10/05/2013
UNU IN PANGATUD SIN MGA ULAMA' HA MADZHAB SHAFI'IE HA MGA ADILLAH NAMAYTAH SIN BUKUN SUNNAH IN HUKUMAN SIN PAG-QUNUT HA SAMBAHAYANG SUBUH
بسم الله الرحمن الرحيم
اللهم صل و سلم على سيدنا محمد و على آله و أصحابه في كل لمحة و نفس بعدد معلوم لك
Awun kaibanan taymanghud natuh, hantang magka-inu-inu sin parkalah pag-qunut ha sambahayang subuh. Laung nila, matampal na in dalil sin pag-qunut ha sambahayang subuh, nah maytah in kaibanan hulah (eg. Saudi Arabia, Pakistan, etc) wayruun kakitaan mu magku-qunut ha sambahayang subuh?
Mga palanggungan ha Agama Islam, in parkalah ini, piyag-ikhltilafan sin mga ulama' ha upat madzhab. Tantu, in kikitah natuh ha mga hulah biyah sin KSA iban Pakistan sawpama niya, in yan bukun papanaw sin mga ulama' Shafi'iyyah in piyapakay duun. Awun da isab mga dalil nila yan. Sumagawah, wayruun piyakay sin mga ulama' Shafi'iyyah in mga dalil nila yan ha karnah sin mga parsababan amu in sabbutun natuh ini.
Awun na dain ha mga ulama' in imiyan sin in Nabi (saw) nagqunut ha laum sin hangkabulan da, mahuli ampa niya tinggalan. Piyakay nila in hadith riwayat hi Anas (ra):
قَنَتَ شَهْرًا يَدْعُو عَلَى أَحْيَاءٍ مِنْ أَحْيَاءِ الْعَرَبِ ثُمَّ تَرَكَ هُ (رواه البخارى j أَنَّ رَسُولَ اللَّهِ
و مسلم)
Sabunnal tuud in Nabi (saw) nag-qunut ha laum sin hangkabulan pag-ubus magrukuh nanghinduwa’a ha kabinsanaan sin hambuok li’uran dain ha bangsa arab, mahuli ampa niya
tinggalan. (Bukhari & Muslim)
In hadith riwayat hi Anas (ra) subay natuh akuhun sin in ini hadith saheeh ha karnah kabakan in hadith ini ha laum Saheeh Bukhari iban Saheeh Muslim. Sumagawah, in subay natuh tuod patungun marayaw amu in lapal hi Anas (ra) ثمّ تركه (mahuli ampa niya tinggalan). Unu bahah in tinggalan sin panghuh natuh Nabi
Muhammad (saw)? Qunut bahah? Atawa amu in
panghinduwa’a niya ha kabinsanaan sin hambuok li’uran dain ha bangsa arab?
Ha supaya natuh kahatihan marayaw in masa’alah ini, dungugun natuh in lilayan sin hambuok alim amu in tanyag ha katilingkal sin dunya dain ha zaman niya yadtu sakarang pa
zaman natuh ini in paslud sin ilmuh niya ha agama natuh, amu na in Imam Abu Zakariyya Muhyiyuddin Yahya bin Sharaf An- Nawawi (rah). Piyatarrang niya marayaw in maksud sin hadith yan ha laum kitab niya Al Majmu’ (vol. 3/p. 505):
Arapun in jawab ha hadith riwayat hi Anas (ra)
iban hi Abu Hurairah (ra) ha tungud sin lapal nila ,ثمّ تركه nah in maksud nila in tinggalan sin Nabi (saw) amu sadja in paglahnat ha mga satruh, bukun niya tinggalan in pag-qunut. Atawa in maksud niya, tinggalan niya in pag-qunut ha mga sambahayang fardhu’ malaingkan in sambahayang subuh. Subay tuod tafsiran in mga hadith ini sin bihaini ha karnah matarrang da isab in lapal hi Anas (ra), “Wayruon tuod himundung in Rasul (saw) ha pag-qunut ha sambahayang subuh sahingga siya timaykud dain ha dunya.” Dain ha sabab ini, harus tuud in papaghambuukun in ma’ana sin mga hadith yan.
Riwayat da isab hi Imam Baihaqi dain kan Abdurahman bin Madiyyil Imam sin in siya naglapal da isab إنّما ترك اللعن (in tinggalan niya amu sadja in paglahnat). Gam man in tafsir sin hadith ini labi pa piyatarrang katuh taniyu sin riwayat hi Abu Hurairah (ra) amu in ثمّ ترك الدعاء عليهم (mahuli ampa niya tinggalan in panghinduwa’a ha kabinsana’an nila).
Dain di, makawah natuh in hambuuk pangadjian sin in tinggalan sin Rasul (saw) amu na in qunut nazilah (paghinangun ha tiyap-tiyap sambahayang fardhu’), bukun amu in qunut
subuh.
