Basilan State College-Departamento ng Filipino

02/09/2026

𝐖𝐈𝐊𝐀, 𝐒𝐀𝐘𝐀, 𝐀𝐓 𝐒𝐀𝐌𝐀𝐇𝐀𝐍: 𝐒𝐚𝐌𝐚𝐅𝐢𝐥 𝐁𝐎𝐎𝐓𝐇 𝐃𝐈𝐒𝐏𝐋𝐀𝐘 2026!

Nakiisa ang 𝗦𝗮𝗺𝗮𝗵𝗮𝗻 𝗻𝗴 𝗺𝗴𝗮 𝗠𝗮𝗴-𝗮𝗮𝗿𝗮𝗹 𝘀𝗮 𝗙𝗶𝗹𝗶𝗽𝗶𝗻𝗼 (𝗦𝗮𝗠𝗮𝗙𝗶𝗹) – 𝗗𝗲𝗽𝗮𝗿𝘁𝗮𝗺𝗲𝗻𝘁𝗼 𝗻𝗴 𝗙𝗶𝗹𝗶𝗽𝗶𝗻𝗼, sa isinagawang Booth Display ngayong araw, Setyembre 2, 2026, bilang bahagi ng pagsalubong para sa mga bagong mag-aaral ng Pampamahalaang Kolehiyo ng Basilan.

Naging masigla, masaya, at makabuluhan ang booth ng 𝗙𝗶𝗹𝗶𝗽𝗶𝗻𝗼 𝗰𝗹𝘂𝗯 dahil sa aktibong pakikilahok ng mga mag-aaral sa iba't ibang inihandang gawain tulad ng "Shout Out Mo, Iyan!" , "Pinoy Henyo," at "Hulaan Mo Kung Sino Ako!" Mas pinasaya pa nina 𝗥𝗲𝘆𝗻𝗮𝗹𝗱𝗼 𝗙. 𝗙𝘂𝗲𝗻𝘁𝗲𝘀 𝗝𝗿., at 𝗝𝗼𝗵𝗻 𝗣𝗮𝘂𝗹 𝗟. 𝗟𝗮𝗯𝗮𝘀𝘁𝗶𝗹𝗹𝗮, ang programa sa pamamagitan ng kanilang song number.

Taos-puso po ang aming pasasalamat sa lahat ng mga mag-aaral, at mga kaibigan ng 𝗦𝗮𝗠𝗮𝗙𝗶𝗹 na nakiisa, nakisaya, at naglaan ng oras upang maging bahagi ng aming booth. Kayo ang tunay na nagbigay-buhay at kulay sa aming munting espasyo para sa wika, kultura, at pagkakaisa.

Dahil sa bawat tawa, sigaw, awit, laro, at pakikibahagi, naging matagumpay at hindi malilimutang Booth Display ang ating sama-samang pagdiriwang.

Muli, Maraming salamat sa inyong pakikiisa!

✍️: 𝗦𝗮𝘆𝗱𝘆𝗹 𝗗. 𝗔𝗺𝗶𝗹
📸: 𝗘𝗹𝗹𝗮 𝗙𝗮𝘆𝗲𝗻𝗻𝗲 𝗩𝗶𝗹𝗹𝗮𝗺𝗼𝗿, 𝗡𝗮𝘀𝗶𝗺 𝗛𝗮𝗺𝗱𝗮𝗻𝗶, 𝗗𝗵𝗲𝗺𝗱𝗶𝗺𝗮𝗿 𝗦𝗶𝗿𝗮𝗱𝘂𝗻

31/08/2026

𝗕𝗨𝗪𝗔𝗡 𝗡𝗚 𝗪𝗜𝗞𝗔𝗡𝗚 𝗣𝗔𝗠𝗕𝗔𝗡𝗦𝗔 𝟮𝟬𝟮𝟲

Tema: "𝗪𝗶𝗸𝗮𝗻𝗴 𝗙𝗶𝗹𝗶𝗽𝗶𝗻𝗼 𝗮𝘁 𝗔𝗜: 𝗞𝗮𝘀𝗮𝗻𝗴𝗸𝗮𝗽𝗮𝗻 𝘀𝗮 𝗣𝗮𝗻𝗮𝗻𝗮𝗹𝗶𝗸𝘀𝗶𝗸 𝗮𝘁 𝗧𝘂𝗹𝗮𝘆 𝘀𝗮 𝗬𝗮𝗺𝗮𝗻 𝗻𝗴 𝗜𝗺𝗽𝗼𝗿𝗺𝗮𝘀𝘆𝗼𝗻"

