11/08/2026
HUWAG MASHOKOT, MAKI-BEKI!
Mariing kinokondena ng mga mag-aaral ng Batsilyer ng Sining sa Araling Pangkaunlaran 2A ang patakaran ng College of Professional Teachers Education (CPTED) hinggil sa dress code ng mga estudyante.
Ang kasuotan ay hindi hadlang sa pagkatuto, pagbabahagi ng kaalaman, o pakikisalamuha nang may respeto sa kapwa. Sa halip, nararapat na kilalanin at igalang ang pagkakaiba-iba ng bawat indibidwal. Kaya narito kami upang manindigan at ipaglaban na ang kasuotan, kasarian, at SOGIE ng isang indibidwal ay hindi dapat maging batayan ng kaniyang propesyonalismo, kakayahan, o kredibilidad bilang isang mag-aaral.
Ang pag-unlad ay hindi lamang nasusukat sa pisikal o teknolohikal na pagbabago ng isang institusyon. Nasusukat din ito sa kakayahan nitong kumilala, rumespeto, at tumugon sa magkakaibang pangangailangan, karanasan, at identidad ng mga taong bumubuo rito. Sa isang lipunang patuloy na umuunlad, mahalagang ang mga patakaran at sistema ay sumabay sa pagpapahalaga sa karapatang pantao, pagkakapantay-pantay, at kalayaan sa pagpapahayag ng sarili. Ang isang progresibo at inklusibong institusyon ay hindi dapat nakabatay sa pagkakapare-pareho ng pananamit. Sa halip, dapat itong nakatuon sa paglikha ng isang ligtas, makatarungan, at pantay na espasyo kung saan ang bawat estudyante ay may kalayaang matuto, umunlad, at makapag-ambag sa komunidad.
Kung kaya, hinihikayat namin ang isang dress code na makatarungan, inklusibo, at hindi mapanghusga o diskriminatibo—isang patakarang kumikilala sa karapatan ng bawat estudyante na ipahayag ang kanilang sarili habang nananatiling responsable at magalang sa loob ng institusyon.
Ang tunay na esensya ng pag-unlad ay hindi ang paghubog sa lahat upang maging magkakapareho, kundi ang paglikha ng isang lipunang marunong kumilala, gumalang, at magbigay ng pantay na pagtingin sa bawat isa.