Awun da isab mga tao amu in dih tuod manayma’i sin pagqunut ha sambahayang subuh, liyabay nila ha dalil amu in hadith riwayat hi Sa’ad bin Tariq (ra) amu na in pagnganan Abu
Malik Al Asja’i:
j عَنْ أَبِى مَالِكٍ الأَشْجَعِىِّ قَالَ قُلْتُ لأَبِى يَا أَبَةِ إِنَّكَ قَدْ صَلَّيْتَ خَلْفَ رَسُولِ اللَّهِ
وَأَبِى بَكْرٍ وَعُمَرَ وَعُثْمَانَ وَعَلِىِّ بْنِ أَبِى طَالِبٍ هَا هُنَا بِالْكُوفَةِ نَحْوًا مِنْ خمَْسِ سِنِينَ
أَكَانُوا يَقْنُتُونَ قَالَ أَىْ بنَُىَّ مُحْدَثٌ . (رواه الترمذى)
Dain kan Abu Malik Al Ashja’i, laung niya, “Iyan ku hi amah ku, ‘Ya amah ku! Bunnal tuud nakasambahayang kaw ha taykud sin
Rasul (saw) iban hi Abu Bakar, Uthman, iban hi ‘Ali bin Abi Talib didtu ha Kufah ha laum sin magkulang maglabi lima tahun. Unu ka, mag-qunut sila?’ Laung niya kakuh, ‘Ya anak ko! Bid’ah!’ (Tirmizi)
Bang sawpama bunnal hi Sa’ad bin Tariq (ra) nakapamung sin biyah na sin ha laum riwayat ini, nah tantu tuud in ini hambuuk hal amu in patut pag-inu-inuhan sin katan ha karnah landuh in taud sin mga riwayat amu in namayta’i sin in Nabi (saw) iban sin mga upat khalifah mag-qunut sila. Kabatukan sin kitaniyo in mga riwayat yan ha laum Saheeh Bukhari, Saheeh Muslim, Sunan Ibnu Majah, Sunan Abu Daud, Sunan Nasa’i,
iban Bihaqi. Dain ha sabab ini, in himumungan hi Sa’ad bin Tariq (ra) wayruon iyaku ha laum madzhab Shafi’i iban na sin madzhab Maliki. Maytah bahah isab bihadtu? Ha karnah ibuhan
manusiyah in nakasakup ha Rasul (saw) nag-qunut, damikyan in mga sahabat niya. Sartah isa-isa ra hi Tariq (ra) in nakaiyan sin in qunut bid’ah. Di na ha masa’alah bihaini mapakay sin kitaniyo in hambuok qai’dah ha fiqhi المثبت مقدّم على النافى (in mag-isbat subay paunahun dain ha magnafi). Puas dain ha yadtu, in mga tao imiyan “awun” labi mataud dain sin imiyan “wayruun.” Bihaini ra tuud in jawab hi Imam Nawawi (rah) ha laum kitab niya Al Majmu’ (vol. 3/p. 505):
و الجواب عن حديث سعد بن طارق انّ رواية الّذين اثبتوا القن وت معهم زيادة علم و
هم اكثر فوجب تقديمهم. ه
In jawab ha hadith hi Sa’ad bin Tariq (ra), sabunnal tuod in riwayat sin mga sila amu in namaugbugi sin qunut awun makawah kanila durugangan ha ilmuh, iban in sila labi mataud.
Dain ha sabab ini, wajib sila paunahun.
Laung hi Qadhi Abu Bakar ibnul Arabi Al Maliki (rah) ha tungud sin hadith ini, “Tantu na tuud sin in Nabi (saw) nag-qunut siya ha sambahayang subuh. Damikyan, tantu na tuud sin in Nabi (saw) nakapag-qunut ha sung magrukuh iban puas magrukuh. Damikyan, tantu na tuud sin in Nabi (saw) nakapagqunut
nazilah ra isab, sartah in upat khalifah ha Madinah nakapag-qunut da isab. Iban ginhawa na tuud hi Baginda Umar (ra) in namaytah sin in qunut ini sunnah. Iban iyammalan tuud ini ha Masjid Nabawi. Dain ha sabab ini, ayaw na kamu umasip sin unu-unu na himumungan dugaing dain ha ini.”
Laung hi Sheikh Shafi’i Hazami dain ha Jakarta (Indonesia) ha laum kitab niya Tawdheehul Adillah ha tungud sin riwayat hi Sa’ad bin Tariq (ra) amu in nasabbut natuh, “Matarrang na tuod
sin in pag-qunut bukun bid’ah bang natuh pandangun in mga riwayat (sin mga sahabat). Dain ha sabab yadtu, in bid’ah amu na in pagduwa-ruwa na mayan ha ka-sunnah niya iban masimasi na mayan pagpangasubu ha tungud sin masa’alah ini.”
Ha laum kitab Mizanul I’tidal hi Imam Dzhabi (rah), piyanglugus tuod hi Imam Al Uqaili (rah) sin dih makadjari agarun in riwayat hi Abu Malik Al Asja’i bang ha tungud sin hukuman sin qunut ha laum sambahayang.
