05/10/2024
SUNDAY GOSPEL – OCTOBER 6, 2024
Twenty-seventh Sunday in Ordinary Time
SI JESUS MAGTUDLO MAHITUNGOD SA PAKIGBULAG - MARCOS (Mk. 10:2-12)
Ug dihay mga pipila ka mga Pariseo nga misulay pagbitik kaniya. Nangutana sila, “Nagtugot ba ang atong Balaod kang bisan kinsa sa pagbulag sa iyang asawa?” (Mk. 10:2)
Si Jesus misumbalik sa pagpangutana kanila, “Unsa may gisugo ni Moises kaninyo?” (Mk. 10:3)
Mitubag sila, “Mitugot si Moises nga ang bana makahimo pagbulag sa iyang asawa human niya sulatig sulat sa pakigbulag ang iyang asawa.” (Mk. 10:4)
Miingon si Jesus kanila, “Gihimo kining sugoa ni Moises kay kamo gahi mag ulo. (Mk. 10:5)
Apan sa sinugdan, sa pagbuhat sa kalibutan, ‘gibuhat sa Dios ang lalaki ug babaye. (Mk. 10:6)
Tungod niini, mobiya ang lalaki sa iyang amahan ug sa iyang inahan ug makighiusa sa iyang
asawa, (Mk. 10:7)
ug silang duha mahimo nang usa.’ Busa ang bana ug ang asawa dili na duha, kondili usa na lamang. (Mk. 10:8)
Tungod niini kinahanglan nga dili bulagon sa tawo ang gihiusa sa Dios.” (Mk. 10:9)
Sa didto na sa balay, nangutana ang mga tinun-an kang Jesus mahitungod ning butanga. (Mk. 10:10)
Miingon siya kanila, “Ang bana nga mobulag sa iyang asawa ug makigminyog laing babaye, nakapanapaw batok sa una niyang asawa; (Mk. 10:11)
ug ang babaye nga mobulag sa iyang bana ug makigminyo og laing lalaki, nanapaw usab.” (Mk. 10:12)
GIPANALANGINAN NI JESUS ANG MGA BATA - MARCOS (Mk. 10:13-16)
May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. (Mk. 10:13)
Sa pagkaalinggat ni Jesus niini, nasuko siya ug miingon sa iyang mga tinun-an, “Paaria kanako ang mga bata. Ayaw silag did-i kay ang Gingharian sa Dios ila sama niining mga bata. (Mk. 10:14)
Timan-i ninyo kini: ang dili modawat sa paghari sa Dios sama sa usa ka bata, dili mahisakop niini.” (Mk. 10:15)
Unya iyang gipangugos ang mga bata, gitapion ang iyang mga kamut kanila, ug gipanalanginan sila. (Mk. 10:16)
REFLECTIONS - MARCOS (Mk. 10:2-16)
Ang kaminyoon.
Ang Biblia klarong namahayag sa Plano sa Diyos kabahin sa pagkalalaki ug pagkababaye. Gihimo nga lalaki ug babaye, sa ato pa dili hingpit ang tagsa tagsa. Gibuhat sila sa Diyos nga managsama ug gusto niya nga maghiusa sila sa bugkos nga mas hugot ug lig-on kay sa bugkos tali sa ginikanan ug mga anak (Genesis 1:26; 2:24).
Apan kining planoha sa Diyos wala tahora sa tawo tungod sa duha ka katarongan:
Ang una mao nga ang kadaghanan sa mga lalake mas kusgan kaysa mga babaye. Tungod ini gipanag-iya nila ang mga asawa daw butang. Sa laing bahin ang gugma sa tawo dili sama sa gugma sa Diyos, kay ang ilang gugma dili man kinatibuk-an ang pagtahan sa kaugalingon; dunay kinutuban. Alang sa Diyos ang gugma ug pag-inunongay dili mabulag. Ang Diyos maunongon kanunay sa iyang gihigugma. Kanunay ning napamatud-an sa paglapas sa tawo sa kasabotan. Tungod sa iyang pag-unong na Manluluwas siya sa tanan.
Ang gugma ug ang pag-inunongay balaod sa kaminyoon. Walay lain pamaagi. Ang mga pulong ni Jesus pranka ug walay lipudlipod bisag giunsa pa siya pagbirabira aron mopabor sa panagbulag.Unsay iyang ikasulti kon magluib ang kapikas? Dili ni makapawala sa gipanumpaan. Mao sab ni ang baroganan sa Simbahan bisag nakasabot ug nalooy sa nabiktima sa pagluib (Mateo 5:31).
Dili na sila duha (b.😎. Ang teksto sa Genesis nag-ingon: mahimo silang usa (2:24). Kining maong tudling sabton isip mithi nga angayng kab-oton sa magtiayon. Apan ang giingon ni Jesus mao nga ang bana ug asawa dili na duha, apan usa ka lawas. Niining paagiha dili na maputol ang bugkos sa kaminyoon.
Busa, dili bulagon… (b.9). Wala ipanghimaraot ni Jesus ang panagbulag, kay nasayod siya nga dili matapos ang pangatarongan. Apan wala niya hatagig awtoridad ang buot mopuypoy sa konsensya sa nagkabulag nga magtiayon nga morag wala na silay tulubagon sa usag usa.
* 13. Bisag walay anak makitag unsa kalumo ang kasingkasing ni Jesus. Nangangha siya sa misteryo sa kinabuhi nga daghag posibilidad ug nakita niya ang larawan sa Amahan bisan sa bata nga wala niya mailhi. Alang ni Jesus, dili masangyaw ang paglaom samtang nalimtan ang mga bata nga atong paglaom... ang dili modawat... (b.15). Dili magbinata, apan magpakasama sa bata aron makasulod sa Gingharian sa Diyos. Unsay kasagarang gawi sa bata? Naa niya ang kayano ug kabukas sa kinabuhi, ang diwa sa kamamugnaon ug ang kahibulong. Puno siya sa pagsalig, walay pagdumot sa kasingkasing, daling makapahaom sa nausab nga kahimtang, ug uban pa.
