03/08/2026
https://www.facebook.com/share/p/1MA4jdtFpL/
Hingpit na nga gisugdan niadtong Sabado, Agosto 1, ang hugot nga pagpatuman sa Mandatory Use of Motorcycle Helmet Ordinance sa Dakbayan sa Tagbilaran aron mapanalipdan ang kinabuhi sa mga motorista ug ilang mga angkas.
Gipasabot ni Konsehal Fausto “Bebot” Budlong, chairman sa Committee on Peace, Order and Public Safety sa Sangguniang Panlungsod, nga ang tumong sa ordinansa dili ang pagpamulta kondili ang pagpalig-on sa kaluwasan sa mga naggamit og motorsiklo.
Matud niya, dugay nang adunay nasudnong balaod ug lokal nga ordinansa nga nagmando sa pagsul-ob og standard protective helmet apan karon pa kini hugot nga ipatuman human sa information and education campaign nga gipahigayon sa Tagbilaran City Police Station (TCPS) ug City Traffic Management Office (CTMO).
Ubos sa City Ordinance No. C-386, Series of 2025 ug sa Republic Act No. 10054 o Motorcycle Helmet Act, obligado ang tanang drayber ug backrider sa pagsul-ob og DTI-certified full-face o half-face helmet nga adunay PS mark o ICC sticker. Dili tugotan ang "nut shell" helmet ug ang mga molapas mahimong mamultahan hangtod sa P5,000 depende sa hukom sa korte.
Gipatin-aw ni Budlong nga ang hugot nga implementasyon gipasikad usab sa nagkataas nga ihap sa mga aksidente sa motorsiklo sa siyudad. Base sa datos sa TCPS, adunay 153 ka motorcycle-related traffic accidents nga natala sa Tagbilaran gikan Enero 2025 hangtod Marso 2026.
Busa, nanawagan usab siya sa ubang local government units sa Bohol nga motabang sa pagpahibalo sa publiko aron masabtan nga ang helmet ordinance gitumong sa pagluwas sa kinabuhi sa mga motorista ug dili lamang alang sa pagpatuman sa balaod.
| Rey Tutas