🎥: Amree Talaji

29/08/2026

𝗪𝗘𝗘𝗸𝗮𝗧𝗘𝗖𝗛𝘆𝗯𝗲𝗹𝘀: 𝗪𝗶𝗸𝗮𝗻𝗴 𝗙𝗶𝗹𝗶𝗽𝗶𝗻𝗼 𝗮𝘁 𝗔𝗜, 𝗦𝘂𝘀𝗶 𝘀𝗮 𝗣𝗮𝗻𝗮𝗻𝗮𝗹𝗶𝗸𝘀𝗶𝗸

Sa patuloy na pag-unlad ng teknolohiya, naging mahalagang kasangkapan ang Artificial Intelligence (AI) sa paghahanap, pagproseso, at pagpapalawak ng impormasyon. Gayunpaman, higit itong nagiging makabuluhan kung ginagamit nang responsable at may malinaw na layunin, lalo na sa pagtugon sa mga suliraning panlipunan. Ito ang naging diwa ng Seminar-Workshop at Araw ng Parangal 2026 na inilunsad ng Samahan ng mga Mag-aaral sa Filipino (SaMaFil), noong Agosto 28, 2026, bilang bahagi ng Pampinid na Palatuntunan sa Buwan ng Wika 2026, na may temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Taimtim na binuksan ang programa sa pamamagitan ng panalangin na pinangunahan ni G. Reynaldo F. Fuentes Jr., na sinundan ng pag-awit ng Pambansang Awit at pambungad na pananalita ni G. Saydyl D. Amil, Alkalde ng SaMaFil. Sa kaniyang talumpati, marubdob na ipinaabot ng Alkalde ang kaniyang malalim na pasasalamat sa mga taong naging bahagi ng kaniyang makabuluhang paglalakbay. Nagbigay rin ng mahalagang mensahe si Gng. Maricor V. Limen, Tagapangasiwa ng Departamento ng Filipino, at kaniyang binigyang-diin ang kahalagahan ng proseso, etika, at datos sa pananaliksik. Iginiit din niya na ang pananaliksik ay hindi paghuhula, kungdi isang sistematikong paraan ng pag-unawa at paghahanap ng solusyon sa mga suliranin sa komunidad, paaralan, at lipunan.

Samantala, naging sentro ng seminar-workshop ang dalawang sesyon tungkol sa mahahalagang yugto ng pananaliksik. Tinalakay ni Bb. Rawda S. Estajal, MATSS, Instructor III, ang pagpili ng paksa ng pananaliksik, pagtukoy sa mga baryabol, pagbuo ng suliranin at mga kaugnay na tanong sa pananaliksik, pagbuo ng teoretikal at konseptwal na balangkas, at pagsusuri at pagbuo ng kaugnay na literatura at mga kaugnay na pag-aaral. Sa ikalawang sesyon, ibinahagi naman ni Bb. Nor-Aiam E. Asmawil, Ed.D., Assistant Professor I, ang wastong pagbuo at pagpapatunay ng instrumento sa pananaliksik, na nakatuon sa kung paano nagiging wasto at mapagkakatiwalaan ang mga ginamit na instrumento at mga talatanungan. Sa kaniyang workshop, naging mahalagang paalala sa mga kalahok ang prinsipyong, “base sa datos, hindi sa opinyon.”

