23/09/2026
Ing Maputing Guinto
Sinulat nang Jane Anne O. Zacarias, Agkas
Ikit ke ing maimpis kung gamat, saka ing palda kung malutu. Reng bitis ku dadalan daku king covered court ning kekaming iskwela. Ikit ke i Apung Turing makatalakad keng lele ning bakud, at tatalan yang garapun a kule kuliawan ing takap a panaluk na kareng lalabas.
Mipasingap ku oneng maski dakal tau kasi recess, kapitna ya pa laman ing garapun. Katmu yang mabilug a kule kape, a makabalut mayumu.
"Salwan na, apulung pesus pu," antimanu mekapitna ne ing bakal ku inyang aldong ita. Binili nala reng apat a pirasung pastillas a gawa keng gatas damulag keng gamat ku.
"Salamat," ana kabang makatiman.
E pa man dinalan ing aldo na eku sinali tse akit ke. Paminsan, magtagan ku pa pilan pirasung uli ku para kang Ma ku, balut kula pa king papil. Inyang panaun a ita, e ku pa balu nung makananu ing biye. Balu ku mu ing saya a adala ning metung a pirasung pastillas.
Oneng linabas la reng banwa. E ku ne ikit i Apung Turing. Ala ne rin i Ma ku a ulian kung pastillas. Inyang aisip ke ita, e mu pala ing lasa ning pastillas ing miwala, pati ing metung a bahagi ning kanakung kamusmusan.
Malyari tang sabyan mayan manakit mamisaling gatas damulag. Na marakal mamisaling pastillas, dapot ali nala kaparehu ning linamnam deng kang Apung Turing. Uling ali mu pala ing pamangan ing atatakman tamu—nun e pati reng alaala, reng tau, ampong reng panaun a mibuu karela.
Ing Pampanga, sagana ya king damulag. Maralas talang akakit bilang kasawup king pamagsaka o sese para keng laman da. Dapot, akalingwan taya ing metung pa kareng abie da kakatamu—ing gatas dang pwedeng maging pastillas, kesu, ampong aliwa pang pamangan a magdala king kekatang kultura.
Ing gatas damulag ali ya mu masustansiya. Para kaku, metung yang maputing guinto. Ali ya mu sagana king bitamina, sagana ya rin king kwentu, king kapamilatan, ampo king alaalang e agad asira ning panaun.
Ngeni, e ku man balu nung nukarin ne i Apung Turing. O kung magtinda ya pa. Peru kabang atin pang Kapampangan a makayalala king yumu ning pastillas na, e pa lubusang mawala ing maputing guinto ning kekatang kultura.
Sana, ali tamu mu byasang pakibaluan ing bayung datang. Pasikanan tamu rin ing pibatan tamu. Uling, ing tune a kayamanan ali ya sasalikut king mayaslag a bage, nun e king metung a pirasung pastillas a agyung magbalik king kekatang kayanakan.
Gawang kalalangan nang Gian Alexis Ocampo
