ANG SUGA

𝙄𝙉 𝙎𝘼 𝙏𝙍𝙀𝙉𝘿, 𝙊𝙐𝙏 𝙎𝘼 𝙋𝘼𝙂-𝙄𝙄𝙎𝙄𝙋?

Sa panahon ngayon, tila mas mabilis pang sumali ang ilang mag-aaral sa mga uso sa social media kaysa matapos ang kanilang mga takdang-aralin at proyekto. Ang pagiging “in” sa TikTok o iba pang platform ay nagiging mas mahalaga kaysa sa pagiging ligtas at responsable. Hindi masama ang makisabay sa uso, ngunit kapag nalagay na sa panganib ang kaligtasan at pag-aaral, panahon na para huminto at mag-isip.

Ayon sa ulat ng Routenote (2025), mahigit 50 milyon ang aktibong TikTok users sa Pilipinas, isa sa pinakamalaking porsyento sa buong mundo. Hindi nakapagtataka na maging mabilis ang pagkalat ng mga “challenges” sa mga paaralan, kabilang na ang kasalukuyang na pagsabit sa rehas ng hagdan. Sa video, mukhang nakakatawa at madali, ngunit sa realidad, maaari itong magdulot ng isang malalang pinsala.

Sa ating paaralan, hindi na bago ang makita ang mga mag-aaral na abala sa paggawa ng trending videos. Minsan pa nga, sa loob mismo ng mga silid-aralan. Ang nakakabahala, mas nauuna pang makapagsumite ng entry sa social media challenge kaysa sa takdang-aralin o proyekto. Ang tanong: paano natin haharapin ang ganitong gawi na tila inuuna ang pansamantalang kasikatan kaysa sa pangmatagalang kabutihan?

Isang patunay na indikasyon ng problema ay ang mababang pagpapahalaga sa kaligtasan. Halimbawa, ang pagsabit sa hagdan, hindi lang basta gasgas o pasa ang maaaring mangyari, posibleng mabalian ng buto o, sa pinakamatindi, mamatay kung mahulog mula sa taas. Ngunit ang nakikita lamang sa video ay tawanan at “likes.” Ito ang panganib ng social media: tinatakpan nito ang tunay na kapahamakan sa likod ng ilang segundo ng aliw. Ang resulta, dumadami ang mga mag-aaral na napapatawag sa guidance o nabibigyan ng kaukulang interbensyon.

Isa ring malinaw na palatandaan ng maling prayoridad ng mga mag-aaral ay ang mas mabilis na pagsabay sa uso kaysa sa akademikong gawain. Kapansin-pansin sa ating paaralan na ang isang assignment o proyekto ay inaabot ng linggo bago isumite, ngunit kapag trending sa TikTok, ilang oras lang tapos agad. Ang ganitong gawi ay nagpapakita ng kakulangan sa time management at disiplina— mga kasanayang mahalaga hindi lang sa paaralan kundi pati sa buhay. Kung hindi ito mababalanse, unti-unting masisira ang ugali ng sipag at tiyaga na pundasyon ng tagumpay.

Ang labis na pagsunod sa mga mapanganib at walang saysay na trends ay hindi lang naglalagay sa panganib sa kaligtasan ng kabataan, kundi sinisira rin ang kanilang disiplina at pagpapahalaga sa pag-aaral. Ang social media ay hindi kaaway, ngunit kung walang tamang paggamit, nagiging bitag ito para sa kabataang naghahanap ng pansin kapalit ng kanilang kinabukasan.

Kung kayang gawing viral ang kalokohan, kaya ring gawing trending ang katalinuhan.

✍🏽 Vivienee V. Violanda
🖼️ Sean Amber P. Ancheta

𝗦𝗔𝗠𝗔𝗚𝗙𝗜𝗟 𝗶𝗻𝗶𝗹𝘂𝗻𝘀𝗮𝗱 𝗮𝗻𝗴 𝘀𝗲𝗹𝗲𝗯𝗿𝗮𝘀𝘆𝗼𝗻 𝗻𝗴 𝗕𝘂𝘄𝗮𝗻 𝗻𝗴 𝗪𝗶𝗸𝗮 𝟮𝟬𝟮𝟱; 𝗺𝗴𝗮 𝗺𝗮𝗴-𝗮𝗮𝗿𝗮𝗹 𝘁𝘂𝗺𝘂𝗴𝗼𝗻 𝘀𝗮 𝗵𝗮𝗺𝗼𝗻 𝗻𝗴 𝗽𝗮𝗴𝗯𝘂𝗯𝘂𝗴𝘁𝗼𝗻𝗴

“Maging tagapangalaga ka ng wikang Filipino sapagkat walang ibang wika ang may kakayahan na ipaliwanag ang ating kasaysayan at kultura na siyang ring tulay natin sa pagkakaisa."

