Diocese of Iba - St. Anne Parish

15/08/2026

𝐌𝐆𝐀 𝐏𝐀𝐆𝐁𝐀𝐒𝐀 | Ika-20 Linggo sa Karaniwang Panahon

UNANG PAGBASA
Isaias 56, 1. 6-7

Pagbasa mula sa aklat ni propeta Isaias

Ang sabi ng Panginoon sa kanyang bayan:
“Ayon sa katarungan at laging matuwid ang inyong gagawin, ang pagliligtas ko’y di na magluluwat, ito ay darating, ito’y mahahayag sa inyong paningin.”

Ito naman ang sabi ng Panginoon sa mga dating dayuhan na ngayo’y kabilang sa kanyang bayan,
buong pusong naglilingkod sa kanya, nangingilin sa Araw ng Pamamahinga; at matapat na nag-iingat sa kanyang tipan: “Dadalhin ko kayo sa Sion, sa aking banal na bundok. Ipadarama ko sa inyo ang kagalakan sa aking Templo. Tatanggapin ko ang inyong mga handog, at ang Templo ko’y tatawaging bahay-dalanginan ng lahat ng bansa.”

Ang Salita ng Diyos.

SALMONG TUGUNAN
Salmo 66, 2-3. 5. 6 at 8

Nawa’y magpuri sa iyo
ang lahat ng mga tao.

O Diyos, pagpalain kami’t kahabagan,
kami Panginoo’y iyong kaawaan,
upang sa daigdig mabatid ng lahat
ang iyong kalooban at ang pagliligtas.

Nawa’y magpuri sa iyo
ang lahat ng mga tao.

Nawa’y purihin ka ng mga nilikha,
pagkat matuwid kang humatol sa madla;
ikaw ang patnubay ng lahat ng bansa.

Nawa’y magpuri sa iyo
ang lahat ng mga tao.

Purihin ka nawa ng lahat ng tao,
purihin ka nila sa lahat ng dako.
Ang lahat sa ami’y iyong pinagpala,
nawa’y igalang ka ng lahat ng bansa.

Nawa’y magpuri sa iyo
ang lahat ng mga tao.

IKALAWANG PAGBASA
Roma 11, 13-15. 29-32

Pagbasa mula sa sulat ni Apostol San Pablo sa mga taga-Roma

Mga kapatid, ito naman ang sasabihin ko sa inyo, mga Hentil. Yamang ako’y apostol ninyo, pinangangatawanan ko ang aking ministeryo upang mangimbulo ang mga kababayan ko, at sa gayo’y maligtas ang ilan sa kanila. Kung naging daan ng pakikipagkasundo ng sanlibutan sa Diyos ang pagkakatakwil sa kanila, ang muling pagtanggap sa kanila’y para na ring pagbibigay buhay sa patay.

Ang Diyos ay hindi nagbabago ng isip tungkol sa kanyang mga kaloob at pagtawag. Dati, masuwayin kayo sa Diyos, ngunit ngayo’y kinahahabagan sa panahon ng pagsuway ng mga Judio. Gayun din naman sila’y naging masuwayin ngayong kayo’y kinahahabagan upang sila’y kahabagan din. Sapagkat hinayaan ng Diyos na maalipin ng kanilang kasalanan ang lahat ng tao upang maipadama sa kanila ang kanyang habag.

Ang Salita ng Diyos.

ALELUYA
Mateo 4, 23

Aleluya! Aleluya!
Ipinangaral ni Hesus
ang paghahari ng Diyos;
sakit ay kanyang ginamot.
Aleluya! Aleluya!

