02/10/2026
Realidad: Pighati Habang Tawa ay Di Mapigil
Ni Hadiguia Mamengkas
Ang realidad natin ay puno ng sakit at pagsubok. Habang tumatanda tayo, mas lalo natin itong naiintindihan. Mahirap man, ngunit kailangan nating gumising sa katotohanan na ang buhay ay hindi madali. Kahit sa mga panahong parang hindi mo na kaya, kailangan mo pa ring lumaban para sa mga pangarap na nais mong makamit.
Isa ito sa mga natutunan ko sa mga ibinahaging kwento ng aming guest speaker. Si Sir Datuali M. Bertudan, isang Senior High School teacher sa SMHS, ang nag-perealize sa akin, at maging sa iba pang mga estudyante, na ang buhay ay talagang punong-puno ng hamon. Na hindi lahat ng tao ay totoo; minsan, sa ilalim ng ngiti at tawa, mayroong nakakubling kalungkutan at sakit na pilit kumakawala, ngunit pinagtatakpan din para lamang ipagpatuloy ang laban sa buhay.
Ang aktibidad na ito na ginanap sa SMHS ngayong Oktubre 1 ay isa sa pinakamahalagang pangyayari na hinding-hindi ko malilimutan. Dahil dito, nasagot ng aming guest speaker ang aking katanungan: "Ano-ano ang mga dapat gawin kung ikaw ay nahihirapan nang lumaban para sa iyong kinabukasan?"
“Kahit gaano kahirap ang buhay, kahit madapa ka ng madapa, bumangon ka pa rin para sa iyong mga pangarap. Huwag sumuko sa mga pagsubok sa buhay,” ito ang naging makabuluhang kasagutan at payo sa akin ni Sir Bertudan.
Sa dami ng mga ibinahagi niyang kwento tungkol sa kanyang buhay, napakarami naming natutunan. Isa na rito ang katotohanang hindi hadlang ang kahirapan upang sukuan ang ating mga pangarap. Ayon sa kanyang karanasan, dumaan siya sa matitinding pagsubok, nakaranas siyang lumipat-lipat ng paaralan at may mga pagkakataon pang natigil sa pag-aaral dahil sa hirap ng buhay. Ngunit dahil sa determinasyong maabot ang kanyang mga pangarap, pinagpatuloy niya ito hanggang sa magtagumpay.
Sa dami ng impormasyong kanyang ibinigay, mayroong isang pahayag na labis na tumatak sa aking isipan: kahit gaano pa kahirap ang buhay, dapat pa rin tayong lumaban. Kahit madapa tayo ng paulit-ulit, dapat pa rin tayong tumayo at ipagpatuloy ang ating sinimulan.
Bilang isang manunulat, nais kong iparating sa aking mga kapwa kabataan na kahit gaano tayo nahihirapan sa buhay, huwag tayong sumuko. Bumangon kapag nadapa, at laging magtiwala sa ating sarili.