Ito ang binigyang-diin ng Tagapag-ugnay sa Filipino at Tagapayo ng Samahan ng mga Mag-aaral sa Filipino (SAMAGFIL) na si Rey Noel D. Besana sa harap ng mga mag-aaral sa pambungad na selebrasyon ng Buwan ng Wika na ginanap sa San Nicolas National High School, Agosto 4.

Nagsimula ang gawain sa ganap na 7:00 ng umaga kasabay ng seremonya sa pagtaas ng bandila na pinangunahan ng mga kasapi ng SAMAGFIL.

Isa sa mga tampok na bahagi ng programa ang patimpalak sa pagbubugtong, kung saan sinubok ang bilis at talas ng isip ng mga mag-aaral sa paunahang pagsagot sa entablado.

Narito ang mga nagwagi sa patimpalak at nakatanggap ng gantimpala: Riza P. Botictic (Grade 7), Christian Rey B. Besoña (Grade 8), Precious Grace V. Calumno (Grade 9), Alexandru Tonnino D. Lachica (Grade 10), Jeremiah Deanon (Grade 11), at Charice C. Villaruel (Grade 12).

"Nasagot ko ang bugtong dahil noong elementarya pa lang ay libangan na namin ito ng mga kaibigan ko. Sakto pa, ubos na ang papel ko, kaya sobrang saya ko na ang premyo ay isang pad ng papel," ani Deanon.

Dinaluhan din ang aktibidad ng lahat ng mga g**o at kawani ng paaralan na nagsuot ng mga palamuti at katutubong kasuotan bilang tanda ng pagkakaisa sa selebrasyon sa pangunguna ng Pinuno-sa-Tungkulin ng Principal II ng paaralan na si Lea A. Uy.

“Napakahusay at handang-handa ang pambungad na programa na inihanda ng SAMAGFIL upang isulong ang diwa ng Buwan ng Wika,” ayon kay Uy sa isang panayam.

Inaasahang magpapatuloy ang serye ng mga gawain para sa Buwan ng Wika sa mga susunod na linggo, na may temang nakatuon sa pagpapalalim ng pag-unawa sa wikang Filipino at mga katutubong wika bilang salamin ng kultura, kasaysayan, at identidad ng bansa tungo sa pagkakaisa.

✍🏽 Jaquelyn Joy B. Carolino
📷 Prince JL G. Bantes
📷 Elise Hyacinth Eve C. Vargas
📷 Joel V. Quiambao

🌧️ BAKIT KINAKAILANGANG IKANSELA ANG KLASE TUWING HABAGAT?
Alam mo ba kung bakit madalas may class suspension o shift to alternative delivery mode (ADM) tuwing panahon ng Habagat? 🤔 Mahalagang maunawaan natin ang mga panganib at epekto nito upang maging handa, ligtas, at responsableng mamamayan sa gitna ng mapaminsalang panahon.

☔ Maging Laging Handa!
Narito ang mga paalala upang masig**o ang kaligtasan ng lahat:
📻 Makinig sa balita – Subaybayan ang mga update tungkol sa lagay ng panahon.
📍 Alamin ang sitwasyon sa inyong lugar – May banta ba ng baha, malakas na hangin, landslide, o storm surge?
🏫 Kilalanin ang mga ligtas na lugar – Alamin kung saan ang evacuation centers at mga emergency hotlines.
🎒 Ihanda ang go bag – Ilagay dito ang mahahalagang gamit tulad ng flashlight, tubig, gamot, at pagkain.
📢 Sumunod sa mga abiso – Makinig sa LGU at mga ahensya tulad ng PAGASA para sa tamang gabay.
🙏 Manalangin – Humingi ng gabay at proteksyon para sa sarili, pamilya, at komunidad.