MABUTING BALITA
Mateo 15, 21-28

Ang Mabuting Balita ng Panginoon ayon kay San Mateo

Noong panahong iyon, si Hesus ay nagpunta sa lupaing malapit sa Tiro at Sidon. Lumapit sa kanya ang isang Cananeang naninirahan doon at malakas na sinabi, “Panginoon, Anak ni David, mahabag po kayo sa akin! Ang anak kong babae ay inaalihan ng demonyo at masyadong pinahihirapan.” Ngunit gaputok ma’y di tumugon si Hesus. At lumapit ang kanyang mga alagad at sinabi sa kaniya, “Pagbigyan na nga po ninyo at nang umalis. Siya’y nag-iingay at susunud-sunod sa atin.” Sumagot si Hesus, “Sa mga tupang naliligaw ng sambahayan ng Israel lamang ako sinugo.” Ngunit lumapit sa kanya ang babae, lumuhod sa harapan at ang sabi, “Tulungan po ninyo ako, Panginoon.” Sumagot si Hesus, “Hindi dapat kunin ang pagkain ng mga anak upang ihagis sa mga tuta.” “Tunay nga po, Panginoon,” tugon ng babae, “ngunit ang mga tuta man ay nagsisikain ng mumong nalalaglag sa hapag ng kanilang panginoon.” Kaya’t sinabi sa kanya ni Hesus, “Napakalaki ng iyong pananalig! Mangyayari ang hinihiling mo.” At noon di’y gumaling ang kanyang anak.

Ang Mabuting Balita ng Panginoon.

15/08/2026

𝐌𝐆𝐀 𝐏𝐀𝐆𝐁𝐀𝐒𝐀 | Dakilang Kapistahan ng Pag-aakyat sa Langit ng Mahal na Birheng Maria

UNANG PAGBASA
Pahayag 11, 19a; 12, 1-6. 10ab

Pagbasa mula sa aklat ng Pahayag

Nabuksan ang templo ng Diyos sa langit, at nakita ang Kaban ng Tipan.

Kasunod nito’y lumitaw sa langit ang isang kagila-gilalas na tanda: isang babaing nararamtan ng araw at nakatuntong sa buwan; ang ulo niya’y may koronang binubuo ng labindalawang bituin. Malapit na siyang manganak kaya’t napasigaw siya sa matinding sakit at hirap.

Isa pang tanda ang lumitaw sa langit: isang pulang dragon na napakalaki. Ito’y may pitong ulo at sampung sungay, at may korona ang bawat ulo. Sinaklot ng kanyang buntot ang ikatlong bahagi ng mga bituin sa langit at inihagis ang mga iyon sa lupa. Pagkatapos ay tumayo siya sa paanan ng babaing malapit nang manganak upang lamunin ang sanggol sa sandaling ito’y isilang. At ang babae ay nagsilang ng sanggol na lalaki, ngunit may umagaw sa bata at dinala ito sa Diyos, sa kanyang trono. Ang sanggol na ito ang itinakdang maghahari sa lahat ng bansa sa pamamagitan ng kamay na bakal. Ang babae naman ay tumakas patungo sa ilang, sa isang dakong inihanda ng Diyos para sa kanya.

At narinig ko ang isang malakas na tinig buhat sa langit na nagsasabi, “Dumating na ang pagliligtas ng Diyos! Ipinamalas na niya ang kanyang kapangyarihan bilang Hari! Ipinamalas na ng Mesiyas ang kanyang karapatan!”

Ang Salita ng Diyos.

SALMONG TUGUNAN
Salmo 44, 10bk. 11. 12ab. 16

Nasa kanan mo ang reyna,
maningning sa ginto’t ganda.

Samantalang sa kanan mo nakatayo yaong reyna,
palamuti’y gintong lantay sa damit na suot niya.

Nasa kanan mo ang reyna,
maningning sa ginto’t ganda.

O kabiyak nitong hari, ang payo ko’y ulinigin;
ang lahat mong kamag-anak at ang madla ay limutin.

Nasa kanan mo ang reyna,
maningning sa ginto’t ganda.

Sa taglay mong kagandahan ang hari ang paibigin;
siya’y iyong Panginoon, marapat na iyong sundin.