Pagkatapos ng sesyon, sinimulan ang paggawad ng sertipiko ng pagkilala at gantimpala sa mga kalahok na nagwagi sa iba't ibang patimpalak na isinagawa kaugnay sa pagdiriwang ng Buwan ng Wikang Pambansa 2026. Narito ang resulta:

𝗗𝗔𝗚𝗟𝗜𝗔𝗡𝗚 𝗧𝗔𝗟𝗨𝗠𝗣𝗔𝗧𝗜
Kampyon: Adzhar D. Gandali (CTE)
2nd Place: Roseller B. Bernos (CTE)
3rd Place: Rashini Eeman D. Amiluddin (CAH)

𝗠𝗔𝗦𝗜𝗡𝗜𝗡𝗚 𝗡𝗔 𝗣𝗔𝗚𝗞𝗨𝗞𝗪𝗘𝗡𝗧𝗢
Kampyon: Farzheena A. Sulayman (CAH)
2nd Place: Rheyhana I. Kandak (CTE)
3rd Place: Erica Joy R. Lim (CCS)

𝗣𝗔𝗚𝗟𝗜𝗞𝗛𝗔 𝗡𝗚 𝗣𝗢𝗦𝗧𝗘𝗥
Kampyon: Mohammad Solaiman A. Sayadi (CCHE)
2nd Place: Rejaina S. Mahalail (CAH)
3rd Place: Ayesha G. Arpa (CAH)

𝗣𝗔𝗚𝗦𝗨𝗟𝗔𝗧 𝗡𝗚 𝗦𝗔𝗡𝗔𝗬𝗦𝗔𝗬
Kampyon: Yan Nelle E. Singson (BAPOS-OSC)
2nd Place: Zyra Charm E. Torralba (CPADM)
3rd Place: Michelle M. Jolo (CCS)

𝗧𝗔𝗚𝗜𝗦𝗔𝗡 𝗡𝗚 𝗧𝗔𝗟𝗜𝗡𝗢 2.0
Kampyon: Pangkat Utakang Puro Hula —John Paul L. Labastilla, EJ Franz P. Hugo, Alyanna Hamsirani (CTE)

2nd Place: Pangkat Panginorin — Daniella Marie A. Taguba, Najiba U. Imlana, Nurnadia S. Piansa (CTE)

3rd Place: Pangkat Smooth — Rarina L. Molina, Nursaleen T. Kalbi, Exphel B. Dela Cruz (CTE)

𝗣𝗔𝗟𝗜𝗚𝗦𝗔𝗛𝗔𝗡 𝗦𝗔 𝗗𝗘𝗕𝗔𝗧𝗘
Kampyon: Pangkat MaKaTa — Adrian R. Ramos, Nurul Ain J. Harun, Nadine D. S. Tanangonan (CTE)

2nd Place: Pangkat Dagitab — Rashini Eeman D. Amiluddin, Giana Gwen Soledad, Maria Allianna G. Abdulla (CAH)

3rd Place: Pangkat Pluma — Rosander Dean M. Poliquit, Michelle D. Gonzales, Shandelle R. Ausejo (CTE)

Sa pagtatapos ng okasyon, nag-iwan naman ng hamon si Bb. Arfhayna A. Abraham, Bise-Alkalde ng SaMaFil, sa kaniyang pangwakas na pananalita. Aniya "gamitin ang wika at kaalaman sa paglilingkod sa kapwa at bayan."

Sa kabuuan, ang Seminar-Workshop on Research Cum Araw ng Parangal 2026, ay nagpapakita na ang Wikang Filipino at AI ay maaaring magsilbing magkatuwang na kasangkapan sa pananaliksik, pagtuklas ng kaalaman, at paglutas ng mga suliraning panlipunan. Higit pa sa isang pagdiriwang, naging panawagan ito ng programa na gamitin ang wika bilang sandata, teknolohiya bilang katuwang, at pananaliksik bilang landas tungo sa mas makabuluhang kinabukasan.

✍️:Reynaldo F. Fuentes, Jr.
🔎: Saydyl D. Amil
📸: Ella Fayenne Villamor, Nasim Hamdani, Sharmane Ahilul, Amree Talaji
🎨: Dhemdimar Siradun

28/08/2026

PART II — MGA KAGANAPAN SA PAGLUNSAD NG MGA AKTIBIDAD SA BUWAN NG WIKANG PAMBANSA 2026.

