10/08/2018
Malugod namin kayong iniimbitahan para sa pagbubukas ng eksibisyong pangsining na pinamagatang “TAWID” sa darating na ika-15 ng Agosto, 2018, 11:00 n.u., sa SSC-R Manila College Arcade.
Inihahandog ng Sentrong Pangkultura at Sining ng SSC-R Manila, sa pakikipagtulungan sa Departamento ng Kolehiyo at Departamento ng Senior High School at sa Pinakamataas na Pamahalaan ng mga Mag-aaral sa SSC-R Manila, ang eksibisyong ito bilang pakikiisa sa pagdiriwang ng Buwan ng Wika ngayong Agosto.
Umiikot ang konsepto sa ideya ng “TAWID” o pamana sa wika ng mga katutubo ng Kordilyera na kung saan kalakip ng pagpasa ng mga bagay o kayamanan sa mas nakakabatang henerasyon ang pag-asang magpapatuloy ang tradisyon, paraan ng pamumuhay at karangalan ng angkan o ng komunidad.
Tampok sa eksibisyon ang mga obra, tradisyonal na kagamitan at kasuotan, at mga artepaktong kumakatawan sa makulay at malawak na kultura at tradisyon ng Pilipinas. Layon nitong palawigin ang ating pang-unawa at pagkamapagdamdam sa mga katutubong tradisyon, sining, kultura at mga problemang kinakaharap ng mga katutubo. Halina’t tunghayan ang ilan lamang sa mga piraso ng ating pagkakakilanlan. Samahan kaming ipagdiwang ating pinagmulan, ang ating kultura.
