13/07/2026
IPAGTANGGOL ANG KOMUNIDAD! MORATORIUM SA UP SDG PARK, IPATUPAD NGAYON!
Isang marahas na tagpo ang hinarap ng mga residente ng Pook Malantik at mga karatig-pook sa Brgy. UP Campus noong Hulyo 8, 2026, matapos puwersahang magpasok ng mga kagamitan sa pagpapatayo ang Megawide Construction Corporation para sa UP SDG Urban Farm and Wellness Park. Upang depensahan ang kanilang mga tahanan, nagkaisa ang mamamayan sa pagtatayo ng barikada, na nagbunga ng komprontasyon kung saan dalawang residente ang nasugatan at isang mag-aaral ng UP Diliman ang binuhat patungo sa sasakyan ng pulisya. Walang silbi ang dangal at husay kung ang isinasalubong ng administrasyon sa mga mamamayang lumalaban para sa kanilang karapatan ay mga armadong blue guards, PNP, at SWAT. Bunsod nito, kaming mga estudyante mula sa Kolehiyo ng Edukasyon, katuwang ang malawak na komunidad ng UP, ay buong-lakas na nakikiisa sa mga residente laban sa mapang-aping komersyalisasyon at pasismo.
Bagamat ipinagmamalaki ng administrasyon ng UP at ng DHSUD na ang SDG Park ay modelo ng "sustainable community," walang tunay na pag-unlad kung ang kapalit nito ay ang pagwasak sa buhay at kabuhayan ng mga maralita. Ibinunyag ng Malantik Community Association na sa mahigit 1,000 pamilyang mawawalan ng tirahan, hamak na 400 housing units lamang mula sa planong 1,200 ang nakalaan para sa kanila. Noong Pebrero pa lamang, ginamit na ng OVCCA-PSSO ang kanilang mga gwardya upang manmanan ang komunidad, na sinundan ng marahas na paggiba at pagbunot sa mga pananim ng mga residente noong Hunyo 15. Upang bigyang-katwiran ang proyekto, idinadahilan ng pamunuan ang 14 na dayalogo at town hall meetings mula Agosto 2025 hanggang Enero 2026, subalit ang mga ito ay huwad at mapagbukod dahil hindi isinama ang mayorya ng mga pamilyang direktang maaapektuhan ng demolisyon.
Ang proyektong ito ay bahagi ng mas malawak na adyenda ng land monetization at neoliberal na pagsasapribado sa mga pampublikong lupain ng unibersidad. Kitang-kita ang ganitong kalakaran sa pagtatayo ng DiliMall at Robinsons Easymart na nagpalayas sa mga maliliit na manininda, gayundin sa GyudFood na pumalit sa mga abot-kayang kainan. Habang iginigiit ng UP admin na ang pondong kinikita rito ay napupunta sa mga klasrum at pasilidad, nananatiling bulok at kapos sa espasyo ang Kolehiyo ng Edukasyon at iba pang yunit tulad ng CMu, CFA, CAL, SLIS, NCPAG, at UPIS. Higit pa rito, lantarang makikita ang conflict of interest sa katauhan ni Alfredo E. Pascual, na bumoto sa pag-apruba ng SDG Park bilang kasapi ng UP Board of Regents habang sabay na nakaupo bilang Independent Director ng Megawide Construction Corporation. Ang krisis sa Brgy. UP Campus ay sumasalamin din sa pambansang sitwasyon sa ilalim ng rehimeng Marcos, kung saan inuuna ang bilyon-bilyong pondo para sa militarisasyon habang humaharap sa banta ng marahas na demolisyon ang mga maralita, tulad na lang sa Mayhaligue, Laguna, at Taguig, kapalit ng mga proyektong pribado.
Sa kabila ng mga pananakot na ito, hindi magpapatinag ang hanay ng mamamayan. Kaisa ang UP Diliman University Student Council, mga lokal na konseho, at mga progresibong alyansa, handa nating harapin ang bawat atake sa ating komunidad. Buong-diwa nating hinihingi sa administrasyon ng UP ang kagyat na pagpapatupad ng moratorium sa lahat ng konstruksyon at aktibidad kaugnay ng UP SDG Wellness Park hangga't hindi ganap na natutugunan ang bawat panawagan ng mga residente sa Pook Malantik, Pook Aguinaldo, at Area 17. Nararapat ding magkaroon ng isang tapat at inklusibong dayalogo na pamumunuan mismo ng UP President, UP Diliman Chancellor, at mga responsableng Bise Tsanselor. Nanawagan kami sa lahat na sumapi sa Quick Response Team sa Pook Malantik upang maghatid ng suporta at patatagin ang ating depensa laban sa korporatismo. Bigyang-wakas ang konstruksyon ng SDG Wellness Park, ipaglaban ang tunay na konsultasyon, tutulan ang komersyalisasyon sa unibersidad ng bayan, at patuloy na magsilbi para sa kapakanan ng sambayanan!
ITIGIL ANG PAGTATAYO NG SDG WELLNESS PARK! TUNAY NA KONSULTASYON, IPATUPAD! TUTULAN ANG KOMERSYALISASYON SA PAMANTASAN!
ISKOLAR NG BAYAN, PAGLINGKURAN ANG SAMBAYANAN!
![[CALL FOR DONATIONS FOR RAYA CASTILLO] The UP College of Education Student Council, is holding a donation initiative for...](https://img5.schoolandcollegelistings.com/705/674/1319497067056746.jpg)
