KANAFIL - PSU Urdaneta City

𝐇𝐚𝐧𝐝𝐚 𝐤𝐚 𝐧𝐚 𝐛𝐚𝐧𝐠 𝐦𝐚𝐠𝐩𝐚𝐦𝐚𝐥𝐚𝐬 𝐧𝐠 𝐠𝐚𝐥𝐢𝐧𝐠 𝐚𝐭 𝐦𝐚𝐠𝐢𝐧𝐠 𝐭𝐢𝐧𝐢𝐠 𝐧𝐠 𝐩𝐚𝐠𝐛𝐚𝐛𝐚𝐠𝐨?

Sa pagdiriwang ng 𝗕𝘂𝘄𝗮𝗻 𝗻𝗴 𝗣𝗮𝗻𝗶𝘁𝗶𝗸𝗮𝗻 𝟮𝟬𝟮𝟲, ang 𝗞𝗮𝗽𝗶𝘀𝗮𝗻𝗮𝗻 𝗻𝗴 𝗺𝗴𝗮 𝗡𝗮𝗴𝗽𝗮𝗽𝗮𝗸𝗮𝗱𝗮𝗹𝘂𝗯𝗵𝗮𝘀𝗮 𝘀𝗮 𝗙𝗶𝗹𝗶𝗽𝗶𝗻𝗼 (𝗞𝗔𝗡𝗔𝗙𝗜𝗟) ay buong siglang nagbubukas ng mga patimpalak na magsisilbing tanghalan ng husay, talino, at malikhaing pag-iisip ng mga mag-aaral ng PSU–Urdaneta. Sa Temang “𝘽𝙚𝙠ë𝙩 𝙋𝙖𝙣𝙞𝙩𝙞𝙠𝙖𝙣: 𝙋𝙖𝙧𝙖 𝙨𝙖 𝙆𝙖𝙩𝙬𝙞𝙧𝙖𝙣 𝙖𝙩 𝙆𝙖𝙡𝙞𝙠𝙖𝙨𝙖𝙣,” inaanyayahan ang lahat na makilahok sa mga gawain na magpapalalim sa pag-unawa sa panitikan bilang sining, wika, at sandata ng kamalayan.

Sa larangan ng sining biswal at digital na pagpapahayag, inihahandog ang mga patimpalak na GUHITikan at Pani-KLIK-an, kung saan ang imahinasyon ay isinasalin sa biswal na sining at makabagong midya, na nagbibigay-buhay sa panitikan sa malikhaing pamamaraan. Samantala, sa larangan ng wika, pagsusulat, at kritikal na pag-iisip, tampok ang SULAT-tikan at Pani-THINK-an mga hamon na susubok sa lalim ng pag-unawa, husay sa pagbuo ng kaisipan, at kakayahang magpahayag ng malinaw, makabuluhan, at mapanuring ideya. Para naman sa mas masigla at interaktibo, inihahandog ang RUN-FUN-tikan at BINGO, kung saan ang kooperasyon, talino, at kasiyahan ay magsasanib upang higit na mapalalim ang pagkatuto sa panitikan sa mas dinamiko at nakakaengganyong paraan.

Kaya ano pa ang hinihintay ninyo? I-tag na ang inyong mga kaklase at kaibigan na handang sumabak sa mga hamong ito na tiyak na magpapakita ng kanilang galing at husay bilang mag-aaral ng Filipino.

Ang rehistrasyon ay bukas hanggang 𝗔𝗯𝗿𝗶𝗹 𝟮𝟰, 𝟮𝟬𝟮𝟲, 𝟭𝟭:𝟱𝟵 𝗣𝗠. Siguraduhing magparehistro agad sa mga link na makikita sa bawat larawan upang makakuha ng slot.

Tara na’t mag-bekët para sa panitikan, katwiran at kalikasan!

Isinulat ni: John Michael Fernandez
Disenyo ni: James Clyde Motea

𝗞𝗔𝗡𝗔𝗙𝗜𝗟 | 𝗕𝗨𝗪𝗔𝗡 𝗡𝗚 𝗣𝗔𝗡𝗜𝗧𝗜𝗞𝗔𝗡 𝟮𝟬𝟮𝟲

"𝐀𝐧𝐠 𝐩𝐚𝐧𝐮𝐥𝐚𝐭 𝐧𝐚 𝐢𝐬𝐢𝐧𝐚𝐬𝐚𝐰𝐬𝐚𝐰 𝐬𝐚 𝐭𝐢𝐧𝐭𝐚 𝐧𝐠 𝐤𝐚𝐭𝐨𝐭𝐨𝐡𝐚𝐧𝐚𝐧 𝐚𝐲 𝐚𝐧𝐠 𝐩𝐢𝐧𝐚𝐤𝐚𝐦𝐚𝐭𝐚𝐥𝐚𝐬 𝐧𝐚 𝐬𝐚𝐧𝐝𝐚𝐭𝐚 𝐬𝐚 𝐩𝐚𝐠-𝐮𝐤𝐢𝐭 𝐧𝐠 𝐦𝐚𝐬𝐢𝐧𝐢𝐧𝐠 𝐚𝐭 𝐥𝐮𝐧𝐭𝐢𝐚𝐧𝐠 𝐛𝐮𝐤𝐚𝐬."

