sa pagningning ng mga bituin sa kalangitan.

Apektado man ng pagtaas ng petrolyo, hindi naman matatawaran ang kaniyang pagseserbisyo sa mga pasaherong matiyagang naghihintay na maisakay upang maihatid sa kanilang paroroonan.

𝗦𝗶 𝗡𝗮𝗻𝗮𝘆 𝗖𝗛𝗔𝗥𝗶𝗲

Paborito niya ang salitang “Char” bilang pampasigla sa kaniyang klase. Tangan-tangan niya sa umaga ang bag na naglalaman ng kaniyang mga kagamitan para sa mahigit limang klase na papasukan.

Hindi man sapat ang kinikita sa pagtuturo, ngunit sapat na para sa kaniya ang maging tulay tungo sa pagbabago. Mahigpit man sa kaniyang klase, malambot naman ang ginintuang puso nito sa pagtulong sa kapos-palad nitong mga estudyante.

𝗦𝗶 𝗔𝗟𝘆𝗦𝗔

Sa bawat anggulo na ata ng camera, makikita mo ang pagtaas niya sa isang bandera na ang nakasulat, “EDUKASYON NG MAMAMAYAN, IPAGLABAN.” Kung may klase lamang sa pakikibaka, panigurado, isa siya sa laging present sa asignaturang ito.

Matagal nang mulat sa sistemang nagpapahirap sa kanilang bansa, kaya’t kahit hindi man singlakas ng mikropono ang kaniyang boses ay hindi siya humintong makipagsapalaran para sa pagbabago ni isang beses.

Sa pagmulat mo sa iyong mga mata at paglabas sa mahahabang kalye’t daan, paniguradong nakita mo sila kahit minsan. Ilan lamang sila sa mga taong hindi lamang magiting, ngunit dakila. Kaya… Sino nga ba ang tunay na magiting? Ang aking kasagutan ay…

𝘈𝘬𝘰, 𝘪𝘬𝘢𝘸, 𝘢𝘵 𝘵𝘢𝘺𝘰 𝘢𝘺 𝘵𝘶𝘯𝘢𝘺 𝘢𝘵 𝘮𝘢𝘯𝘢𝘯𝘢𝘵𝘪𝘭𝘪𝘯𝘨 𝘮𝘢𝘨𝘪𝘵𝘪𝘯𝘨 𝘩𝘢𝘯𝘨𝘨𝘢’𝘵 𝘱𝘢𝘵𝘶𝘭𝘰𝘺 𝘢𝘯𝘨 𝘢𝘵𝘪𝘯𝘨 𝘱𝘢𝘨𝘵𝘪𝘯𝘥𝘪𝘨 𝘴𝘢 𝘣𝘢𝘺𝘢𝘯 𝘯𝘢 𝘢𝘵𝘪𝘯𝘨 𝘭𝘶𝘣𝘰𝘴 𝘢𝘵 𝘱𝘪𝘭𝘪𝘵 𝘯𝘢 𝘱𝘪𝘯𝘪𝘱𝘪𝘭𝘪.

𝗣𝗔𝗡𝗨𝗟𝗔𝗧 | Lebron Lejano
𝗣𝗔𝗚𝗪𝗔𝗪𝗔𝗦𝗧𝗢 | Jon Jedwin Pineda
𝗣𝗔𝗚-𝗔𝗔𝗡𝗬𝗢 | Hisham Narag