Community Awareness Office at the Islamic Dawah & Guidance Center of the PH

ANG MAG-ASAWANG MATUWID, MAG-ASAWA SA MUNDO, MAG-ASAWA SA KABILANG-BUHAY (PARAISO)

Ang tunay na pagmamahal sa asawa ay hindi nagtatapos sa matatamis na salita, kundi higit na naipapakita sa araw-araw na gawaing may takot at pagsunod kay Allah SWT at sa Kanyang Sugo (SAWS). Ito ay ang pagiging tapat, maunawain, at mapagpasensya sa oras ng pagsubok, ang pagpili ng kabutihan kahit may pagod at pagkukulang,at ang pagsasakripisyo ng sarili upang mapanatili ang kapayapaan at awa sa loob ng tahanan. Kapag ang mag-asawa ay kapwa mananampalataya, sila ay nagtutulungan sa paggawa ng mga ‘ibādah para kay Allah SWT, sa pagdarasal, sa pagsunod sa Kanyang mga utos, at sa pag-iwas sa Kanyang mga ipinagbawal, at sila rin ay magkatuwang sa pagharap sa hirap at ginhawa ng buhay. Sa ganitong pagsasamang may īmān at pagtutulungan, ang kanilang pagsasama ay nagiging isang patuloy na pagsamba, at ang bawat sakripisyo ay nagiging sanhi ng barakah.

Dahil sa kanilang matibay na pananampalataya at taos-pusong pagmamahalan para kay Allah SWT, ipinangako na igagawad sa kanila ni Allah SWT ang Kanyang Paraiso, kung saan sila ay muling pag-iisahin bilang mag-asawa at pamilya upang manirahan doon magpakailanman isang gantimpalang nakalaan sa mga pusong nagkakaisa sa īmān, pagtitiis, at pagsunod sa Kanyang kalooban.

Kapag ang isang lalaki at babae ay nagpakasal, at pagkatapos sila ay parehong matuwid sa kanilang pananampalataya at katuwiran, sila ay pagsasamahin ni Allah sa Kanyang Paraiso bilang pamilya, subalit hindi ito magnyayari kung sila ay magkaiba ng 'Amal (gawain).

Sinabi ni Allah SWT:

جَنَّٰتُ عَدۡنٖ يَدۡخُلُونَهَا وَمَن صَلَحَ مِنۡ ءَابَآئِهِمۡ وَأَزۡوَٰجِهِمۡ وَذُرِّيَّٰتِهِمۡۖ وَٱلۡمَلَٰٓئِكَةُ يَدۡخُلُونَ عَلَيۡهِم مِّن كُلِّ بَابٖ

"Ang kahihinatnang papupurihang ito ay mga hardin, na mananatili sila sa mga ito bilang mga pinagiginhawa ayon sa pananatiling palagi. Bahagi ng kalubusan ng kaginhawahan nila sa mga ito na makapasok sa mga ito kasama sa kanila ang sinumang naging matuwid sa mga ama nila, mga ina nila, mga asawa nila, at mga anak nila bilang pagkumpleto sa pagkapalagayang-loob nila sa pakikipagkita nila. Ang mga anghel ay papasok sa kanila, habang mga bumabati, mula sa lahat ng mga pinto ng mga tirahan nila sa Paraiso". [Surah Ar-Ra‘d: 23]

Malinaw na binanggit dito ang mga asawa (أَزْوَاجِهِمْ) ng mga mananampalataya, ipinapakita sa ayah na ito na ang pagsasama ng mag-asawa sa mundong ito ay magpapatuloy sa Jannah, basta parehong matuwid at may pananampalataya.

رَبَّنَا وَأَدۡخِلۡهُمۡ جَنَّٰتِ عَدۡنٍ ٱلَّتِي وَعَدتَّهُمۡ وَمَن صَلَحَ مِنۡ ءَابَآئِهِمۡ وَأَزۡوَٰجِهِمۡ وَذُرِّيَّٰتِهِمۡۚ

"Magsasabi ang mga anghel: "o aming Panginoon, at magpapasok Ka sa mga mananampalataya sa mga Hardin ng Kawalang-hanggan na ipinangako Mo sa kanila na magpasok Ka sa kanila sa mga iyon, at magpapasok Ka kasama sa kanila sa sinumang umayos ang gawa kabilang sa mga magulang nila, mga asawa nila, at mga anak nila". [Surah Al-Ghāfi: 8]

Ito ay panalangin ng mga anghel para sa mga mananampalataya, pinatutunayan nito na ang mag-asawa na matuwid at may īmān ay sabay na papasok sa Paraiso.

