Samagfil - Melchor L. Nava NHS

Dumayo tayo sa makulay at mahiwagang mundo ng pabula sa pamamagitan ng pagbabasa!

Muli na namang ipinamalas ng mga batang Melchorian ang kanilang kahusayan, talino, at pagkamalikhain sa idinaos na timpalak na “Madulang Pagbasa” bilang bahagi ng pagdiriwang ng Pambansang Buwan ng Pagbasa 2025. Sa tanghalang puno ng imahinasyon at damdamin, buhay na buhay nilang inihatid ang mahahalagang aral na taglay ng mga pabulang minahal natin mula pagkabata.

Mula baitang pito hanggang baitang labing-dalawa, isang piling kalahok ang nagbigay-kulay, tinig, at emosyon sa mga tauhang hayop na nagmula sa iba’t ibang kwentong pabula. Tunay na hinangaan ang kanilang galing sa pagbibigay-buhay sa bawat karakter, mula sa nangangalit na leon, matalinong pagong, hanggang sa mga cute na biik na nag-iwan ng inspirasyon, aral, at saya sa lahat ng nakasaksi.

Isang patunay itong ang pagbabasa ay hindi lamang libangan, kundi isang paglalakbay sa mundo ng aral, imahinasyon, at pagkatuto.

Isang matagumpay na pagdiriwang ng Buwan ng Wikang Pambansa ang naganap kahapon, Agosto 29, 2025 sa Mataas na Paaralang Nasyonal ng Melchor L. Nava.

Ang SAMAGFIL ay nais magpahayag ng buong pasasalamat sa lahat ng naging bahagi sa pagsasakatuparan ng pagdiriwang na ito. Tunay, na walang layunin ang hindi makakamit sa loob ng nagkakaisang pangkat at samahan!

Nawa’y sa pagtatapos ng ating pagdiriwang ay mas lalong napatibay ang ating pagmamahal sa sariling wika, at sa ating pagkakilanlan. Nawa’y manatili sa atin ang lubos na pagpapahalaga sa ating Wikang Filipino at araw-araw natin itong ipagmalaki at ipagbunyi! Mabuhay ang Wikang Filipino! Mabuhay ang nagkakaisang Pinoy!

Bilang bahagi ng pagdiriwang ng Buwan ng Wikang Pambansa na may temang, “Paglinang sa Filipino at Katutubong Wika: Makasaysayan sa Pagkakaisa ng Bansa.”

Malugod na inihahandog ng MLNNHS-Samahan ng Mag-aaral sa Filipino (SAMAGFIL), ang isang patimpalak sa ganda, yaman, at istorya. Ang pagsuot ng iba’t ibang kasuotang Pinoy!

Pagmasdan ang natatanging tikas at ganda ng mga ginoo’t binibining Melchorian sa makukulay nilang kasuotang Pilipino.

Ipakita ang iyong paghanga at suporta sa bawat kalahok sa pamamagitan ng pagbigay ng pusong reaksyon ❤️ sa bawat larawan.

Sa pangunguna ng Samahan ng Mag-aaral sa Filipino ng Melchor L. Nava National High School, naganap kanina ang pinakaabangang paligsahan sa paggawa ng poster, islogan, pagsulat ng sanaysay, at tagisan ng talino.

Maraming kalahok mula sa iba’t ibang baitang ang nagpasiklaban ng kanilang husay at galing. Tanging talino, talento, at pusong makabayan lamang ang puhunan! Ang bawat paligsahan ay patunay sa lawak at lago ng imahinasyon, at talas ng isip ng isang batang Melchorian.

𝗧𝗮𝗴𝘂𝗺𝗽𝗮𝘆 𝘁𝗮𝘆𝗼 𝘀𝗮 𝘂𝗻𝗮𝗻𝗴 𝗮𝗿𝗮𝘄 𝗻𝗴 𝗔𝗴𝗼𝘀𝘁𝗼!

Ang MLNNHS, sa pangunguna ng Samahan ng mag-aaral sa Filipino (SAMAGFIL) ay nagdaos ng misa para sa unang Biyernes ng Agosto na sinundan ng masiglang pambungad na palatuntunan para sa buwan ng wikang pambansa.

Sa unang araw ng Agosto, hindi pinalampas ng MLNNHS ang pagkakataong magbigay papuri at pasasalamat sa Panginoon. Sa misa ni father, kaniyang ipinaalala ang halaga ng pagpapanatili ng kababaang loob sa gitna ng mga nakakamit na tagumpay sa buhay. Ipinahayag niyang ang kaugaliang ito ang bubuo sa isang mahusay na batang Melchorian.