Sa gitna ng mabilis na pagbabago ng panahon at ang banta ng kaisipang mapanira sa ating kalikasan at kasaysayan, ang panitikan ay nagsisilbing matibay na moog ng ating pagkakakilanlan. Hindi lamang ito imbakan ng mga kuwento, ito ay buhay na daluyan ng ating mga paninindigan at ang sulo na tumatanglaw sa madidilim na sulok ng ating kamalayan bilang isang lahi.

Ngayong Abril, buong kabuklod na ipinagdiriwang ng Kapisanan ng mga Nagpapakadalubhasa sa Filipino (KANAFIL) ang 𝘽𝙪𝙬𝙖𝙣 𝙣𝙜 𝙋𝙖𝙣𝙞𝙩𝙞𝙠𝙖𝙣 2026 𝙣𝙖 𝙢𝙖𝙮 𝙩𝙚𝙢𝙖𝙣𝙜 "𝘽𝙚𝙠ë𝙩 𝙋𝙖𝙣𝙞𝙩𝙞𝙠𝙖𝙣: 𝙋𝙖𝙧𝙖 𝙨𝙖 𝙆𝙖𝙩𝙬𝙞𝙧𝙖𝙣 𝙖𝙩 𝙆𝙖𝙡𝙞𝙠𝙖𝙨𝙖𝙣." Ang konseptong bekët mula sa kulturang Agutaynën ay nagsisilbing paanyaya sa atin upang pagbigkisin ang ating mga talino at talento, isang panawagan na gamitin ang kapangyarihan ng salita upang protektahan ang ating kapaligiran at itaguyod ang katarungang panlipunan.

Bilang mga mag-aaral at tagapagtaguyod na nagpapakadalubhasa sa ating wika, naniniwala ang KANAFIL na ang bawat titik na ating isinusulat at bawat tula na ating binibigkas ay may kakayahang magpunla ng pagbabago. Tungkulin nating tiyakin na ang ating panitikan ay mananatiling tapat sa katwiran at mapagkalinga sa ating inang kalikasan.

Sa pagyakap natin sa diwa ng bekët, nawa'y maging masigla ang ating pakikilahok sa paglikha ng mga akdang hindi lamang nagpapaganda sa pahina, kundi nagpapakilos din sa masa para sa isang mas maliwanag at mas luntiang kinabukasan.

Tayo na't magkaisa, lumikha, at manindigan!

Isinulat ni: John Michael Fernandez
Disenyo ni: Joriz Carl D. Dalanon

𝐊𝐀𝐍-you 𝐓𝐇𝐈𝐍𝐊 𝐀𝐁𝐎𝐔𝐓 𝐈𝐓! 🤔

𝗞𝘂𝗺𝘂𝘀𝘁𝗮, 𝗣𝗦𝗨𝗻𝗶𝗮𝗻𝘀!
Sa pagpasok ng buwan ng Abril, may isang bagay tayong dapat abangan, isang salitang hindi lang basta binabasa, kundi inuunawa at nararamdaman.

Kaya naman, samahan ang KANAFIL sa munting pagtuklas na ito,
kung saan ang bawat pahiwatig ay unti-unting bubuo sa hiwaga nito.

Kaya halina’t makilahok, makibahagi at makihula, hanggang ang lihim na salita ay tuluyang maipakita ✨🔮

Narito ang ikalawang hamon na susubok sa talas ng inyong isipan! 🧠🧩

📌 Upang maging ganap na kalahok:
• I-follow at i-like ang page ng KANAFIL
• I-share ang post na ito
• I-comment ang inyong sagot
• Maghanda ng screenshot bilang patunay

Narito ang clue upang inyong masagutan ang nasa larawan:

“Ito ay ang ginamit na apelyido at sagisag-panulat ng isang kilalang makata sa kaniyang mga akda bilang pagkilala sa kanyang katutubong pinagmulan.”

