DepEd Tayo Bulo National High School

Early Registration

Early Registration on going at Bulo National High School 🥰

ANNOUNCEMENT!!!
EARLY REGISTRATION 2026 - 2027
"TARA NA'T MAGPALISTA!"
Inaanyayahan po namin ang lahat lalo na ang INCOMING GRADE 7 at GRADE 11 na magpalista na sa ating paaralan mula Enero 31 hanggang Pebrero 27, 2026.
Ang mga mag-aaral naman mula Grade 8 - 10 at Grade 12 ay hindi na kailangan pang sumali sa Early Registration dahil sila ay kabilang na sa pre-registered.
Kung may iba pang katanungan ay makipag-ugnayan sa mga g**o.
Makapag-aral ay karapatan mo!
Magpatala na!

ALUMNI NG BULO NHS, BUMISITA SA KANILANG ALMA MATER

Enero 30, 2026 - Hindi lamang alaala ang iniwan nina Midshipman First Class Joseph Jr. G. Paga at Midshipman Third Class Rainier P. Diwag sa kanilang dating paaralan, kundi inspirasyon para sa mga kabataang mag-aaral ng Bulo National High School.

Mula sa kanilang paglalakbay sa Philippine Merchant Marine Academy (PMMA), muling nagbalik ang dalawa upang ibahagi ang kanilang kwento ng pagsusumikap at tagumpay.

Sa kanilang pagbabalik, agad silang nagbigay-galang sa School Head na si Ginoong Alexis B. Luban sa pamamagitan ng isang courtesy call. Ngunit higit pa sa simpleng pagbisita, dala nila ang layunin na magbigay ng pag-asa at direksyon sa mga Grade 12 na mag-aaral.

Sa kanilang campaign talk, hinikayat nila ang mga mag-aaral na subukan ang PMMA Entrance Examination na magaganap sa January 31, 2026 sa Tabuk City National High School, na nagbubukas ng oportunidad para sa mas mataas na edukasyon at propesyon sa maritime industry. Ipinaalala nila na ang PMMA entrance examination ay hindi lamang isang pagsusulit, kundi isang pintuan tungo sa mas maliwanag na kinabukasan.

Ibinahagi nila ang mga hamon at tagumpay na kanilang naranasan sa akademya, mula sa mahigpit na training hanggang sa disiplina at pagkakaisa na siyang naghubog sa kanila bilang mga lider ng hinaharap.

Ang mga mag-aaral ay nakinig nang buong atensyon, at sa bawat salitang kanilang binitiwan ay tila mas lumalakas ang loob ng mga kabataan na mangarap nang mas mataas.

Ang kanilang pagbabalik ay nagsilbing patunay na ang mga anak ng Bulo NHS ay may kakayahang makipagsabayan sa mas malaking mundo.

Sa huli, ang mensahe nina Midshipman First Class Joseph Jr. G. Paga at Midshipman Third Class Rainier P. Diwag ay malinaw: “Kung kaya namin, kaya n’yo rin.”

Career Guidance Program, Matagumpay na Idinaos sa Bulo National High School
Ni: Xyriel B. Calading

Idinaos noong Disyembre 5, 2025 sa Bulo National High School ang taunang Career Guidance Program na may temang “Dreams in Action: Guiding Learners Toward Bright Futures.” Layunin ng aktibidad na magbigay-gabay at inspirasyon sa mga mag-aaral upang makapili ng tamang landas para sa kanilang kinabukasan.

Unang Bahagi ng Programa
Sa umaga, tampok ang Career Parade kung saan ipinakita ng mga mag-aaral ang kanilang napiling propesyon sa pamamagitan ng makukulay na kasuotan. Sinundan ito ng Filipinism na pinangunahan ni Davielyn Abay, Baitang 12 at panalangin na pinamunuan ni Hazel Latagan mula sa baitang 8.
Nagbigay ng opening remarks si G. Alexis Luban, School Head habang ipinaliwanag ni Julie C. Pagtan, Guidance Designate ang layunin ng aktibidad. Ipinakilala naman ni Laura Magannon ang mga kalahok at panauhing tagapagsalita.
Nagbigay ng inspirasyonal na mensahe sina G. Cyril O. Tinipac, Nurse II mula sa Department for Health, at PCPI Lany M. Bajelot, na nagbahagi ng kanilang karanasan sa propesyon. Pagkatapos ay isinagawa ang intermission number at ang pagbibigay ng tokens at certificates of recognition mula sa mga panauhing tagapagsalita.