Samantala, naging hudyat naman ang pagtatapos ng misa ng pagsisimula ng taunang pambungad na palatuntunan sa buwan ng wikang pambansa ng MLNNHS, sa pangunguna ng Samahan ng Mag-aaral sa Filipino (SAMAGFIL).

Nagsimula ang palatuntunan sa pagbigagay ng isang pambungad na mensahe ni Gng. Geraldin Taroballes, punong g**o ng paaralan. Ipinahayag niya ang kaniyang maigting na suporta sa pagdiriwang ng buwan ng wikang pambansa. Tinalakay din ni Gng. Reyna Mel Galvez, pinuno ng kagawaran ng Filipino ng paaralan ang tema ng buwan ng wika sa taong ito, “Paglinang sa Filipino at Katutubong Wika: Makasaysayan sa Pagkakaisa ng Bansa.” Kaniyang idiniin ang halaga ng Filipino at ng yaman ng katutubong wika sa pagbuo ng ating pagkakilanlan bilang isang Pilipino at nagkakaisang arkipelago.

Sa pagwawakas ng palatuntunan ay inihatid ni G. Julius Puntal, tagapayo ng SAMAGFIL, ang kaniyang buong pasasalamat sa lahat ng tumulong at nakibahagi sa pambungad na palatuntunan ng buwan ng wikang pambansa. Hatid ang panghihikayat na ipagpatuloy ang ganitong pagtutulungan at pagsama-sama sa layuning itaguyod, linangin, at ipagdiwang ang ating Wikang Filipino, ang ating pagkakakilanlan, at ang ating dangal.

Ang pambungad na palatuntunan ay nagsilbing pamukaw sa makabansang damdamin ng mga mag-aaral na Melchorian. Nabigyan ang bawat isa ng pagkakataon malaman ang mga aktibidades na isasagawa sa pagdiriwang ng buwan ng Wikang Pambansa sa buong Agosto. Layunin din nitong ipakilala ang bagong tagapayo at mga opisyales ng SAMAGFIL na siyang mangunguna at mangangasiwa sa mga isasagawang aktibidades ng paaralan.

Mga Salita Ni: Ginoong Julius Puntal
Layout: Lenz John Mercado

𝐏𝐚𝐦𝐛𝐮𝐧𝐠𝐚𝐝 𝐧𝐚 𝐏𝐚𝐥𝐚𝐭𝐮𝐧𝐭𝐮𝐧𝐚𝐧 𝐬𝐚 𝐁𝐮𝐰𝐚𝐧 𝐧𝐠 𝐖𝐢𝐤𝐚𝐧𝐠 𝐏𝐚𝐦𝐛𝐚𝐧𝐬𝐚

𝐀𝐧𝐠 𝐌𝐋𝐍𝐍𝐇𝐒 𝐬𝐚 𝐩𝐚𝐧𝐠𝐮𝐧𝐠𝐮𝐧𝐚 𝐧𝐠 𝐒𝐚𝐦𝐚𝐡𝐚𝐧 𝐧𝐠 𝐌𝐚𝐠-𝐚𝐚𝐫𝐚𝐥 𝐬𝐚 𝐅𝐢𝐥𝐢𝐩𝐢𝐧𝐨 (𝐒𝐀𝐌𝐀𝐆𝐅𝐈𝐋) 𝐚𝐲 𝐧𝐚𝐠𝐥𝐮𝐧𝐬𝐚𝐝 𝐧𝐠 𝐩𝐚𝐦𝐛𝐮𝐧𝐠𝐚𝐝 𝐧𝐚 𝐩𝐚𝐥𝐚𝐭𝐮𝐧𝐭𝐮𝐧𝐚𝐧 𝐩𝐚𝐫𝐚 𝐬𝐚 𝐛𝐮𝐰𝐚𝐧 𝐧𝐠 𝐖𝐢𝐤𝐚𝐧𝐠 𝐏𝐚𝐦𝐛𝐚𝐧𝐬𝐚 𝐧𝐠𝐚𝐲𝐨𝐧𝐠 𝐮𝐧𝐚𝐧𝐠 𝐚𝐫𝐚𝐰 𝐧𝐠 𝐀𝐠𝐨𝐬𝐭𝐨.

Ang gawaing ito ay isinagawa upang ibahagi sa mga mag-aaral na Melchorian ang mga aktibidades na idaraos ng SAMAGFIL sa buong buwan ng Agosto para sa Pagdiriwang ng Buwan ng Wikang Pambansa. Layunin din na maipakilala ang bagong tagapayo at mga opisyales na mangunguna sa mga isasagawang aktibidades ng paaralan.