05/10/2018
" Hindi Ako "
Ni: Gerald Lanzuela
Ng: STEM 11-A
"Handa akong gawin ang lahat para sa taong mahal ko".
Katagang madalas nating marinig
lalo na sa usaping Pag-Ibig,
Yung tipong di mo na iniisip ang sarili mo,
Maging ang mga maaapektuhan nito.
Dahil walang ibang Importante sau,
Kundi makitang Masaya ang Minamahal mo.
Maging ikaw o Hindi man ikaw ang dahilan nito.
Hindi ko alam kung matutuwa kayo,
Pero may pagkakataon sa buhay ko,
Na hinayaan kong gamitin ng isang tao ang pagkatao ko.
Magulo? OO magulo.!
Pero hayaan nyong simulan ko ang Kwento,
Ng maunawaan nyo kung anong naging dahilan ko,
Sa likod ng Seryosong desisyong to.
Sya ang Unang lalaking minahal ko sa buong buhay ko.
At wala akong nakikitang mali doon.
Nalulungkot ako kapag malungkot sya
Mas masaya naman ako kapag masaya sya.
Kung tatanungin nyo ko,
Kung may Karelasyon ba sya?
OO, May karelasyon sya at matagal na cla.
Pero dahil nga mahal ko siya,
Nagiging masaya ako para sakanila,
Ganun naman talaga diba?
Kung sinong mahal ng taong mahal mo,
Ay syang tatanggapin at mamahalin mo din.
Sa totoo lang,
nakakasama ko pa silang dalawa,
Maging sa mahahalagang araw sa buhay nila,
Palagi akong kasama.
Medyo may konting inggit,
Inggit na di dahil sa di ako ang nakakapagpasaya sakanya,
Kundi inggit na sana balang araw
Maranasan ko din ang sayang nararanasan nila.
Di ko man nasaksihan kung paano nagsimula ang Pag-Iibigan nila,
Saksi naman ako kung paano nila
Sinikap na Panatilihing matibay ang pagmamahalan nila.
Ngunit di lang yan ang nasaksihan ko,
Dahil pati ang pinakamasakit na pangyayari sa buhay ng lalaking mahal ko ay nasaksihan ko.
Sadyang mapaglaro ang tadhana,
Madaming taon, buwan at araw man silang nagkasama,
Dumating ung araw na sumakabilang buhay ang babaeng mahal nya.
Ganun naman talaga,
Walang permanente sa mundong to,
Kung di man magbabago,
ito'y tuluyang maglalaho.
Masakit sakin makitang nahihirapan sya
Sa mga panahong kasama ko sya matapos syang iwan ng babaeng inakala nyang una at huling Pag-ibig nya.
Mabilis na lumipas ang panahon,
Kung di ako nagkakamali,
Apat na taon na,
Pero ramdam ko pa din
Sa bawat hinga at pikit ng kanyang mga mata ang pangungulila nya sa dating mahal nya.
At pilit nyang pinaparamdam sakin
Na apat na taon na syang nag iisa,
Kahit na walang araw na dumating sa buhay nya na di nya ko kasama,
dahil nandito lang ako para sakanya,
Pero bakit parang di nya un makita?
Sa wakas,
May isang pangyayari na muling nagpangiti sakanya,
Sobrang ganda ng ngiti nya,
kaya tinanong ko sya,
Ano? O sino ang dahilan sa likod ng mga ngiti mo?
At nagulat ako sa sagot nya ng sabihin nyang "ikaw" .
Ako pala ang dahilan ng ngiti nya,
Syempre natuwa ako, Sobrang tuwang-tuwa
Pero may pahabol pa syang sinabi na mas ikinagulat ko..
"Nagpakilala kasi ako bilang ikaw sa isang katextmate ko.!"
Hindi ko alam kung anung magiging reaksyon ko nung mga oras na un.
Pero isa lang ang narealize ko,
Kung un lang ang tanging magagawa ko, para muling mapasaya ang lalaking mahal ko, bakit ko sya pipigilan?
Mula noon, hinayaan ko ng gamitin nya ang pagkatao ko.
Pangalan, Edad, maging ang Facebook Account ko.
Di nya ginamit ang katauhan ko dahil sa
Mas Gwapo ako kaysa sa kanya o anumang ibang malalim na dahilan,
Ginamit nya ang pagkatao ko
Dahil sa pag iisip na baka,
Pagnalaman ng babae kung sino ba talaga sya,
Ay di na sya nito muling kausapin pa.
Lumipas ang mga buwan at nakita ko nanaman syang masaya,
Yun ay dahil naging sila na,
Ng babaeng nakakatext nya,
Na inaakalang "ako" ay "sya".
Araw - araw,
Masaya syang gumigising sa umaga,
At higit na masaya bago matulog sa gabi.
May tatlong buwan ding naging ganun ang takbo ng Buhay nya,
Pero sadyang Mahirap Kalimutan at Palitan ang una nating minahal.
Kaya dumating ung araw na,
Hindi na nya gustong ipagpatuloy ang relasyon nila ng bagong babaeng minsan nyang minahal
At minsang nagbalik ng mga ngiti
Sakanyang labi.
Dahil napagtanto nyang iisang babae lang talaga ang mamahalin nya,
Maging ito man ay nasa kabilang buhay na.
Sa puntong to masasabi kong
Masaya ako, Masaya di dahil sa wala na syang kasintahan at masosolo ko na sya,
Kundi dahil sa may mahalagang bagay akong natutunan sakanya.
Yun ay tumupad sa pangakong binitawan mo sa isang tao,
Nandyan man sya o wala na.
Marahil gustong gusto nyo ng malaman kung sino nga ba ang lalaking tinukoy ko?
Bakit ganun nalang sya kahalaga?,kung bakit lagi akong nasa tabi nya?, kung bakit alam na alam ko ang mga pangyayari sa buhay nya?, at kung bakit handa akong gawin ang lahat para sakanya?
Simple lang,
Dahil sya'y walang iba kundi
Ang aking Ama.
----------
Maaari niyo pong i-sumite ang inyong sariling piyesa sa pamamagitan ng pagbibigay mensahe sa aming pahina.