Nasa kanan mo ang reyna,
maningning sa ginto’t ganda.

Sama-samang masasaya, ang lahat ay nagagalak
na pumasok sa palasyo at sa hari ay humarap.

Nasa kanan mo ang reyna,
maningning sa ginto’t ganda.

IKALAWANG PAGBASA
1 Corinto 15, 20-27

Pagbasa mula sa unang sulat ni Apostol San Pablo sa mga taga-Corinto

Mga kapatid, si Kristo’y muling binuhay bilang katibayan na muling bubuhayin ang mga patay. Kung paanong dumating ang kamatayan sa pamamagitan ng isang tao, gayun din naman, dumating din ang muling pagkabuhay sa pamamagitan ng isang tao. Sapagkat kung paanong mamamatay ang lahat dahil sa kanilang kaugnayan kay Adan, gayun din naman, mabubuhay ang lahat dahil sa kanilang kaugnayan kay Kristo, ngunit ang bawat isa’y sa kanya-kanyang takdang panahon: Si Kristo ang pinakauna sa lahat; pagkatapos, ang mga kay Kristo sa panahon ng pagparito niya. At darating ang wakas, pagkatapos malupig ni Kristo ang lahat ng kaharian, pamahalaan at kapangyarihan; at ibibigay niya sa Diyos at Ama ang paghahari. Sapagkat si Kristo’y dapat maghari hanggang sa malupig niya at lubusang mapasuko ang kanyang mga kaaway. Ang kahuli-hulihang kaaway na kanyang pasusukuin ay ang kamatayan. Ganito ang sinasabi ng Kasulatan: “Ang lahat ng bagay ay lubusang pinasuko sa kanya ng Diyos.”

Ang Salita ng Diyos.

15/08/2026

𝐌𝐀𝐋𝐈𝐆𝐀𝐘𝐀𝐍𝐆 𝐀𝐑𝐀𝐖 𝐍𝐆 𝐌𝐆𝐀 𝐋𝐈𝐍𝐆𝐊𝐎𝐃 𝐍𝐆 𝐀𝐋𝐓𝐀𝐑!

Kasabay ng kapistahan ni St. Tarcisius ng Roma, patron ng mga Lingkod sa Altar, buong puso nating ipinagdiriwang ang lahat ng ating mga Lingkod sa Altar na patuloy na naglilingkod, nagmamahal, at nag-aalay ng kanilang oras at lakas para sa Panginoon.

Naway maging katulad natin si San Tarcisius na sa murang edad, buong tapang niyang ipinagtanggol ang Banal na Eukaristiya, pinili ang katapatan kay Kristo kaysa sa kanyang sariling kaligtasan. Ang kanyang buhay ay paalala na ang paglilingkod sa altar ay hindi lamang isang tungkulin, kundi isang paglilingkod na puno ng pagmamahal, pananampalataya, at sakripisyo.

Taos-puso rin kaming nagpapasalamat sa bawat Lingkod ng Altar ng Parokya ni Sta. Ana — sa inyong oras, tiyaga, sakripisyo, at pagiging laging handang tumugon sa tawag ng Panginoon. Salamat sa inyong paglilingkod kahit minsan ay pagod, abala, o may mga pagsubok. Ang bawat simpleng paglilingkod ninyo sa altar ay isang magandang alay para sa Diyos.

Maraming salamat din sa ating mga magulang, pari, formators, at lahat ng taong nagiging daan sa pagsuporta, at panalangin para sa ating mga Altar Server. Sa inyong pagmamahal at suporta, mas napapalakas ang aming mga kabataan na magpatuloy sa paglilingkod.

Nawa’y patuloy nating isabuhay ang paalala:

“In everything, love and serve the Lord.”

Mabuhay ang ating mga Altar Server! Patuloy kayong maging ilaw at mabuting halimbawa sa paglilingkod kay Kristo.

San Tarcisuis, patron ng mga Altar Server, ipanalangin mo kami!