28/08/2026

𝗠𝗚𝗔 𝗔𝗞𝗧𝗜𝗕𝗜𝗗𝗔𝗗 𝗦𝗔 𝗕𝗨𝗪𝗔𝗡 𝗡𝗚 𝗪𝗜𝗞𝗔𝗡𝗚 𝗣𝗔𝗠𝗕𝗔𝗡𝗦𝗔 𝟮𝟬𝟮𝟲, 𝗠𝗔𝗧𝗔𝗚𝗨𝗠𝗣𝗔𝗬 𝗡𝗔 𝗜𝗡𝗜𝗟𝗨𝗡𝗦𝗔𝗗

Matagumpay na inilunsad ng 𝗦𝗮𝗺𝗮𝗵𝗮𝗻 𝗻𝗴 𝗺𝗴𝗮 𝗠𝗮𝗴-𝗮𝗮𝗿𝗮𝗹 𝘀𝗮 𝗙𝗶𝗹𝗶𝗽𝗶𝗻𝗼 (𝗦𝗮𝗠𝗮𝗙𝗶𝗹, ng Departamentong Filipino, ang serye ng mga makabuluhan at kapana-panabik na aktibidad bilang bahagi ng pagdiriwang ng Buwan ng Wikang Pambansa 2026. Ginanap ang nasabing aktibidad noong Agosto 24-25, na may temang “𝗪𝗶𝗸𝗮𝗻𝗴 𝗙𝗶𝗹𝗶𝗽𝗶𝗻𝗼 𝗮𝘁 𝗔𝗜: 𝗞𝗮𝘀𝗮𝗻𝗴𝗸𝗮𝗽𝗮𝗻 𝘀𝗮 𝗣𝗮𝗻𝗮𝗻𝗮𝗹𝗶𝗸𝘀𝗶𝗸 𝗮𝘁 𝗧𝘂𝗹𝗮𝘆 𝘀𝗮 𝗬𝗮𝗺𝗮𝗻 𝗻𝗴 𝗜𝗺𝗽𝗼𝗿𝗺𝗮𝘀𝘆𝗼𝗻,”

Noong Agosto 24, isinagawa ang mga patimpalak na 𝙿𝚊𝚐𝚜𝚞𝚕𝚊𝚝 𝚗𝚐 𝚂𝚊𝚗𝚊𝚢𝚜𝚊𝚢, 𝙳𝚊𝚐𝚕𝚒𝚊𝚗𝚐 𝚃𝚊𝚕𝚞𝚖𝚙𝚊𝚝𝚒, 𝙼𝚊𝚜𝚒𝚗𝚒𝚗𝚐 𝚗𝚊 𝙿𝚊𝚐𝚔𝚞𝚔𝚞𝚠𝚎𝚗𝚝𝚘, 𝚊𝚝 𝙿𝚊𝚐𝚕𝚒𝚔𝚑𝚊 𝚗𝚐 𝙿𝚘𝚜𝚝𝚎𝚛, na nagbigay-daan upang maipamalas ng mga kalahok ang kanilang husay sa pagsulat, pagsasalita, pagkukuwento, at malikhaing pagpapahayag. Samantala, noong Agosto 25, itinampok naman ang 𝗣𝗮𝗹𝗶𝗴𝘀𝗮𝗵𝗮𝗻 𝘀𝗮 𝗗𝗲𝗯𝗮𝘁𝗲 𝗮𝘁 𝗧𝗮𝗴𝗶𝘀𝗮𝗻 𝗻𝗴 𝗧𝗮𝗹𝗶𝗻𝗼 𝟮.𝟬, kung saan nasubok ang talas ng isip, lalim ng kaalaman, husay sa pangangatwiran, at galing sa pagpapahayag ng bawat kalahok.