Ikalawang Bahagi ng Programa
Sa hapon, nagkaroon ng ramp presentation ng mga mag-aaral bilang pagpapakita ng kanilang mga napiling career paths. Sinundan ito ng role play at short presentations na isinagawa ayon sa iba’t ibang propesyon.
Nagtapos ang programa sa awarding of certificates na pinangunahan ni Gng. Laura L. Magannon.

Kabuuan ng Aktibidad
Ang buong programa ay pinamunuan ni Gng. Angelica B. Adora bilang Master of Ceremony. Naging matagumpay ang aktibidad sa pagbibigay ng kaalaman, inspirasyon, at paghubog ng pangarap ng mga kabataang mag-aaral ng Bulo National High School.

Congratulations diligent teachers👏👏👏

CITYWIDE JOURNALISM TRAINING AT WORKSHOP ISINAGAWA SA KALINGA STATE UNIVERSITY
13 na mga manunulat mula sa Bulo National High School kasama ang mahigit tatlong daang kabataang manunulat mula sa iba’t ibang elementarya at sekondaryang paaralan sa Tabuk City ang lumahok sa dalawang araw na Citywide Journalism of Training and Workshop na ginanap noong Oktubre 17-18 sa Kalinga State University.
Ang aktibidad ay may temang “The History Unbound: Journalism as a Creative and Cultural Force” na layong palalimin ang kaalaman ng mga kabataan sa larangan ng pamamahayag, at hikayatin silang gamitin ito bilang kasangkapan sa malikhaing pagpapahayag at pagtataguyod ng kultura.
Inisyatibo ito ng Sangguniang Kabataan ng Bulanao, katuwang ang mga g**o at eksperto sa journalism na nagsilbing tagapagsalita at tagapagsanay. Tinalakay sa workshop ang mga pangunahing kaalaman sa pagsulat ng balita, editorial, feature, at sports, pati na rin ang photojournalism at layouting.
Bukod sa mga lecture, isinagawa rin ang mga hands-on na aktibidad kung saan nagpakitang-gilas ang mga kalahok sa paggawa ng kani-kanilang mga artikulo at layout na nagbigay daan sa pagpapamalas ng husay at galing ng mga batang mamamahayag.
Layunin ng programa na hubugin ang mga kabataan bilang responsableng tagapaghatid ng impormasyon at tagapangalaga ng kasaysayan at kultura ng kanilang komunidad.
Ang matagumpay na pagsasagawa ng workshop ay patunay ng lumalawak na interes ng kabataan sa larangan ng pamamahayag, at nagsisilbing hakbang tungo sa mas malalim na partisipasyon nila sa mga isyung panlipunan.

Matagumpay na Pagbubukas ng 2025 ETD2 District Meet
Ni: Xyriel B. Calading
Oktubre 15, 2025 — Sa temang “Strengthening Camaraderie and Excellence Through Sports,” pormal na binuksan ang 2025 ETD2 District Meet sa Bulo National High School sa pamamagitan ng isang makulay at makabuluhang Opening Program. Pinangunahan ni Dilisina S. Turales, g**o sa MAPEH, ang pag-awit ng Lupang Hinirang, na sinundan ng isang audio-visual presentation ng panalangin na nagbigay ng solemnidad sa okasyon.
Mainit na tinanggap ni Alexis B. Luban, School Head ng Bulo NHS, ang mga dumalo mula sa iba't ibang paaralan sa kanyang Welcome Remarks. Isa sa mga tampok na bahagi ng programa ang Lighting of the Torch na nilahukan ng piling kinatawan mula sa bawat paaralan, bilang simbolo ng pagkakaisa at masigasig na pakikilahok sa palaro. Nagbigay naman ng inspirasyonal na mensahe si Punong Barangay Francisco Agwayas, kung saan kanyang binigyang-diin ang kahalagahan ng disiplina at pagkakaibigan sa bawat laban.
Nagpakitang-gilas ang Bulo East Central School sa pamamagitan ng isang Arnis Exhibition na nagpamalas ng husay sa katutubong sining. Sinundan ito ng Dance Sports Exhibition mula sa Lacnog Integrated School at San Pablo Integrated School, na kapwa nagbigay sigla at aliw sa mga manonood. Opisyal namang binuksan ni Napoleon Mukay, School Head ng San Pablo Integrated School, ang 2025 District Meet sa pamamagitan ng kanyang mensahe at pormal na deklarasyon.
Kasunod nito ay isinagawa ang Oath of Sportsmanship na pinangunahan ni Monica C. De Belen mula sa CARAA Swimming, at ang Pledge of Officiating Officials na pinamunuan ni Leonardo Egalan, School Head ng Madopdop Elementary School.
Bilang pagtatapos ng programa, nagbigay ng closing remarks si Peter Morales, PTA President, kung saan siya ay taos-pusong nagpasalamat sa mga g**o, mag-aaral, at opisyales na naging bahagi ng matagumpay na pagbubukas ng District Meet.

