17/10/2025
🏵️HALLIH KAW HA PANG LAGIH LAGIH HA MGA ULAMAH MATTAN NAG HAHADDAM HA MATTAN SUNNAH SIN RASULULLAH (ﷺ) KALNAH MAGPAKA BUSUNG SILA🏵️
قال رسول الله صلى الله عليه وسلم: (وإِنَّ الْعُلَمَاءَ وَرَثَةُ الْأَنْبِيَاءِ، وإِنَّ الْأَنْبِيَاءَ لَمْ يُوَرِّثُوا دِينَارًا وَلَا دِرْهَمًا، وإِنَّمَا وَرَّثُوا الْعِلْمَ، فَمَنْ أَخَذَه أَخَذَ بِحَظٍّ وَافِرٍ.) أخرجه الترمذي وأبو داود وغيرهما بإسناد حسن من حديث أبي الدرداء رضي الله عنه.
▪️Nag sabda in Rasulullah (ﷺ): (Iban sabunnal bunnal tuud in mga Ulamah mattan nag haddam sin pamanduh sin Allah (ﷻ) iban sin Rasul niya (ﷺ) in sila gantih ha mga kanabihan mag palanyut sin agama Islam, iban in mga kanabihan wayruun sila nag pusakah ha mga Manusiya altah (Dīnar) iban sin altah (Dirhām), iban in mattan piyusakah nila ha mga Manusiya amuna in panghati ha palihalan pag agama, hasupaya mag tupud katan in mga Manusiya hangkan ilmu in piyusakah nila, iban hesiyu siyu in kimawah sin mattan pusakah nila, na! tantu tuud nakawah niya na in parbahagian niya sampulnah.)📗
▪️Hangkan subay in mga ULAMAH dih bissarahan sin bukun marayaw, kalnah tao awam da ha pag agama in mag bissara kanila bukun marayaw, hangkan bangkaw dih mabayah mabista daing ha mga tao jahil ha pag agama, iban dih kaw mabayah mabista daing ha mga Manusiya busungun ha sabab sin pang bissara nila bukun marayaw ha mga Ulamah, na! anibi in mang lakah lakah kanila, kalnah in sila biyah da kanabihan, nag hidjatul ha Mahadjana sin mattan pag agama, bang sawpama biyusung in mga manusiya amuin nang dihil kamudaratan ha mga kanabihan, na! biyah da isab hayadtu in dumihil kangian ha mga Ulamah mattan, busungun da isab.
روي عن الإمام أحمد رحمه الله تعالى أنه قال: (لحوم العلماء مسمومة؛ من شمها مرض، ومن أكلها مات.) (المعيد في أدب المفيد والمستفيد: ص 71).
▪️Kiyabaytah daing kan Imam Ahmad (kiyalasahan siya sin Allah ﷻ) sabunnal tuud namung siya in agi niya: (in mga unud sin mga mattan Ulamah makalassun siya, hesiyu siyu in himamut "nang lagih lagih, nang babah babah kanila" na! palsababan masakit in pangatayan niya, iban hesiyu siyu in kimaun sin unud nila labay "bissarahan sila sin bukun marayaw" na! palsababan yadtu sin hika patay sin pangatayan nila amuin sampay dih na sila maingat tumaymah sin kasabunnalan pag agama.)📘
ويقول الإمام عبد الله بن المبارك رحمه الله تعالى: (من استخف بالعلماء ذهبت آخرته، ومن استخف بالأمراء ذهبت دنياه، ومن استخف بالإخوان ذهبت مروءته.) (سير أعلام النبلاء: 4/408).
▪️Iban in agi he Imam Abdullah Ibnul Mubarak (kiyalasahan siya sin Allah ﷻ): (hesiyu siyu in mang babah babah ha mga Ulamah mattan sin agama Islam, na! tantu manaw - mig na in pag akhirat niya marayaw duun kaniya, iban hesiyu siyu isab in mang gurah gurah ha mga kanakuraan Muslim, na! tantu manaw - mig na duun kaniya in karayawan pag dunya niya, iban hesiyu siyu in mang gurah gurah ha mattan pag taymanghud ha agama Islam, na! maig na duun kaniya in mattan pangaddatan marayaw.)📘
قال الإمام أبو حاتمٍ الرازيُّ رحمه الله: (علامةُ أهل البدع الوقيعةُ في أهل الأثر.) عقيدة السلف: (105).
▪️In agi he Imam Abu Hatim Ar-Razīy (kiyalasahan siya sin Allah ﷻ): (in tadah - pangilahan sin mga tao mag bibidaah ha pag agama, amuna in mang babah babah - mang lagih lagih ha mga sila "Ahlul Āthar" Ahlusunnah Wal Jamaah.)📘
🌹وَاللَّهُ تَعَالَى أَعْلَى وَأَعْلَمُ بِالصَّوَابِ🌹
[جَزَاكُمُ اللَّهُ عَنَّا وَعَنِ الْإِسْلَامِ وَالْمُسْلِمِيْنَ خَيْرَ الْجَزَاءِ]
________________________________________________
✍️ﺃَﺧُﻮْﻛُﻢْ: ﺍَﻟْﺘَﺬِﻳْﺮُ ﺻَﺎﻟِﺢٌ ﺩَﻣَّﺎنج Altadir Salih Dammang
17/10/2024
17/10/2024