Taos-pusong pasasalamat ang aming ipinaaabot sa mga Lupon ng Inampalan: 𝐁𝐛. 𝐑𝐚𝐰𝐝𝐚 𝐄𝐬𝐭𝐚𝐣𝐚𝐥, 𝐆. 𝐌𝐚𝐫𝐤 𝐌𝐞𝐥𝐠𝐚𝐫, 𝐚𝐭 𝐁𝐛. 𝐉𝐞𝐳𝐤𝐚 𝐓𝐚𝐲𝐨𝐧𝐠𝐭𝐨𝐧𝐠, na buong husay at dedikasyong nagsilbing mga hurado sa iba't ibang patimpalak. Ang inyong oras, kaalaman, at patas na paghusga ay naging mahalagang bahagi ng tagumpay ng mga gawaing ito.

Higit sa lahat, maraming salamat sa lahat ng kalahok na buong tapang at sigasig na nakibahagi sa bawat patimpalak. Ang inyong talento, kaalaman, pagkamalikhain, at pagmamahal sa wikang Filipino ang tunay na nagbigay-buhay sa pagdiriwang.

Sa bawat salita, ideya, at kaalamang ibinahagi, nawa'y patuloy nating buhayin, paunlarin, at gamitin ang wikang Filipino sa makabagong panahon.

Mabuhay ang Wikang Filipino! Mabuhay ang kabataang Pilipino.

✍️: 𝐒𝐚𝐲𝐝𝐲𝐥 𝐃. 𝐀𝐦𝐢𝐥
📸: 𝐀𝐦𝐫𝐞𝐞 𝐓𝐚𝐥𝐚𝐣𝐢, 𝐑𝐢𝐲𝐚𝐧-𝐑𝐚𝐢𝐳𝐚 𝐀𝐧𝐮𝐚𝐫, 𝐒𝐡𝐚𝐫𝐦𝐚𝐧𝐞 𝐀𝐡𝐢𝐥𝐮𝐥, 𝐍𝐚𝐬𝐢𝐦 𝐇𝐚𝐦𝐝𝐚𝐧𝐢, 𝐌𝐚𝐫𝐣𝐚𝐢𝐝𝐚 𝐒𝐚𝐢𝐥𝐢𝐥𝐥𝐚, 𝐄𝐥𝐥𝐚 𝐅𝐚𝐲𝐞𝐧𝐧𝐞 𝐕𝐢𝐥𝐥𝐚𝐦𝐨𝐫 𝐚𝐭 𝐃𝐡𝐞𝐦𝐝𝐢𝐦𝐚𝐫 𝐒𝐢𝐫𝐚𝐝𝐮𝐧
🎨: 𝐃𝐡𝐞𝐦𝐝𝐢𝐦𝐚𝐫 𝐒𝐢𝐫𝐚𝐝𝐮𝐧

23/08/2026

𝗣𝗔𝗡𝗜𝗡𝗜𝗡𝗗𝗜𝗚𝗔𝗡 𝗦𝗔 𝗣𝗔𝗡𝗚𝗔𝗡𝗚𝗔𝗧𝗪𝗜𝗥𝗔𝗡: 𝗔𝗡𝗚 𝗔𝗣𝗔𝗧 𝗡𝗔 𝗣𝗔𝗡𝗚𝗞𝗔𝗧, 𝗛𝗔𝗡𝗗𝗔 𝗡𝗚𝗔𝗬𝗢𝗡𝗚 𝗠𝗔𝗡𝗜𝗡𝗗𝗜𝗚𝗔𝗡

Narito na ang mga kalahok na haharap sa 𝗣𝗮𝗹𝗶𝗴𝘀𝗮𝗵𝗮𝗻 𝘀𝗮 𝗗𝗲𝗯𝗮𝘁𝗲 — isang makabuluhang tunggalian ng mga ideya, pananaw, at paninindigan na susukat sa husay sa pangangatwiran, lalim ng pag-unawa, tibay ng argumento, at galing sa pagpapahayag ng bawat pangkat.