NAKAMIT NG BULO NATIONAL HIGH SCHOOL ANG ZERO FAILURE RATE
Sa isang kahanga-hangang tagumpay, naitala ng Bulo National High School ang zero percent na failure rate para sa Taong Panuruan 2024–2025 matapos ipatupad ang isang makabago at malikhaing proyekto sa pagkatuto na tinawag na "Treasure Trail: Enhancing Reading Comprehension to Reduce Failure Rates."
Ang proyekto, na pinangunahan nina G. Alexis Luban at Gng. Laura L. Magannon, mga g**o ng Bulo NHS, ay nagbago sa tradisyonal na paraan ng pagtuturo sa pamamagitan ng mga aktibidad na parang "treasure hunt" upang mapalakas ang kakayahan sa pagbasa, partisipasyon, at motibasyon ng mga mag-aaral.
Noong Taong Panuruan 2023–2024, nagtala ang paaralan ng 5.62% failure rate at 6.18% dropout rate. Ngunit matapos ang implementasyon ng programa, bumaba ang mga bilang sa 0% failure rate at 0.99% dropout rate—isang makasaysayang tagumpay sa akademikong rekord ng paaralan.

BAGONG KULTURA NG PAGKATUTO
Inilunsad noong Setyembre 2024, ang programa ay binuo sa pamamagitan ng mga interdisciplinary na "treasure hunt" kung saan kailangang lutasin ng mga mag-aaral ang mga pahiwatig, isagawa ang mga gawaing pampagkatuto, at makipagtulungan sa kanilang mga grupo upang matuklasan ang tinatawag na “academic treasures.” Dahil dito, naging mas masigla at mas masaya ang pagkatuto para sa mga mag-aaral.
Batay sa datos ng pagdalo, umabot sa 99–100% ang partisipasyon sa lahat ng antas ng baitang, patunay ng mataas na antas ng pakikilahok ng mga mag-aaral. “Hindi lang ito tumutulong sa mga estudyanteng nanganganib bumagsak, kundi pinapahusay din nito ang pagganap ng lahat ng mag-aaral,” ayon kay Gng. Angelica Adora, tagapayo ng Grade 11.
Pinanatili ni dating punong-g**o Gemmaline C. Bumanglag ang diwa ng pagtutulungan sa likod ng proyekto. “Ipinapakita ng Treasure Trail na kapag pinagsama ang pagkamalikhain, pagtutulungan, at malasakit, nagiging mas makahulugan ang edukasyon. Pinatunayan ng ating mga mag-aaral na ang pagkatuto ay maaaring maging masaya at epektibo,” aniya.
Si G. Alexis Luban, isa sa mga tagapagtaguyod ng proyekto at ngayo’y ulong-g**o ng paaralan, ay nangakong ipagpapatuloy ang implementasyon ng programa.
Nagpakita rin ng suporta sina Thelma B. Galicia, ADM Focal ng SDO Tabuk City, at Dr. Benedicta B. Gamatero, CESO V, Schools Division Superintendent, sa pamamagitan ng pagbabahagi ng pondo mula sa ADM program.
Ang mga natatanging resulta ng Treasure Trail Program ay nagsilbing patunay ng malikhaing ideya sa edukasyon na may mahusay na bunga. Ginawang isang pakikipagsapalaran ang pagkatuto at ang tagumpay ng mga mag-aaral ay naging isang kayamanang sama-samang natamo.

