28/08/2025
BUWAN NG WIKANG PAMBANSA 2025
AGOSTO 1-31, 2025
TEMA: “Paglinang sa Filipino at Katutubong Wika: Makasaysayan sa Pagkakaisa ng Bansa”
Sa pagsisimula ng buwan ng Agosto, ipinagdiriwang ng Pisipis Elementary School ang Buwan ng Wika sa pamamagitan ng iba't ibang makabuluhang gawaing naglalayong itaguyod ang pagmamahal sa wikang Filipino at pagpapahalaga sa ating kultura.
Noong Agosto 1, masayang isinagawa ang Palaro ng Lahi na nilahukan ng mga mag-aaral mula sa kindergarten hanggang ika-6 na baitang. Naging makulay at puno ng sigla ang buong araw habang ipinakita ang bawat baitang ang kanilang diskarte at kasipagan sa iba't ibang larong pinoy gaya ng pasahang bola, karerang may bola, takbuhan at iba pa.
Samantala, noong Agosto 8 (Biyernes), nagkaroon naman ng mga patimpalak na nagpakita ng talento at pagkamalikhain ng mga mag-aaral. Para sa Kinder hanggang Ikatlong baitang, isinagawa ang Coloring Contest kung saan kinulayan ng mga bata ang isang larawan na ipinakita ang kanilang pagmamahal sa wika at kultura gamit ang makukulay na lapis at krayola. Para naman sa Ika-apat na
baitang hanggang ika-anim na baitang, ginanap ang Poster Making
Contest na nagbigay-daan upang mailarawan ng mga mag-aaral ang kanilang mga ideya at damdamin ukol sa tema ng Buwan ng Wika.
Araw ng Huwebes , Agosto 28, 2025 ay matagumpay na ipinagdiwang ng paaralan ang culminating activity para sa Buwan ng Wika 2025 na may temang “Paglinang sa Filipino at Katutubong Wika: Makasaysayan sa Pagkakaisa ng Bansa.” Ang programa ay nilahukan ng lahat ng mag-aaral mula Kinder hanggang Ika-anim na Baitang. Bawat baitang ay naghanda ng kani-kanilang pagtatanghal bilang pagpapakita ng kanilang pagmamahal at pagpapahalaga sa wikang Filipino at sa kulturang Pilipino. Nagtampok ang mga mag-aaral ng iba’t ibang bilang: ang Kinder at Unang Baitang ay nagbigay-aliw sa pamamagitan ng masayang sayaw na sinabayan ng awitin; ang Ikalawang Baitang naman ay nagpakitang-gilas sa kanilang makukulay na sayaw; ipinamalas ng Ikatlong Baitang ang husay sa pagtula; ipinakita ng Ika-apat na Baitang ang galing sa sabayang pagbasa; at itinampok ng Ikalima at Ika-anim na Baitang ang kanilang talento sa sabayang pagbigkas. Bukod sa mga pagtatanghal, iginawad din sa nasabing okasyon ang mga parangal para sa mga nagwagi sa Coloring Contest at Poster Making Contest na ginanap noong mga nakaraang linggo bilang bahagi ng pagdiriwang. Binigyang pagkilala rin ang lahat ng baitang sa pamamagitan ng mga sertipiko bilang pagpapatunay ng kanilang aktibong partisipasyon at pagsisikap. Sa kabuuan, naging makabuluhan at makulay ang pagdiriwang. Ipinakita ng mga mag-aaral ang kanilang pagmamalaki sa sariling wika at kultura, gayundin ang kanilang pagkakaisa bilang mga batang Pilipino. Tunay ngang naipakita sa okasyong ito ang kahalagahan ng temang “Paglinang sa Filipino at Katutubong Wika: Makasaysayan sa Pagkakaisa ng Bansa."
Ulat ni: G. Christian C.Trajano