Awun da isab mga tao amu in piyakay nila in riwayat hi Ibnu Mas’ud (ra) bilang dalil nila ha pamaham nila sin in qunut ha sambahayang subuh bid’ah:
فِى شَىْءٍ مِنْ صَلَوَاتِهِ j مَا قَنَتَ رَسُولُ اللَّهِ
Wayruon tuod nakapag-qunut in Rasul (saw) ha unu-unu na sambahayang niya.
In riwayat ini laung hi Imam Nawawi (rah) ha laum kitab niya Al Majmu’ landuh in dha’eef niya ha karnah in hambuuk dain ha mga nagriwayat sin riwayat ini amu na hi Muhammad
bin Jabir As-Suhaili amu in dih pagtayma’un sin mga ahli hadith in mga riwayat niya. Siyabbut hi Imam Dzahabi (rah) ha laum kitab niya Mizanul I’tidal sin in hi Muhammad bin Jabir As-Suhaili diya’eef hinda Ibnu Mu’een iban Imam Nasa’i (rah). Laung isab hi Imam Bukhari, “Bukun makusug (in riwayat niya).” Laung hi Ibnu Hatim (rah), “Nagkabainglupahun siya ha kahinapusan sin kabuhih niya, iban nalawah in mga kitab niya.”
In sila mabayah humati marayaw sin kahalan hi Muhammad bin Jabir As-Suhaili, makadjari nila ukabun in kitab Mizanul I’tidal (vol. 3/p. 492) hi Imam Dzahabi (rah).
Iban biyah na sin nasabbut natuh ha nakauna, in mga riwayat amu in imiyan “awun” subay pataimbabawun dain ha mga riwayat amu in imiyan “wayruun” bilang pangagad natuh ha qa’idah sin mga ahli fiqhi المثبت مقدّم على النافى (in mag-isbat subay paunahun dain ha magnafi).
Awun isab mga tao mababaw in panghati nila ha shara’ sin Agama Islam amu in piyakay nila in riwayat hi Ibnu ‘Abbas (ra) bilang dalil sin pamaham nila sin in pag-qunut ha sambahayang
subuh in hukuman niya bid’ah:
القُ ن وتُ فِى الصُّ بحِ ب دْ عَ ة
In pag-qunut ha sambahayang subuh bid’ah.
In hadith ini landuh in dha’eef niya. Riwayat ini hi Imam Baihaqi (rah) labay dain kan Abu Layla Al Kufi. Ginhawa ra isab hi Imam Baihaqi (rah) in imiyan sin in hadith ini bukun saheeh ha karnah hi Abu Layla Al Kufi ini hambuuk siya magririwayat hadith amu in matruk (tao amu in tinggalan sin mga ahli hadith in mga riwayat niya). Iban ginhawa ra isab hi Ibnu ‘Abbas in
imiyan ha dugaing mga riwayat أنّه قنت فى الصبح (sabunnal tuod in Rasul nag-qunut ha sambahayang subuh).
Awun da isab dain ha mga tao amu in nagdara sinpamaham sin in hukuman sin pag-qunut ha sambahayangsubuh bid’ah, piyakay nila bilang dalil in riwayat hi Ummu Salamah (ra):
ن هَ ى عَ نِ القُ ن وتِ فِى الصُّ بْ حِ j أنّه
Sabunnal tuod liyang sin Rasul (saw) in pag-qunut ha sambahayang subuh.
Bang usulun in mga nagriwayat sin hadith ini, in hadith ini riwayat dain kan Muhammad bin Ya’la labay dain kan Anbasah bin Abdurahman labay dain kan Abdullah bin Nafi’ labay dain kan amah niya sahingga miyabut kan Ummu Salamah (ra).
Laung hi Imam Daruqutni (rah), “In tungka-tao nagriwayat sin hadith yan dha’eef sila katu-tu. Iban wayruon nakariwayat hi Nafi’ dain kan Ummu Salamah (ra).” Kiyasulat ha laum kitab
Mizanul I’tidal sin nag-iyan hi Imam Bukhari sin in hi Muhammad bin Ya’la ini mataud mga hadith in piyaglawah niya. Damikyan laung hi Abu Hatim, in tao yan matruk. Iban in hi Anbasah bin Abdurahman matruk da isab laung hi Imam Bukhari. In hi Abdullah bin Nafi’ isab, mataud mga hadith munkar in riwayat niya.
Dain ha mga hujjah sin mga ulama' sin Shafi'iyyah ini, isbat nila sin sunnah in pagduwa'a qunut ha sambahayang subuh. Dain ha sabab ini, in mga sila miyamagad ha madzhab hi Imam Shafi'ie, dih natuh tuud makadjari salla'un in kakahinang nila ha tungud sin parkalah ini, karnah in masa'alah ini masa'alah piyag-ikhtilafan sin mga ulama' ha dugaing-dugaing madzhab.
Allahu a'lam bissawab...
{SAF}