وَٱلَّذِينَ ءَامَنُواْ وَٱتَّبَعَتۡهُمۡ ذُرِّيَّتُهُم بِإِيمَٰنٍ أَلۡحَقۡنَا بِهِمۡ ذُرِّيَّتَهُمۡ وَمَآ أَلَتۡنَٰهُم مِّنۡ عَمَلِهِم مِّن شَيۡءٖۚ

"Ang mga sumampalataya at sumunod sa kanila sa pananampalataya ang mga anak nila ay mag-uugnay Kami sa kanila sa mga anak nila upang magalak ang mga mata nila sa mga ito. Kung sakaling hindi umabot ang mga gawa nila ay hindi Kami magbabawas sa kanila ng anuman sa gantimpala ng mga gawa nila". [Surah At-Tur: 21]

Bagamat binanggit dito ang mga anak, ayon sa mga mufassirūn, kasama rin ang pamilya kabilang ang asawa, ipinapakita sa Ayah na ito na ang pagkakaisa ng pamilya sa īmān sa mundong ito ay nagiging dahilan ng kanilang pagsasama sa Paraiso.

Sinabi ng Propeta SAWS:

«خَيْرُكُمْ خَيْرُكُمْ لِأَهْلِهِ»

"Ang pinakamabuti sa inyo ay ang pinakamabuti sa kanyang pamilya.” (At-Tirmidhi)

Ang mag-asawang parehong mananampalataya ay pag-iisahin muli ni Allah SWT sa Kabilang-Buhay, ang kanilang pagsasama sa mundo ay nagiging patuloy na pagsamba at barakah, ang pamilya na nagkakaisa sa īmān at pagsunod kay Allah ay makakaranas ng walang hanggang kaligayahan sa Paraiso.

Nawa'y mapabilang tayo sa mga mag-asawang may takot at pananampalataya kay Allah SWT at mag-asawa rin sa Kabilang-Buhay (Paraiso). Ameen

Akh. Salim Zailon

ANG HUKOM SA PAGPAPAHABA NG KHUTBAH (SERMON) SA ARAW NG JUMU'AH

Sa Islam, hindi kanais-nais ang pagpapahaba ng khutbah sa Jumu‘ah sapagkat ang Sunnah ay ang maikli ngunit malinaw at kapaki-pakinabang na khutbah at mas mahabang salah, dahil ito ang mas madaling maunawaan at maisabuhay ng mga nakikinig; ang labis na pagpapahaba ng sermon na nagdudulot ng pagod, antok, o hirap sa jama‘ah ay itinuturing ng maraming ulama na makruh, lalo na kung hindi naman kinakailangan. Mas mainam ang maikling khutbah na may mapupulot na aral, sapagkat may mga tao sa jama‘ah na may pupuntahan, may mahahalagang gawain, o mga dayong manlalakbay (musafir) na kailangang ipagpatuloy ang kanilang paglalakbay, kaya ang pagsunod sa Sunnah na paikliin ang khutbah ay isang anyo ng pagpapagaan at awa upang maiwasan ang hirap at ang hindi magandang kalabasan.

Sinabi ni Allah SWT:

يُرِيدُ اللَّهُ بِكُمُ الْيُسْرَ وَلَا يُرِيدُ بِكُمُ الْعُسْرَ

"Nais ni Allah SWT para sa inyo ang kagaanan at hindi Niya nais para sa inyo ang kahirapan.” [Surah Al-Baqarah: 185]

Sinabi ng Propeta SASW:

إِنَّ طُولَ صَلَاةِ الرَّجُلِ وَقِصَرَ خُطْبَتِهِ مَئِنَّةٌ مِنْ فِقْهِهِ، فَأَطِيلُوا الصَّلَاةَ وَاقْصُرُوا الْخُطْبَةَ»

"Katotohanan, ang kahabaan ng salah ng isang tao at ang ikli ng kanyang khutbah ay tanda ng kanyang pagkaunawa (fiqh), kaya pahabain ninyo ang salah at paikliin ang khutbah.”[Muslim]

Sinabi ni Shiekh Bin Baz Rahimahullah:
"Kung kinakailangan, walang problema na pahabain ang khutbah paminsan‑minsan, ang Propeta ﷺ ay nagpapahaba nito minsan sa oras na may pangangailangan. Ngunit ang batayan at prinsipyo ay pagiging maikli at tuwiran ng khutbah, yan ang asl".

Sinabi ni Imam An-Nawawi Rahimahullah:
“Ang maikling khutbah na malinaw at nagbibigay-aral ay mas kanais-nais kaysa sa mahaba ngunit walang kabuluhan, at ito ay mas sumusunod sa Sunnah.”

Sinabi ni Ibn Hajar al-Asqalani Rahimahullah:
“At ang maikling khutbah ay tanda ng fiqh at pagkaunawa, sapagkat ito ay naglalaman ng kaalaman nang hindi nagpapahirap sa mga nakikinig.”

Sinabi ni Shiekh Muhammad ibn Salih al-Uthaymeen Rahimahullah: “Ang pagpapahaba ng khutbah ay nakakasama sa konsentrasyon ng mga nagdarasal, at mas mabuti kung ito ay maikli ngunit may malinaw na aral.”

Akh. Salim Zailon

ANG HUKOM SA LABIS NA KATAASAN NG MAHR

Ano ang Mahr?