Muli, mula sa Parokya ni Santa Ana, Happy Altar Servers’ Day!

14/08/2026

𝐒𝐎𝐋𝐄𝐌𝐍𝐈𝐓𝐘 𝐎𝐅 𝐓𝐇𝐄 𝐀𝐒𝐒𝐔𝐌𝐏𝐓𝐈𝐎𝐍 𝐎𝐅 𝐓𝐇𝐄 𝐁𝐋𝐄𝐒𝐒𝐄𝐃 𝐕𝐈𝐑𝐆𝐈𝐍 𝐌𝐀𝐑𝐘

Tomorrow, August 15, we celebrate the Solemnity of the Assumption of the Blessed Virgin Mary.

The Assumption teaches us that, at the end of her earthly life, Mary was taken body and soul into the glory of Heaven. It reminds us of God’s promise of eternal life and invites us to follow Mary’s example of humble faith, loving obedience, and complete trust in God.

As we honor our Blessed Mother, may we learn from her “yes” to God and remain faithful in our own journey toward Heaven.

Let us celebrate this beautiful feast together through the Holy Eucharist:

06:30 A.M. Holy Mass
07:00 P.M. Holy Mass

May Mary, assumed into Heaven, pray for us and lead us ever closer to her Son, Jesus.

Our Lady of the Assumption, pray for us!

12/08/2026

𝐁𝐀𝐒𝐀𝐇𝐈𝐍: 𝐌𝐠𝐚 𝐩𝐚𝐚𝐥𝐚𝐥𝐚𝐧𝐠 𝐥𝐢𝐭𝐮𝐫𝐡𝐢𝐤𝐚𝐥 𝐤𝐚𝐮𝐠𝐧𝐚𝐲 𝐧𝐠 𝐩𝐚𝐠𝐝𝐢𝐫𝐢𝐰𝐚𝐧𝐠 𝐧𝐠 𝐃𝐚𝐤𝐢𝐥𝐚𝐧𝐠 𝐊𝐚𝐩𝐢𝐬𝐭𝐚𝐡𝐚𝐧 𝐧𝐠 𝐏𝐚𝐠-𝐚𝐚𝐤𝐲𝐚𝐭 𝐬𝐚 𝐥𝐚𝐧𝐠𝐢𝐭 𝐬𝐚 𝐌𝐚𝐡𝐚𝐥 𝐧𝐚 𝐁𝐢𝐫𝐡𝐞𝐧𝐠 𝐌𝐚𝐫𝐢𝐚

𝐁𝐀𝐒𝐀𝐇𝐈𝐍: 𝐌𝐠𝐚 𝐩𝐚𝐚𝐥𝐚𝐥𝐚𝐧𝐠 𝐥𝐢𝐭𝐮𝐫𝐡𝐢𝐤𝐚𝐥 𝐤𝐚𝐮𝐠𝐧𝐚𝐲 𝐧𝐠 𝐩𝐚𝐠𝐝𝐢𝐫𝐢𝐰𝐚𝐧𝐠 𝐧𝐠 𝐃𝐚𝐤𝐢𝐥𝐚𝐧𝐠 𝐊𝐚𝐩𝐢𝐬𝐭𝐚𝐡𝐚𝐧 𝐧𝐠 𝐏𝐚𝐠-𝐚𝐚𝐤𝐲𝐚𝐭 𝐬𝐚 𝐥𝐚𝐧𝐠𝐢𝐭 𝐬𝐚 𝐌𝐚𝐡𝐚𝐥 𝐧𝐚 𝐁𝐢𝐫𝐡𝐞𝐧𝐠 𝐌𝐚𝐫𝐢𝐚

11/08/2026

PASASALAMAT AT PANALANGIN KAY MAHAL NA POONG SANTA ANA

Para sa Pamimintuho tuwing Unang Martes ng Buwan at paghahandog ng panalangin kay Sta. Ana tuwing araw ng Martes

