26/11/2025
Tagumpay na naisagawa ang gawain tungkol sa Knowledge Management (KM) Advocacy Seminar ng KM Section sa ilalim ng Institutional Quality Management Office (IQMO) at inisyatiba ng Office of the Vice President for Research, Extension and Development (OVPRED) noong ika-24 ng Nobyembre, 2025, Lunes, sa ganap na 1:00 N.T. hanggang 5:00 N.H. sa Politeknikong Unibersidad ng Pilipinas (PUP) Bulwagang Bonifacio, University Library and Learning Resources Center (ULLRC). Pangunahing kalahok ang mga Dekano, Tagapangulo at OJT/QA coordinator ng lahat ng Kolehiyo mula sa Office of the Vice President for Academic Affairs. Layunin nitong: 1. Magkaroon ng pangunahing kaalaman sa KM; 2. Madaling matipon at maipamahagi ang Karunungan mula sa iba’t ibang sektor, unit at indibidwal; 3. Mapadali at mapabilis ang proseso sa bawat opisina tungo sa mas maayos na serbisyo; 4. Maipagpatuloy ang nasimulang gawain; 5. Mas maayos na relasyon sa lahat.
Pormal na binuksan ang programa sa pamamagitan ng pagbibigay ng mensahe ni Direktor Ireneo C. Delas Armas, Jr. ng IQMO, binanggit niyang makatutulong sa Sector ng Akademiko ang ganitong gawain lalo pa at madalas silang maging bahagi ng Accreditation at ISO audit. Mapadadali aniya ang pagtitipon, pagsisinop at paghahanap ng kailangang mga dokumento.
Sinundan ito ng isa pang mensahe ni Dr. Anna Ruby P. Gaparin, Vice President for Research, Extension and Development. Binigyang-diin niya ang kahalagahan ng KM bilang mekanismo upang makapagsalin at makapagbahagi ng impormasyon mula sa at para sa mga indibidwal at grupo sa institusyon. May mahuhusay na mga senior staff ang isang opisina, subalit hindi raw naipagpapatuloy ang kanilang nasimulan o hindi naipapasa ang kanilang talino dahil walang nagdo-dokumento nito upang mabatid ng susunod na henerasyon. Ito raw ang mga talinong hindi naitatala kaya’t habang may oras pa, mainam na makuha ang kanilang karanasan upang maisalin at mapadali ang gawain ng papalit sa kanila kung sakali mang mag-retiro. Dagdag pa niya, matagal na raw nating ginagawa ang KM, hindi lang malay ang mga indibidwal at grupo na ginagawa na pala ito. Kaya mahalaga ang ganitong gawain upang malaman natin kung paano natin mas maisasabuhay proseso ng KM. Sa Kabuuan, binanggit niyang magbibigay-daan ang prosesong ito sa sabay-sabay na pagkatuto upang mas mapamahalaan ang kaalaman.
Nagbigay ng komprehensibong panayam ang panauhing tagapagsalita na si Mr. Ramon P. Lagoc, isang KM Advocate at dating Chief Knowledge Officer. Binigyang linaw niya ang kahulugan at kritikal na tungkulin ng KM sa isang organisasyon. Ibinahagi niya ang kanyang karanasan, kung saan iginiit niya ang kahalagahan ng pag-di-digitalize (digitalization) ng impormasyon upang mas madali itong maipamahagi at para sa mas epektibo at progresibong paggamit ng kaalaman. Binigyang-diin din niya ang mga susing elemento at kahalagahan ng KM, kabilang ang tungkulin ng mga Knowledge Experts sa pagbabahagi ng datos, at ang pangangailangan para sa Aplikasyon ng Kaalaman na sumasaklaw sa thinking, knowledge management, at risk management. Tinalakay rin niya ang konsepto ng "House of KM" na binubuo ng limang pangunahing bahagi: tao, nilalaman, opisina/paaralan, teknolohiya, at pamamahala.
Dagdag pa rito, tinalakay rin niya ang mga pangunahing balakid sa epektibong KM. Kinabibilangan ito ng mga hamon sa Kultura ng Organisasyon, tulad ng cultural values, kawalan ng leadership and management support, kakulangan sa vision, at management barriers. Bukod pa rito, pinag-iba niya ang tahimik (tacit) at malinaw (explicit) na kaalaman, ang pagkakaiba ng wisdom at knowledge. Sa panghuli, binanggit niya ang mga problema sa Teknolohiya at Infrastraktura, tulad ng hindi sapat na teknolohiya at governance inefficiency, at tinalakay ang mahalagang papel ng Artificial Intelligence (AI) sa pagpapanatili ng kaalaman para sa quality control.
Sa pangwakas na pananalita, pinatibay ni Dr. Rock Bryan B. Matias, Hepe ng Knowledge Management Section, ang kritikal na kahalagahan ng KM sa PUP. Binanggit niya na sa pamamagitan ng KM initiative, mas maipamamahagi nila sa mga faculty ang kanilang mga karanasan at mas mauunawaan ang halaga ng pagsusumite ng mga hinihinging dokumento. Iginiit niyang dapat i-dokumento at i-digitalize ang naibahaging mga kaalaman at karanasan upang mabasa ng mga faculty members.
Layunin nitong maiwasan ang pag-uulit-ulit ng proseso at mailaan ang oras sa mas produktibong bagay. Sa huli, mariin niyang sinabi na ang pagsisikap na ito ay hindi lamang para sa kanilang opisina, kundi para sa Sintang Paaralan upang lalo pang mapahusay ang kalidad.