================================
INSPIRING VERSES - OCTOBER 6, 2024
1st Reading – Twenty-seventh Sunday in Ordinary Time
ANG TANAMAN SA EDEN - GENESIS (Gn. 2.18-24)
Unya miingon ang GINOONG Dios, “Dili maayo nga mag-inusara ang tawo; himoan ko siyag kauban ug katabang nga angay kaniya.” (Gn. 2:18)
Busa giumol niya gikan sa yuta ang tanang mananap ug langgam, ug gidala niya sila ngadto sa tawo aron iyang nganlan sila; bisag unsa ang ingalan sa tawo sa matag usa kanila mao na ang ngalan niini. (Gn. 2:19)
Busa ginganlan sa tawo ang tanang kahayopan ug ang mga langgam, ingon man ang ihalas nga mga mananap; apan walay hipalgan nga kauban ug katabang nga angay kaniya. (Gn. 2:20)
Unya gipakatulog sa GINOONG Dios ang tawo ug samtang nahinanok siya, gikuhaan siya sa GINOONG Dios og gusok ug gihulipan niya kinig unod. (Gn. 2:21)
Ang maong gusok gihimo niya nga usa ka babaye, ug gidala niya ang babaye ngadto sa lalaki. (Gn. 2:22)
Ug miingon ang lalaki, “Ania ra gayod ang sama kanako bukog gikan sa akong bukog, ug unod gikan sa unod. ‘Babaye’ ang ngalan niya kay gikuha man siya gikan sa lalaki.” (Gn. 2:23)
Tungod niini ang lalaki mobiya sa iyang amahan ug inahan ug motipon sa iyang asawa ug mausa sila. (Gn. 2:24)
REFLECTIONS - GENESIS (Gn. 2.18-24)
Dili maayo nga… (2:18) … Ang Diyos dunay katilingbanong kinaiya, mao nga nagbuhat siyag magtiayon aron magpuyo sa gugma ug pag-inambitay, bisag dili kay kini lang ang iyang pamaagi nga iyang magamit sa paghatag ug kinabuhi.
Apan walay hipalgan… (2:20) Makita dinhi ang talagsaong luna sa Babaye. Kauban siya, dili sulugoon. Busa, gikuha siya sa gusok, ug dili sa ulo o sa tiil, pagpaila nga dili siya taas ni ubos sa lalaki kondili, pareho. Apan bisan pa ining mensahe sa Diyos, ang katawhan sa Israel naghatag gihapon ug mas dakong gibug-aton sa mga lalaki. Basaha pod ang Mal 2:15; Lc 8:1-3; 1 Cor 7:4; 7:10; Ef 5:31.
… gipakatulog… (2:21) aron nga ang Diyos makabuhat diha ni Adan sa ikaduhang buluhaton. Ang mag-inusara laig hisgotan; apan ang magpuyo isip magtiayon nagkinahanglan ug bag-ong pagkatawo.
… mausa sila… (2:24) Hebreo ni nga nagkahulogan nga nausa sila ka linalang.
===================================
INSPIRING VERSES - OCTOBER 6, 2024
2nd Reading – Twenty-seventh Sunday in Ordinary Time
ANG PANGULO SA KALUWASAN - HEBREO (Heb. 2: 9-11)
Ang nakita nato mao si Jesus nga sa makadiyot nahimong ubos sa mga anghel, aron pinaagi sa grasya sa Dios magpakamatay siya alang sa tanan. Nakita nato siya nga gihimaya ug gipasidunggan karon tungod sa kamatayon nga iyang giantus. (Heb. 2:9)
Husto gayud ang Dios nga maoy nagbuhat ug nagpalungtad sa tanang butang, sa paghingpit kang Jesus pinaagi sa iyang pag-antus, aron makaambit sa iyang himaya ang daghang mga anak. Kay si Jesus mao ang nagpadala kanila ngadto sa kaluwasan. (Heb. 2:10)
Kay sila gibalaan ug ang nagbalaan kanila may usa lamang ka Amahan. Busa dili maulaw si Jesus sa pagtawag kanila nga iyang mga igsuon. (Heb. 2:11)
REFLECTIONS - HEBREO (Heb. 2: 9-11)
Ang giingon sa teksto mao ang umaabot nga kalibotan. Wala ni nagpasabot sa umaabot nga panahon o sa katapusan sa kalibotan, apan ang bag-o ug pihong panahon nga nagsugod sa pagkabanhaw ni Cristo.
Ang bag-ong kalibotan naa na diri naa na sab ang nabanhawng Cristo. Mao ni ang pinuy-anan nga atong gilaoman. Apan ang bag-ong kalibotan miabot na sa atong taliwala: masinati ni sa nagtoo ug nagpakabana sa isigkatawo...sa paghingpit... (b.10). Walay laing paagi sa kalingkawasan gawas sa krus. Ang nagtinguha paglingkawas sa kaigsoonan, moagig mga pagsulay: sa pagsupak ug way pagpakabana. Ang pag-antos maayong magtutudlo ug sulayan ini ang kalig-on sa pagtahan sa kaugalingon.
Sa krus ni Cristo madiskobrehan ta ang gugma sa Amahan sa iyang Anak, kay ang iyang pag-antos dili man silot, apan tawag aron mahimo siyang magluluwas ug panig-ingnan sa tanang tawo.