Mahal na P**ng Santa Ana, aming Patrona at Gabay,

Maraming salamat sa iyo dahil ipinakita mo sa amin ang dakilang kabutihan at kabanalan. Kahit sa mahabang panahon ng paghihintay, hindi ka nawalan ng pag-asa at patuloy kang nanalangin sa Diyos. Ikaw ay naging buhay na halimbawa sa amin upang kami rin ay magkaroon ng matibay na pananampalataya, tapat na pag-asa, at wagas na pagmamahal — na siyang pundasyon ng aming pagiging Simbahan.

Maraming salamat sa banal na pamumuhay na iniwan mo sa amin. Ikaw ay huwarang ina at asawa, na ang buhay ay nakatuon sa Diyos, sa pagmamahal sa pamilya, at paglilingkod sa mga nangangailangan. Tulad mo, nagnanais kaming maging isang pamayanan na namumuhay ayon sa Salita ng Diyos, nagkakaisa sa Eukaristiya, at may malasakit sa lahat, lalo na sa mga mahihirap at naghihirap.

Maraming salamat sa iyong pagtulong at pag-aalaga sa aming mga panalangin. Ikaw ang aming tagapamagitan na nagdadala ng aming mga hiling sa harap ng Diyos at ng iyong anak, ang Mahal na Birheng Maria. Salamat sa pagtulong mo sa aming mga kapatid na nagpapasan ng mabibigat na krus, at sa paggabay sa amin upang makayanan ang mga pagsubok ng buhay nang may pag-ibig at pananalig.

Tulungan mo kaming maging katulad mo: tapat sa Diyos, mapagmahal sa kapwa, at laging handang maglingkod. Gabayan mo kami upang ang aming parokya ay maging tunay na tahanan ng pananampalataya, kung saan ang bawat isa ay nagkakaisa, nagmamahalan, at nagiging "tinapay para sa iba" ayon sa halimbawa ni Hesus sa Eukaristiya.

Patuloy mo kaming akayin palapit sa iyong anak na si Maria at sa aming Panginoong Hesukristo. Turuan mo kaming tahakin ang mga yapak ni Kristo — na Siya ay iyong minahal, inalagaan, at ipinakilala sa mundo.

Santa Ana, salamat at patuloy mo kaming ipanalangin. Gawin mo kaming tapat, mapagkumbaba, at nagkakaisa sa paglilingkod sa Diyos at sa kapwa.

Amen.

09/08/2026

09 AGOSTO 2026 | Ika-19 Linggo sa Karaniwang Panahon (A)

1 Hari 19, 9a. 11-13a
Salmo 84, 9ab-10. 11-12. 13-14

Pag-ibig mo’y ipakita,
iligtas kami sa dusa.

Roma 9, 1-5
Mateo 14, 22-33

---------

UNANG PAGBASA
1 Hari 19, 9a. 11-13a

Pagbasa mula sa unang aklat ng mga Hari

Noong mga araw na iyon, si Elias ay sumapit sa Horeb na bundok ng Diyos. Pumasok siya sa isang yungib at doon nagpalipas ng gabi. Walang anu-ano’y nagsalita sa kanya ang Panginoon: “Lumabas ka at tumayo sa ibabaw ng bundok sa harapan ko.” Pagkasabi nito’y dumaan ang Panginoon at umihip ang napakalakas na hangin. Sumabog ang bundok at nagkadurug-durog ang mga bato sa lakas ng hangin ngunit wala sa hangin ang Panginoon. Nang tumigil ang hangin ay lumindol, ngunit wala sa lindol ang Panginoon. Pagkalipas ng lindol ay kumidlat, ngunit wala rin sa kidlat ang Panginoon. Pagkalipas ng kidlat, narinig niya ang isang banayad na tinig.

Lumabas si Elias, tinakpan ng balabal ang kanyang mukha at naghintay sa bunganga ng yungib.