Ang Mahr ay karapatan ng babae kapag siya ay pakakasalan.

Ito ay iniuutos ni Allah (SWT) sa Qur’an:

﴿ وَآتُوا النِّسَاءَ صَدُقَاتِهِنَّ نِحْلَةً ﴾
“At ibigay ninyo sa mga kababaihan ang kanilang dowry ng taos puso.” (Surah An-Nisā’, 4)

Ayon kay Ibn Kathīr:
"Ang mahr ay para lamang sa babae at hindi ito maaaring kunin ng magulang maliban kung may pahintulot ng babae".

Magkano ba ang Mahr?

Walang itinakdang tiyak na halaga sa Islam.

Ang sukatan ay abot kaya ng lalaki at hindi labis na nagpapahirap.

Hindi ito simbolo ng pagbebenta sa babae, kundi simbolo ng pagmamahal, respeto, at kahandaan ng lalaki sa responsibilidad ng pagiging asawa (Ibn Taymiyyah).
Araw-araw na Gawain ng Propeta (SAW) tungkol sa Mahr

Sinabi ng Propeta (SAW):

قَالَ النَّبِيُّ ﷺ: خَيْرُ الصَّدَاقِ أَيْسَرُهُ
“Ang pinakamagandang mahr ay yung pinakamadali at abot kaya.” (Bayhaqi)

Sinabi ng Propeta SAWS:

قَالَ النَّبِيُّ ﷺ: خَيْرُ النِّكَاحِ أَيْسَرُهُ
“Ang pinakamagandang kasal ay yung ginagawang madali.” (Ibn Ḥibbān)

Sinabi niya (ﷺ) sa isang lalaki:

الْتَمِسْ وَلَوْ خَاتَمًا مِنْ حَدِيدٍ
“Magbigay ka kahit singsing lang na yari sa bakal.” (Muttafaq ‘alayh)

Halimbawa:
Si ‘Ali (RA) ay nagbigay ng kanyang panangga (armor) bilang mahr kay Fāṭimah (RA).

Babala sa Labis na Dowry

Ayon kay ‘Umar ibn al-Khaṭṭāb (RA):

“Huwag kayong magpataasan sa Mahr, sapagkat kung ito’y karangalan, si Propeta Muhammad (SAW) ang dapat na unang gumawa nito. Ngunit wala ni isa sa kanyang asawa o anak ang tumanggap ng higit sa 12 Uqiyah (≈ 480 dirhams / 134.4 riyals).” (Ibn Mājah, Sahih Al-Albānī)

Ang sobrang taas ng mahr ay nagiging dahilan ng hadlang sa kasal at minsan ay nagdudulot ng alitan sa mag-asawa. Huwag mong gawing business ang anak mong babae dahil hindi ito for SALE!

Hindi mga magulang o sinuman ang magdedecide para sa Mahr ng babae kundi ang mismong babae ang siyang may karapatang magdesisyon para sa kanyang magiging Mahr.

Mahr ay karapatan ng babae at obligasyon ng lalaki.

Walang takdang halaga, dapat ito ay makatarungan, abot kaya, at hindi magpahirap.

Pinaka-mainam na gawing simple at magaan, ayon sa halimbawa ng Propeta (SAW).

Babala: Ang sobrang taas ng Mahr ay nagiging sanhi ng pagkaantala ng kasal at problema sa mag-asawa.

Halimbawa ng Sunnah:

Mahr ni Fatimah (RA) ay armor lamang ni ‘Ali (RA).

Limitasyon sa Sunnah: hindi lumalagpas ng 12 Uqiyah.

Ang Mahr ng Propeta SAWS sa mga asawa niya ay 500 dirham lang at sa mga anak niya ay 400 dirham naman.

Ang Mahr ng babae ay hindi pinapahintulutan (haram) para sa mga magulang o sinuman na sapilitang kunin ang Mahr ng babae na wala siyang pahintulot dito, maliban lamang kung kusang nagbigay ang babae para sa kanila.

Ang hangarin ng Islam ay gawing madali at simple ang kasal, at ang Mahr ay simbolo ng pagmamahalan at responsibilidad, hindi ng kalakalan o pagbebenta.

ᴀᴋʜ: sᴀʟɪᴍ ᴢᴀɪʟᴏɴ ✍

"Sa bawat pagsubok na dumating sa ating buhay, may kaakibat na ginhawa at lakas."

Akh. Salim Zailon

“Ang pusong puno ng sabr at tiwala kay Allah SWT ay hindi kailanman talo, sapagkat sa bawat pagsubok ay may kaakibat na karunungan, at sa bawat hirap ay may nakatagong ginhawa. Kapag ang puso ay marunong magtiis at ang isip ay lubos na nagtitiwala sa Kanya, ang mga unos ng buhay ay nagiging daan ng tagumpay, at ang katahimikan ng pananampalataya ay nananatili sa kabila ng anumang pagsubok.”

Akh. Salim Zailon