23/02/2026
878 SSES iskawt lumahok sa School Camp 2025
Ni: Klixie Eryz J. Delema
Lumahok ang 878 kasapi ng Boy Scouts of the Philippines (BSP) at Girl Scouts of the Philippines (GSP) ng Silay South Elementary School (SSES) sa BSP and GSP School Encampment 2025 noong Nobyembre 21-22, 2024.
Nagpasiklaban ng talento sa songs at yells ang mga iskawt sa kanilang Campfire sa unang araw ng kamping na dinaos sa SSES Covered Court.
Nagtagisan naman ng talino at natatanging kakayahan ang mga kalahok sa Mr. BSP and Ms. GSP. Nagwagi bilang Mr. BSP si Aimer Luis F. Tipon ng Ikaanim na Baitang at Ms. GSP si Alleora Marshian Lidres ng Ikaapat na Baitang.
Tampok sa ikalawang araw ng kamping ang Training on Basic Life Support and First Aid na pinangunahan ng DRRM, CPR Lecture Demonstration ng Red Cross of the Philippines – Bacolod, at Lecture on History, of Scouting, Symbols, Law, Oath, and Motto na binigay ng Doña Montserrat Senior GSP at BSP, at Laro ng Lahi.
Knot Tying at Laro ng Lahi tulad ng Sack Race, Tug of War, at Going to the River ang pangunahing aktibidad ng BSP sa ikalawang araw ng kamping. Nagkaroon naman ang GSP ng lektyur sa History of Scouting, Symbols, Oath and Motto, at Knot Tying, at Laro ng Lahi.
Kasabay ng mga aktibidad ng BSP at GSP sa ikalawang araw, nagkaroon din ng mga katulad na gawain sa GSP at BSP ang KAB at Star Scouts ng SSES.
May 200 KAB Scouts at 253 Star Scouts na mula sa Una hanggang Ikatlong Baitang ang sumali.
Pinangunahan nina Camp Leaders Rodney Siodina ng BSP, Rose Sontuosidad ng GSP, Joan Caluyo ng KAB Scout, Gina Pahilanga ng Star Scout, at Project Development Officer I Marilyn Solomon ang kamping sa taong ito.
Sa kanyang pambungad na mensahe sa pambukas na programa sa unang araw ng kamping, nagbigay ng makabuluhang mensahe si Joeramie B. Quinto, punongguro ng SSES.
“Masaya ako na marami pa ring mga mag-aaral ang patuloy na sumasali sa scouting activites. Ipagpatuloy ninyo ang pakikilahok sa mga gawaing tulad nito na makakatulong sa pag-unlad ng inyong pagkato,” pahayag ni Quinto.
“Magiging memorable po sa akin ang karanasang ito dahil marami akong natutunan at nakakilala pa ako ng mga bagong kaibigan,” saad ni Thea Candelario, iskawt mula sa Grade 5.
Nagtapos ang aktibidad sa isang Clean Up Drive sa paaralan na nilahukan ng lahat ng iskawt and Troop Leaders.