Ang Salita ng Diyos.

SALMONG TUGUNAN
Salmo 84, 9ab-10. 11-12. 13-14

Pag-ibig mo’y ipakita,
iligtas kami sa dusa.

Aking naririnig magmula sa P**n ang sinasalita;
sinasabi niyang ang mga lingkod n’ya’y magiging payapa,
kung mangagsisisi at di na babalik sa gawang masama.
Ang nagpaparangal sa pangalan niya’y kanyang ililigtas,
sa ating lupain ay mananatili ang kanyang paglingap.

Pag-ibig mo’y ipakita,
iligtas kami sa dusa.

Ang pagtatapatan at pag-iibiga’y magdadaup-palad,
ang kapayapaan at ang katwira’y magsasamang ganap.
Sa balat ng lupa’y pawang maghahari yaong pagtatapat,
at ang katarungan nama’y maghahari mula sa itaas.

Pag-ibig mo’y ipakita,
iligtas kami sa dusa.

Gagawing maunlad ng Panginoong Diyos itong ating buhay,
ang mga halaman sa ating lupai’y bubungang mainam;
sa harapan niya yaong maghahari’y pawang katarungan,
magiging payapa’t susunod ang madla sa kanyang daan.

Pag-ibig mo’y ipakita,
iligtas kami sa dusa.

IKALAWANG PAGBASA
Roma 9, 1-5

Pagbasa mula sa sulat ni Apostol San Pablo sa mga taga-Roma

Mga kapatid, saksi ko si Kristo na katotohanan ang sinasabi ko; hindi ako nagsisinungaling. Saksi ko rin ang Espiritu Santo na malinis ang aking budhi sa sasabihin kong ito sa inyo: matindi ang aking kalungkutan at di mapawi ang pagdaramdam ng aking puso tungkol sa aking mga kalahi at mga kababayan, anupat mamatamisin kong ako’y sumpain at mawalay kay Kristo, alang-alang sa kanila. Sila’y mga Israelita at itinuring ng Diyos na mga anak niya. Nakita nila ang maliwanag na tanda na nagpapakilalang siya’y kasama nila. Sa kanila nakipagtipan ang Diyos; sa kanila rin ibinigay ang Kautusan, ang tunay na pagsamba, at ang mga pangako. Sila’y nagmula sa mga patriyarka, at sa kanilang lahi nagmula ang Kristo nang siya’y maging tao, Diyos na Kataas-taasan, na pinapupurihan magpakailanman! Amen.

Ang Salita ng Diyos.

ALELUYA
Salmo 129, 5

Aleluya! Aleluya!
P**n, ikaw ang pag-asa,
ang Salita mo’y ligaya,
pag-asa ko sa tuwina.
Aleluya! Aleluya!

MABUTING BALITA
Mateo 14, 22-33

Ang Mabuting Balita ng Panginoon ayon kay San Mateo

Noong panahong iyon, matapos pakainin ang mga tao, agad pinakasakay ni Hesus sa bangka ang kanyang mga alagad at pinauna sa kabilang ibayo samantalang pinauuwi niya ang mga tao. Pagkaalis ng mga ito, umahon siya sa burol upang manalangin. Nag-iisa siyang inabot doon ng gabi. Samantala, nasa laot na noon ang bangka at sinasalpok ng mga alon sapagkat pasalungat sa hangin. At nang madaling araw na’y sumunod sa kanila si Hesus na naglalakad sa ibabaw ng tubig. Kinilabutan sa takot ang mga alagad nang makita nilang may lumalakad sa ibabaw ng tubig. “Multo!” sigaw nila. Ngunit agad siyang nagsalita at sinabi sa kanila, “Huwag kayong matakot; si Hesus ito!” At nagsalita si Pedro, “Panginoon, kung talagang kayo iyan, papariyanin ninyo ako sa ibabaw ng tubig.” Sumagot siya, “Halika.” Kaya’t lumunsad si Pedro sa bangka at lumakad sa ibabaw ng tubig, palapit kay Hesus. Ngunit nang mapansin niya ang hangin, siya’y natakot at nagsimulang lumubog. “Sagipin ninyo ako, Panginoon!” sigaw niya. Agad siyang inabot ni Hesus. “Napakaliit ng iyong pananalig!” sabi niya kay Pedro. “Bakit ka nag-alinlangan?” Pagkasakay nila sa bangka, tumigil ang hangin. At sinamba siya ng mga nasa bangka. “Tunay na kayo ang Anak ng Diyos!” sabi nila.