✅ Kung nasa ligtas na kalagayan ka naman:
📚 Mag-aral at magreview
🧹 Tumulong sa bahay
🤝 Maging mahinahon

Ang kaligtasan ay mahalaga.

𝗪𝗔𝗟𝗔𝗡𝗚 𝗣𝗔𝗦𝗢𝗞! 🌧️

Habang wala munang pasok, gamitin ang pagkakataong ito para makapagpahinga, magbasa, maghanda sa sakuna, o tumulong sa bahay.

🚨 Kaligtasan Muna:
✔ Huwag nang lumabas ng bahay kung hindi kinakailangan.
✔ Iwasan ang paglalaro o paglalakad sa baha.
✔ I-charge ang mga gadget at maghanda ng emergency kit.
✔ Makinig sa opisyal na anunsyo mula sa paaralan at LGU.

Maging ligtas at responsable.
𝗛𝗶𝗻𝗱𝗶 𝗯𝗮𝗸𝗮𝘀𝘆𝗼𝗻 𝗮𝗻𝗴 𝗯𝗮𝘄𝗮𝘁 𝗸𝗮𝗻𝘀𝗲𝗹𝗮𝘀𝘆𝗼𝗻.
Mag-ingat! 🙏🏽

🔥 Opisyal na Pahayag mula sa ANG SUGA 🔥
Sa bisa ng masusing pagtataya, buong puso naming ipinapakilala ang mga bagong miyembro ng Ang Suga (Opisyal na Pahayagang Pangkampus ng San Nicolas National High School sa Filipino) para sa Taong Panuruan 2025–2026!

Mabuhay ang malayang pamamahayag! 🖋️📰📸

𝗗𝗔𝗟𝗜 𝗡𝗔! 𝗠𝗔-𝗕𝗥𝗜𝗚𝗔𝗗𝗔 𝗞𝗜𝗧𝗔! 💪🏼

Inaanyayahan ang lahat ng mga mag-aaral, magulang, stakeholders, at volunteers na makiisa sa Brigada Eskwela 2024! Sama-sama nating gawing ligtas ang ating paaralan para sa darating na pasukan, TP 2024 - 2025.

📅 Date: July 22-27, 2024
🎉 Opening Program: July 22, 2024

Mahalagang magtulungan tayo upang makapagtatag ng paaralang handang magbigay ng dekalidad na edukasyon sa mga mag-aaral.

Tara na't magkaisa para sa mas matibay at maunlad na kinabukasan ng ating mga mag-aaral!

𝗥𝗘-𝗔𝗟 𝗢𝗥 𝗙𝗔-𝗞𝗘?! 🤔
𝗢𝗛, 𝗡𝗔𝗔𝗔𝗨𝗨𝗨𝗥𝗥𝗥! 𝗥𝗘-𝗔𝗟! 🤩
Ilang araw na lang, pasukan na! 🗓️
Handa ka na ba sa TP 2024-2025? 📚

Narito ang ilang tips para sa mas maayos na pagsisimula:
✅ Syempre, magpa-enrol ka muna sa San Nicolas National High School.
✅ Ihanda na ang inyong mga gamit at siguraduhing kompleto ang mga ito.
✅ Gumawa ng study schedule para maging organisado.
✅ Huwag kalimutang mag-enjoy at gawing masaya ang nalalabing araw ng bakasyon.

I-share ang inyong mga paghahanda at excitement para sa bagong taon ng pag-aaral! 😍

Maligayang pagdating sa 𝐀𝐍𝐆 𝐒𝐔𝐆𝐀! ✍️🔥

Matapos ang matagal na pamamahinga, nagbabalik na ang Opisyal na Pahayagang Pangkampus sa Filipino ng San Nicolas National High School.

Hindi naging madali ang mga huling taon na dumaan tayo sa gitna ng pandemyang COVID-19. Ngunit sa kabila ng mga pagsubok, ang tanggapan ng 𝐀𝐍𝐆 𝐒𝐔𝐆𝐀 ay hindi nawalan ng pag-asa at determinasyon na muling magsilbi sa inyo bilang tagapagdala at tagapagbalita ng impormasyon.

Sa bawat pahina ng 𝐀𝐍𝐆 𝐒𝐔𝐆𝐀, inaanyayahan naming kayong maging bahagi ng aming paglalakbay at pagbabahagi ng liwanag!

IPAHAYAG ANG KATOTOHANAN! 📰