Bilang bahagi ng pagdiriwang ng Buwan ng Wikang Pambansa 2026, buong pagmamalaking ipinakikilala ng 𝗦𝗮𝗺𝗮𝗵𝗮𝗻 𝗻𝗴 𝗺𝗴𝗮 𝗠𝗮𝗴-𝗮𝗮𝗿𝗮𝗹 𝘀𝗮 𝗙𝗶𝗹𝗶𝗽𝗶𝗻𝗼 (𝗦𝗮𝗠𝗮𝗙𝗶𝗹) ng Departamentong Filipino, ang apat (4) na pangkat na maglalaban-laban sa isang makabuluhang palitan ng mga kaisipan. Bawat isa ay may kanya-kanyang paninindigang ipagtatanggol, mga argumentong bibigyang-lakas, at mga pananaw na hahamon sa kakayahan ng kabilang panig na mangatwiran at sumagot.

Sa bawat pahayag ay masusubok ang linaw ng kaisipan; sa bawat argumento ay titimbangin ang lakas ng paninindigan; at sa bawat sagot ay maipamamalas ang talas ng isip at husay sa pangangatwiran.

Sino ang mananaig? Sino ang makapagpapakita ng pinakamalakas na katuwiran? At sino ang tatanghaling kampeon sa larangan ng makabuluhang pakikipagtalastasan?

Taglay ang temang “𝗪𝗶𝗸𝗮𝗻𝗴 𝗙𝗶𝗹𝗶𝗽𝗶𝗻𝗼 𝗮𝘁 𝗔𝗜: 𝗞𝗮𝘀𝗮𝗻𝗴𝗸𝗮𝗽𝗮𝗻 𝘀𝗮 𝗣𝗮𝗻𝗮𝗻𝗮𝗹𝗶𝗸𝘀𝗶𝗸 𝗮𝘁 𝗧𝘂𝗹𝗮𝘆 𝘀𝗮 𝗬𝗮𝗺𝗮𝗻 𝗻𝗴 𝗜𝗺𝗽𝗼𝗿𝗺𝗮𝘀𝘆𝗼𝗻,” sama-sama nating kilalanin ang apat na pangkat na handang humarap, mangatwiran, at manindigan. Hindi lamang paligsahan ng mga salita, kungdi tagisan din ng mga kaisipang may saysay.

Magkita-kita po tayo sa Agosto 25, 2026 ganap na alas-otso (8:00) ng umaga, sa CTE Function Hall, 3rd Floor.

✍️: Saydyl D. Amil
📸: Marjaida Saililla, Ella Fayenne Villamor, at Dhemdimar Siradun
🎨: Dhemdimar Siradun

23/08/2026

𝗧𝗔𝗚𝗜𝗦𝗔𝗡 𝗡𝗚 𝗧𝗔𝗟𝗜𝗡𝗢 𝟮.𝟬: 𝗜𝗣𝗔𝗠𝗔𝗟𝗔𝗦 𝗔𝗡𝗚 𝗧𝗔𝗟𝗜𝗡𝗢, 𝗚𝗔𝗟𝗜𝗡𝗚, 𝗔𝗧 𝗞𝗔𝗔𝗟𝗔𝗠𝗔𝗡

Narito na ang mga kalahok na sasabak sa 𝗧𝗮𝗴𝗶𝘀𝗮𝗻 𝗻𝗴 𝗧𝗮𝗹𝗶𝗻𝗼 𝟮.𝟬 — isang paligsahang naglalayong subukin ang lawak ng kaalaman, bilis ng pag-iisip, talas ng pang-unawa, at husay sa pagsagot ng bawat pangkat sa iba’t ibang larangan na may kaugnayan sa ating wika, panitikan, kasaysayan, kultura, at makabagong kaalaman.