Ang Mabuting Balita ng Panginoon.

02/08/2026

𝐇𝐀𝐏𝐏𝐘 𝐏𝐑𝐈𝐄𝐒𝐓 𝐃𝐀𝐘, Fr. Dex!

Sa paggunita natin kay San Juan Maria Vianney, Patron ng mga Pari, buong pusong nagpapasalamat ang Parokya ni Sta. Ana para sa kaloob ng inyong bokasyon at paglilingkod.

Sa aming minamahal na Kura Paroko, REV. FR. DEXTER FABIE

Maraming salamat, Father Dexter, sa inyong tapat na paggabay sa ating pamayanan sa pamamagitan ng Banal na Eukaristiya, mga Sakramento, at pangangaral ng Salita ng Diyos. Nawa’y patuloy kayong pagpalain ng Panginoon ng kalusugan, karunungan, at lakas sa inyong misyon bilang lingkod ni Kristo.

Sa pamamagitan ng panalangin ni San Juan Maria Vianney at ng ating patronang si Sta. Ana, nawa’y manatili kayong matatag at masigasig sa inyong banal na bokasyon.

Maligayang Araw ng mga Pari, Fr. Dex!

“The priesthood is the love of the Heart of Jesus.”
— St. John Marie Vianney

St. John Marie Vianney, ipanalangin mo ang aming pari.
Sta. Ana, ipanalangin mo ang aming pari.

28/07/2026

PASASALAMAT AT PANALANGIN KAY MAHAL NA POONG SANTA ANA

Para sa Pamimintuho tuwing Unang Martes ng Buwan at paghahandog ng panalangin kay Sta. Ana tuwing araw ng Martes

Mahal na P**ng Santa Ana, aming Patrona at Gabay, Maraming salamat sa iyo dahil ipinakita mo sa amin ang dakilang kabutihan at kabanalan. Kahit sa mahabang panahon ng paghihintay, hindi ka nawalan ng pag-asa at patuloy kang nanalangin sa Diyos. Ikaw ay naging buhay na halimbawa sa amin upang kami rin ay magkaroon ng matibay na pananampalataya, tapat na pag-asa, at wagas na pagmamahal — na siyang pundasyon ng aming pagiging Simbahan.

Maraming salamat sa banal na pamumuhay na iniwan mo sa amin. Ikaw ay huwarang ina at asawa, na ang buhay ay nakatuon sa Diyos, sa pagmamahal sa pamilya, at paglilingkod sa mga nangangailangan. Tulad mo, nagnanais kaming maging isang pamayanan na namumuhay ayon sa Salita ng Diyos, nagkakaisa sa Eukaristiya, at may malasakit sa lahat, lalo na sa mga mahihirap at naghihirap.

Maraming salamat sa iyong pagtulong at pag-aalaga sa aming mga panalangin. Ikaw ang aming tagapamagitan na nagdadala ng aming mga hiling sa harap ng Diyos at ng iyong anak, ang Mahal na Birheng Maria. Salamat sa pagtulong mo sa aming mga kapatid na nagpapasan ng mabibigat na krus, at sa paggabay sa amin upang makayanan ang mga pagsubok ng buhay nang may pag-ibig at pananalig.