Ang huling makapagbibigay ng tamang sagot hanggang 11:59 PM at makasusunod sa mechanics ang siyang mananalo! 🎉

𝐊𝐀𝐍-𝐘𝐎𝐔 𝐓𝐇𝐈𝐍𝐊 𝐀𝐁𝐎𝐔𝐓 𝐈𝐓! 🤔

𝗞𝘂𝗺𝘂𝘀𝘁𝗮, 𝗣𝗦𝗨𝗻𝗶𝗮𝗻𝘀!
Sa pagpasok ng buwan ng Abril, may isang bagay tayong dapat abangan, isang salitang hindi lang basta binabasa, kundi ito ay inuunawa at nararamdaman.

Kaya naman, samahan ang KANAFIL sa munting pagtuklas na ito,
kung saan ang bawat pahiwatig ay unti-unting bubuo sa hiwaga nito.

Kaya halina’t makilahok, makibahagi at makihula, hanggang ang lihim na salita ay tuluyang maipakita ✨🔮

Narito ang unang hamon na susubok sa talas ng inyong isipan! 🧠🧩

📌 Upang maging ganap na kalahok:
• I-follow at i-like ang page ng KANAFIL
• I-share ang post na ito
• I-comment ang inyong sagot
• Maghanda ng screenshot bilang patunay na nagawa ninyo ang una at ikalawang mekaniks.

Ang unang makapagbigay ng tamang sagot at makasunod sa mekaniks ang siyang mananalo! 🎉

KANA-FEEL: Damdamin ng Kababaihan, Lakas ng Pamumuno

Nakiisa ang Kapisanan ng mga Nagpapakadalubhasa sa Filipino (KANAFIL) sa pagdiriwang ng National Women’s Month 2026 sa ginanap na “SHERO: Celebrating Historical and Contemporary Babaylans” na inorganisa ng Alliance of Advocates for Gender and Development noong Marso 30, 2026 sa Student Activity Center.

Sa pangunguna ni Joriz Carl Dalanon, Pangulo ng KANAFIL, kasama ang mga kapwa opisyales na sina Khay C. Honrado (Tagasuri), Vealy Rendon (Kalihim), at Angela Ordoña (Pangalawang Kalihim), aktibong nakiisa ang organisasyon sa nasabing aktibidad.

Layunin ng pakikiisang ito na higit pang mapalawak ang kaalaman at perspektibo ng mga kasapi, lalo na sa paghubog ng mas inklusibo at epektibong liderato.

Tampok sa programa ang mga makabuluhang talakayan mula kina Dr. Jeanilyn L. Villanueva, na nagbigay-diin na ang pamumuno ay hindi nakabatay sa kasarian kundi sa kakayahan, at Atty. Abigail C. Bañares, na nagbigay-linaw sa iba’t ibang katangian ng liderato sa iba’t ibang konteksto.

Naging bahagi rin ng aktibidad ang mga gawaing tulad ng Quiz Bee, Gaya-Gaya: Babaeng Bida, at Fireside Chat, kasama ang mga kalahok mula sa iba’t ibang kampus gaya ng Asingan at Bayambang.

Sa kabuuan, ang pakikiisang ito ay hindi lamang naging pagkakataon upang makilahok, kundi isang hakbang tungo sa paghubog ng mas mulat, inklusibo, at responsableng liderato sa hanay ng mga mag-aaral.

FUNTASTIKA: Aral at Likha

Nagpatuloy ang sigla at husay sa ikalawa at huling araw ng EDUK’s Week 2026!

Sa ikalawang araw, nagbigay-inspirasyon si Dr. Edna E. Fregillana sa pamamagitan ng kanyang talakayan ukol sa "Preparing Future Teachers for Real-World Classroom Challenges", habang ibinahagi naman ni Dr. Ma. Kimberly Zarate Velasco ang mahahalagang kaalaman tungkol sa "21st Century Teaching Skills for Future Educators". Ang bawat sesyon ay punong-puno ng ideya, motibasyon, at praktikal na gabay na huhubog bilang handa at mahusay na g**o ng bukas.

Pagsapit ng hapon, napuno naman ng saya, pagkamalikhain, at kompetisyon ang kapaligiran! Mula sa pagdidisenyo ng kakaibang kasuotan sa Trashion Show Making, patalinuhan sa Quiz Bee, patalasan ng salita sa Scrabble, hanggang sa tawanan sa Pinoy Henyo, bawat aktibidad ay naghatid ng enerhiya, pagkakaisa, at hindi malilimutang alaala.

Sa ikatlong araw, nagtapos ang selebrasyon sa isang makabuluhang webinar na may temang “Enhancing Ecosystem Education in Vietnam Through Climate Box Initiative,” na nagbigay ng mas malalim na kamalayan sa papel ng edukasyon sa pangangalaga ng kalikasan.

Mula ikalawa hanggang ikatlong araw, tunay na naipamalas ang diwa ng FUNTASTIKA: Galak, Talino, at Likha, isang pagdiriwang ng talino, likha, at pusong edukador.