Bilang bahagi ng pagdiriwang ng Buwan ng Wikang Pambansa 2026, buong pagmamalaking ipinakikilala ng 𝗦𝗮𝗺𝗮𝗵𝗮𝗻 𝗻𝗴 𝗺𝗴𝗮 𝗠𝗮𝗴-𝗮𝗮𝗿𝗮𝗹 𝘀𝗮 𝗙𝗶𝗹𝗶𝗽𝗶𝗻𝗼 (𝗦𝗮𝗠𝗮𝗙𝗶𝗹, ng Departamentong Filipino, ang labing-apat (14) na pangkat na magtatagisan ng talino at galing para sa iisang hangarin—ang makamit ang pinakamataas na karangalan at tanghaling kampeon ng Tagisan ng Talino 2.0. Bawat pangkat ay may dalang sapat na paghahanda, matalas na pag-iisip, at determinasyong manaig sa bawat tanong at hamong kanilang haharapin.

Sa bawat sagot ay susukat ang kanilang kaalaman; sa bawat segundo ay masusubok ang kanilang bilis ng pag-iisip; at sa bawat puntos ay lalong titindi ang laban tungo sa kampeonato.

Sino ang mananaig sa gitna ng labing-apat na naglalaban-laban? Sino ang magpapatunay na ang talino, kapag sinabayan ng husay at paghahanda, ay tunay na sandata sa bawat hamon?

Sa temang “𝗪𝗶𝗸𝗮𝗻𝗴 𝗙𝗶𝗹𝗶𝗽𝗶𝗻𝗼 𝗮𝘁 𝗔𝗜: 𝗞𝗮𝘀𝗮𝗻𝗴𝗸𝗮𝗽𝗮𝗻 𝘀𝗮 𝗣𝗮𝗻𝗮𝗻𝗮𝗹𝗶𝗸𝘀𝗶𝗸 𝗮𝘁 𝗧𝘂𝗹𝗮𝘆 𝘀𝗮 𝗬𝗮𝗺𝗮𝗻 𝗻𝗴 𝗜𝗺𝗽𝗼𝗿𝗺𝗮𝘀𝘆𝗼𝗻,” sama-sama nating kilalanin at suportahan ang mga pangkat na handang mag-isip, sumagot, at mangibabaw sa Tagisan ng Talino 2.0.

Magkita-kita po tayo sa Agosto 25, 2026 ganap na ala-una (1:00) ng hapon, sa CTE Function Hall, 3rd Floor.

✍️: Saydyl D. Amil
📸: Marjaida Saililla, Ella Fayenne Villamor, at Dhemdimar Siradun
🎨: Dhemdimar Siradun

19/08/2026

𝗪𝗜𝗞𝗔𝗡𝗚 𝗙𝗜𝗟𝗜𝗣𝗜𝗡𝗢 𝗔𝗧 𝗔𝗜: 𝗦𝗘𝗡𝗧𝗥𝗢 𝗡𝗚 𝗣𝗔𝗚𝗕𝗨𝗕𝗨𝗞𝗔𝗦 𝗡𝗚 𝗧𝗔𝗢𝗡𝗚 𝗣𝗔𝗡𝗨𝗥𝗨𝗔𝗡 𝟮𝟬𝟮𝟲–𝟮𝟬𝟮𝟳 𝗡𝗚 𝗕𝗮𝗦𝗖

Sa panahong kayang magbigay ng impormasyon ng artificial intelligence sa loob lamang ng ilang segundo, tila naging mas madali na ang paghahanap ng kaalaman. Ngunit kasabay ng bilis na ito ang isang mas malaking hamon: paano malalaman kung ang impormasyong natatanggap ay tama?

Sa Basilan State College, ang tanong na ito ay naging bahagi ng makabuluhang pagbubukas ng Taong-Panuruan 2026–2027, noong Agosto 17, kasabay ng pagdiriwang ng Buwan ng Wika 2026. Hindi lamang bagong semestre ang sinalubong ng mga BaSCinians. Kasabay nito ang isang paalala na sa kabila ng bilis ng pag-unlad ng teknolohiya, kailangang isaalang-alang at panatilihin ang wasto at kritikal na paggamit ng AI tungo sa mas mayabong na kinabukasan ng bawat isa.

“Wikang Filipino at AI: Kasangkapan sa Pananaliksik at Tulay sa Tamang Impormasyon.”