Tulungan mo kaming maging katulad mo: tapat sa Diyos, mapagmahal sa kapwa, at laging handang maglingkod. Gabayan mo kami upang ang aming parokya ay maging tunay na tahanan ng pananampalataya, kung saan ang bawat isa ay nagkakaisa, nagmamahalan, at nagiging "tinapay para sa iba" ayon sa halimbawa ni Hesus sa Eukaristiya.

Patuloy mo kaming akayin palapit sa iyong anak na si Maria at sa aming Panginoong Hesukristo. Turuan mo kaming tahakin ang mga yapak ni Kristo — na Siya ay iyong minahal, inalagaan, at ipinakilala sa mundo.

Santa Ana, salamat at patuloy mo kaming ipanalangin. Gawin mo kaming tapat, mapagkumbaba, at nagkakaisa sa paglilingkod sa Diyos at sa kapwa.

Amen.

28/07/2026

𝗣𝗜𝗦𝗧𝗔𝗡𝗚 𝗦𝗧𝗔. 𝗔𝗡𝗔 𝟮𝟬𝟮𝟲 | 𝗠𝗜𝗦𝗔 𝗖𝗢𝗡𝗖𝗘𝗟𝗘𝗕𝗥𝗔𝗗𝗔 𝗣𝗛𝗢𝗧𝗢 𝗛𝗜𝗚𝗛𝗟𝗜𝗚𝗛𝗧𝗦 – 𝙋𝙖𝙧𝙩 3

Sa diwa ng pananampalataya at pagkakaisa, matagumpay nating ipinagdiwang ang Dakilang Kapistahan ni Sta. Ana, ang ating mahal na patrona, sa pamamagitan ng isang Misa Concelebrada na pinangunahan ng Lubhang Kagalang-galang Bartolome G. Santos Jr., D.D., Obispo ng Iba. Kasabay ng banal na pagdiriwang ang makasaysayang Pagtatalaga kay Reb. Fr. Dexter Fabie bilang Kura Paroko ng Parokya ni Sta. Ana at Vicar Forane ng Bikarya ni San Jose, isang biyayang nagpapatibay sa misyon ng Simbahan at sa paglilingkod sa sambayanan.

Kasabay ng paggunita kina Sta. Ana at San Joaquin, ang mga lolo at lola ni Hesus, isinagawa rin ang Pagbabasbas sa ating mga Lolo at Lola bilang pakikiisa sa pagdiriwang ng World Day for Grandparents and the Elderly, pagkilala sa kanilang pananampalataya, karunungan, at pagmamahal na patuloy na gumagabay sa bawat henerasyon.

Ang pagdiriwang na ito ay naging mas makahulugan dahil sa sama-samang pagtutulungan ng buong pamayanan. Taos-puso kaming nagpapasalamat sa lahat ng mga Mass Sponsors, Parish Organizations, St. Anne Academy, mga indibidwal, pamilya, samahan, at mga debotong naghandog ng kanilang panahon, panalangin, at biyaya upang maging matagumpay ang ating kapistahan. Lubos din ang aming pasasalamat sa Sangguniang Panlungsod ng Lungsod ng Olongapo, Pamahalaang Barangay Gordon Heights, Sangguniang Barangay Mabayuan, at Sangguniang Kabataan ng Barangay Gordon Heights, Parish Pastoral Council at Parish Fiesta EXECOM sa kanilang walang sawang suporta at pakikiisa sa ating pagdiriwang. Ang inyong malasakit at pakikipagtulungan ay tunay na naging malaking bahagi ng tagumpay ng kapistahang ito.

Nawa'y sa pamamagitan ng panalangin nina Sta. Ana at San Joaquin, patuloy tayong pagkalooban ng Panginoon ng matatag na pananampalataya, mapagkalingang pamilya, at pusong laging handang maglingkod sa Kanya at sa kapwa.

Sta. Ana, aming Patrona, ipanalangin mo kami!
San Joaquin, ipanalangin mo kami!