FUNTASTIKA: Pagpapakita ng Galing at Pagkakaisa

Sumabog ang kulay, sigla, at enerhiya sa unang araw ng EDUK’s Week 2026! Mula sa makulay na Parade hanggang sa matinding labanan sa Carnival King & Queen, Bench Yell, at Organization and Block Banner, ipinakita ng bawat organisasyon at programa ang kanilang kakaibang galing at pagkakaisa.
Hindi rin nagpahuli ang mga kalahok sa mga palaro tulad ng Amazing Race, Jump Your Luck, Laro ng Lahi, at Balloon Race, pati na rin sa online games na MLBB at COD, patunay na ang FUNTASTIKA ay hindi lang saya, kundi laban ng talino, diskarte, at puso!

Kapsyon ni: John Michael Fernandez
Layout ni: Joriz Carl Dalanon

Nakiisa ang Kapisanan ng mga Nagpapakadalubhasa sa Filipino (KANAFIL) sa pagdiriwang ng ika-28 anibersaryo ng City Charter ng Lungsod ng Urdaneta sa pamamagitan ng pakikilahok sa "Istoryahan sa Parke" ngayong ika-19 ng Marso, 2026. Ginanap ang aktibidad sa Julio E. Parayno Sr. People's Park sa ganap na alas-4:00 ng hapon, na inorganisa ng Urdaneta City Library sa pakikipagtulungan ng Urdaneta City University at Pangasinan State University-Urdaneta.

Naghandog ang KANAFIL ng isang masining na pagkukuwento at pagsasadula ng maikling kwentong "Ang Prinsipeng Ayaw Maligo" na kinatampukan ng mga mag-aaral sa elementarya bilang pangunahing manonood. Sa pamamagitan ng malikhaing pagganap ng mga miyembro, matagumpay na naibahagi sa mga bata ang mahahalagang aral tungkol sa kalinisan at kalusugan habang ipinagdiriwang ang yaman ng wikang Filipino sa gitna ng selebrasyon ng lungsod.

Bilang bahagi ng adbokasya sa pagsuporta sa edukasyon, nagpamahagi rin ang KANAFIL ng mga school supplies para sa mga mag-aaral na dumalo. Ang munting handog na ito ay naglalayong magbigay ng karagdagang inspirasyon sa mga bata na ipagpatuloy ang kanilang pag-aaral nang may sigasig at kagalakan.

Hiraya Manawari, Future LPT’s!

Sa bawat araw ng paghahanda, bawat gabing piniling magpatuloy sa kabila ng pagod, lahat ng ito ay bahagi ng isang pangarap. Isang pangarap na balang araw ay tumayo sa harap ng silid-aralan at magbigay-liwanag sa isipan ng susunod na henerasyon.

Sa araw na ito, patunayan ang inyong matagal nang pinaghandaan, gawin ang inyong 100% makakaya at higit sa lahat ipaubaya sa AMA ang mga susunod pa.

Pauna nang pagbati mga Future LPT's —
- LET Marso 2026,
dala ninyo hindi lamang ang kaalaman,
kundi ang layuning maglingkod at maghubog ng kinabukasan.

Nawa’y magsilbing tanglaw ang inyong dedikasyon sa araw ng pagsusulit.

Para sa mga hinaharap na lisensiyadong g**o ng bayan hangad namin ang inyong tagumpay. 🎓📚
-2025

𝗢𝗣𝗜𝗦𝗬𝗔𝗟𝗘𝗦 𝗡𝗚 𝗞𝗔𝗡𝗔𝗙𝗜𝗟 𝗧.𝗣. 𝟮𝟬𝟮𝟲–𝟮𝟬𝟮𝟳

“Ang pamumuno ay hindi lamang nasusukat sa kakayahan, kundi sa tapang na manindigan, maglingkod, at maging tinig ng nakararami.”

Ipinagmamalaki naming ipakilala ang mga bagong halal na opisyales ng Kapisanan ng mga Nagpapakadalubhasa sa Filipino (KANAFIL) para sa Taong Panuruan 2026–2027. Sila ang mga mag-aaral na pinagkatiwalaan ng tungkulin upang manguna sa pagpapatuloy at pagpapaigting ng misyon, bisyon, at mga adhikain ng ating samahan.

Taos-pusong pagbati at pagpupugay sa inyong pagkakahalal. Nawa’y magsilbi kayong huwaran ng tapat, responsable, at makabuluhang pamumuno para sa kapakanan ng bawat kasapi.

Nawa’y maging matagumpay at makabuluhan ang inyong panunungkulan bilang mga lider ng KANAFIL. 🇵🇭✨

Kapsyon ni: 𝐉𝐨𝐧𝐚𝐥𝐲𝐧 𝐒. 𝐃𝐨𝐭𝐨𝐧