Ito ang temang naging sentro ng pagdiriwang—isang temang tila sumasalamin sa realidad ng mga mag-aaral ngayon. Hindi maipagkakaila na sa bawat pangangailangan ay unti-unti nang nagiging bahagi ng kanilang buhay ang AI. Ngunit kasabay ng pagkakaroon ng makabagong kasangkapan ay ang pangangailangang gamitin ito nang may pag-iingat at pananagutan.

Ang programa ay pinangunahan ng Samahan ng mga Mag-aaral sa Filipino (SaMaFil), sa ilalim ng pamumuno ni Asst. Prof Maricor V. Limen, Tagapangasiwa ng Departamentong Filipino.

Ang nasabing programa ay dinaluhan ng mga kawani, mga g**o, at mga mag-aaral ng Basilan State College kasama ang kagalang-galang na Pangulo, Hja. Haipa Abdurahim Salain, Ed.D.

Sa patuloy na pagdaloy ng makabuluhang pagtitipon na ito, nagbigay ng mahalagang mensahe si Gng. Limen, kung saan binigyang-diin niya ang kahalagahan ng Filipino sa edukasyon at pananaliksik. Higit pa rito, ipinaalala niya ang pangangailangang maging mapanuri sa paggamit ng AI, lalo na sa pagkuha at pagsusuri ng impormasyon.

Ayon sa kaniya, bagamat ang AI ay isang makabuluhang kasangkapan, ito ay nangangailangan ng wastong pag-aaral at pananagutan. Sapagkat ang teknolohiya ay maaaring maging makapangyarihang kasangkapan, ngunit hindi nito awtomatikong ginagawang tama ang lahat ng impormasyong ibinibigay nito.

Kasunod nito ay ang mensaheng ibinahagi ng kagalang-galang na Pangulo ng Institusyon, Dr. Haipa Abudurahim-Salain. Hinikayat ng mahal na Pangulo ang mga mag-aaral na pagbutihin ang kanilang pag-aaral, pahalagahan ang edukasyon, at mahalin ang kanilang paaralan. Kasabay nito ang pagpapaalala na gamitin ang mga makabagong learning tools, kabilang ang AI, bilang katuwang sa pagkatuto, hindi bilang kapalit ng sariling pag-iisip.

Nagbigay ng isang makulay at makabuluhang pagtatanghal ang BaSC Dance Troupe. Ipinakita nila sa pagtatanghal ang kultura at kaugaliang Pilipino. Sa kabilang dako, ang SaMaFil ay naglunsad ng Trivia Questions na nagbigay sigla sa programa.

Ang pagbubukas ng pagdiriwang ng Buwan ng Wikang Pambansa 2026 sa Basilan State College ay isang makabuluhang pagkakataon upang mabigyang-diin ang pagpapahalaga sa Wikang Filipino sa gitna ng modernisasyon. Sa pamamagitan ng mga nakahandang aktibidad na iluluunsad ng Samahan ng mga Mag-aaral sa Filipino ( SaMaFil), inaasahang mas mapapaunlad at mapapalalim ang pagmamahal ng bawat isa sa Wika na siyang bahagi ng pagkakakilanlan ng bawat isa.

Sa pagtatapos ng okasyon, ang SaMaFil ay nananawagan at nagpapaalala na patuloy pagyamanin ang Wikang Filipino bilang daluyan ng kaalaman at pag-unawa sa kultura. Nawa'y ating panatilihin ang pagbibigay-halaga sa Wikang Filipino sa tulong ng teknolohiya nang may mapanuri at kritikal na pag-iisip.

Tandaan na ang Artificial Intelligence ay isa lamang kasangkapan na siyang nakatutulong upang mapabilis ang pangangailangan, ngunit hindi ito ang sentro ng ating pagkakakilanlan. Kaya naman, gamitin ang AI gamit ang mapanuring pag-iisip at pansariling pananagutan.

Maligayang Buwan ng Wikang Pambansa 2026!

✍️: Arfhayna Abraham
📸: Farha Ratib, Sittina Amil, Amree Talaji and Demar Siradun

20/02/2026