Kahayag: Ulat Pang-kalagayan Para sa Katotohanan

Bisitahin ang aming mini exhibit sa AS Walk mula Mayo 21-22, 2025 mula 8 n.u. hanggang 5 n.g.

𝑲𝑨𝑻𝑶𝑻𝑶𝑯𝑨𝑵𝑨𝑵 𝑨𝑻 𝑲𝑨𝑻𝑨𝑹𝑼𝑵𝑮𝑨𝑵

Kaakibat ng malawakang pag-abuso at pagpaslang, isang bulag at bulok na sistemang pang-hustisya ang patuloy na kumakalinga sa mga krimen ng dating Pangulong Duterte. Sa kabila ng takot at panggigipit, may mga Pilipinong patuloy na tumitindig, humihingi ng hustisya, at nagsusulong ng pananagutan. Ngayon, muling nakita ang pag-asa dahil sa imbestigasyon ng International Criminal Court (ICC) laban kay Duterte.
Ano nga ba ang papel ng ICC sa paglaban sa mga krimeng hindi pinaparusahan ng sariling pamahalaan? Balikan natin ang kasaysayan ng dugo at dahas, at alamin kung paanong ang internasyonal na pagkilos ay naging tanglaw sa matagal nang pinapatay na pag-asa ng sambayanan.
Panahon na upang ipaglaban ang hustisyang matagal nang ipinagkait. Hindi dapat makaligtas sa pananagutan ang sino mang lumapastangan sa karapatang pantao. 𝐇𝐮𝐬𝐭𝐢𝐬𝐲𝐚 𝐩𝐚𝐫𝐚 𝐬𝐚 𝐦𝐠𝐚 𝐛𝐢𝐤𝐭𝐢𝐦𝐚 𝐧𝐠 𝐫𝐞𝐡𝐢𝐦𝐞𝐧𝐠 𝐃𝐮𝐭𝐞𝐫𝐭𝐞! 𝐏𝐚𝐧𝐚𝐠𝐮𝐭𝐢𝐧 𝐬𝐢 𝐃𝐮𝐭𝐞𝐫𝐭𝐞! 𝐏𝐚𝐠𝐛𝐚𝐲𝐚𝐫𝐢𝐧 𝐬𝐢 𝐃𝐮𝐭𝐞𝐫𝐭𝐞!

𝐏𝐢𝐧𝐚𝐬𝐥𝐚𝐧𝐠 𝐧𝐚 𝐊𝐚𝐫𝐚𝐩𝐚𝐭𝐚𝐧

Bago pa man maupo bilang pangulo, dala na ni dating Pangulong Rodrigo Duterte ang pangakong seguridad at kapayapaan. Ngunit sa kaniyang panunungkulan bilang alkalde ng Davao, naging madugo ang katuparan ng pangakong ito.

Binalot ng katahimikan ang lungsod, katahimikang binabalot ng takot — takot dahil sa sunod-sunod na pamamaslang. Maging ang mga inosente ay nadamay. Hindi kapayapaan ang namayani, kundi pangamba at karahasan.

Hanggang sa kaniyang termino bilang pangulo, dala niya pa rin ang madugong sistema — sistemang lumapastangan sa karapatang pantao at kumitil ng libu-libong buhay.

Isang malaking krimen ang kaniyang ginawa. 𝑷𝒂𝒏𝒂𝒉𝒐𝒏 𝒏𝒂 𝒖𝒑𝒂𝒏𝒈 𝒔𝒊𝒚𝒂’𝒚 𝒑𝒂𝒈𝒃𝒂𝒚𝒂𝒓𝒊𝒏 𝒂𝒕 𝒑𝒂𝒏𝒂𝒈𝒖𝒕𝒊𝒏!

𝑨𝒏𝒐 𝒏𝒈𝒂 𝒃𝒂 𝒂𝒏𝒈 𝒑𝒂𝒑𝒆𝒍 𝒏𝒈 𝒎𝒊𝒅𝒚𝒂 𝒔𝒂 𝒓𝒆𝒉𝒊𝒎𝒆𝒏𝒈 𝑫𝒖𝒕𝒆𝒓𝒕𝒆?

Sandata ng katotohanan, minsa’y naging kasangkapan ng panlilinlang. Sa ilalim ng rehimeng Duterte, naging larangan ng tunggalian ang midya—lumalaban, pinatatahimik, at pilit na binabaluktot. Habang pinapaikot-ikot ang katotohanan at ikinakalat ang mga fake news, ang sambayanan ang unti-unting nabibingi sa tunay na sigaw ng bayan. Sa ganitong kalagayan, paano hinubog ng midya ang paniniwala ng sambayanan? At higit sa lahat—sino ang dapat managot?

𝐁𝐨𝐬𝐞𝐬 𝐧𝐠 𝐦𝐠𝐚 𝐏𝐢𝐥𝐢𝐩𝐢𝐧𝐨, 𝐇𝐢𝐧𝐝𝐢 𝐓𝐞𝐫𝐨𝐫𝐢𝐬𝐦𝐨!

Pilit na pinatatahimik sa isang pitik. Talamak na red-tagging ang natatanggap ng mga nagsisilbing boses ng mga Pilipino laban sa napang-api at mapang-abusong administrasyon ng dating Pangulong Duterte.

Tunghayan ang kabagsikan ng rehimeng Duterte tungkol sa usapin ng aktibismo at kilalanin ang ilan sa mga patuloy na lumalaban para panagutin si Duterte sa mga krimen nitong lumalabag sa karapatang pantao ng mga Pilipino.

𝑫𝒆𝒑𝒆𝒌𝒕𝒊𝒃𝒐, 𝒉𝒊𝒏𝒅𝒊 𝒆𝒑𝒆𝒌𝒕𝒊𝒃𝒐!

Bago pa man magsimula ang administrasyon ng dating pangulong Duterte, isa ang kampanya laban sa iligal na droga ang kaniyang nais isulong, na tinitingnang isang hakbang upang bumaba ang antas ng krimen sa bansa. Subalit, ang War on Drugs na ito ay naging madugo at nagdala ng pang-aabuso sa karapatang pantao ng mga Pilipino.

Mula sa mga inilabas na datos ng gobyerno, bumaba ang crime rate sa kaniyang administrasyon. Ngunit sapat na batayan ba ito para sabihing epektibo ang kaniyang pamamalakad?