26/07/2026
Tanza, Cavite –
“Walang natatago sa internet. Ang bawat post ay may digital footprint o nag-iiwan ng bakas, at ang bawat digital footprint ay may kaakibat na pananagutan. Mag-isip bago mag-click, dahil ang cyberspace ay hindi ligtas na taguan ng sinumang lumalabag sa batas. Kahit dummy account o pekeng pangalan ang gamitin at kahit burahin ang isang post, may kakayahan ang PNP na tukuyin ang mga nasa likod nito. Mag-post nang may responsibilidad.”
Bilang bahagi ng pinaigting na kampanya laban sa mga krimeng gumagamit ng makabagong teknolohiya, matagumpay na ipinatupad ng Tanza Municipal Police Station (MPS), sa pangunguna ni PLTCOL CHESTER NOEL R. BORLONGAN, ang isang Warrant to Search, Seize, and Examine Computer Data (WSSECD) laban sa isang indibidwal na kinilalang alias “Cristy” sa Brgy. Paradahan I, Tanza, Cavite, bandang alas-6:00 ng umaga noong Hulyo 25, 2026.
Isinagawa ang operasyon sa pakikipag-ugnayan sa Regional Anti-Cybercrime Unit 4A (RACU 4A) at Cavite Provincial Cyber Response Team (PCRT).
Ayon kay PLTCOL BORLONGAN, iniulat niya kay PCOL ARIEL R. RED, Provincial Director ng Cavite Police Provincial Office, na ang naturang operasyon ay isinagawa alinsunod sa Warrant to Search, Seize, and Examine Computer Data (WSSECD) na inilabas ng Regional Trial Court, Branch 130, Trece Martires City, na may petsang Hulyo 24, 2026. Ang warrant ay may kaugnayan sa isinasagawang imbestigasyon sa kasong Grave Threats sa ilalim ng Article 282 ng Revised Penal Code, kaugnay ng Republic Act No. 10175 o Cybercrime Prevention Act of 2012.
Sa pagpapatupad ng kautusan ng hukuman, nakumpiska ng mga operatiba ang iba’t ibang digital na kagamitan na pinaniniwalaang naglalaman ng mahahalagang electronic evidence na may kaugnayan sa kasalukuyang imbestigasyon. Kabilang sa mga nasamsam ang ilang mobile phone ng iba’t ibang tatak, isang Apple iPhone, isang iPod na may keyboard, isang Wi-Fi modem, at mga SD card. Ang lahat ng ito ay maayos na naimbentaryo at nadokumento alinsunod sa umiiral na Rule on Cybercrime Warrants.
Kaagad namang isinagawa ng mga Digital Forensic Examiners mula sa PCRT at RACU 4A ang kinakailangang on-site forensic examination, na natapos bandang alas-11:00 ng umaga. Ang buong implementasyon ng warrant ay nasaksihan ng mga legal na naninirahan sa nasabing lugar at ng mga opisyal ng Barangay Paradahan I, bilang pagtitiyak sa pagiging malinaw, patas, at naaayon sa itinakdang legal na proseso ng operasyon.
Ang mga nakumpiskang digital na kagamitan ay kasalukuyang nasa kustodiya ng Tanza MPS at ipapadala sa Digital Forensic Laboratory ng RACU 4A sa Camp BGen Vicente P. Lim, Calamba City, Laguna, para sa masusing off-site forensic examination. Inihahanda na rin ang Return of the Warrant, kasama ang imbentaryo ng mga nakumpiskang kagamitan, chain of custody documentation, at iba pang kinakailangang ulat para sa pagsusumite sa hukuman. Anumang computer data na legal na makukuha mula sa forensic examination ay gagamitin lamang bilang ebidensya sa patuloy na imbestigasyon at sa kaukulang pagsasampa ng kasong kriminal alinsunod sa umiiral na batas.
Nagbigay rin ng paalala si PLTCOL CHESTER NOEL R. BORLONGAN, Chief of Police ng Tanza MPS, hinggil sa pananagutan ng bawat mamamayan sa paggamit ng internet at social media.
Muling pinagtitibay ng Tanza Municipal Police Station ang matatag nitong pangako na pangalagaan ang publiko laban sa mga cyber-enabled crimes sa pamamagitan ng intelligence-driven operations, mahigpit na pagpapatupad ng batas, at makabagong digital forensic capabilities.
Kasabay ng patuloy na pag-unlad ng teknolohiya, nananatiling nakahanda ang Tanza MPS na tiyakin na ang cyberspace ay hindi magiging kanlungan ng pananakot, panlilinlang, at iba pang gawaing labag sa batas. Patuloy ding paiigtingin ng kapulisan ang mga operasyon upang matiyak na ang sinumang lalabag sa batas ay mapananagot alinsunod sa umiiral na mga batas ng Republika ng Pilipinas.