ORYENTASYON SA PAGPAPALAGANAP NG DISIPLINA AT KALIGTASAN SA KALSADA, ISINAGAWA

Oktubre 8, 2025 - dinaluhan ng mga mag-aaral mula sa baitang 11 at 12 ng Bulo National High School ang Oryentasyon. Ang okasyon ay nakatuon sa kahalagahan ng kaligtasan sa kalsada at kung paano ito maiiwasan. Nagsimula ang pagtitipon sa isang taimtim na panalangin na pinangunahan ni Gng. Juliet Quiban, isang kinatawan mula sa CBRACRO BVFO. Matapos ang panalangin, nagbigay ng isang makabuluhang mensahe si Gng. Maryjane E. Alib-on, isa ring sa ring kinatawan mula sa CBRACRO BVFO na nagbigay-diin sa kahalagahan ng pagiging responsable at mapanagutan sa lahat ng aspeto ng buhay, kabilang na ang pagrespeto sa ating mga magulang at g**o, siya ang nagbahagi sa salita ng Diyos sa mga mag-aaral na naghatid ng aral sa kanila upang maging matatag sa kanilang paniniwala. Sa huli, ibinahagi niya ang katagang "Let us not be tired of doing good, because in due time we will reap what we sow" para maging reflection at aral sa mga mag aaral .
Ang pangunahing tagapagsalita sa okasyong ito ay si Ginoong Ernesto Dela Cruz, Assistant Head ng POSO. Tinalakay niya ang kaligtasan sa kalsada at kung bakit mahalaga para sa mga mag-aaral na sundin ang mga patakaran sa trapiko, Kabilang na dito ang anim na SAFETY RULES FOR STUDENTS:
1. Gamitin ang mga tawiran (pedestrian crossing)
2. Huwag tumakbo sa kalsada
3. Lumingon sa parehong direksyon
4. Iwasan ang mga distraksyon
5. Sundin ang mga signal ng trapiko
6. Magsuot ng maliwanag na damit
Kaniya ring idinagdag ang limang mga Paalala sa Kaligtasan para sa mga Mag-aaral na Driver:
1. Gamitin ang seatbelt
2. Magsuot ng protective gears
3. Sundin ang speed limit (20 kph sa paaralan).
4. Manatiling alerto sa mga nakaparadang sasakyan.
5. Alamin ang mga road signs at signals.
Itinuro niya ito upang bigyang-diin ang kahalagahan ng kaligtasan sa kalsada para sa mga mag-aaral na driver at upang hikayatin silang sundin ang mga alituntunin sa trapiko upang maiwasan ang mga aksidente. Naibahagi rin niya ang mga karaniwang paglabag sa batas trapiko ng mga taga-Kalinga kabilang dito ang Not wearing helmet, Over speeding, at Intoxication. Nagpaalala siya na iwasan ang mga ito para maiwasan din ang aksidente.
Nagtapos ang pagtitipon sa isang pangwakas na pananalita ni School Head Sir Alexis Luban, na nagpasalamat sa mga tagapagsalita at mga kalahok sa kanilang aktibong pakikilahok.

PAGSISIMULA NG ARAL PROGRAM SA BULO NHS

Sa layuning mapalakas ang akademikong pagbangon ng mga mag-aaral, aktibong lumahok ang Bulo National High School sa pagpapatupad ng Academic Recovery and Accessible Learning (ARAL) Program ngayong Setyembre.

Setyembre 12–13, limang g**o mula sa Bulo NHS ang dumalo sa Division Orientation for ARAL Program Tutors na isinagawa ng Schools Division Office. Layunin ng oryentasyong ito na ihanda ang mga g**o sa kanilang magiging papel bilang ARAL Tutors.

Setyembre 15, Dinaluhan ni G. Alexis B. Luban, Ulong-g**o ng Bulo NHS, ang Launching ng ARAL Program na ginanap sa SDO Multi-Purpose Hall. Ipinakita rito ang suporta ng pamunuan sa programang naglalayong tugunan ang learning gaps ng mga mag-aaral.

Setyembre 16, Opisyal nang sinimulan ang ARAL Program sa paaralan. Isinagawa ang General Orientation para sa mga mag-aaral na kalahok, kung saan ipinaliwanag ng mga ARAL Tutors ang mga tuntunin, iskedyul ng sessions, at inaasahang pakikilahok ng bawat mag-aaral.

👥 Bilang ng mga Kalahok sa Bawat Baitang:
Grade 7 Hope - 12
Grade 7 Peace - 7
Grade 8 Wisdom - 14
Grade 9 Faith - 12
Grade 10 Love - 7

Ang ARAL Program ay inaasahang magiging daan upang mas mapalalim ang kaalaman ng mga mag-aaral sa mga asignaturang may learning gaps, at magsilbing suporta sa kanilang patuloy na akademikong pag-unlad.