20/03/2023
Daytoy nga aldaw ket naingasatan nga aldaw kadagiti agad-adal, nagannak ken manursuro iti Bayugao Elementary School agsipud ta personal nga binisita ida ti Ama ti Probinsya ti Apayao nga ni Hon. Butzy Bulut Jr ken ni Congresswoman Hon. Eleanor Bulut Begtang. Iti ibibisita da ket kadwa da ti amin nga Department Heads iti Probinsya ti Apayao tapnu idanun da dagiti programa para iti salun-at ken iti teenage pregnancy prevention kadagiti agindeg iti Barangay Turod kangrunaan kadagiti taga Bayugao.
Iti inna panagsarita, ginuyogoy ti naayat nga Gobernador ken Congresswoman dagiti nagannak nga suportaran da dagiti annak da iti panagadal da agsipud ta silulukat ti opisina da nga tumulong kadagiti nagaed ken porsigido nga agadal. Kas kuna ti naayat nga Congresswoman: "Agadal kayo nga naimbag agsipud manmanu paylaeng ti nakaadal manipud iti tribu yo ditoy Apayao, haanen nga problema ti pinansyal ta adda dagiti scholarship grant ti opisina ti Gobernador tayo nga naayat nga tumulong kadagiti agad-adal".
Kasta met nga pinalagipan Ni Gobernador Butzy Bulut dagiti nagannak ti partisipayon da iti panangprotektar kadagiti banbantay aglalo kadagiti ayup ken tumatayab nga agindeg kadagitoy.
Kasta met nga naikkan amin nga agad-adal kadagiti school supplies manipud daycare, elementary, high school ken ALS. Adda pay food packs para kadagiti amin nga nagannak.
Agyaman kami unay Gov. Butzy ken Cong. Leah iti ayat yo ken sakripisyo nangnangruna para kadagiti agad-adal ken nagannak iti Bayugao Elementary School.
Ni Apo Dios ti mangbendisyon kadakayo iti maminribo a daras.
