31/07/2026
Tagisan ng Galing, talas ng isip at hinasang Talento
Hulyo 31— Nagsagawa ng iba’t ibang classroom-based activities ang Ammogaoen Elementary School (AES) bilang bahagi ng pagdiriwang ng Nutrition Month Na nilahukan ng mga mag-aaral mula Kindergarten hanggang Grade 6.
Nagkaroon ng paligsahan sa pagkukulay para sa mga mag-aaral mula Kindergarten hanggang Grade 2, kung saan ipinamalas ng mga batang kalahok ang kanilang pagkamalikhain at husay sa pagguhit at pagkulay na may temang may kaugnayan sa wastong nutrisyon at malusog na pamumuhay. Nagkamit ng unang pwesto sa patimpalak sina Freyha Namie C. Fernandez (Kindergarten), Giana Greesam B. Baguilat (Grade 1), Hazelle Faith B. Idala (Grade 2).
Samantala, nagtagisan naman sa paggawa ng slogan ang mga mag-aaral mula Grade 3 hanggang Grade 4. Sa pamamagitan ng kanilang mga likhang slogan, naipakita ng mga kalahok ang kanilang kaalaman at pagpapahalaga sa kahalagahan ng wastong nutrisyon at pagpapanatili ng malusog na pangangatawan. Nagkamit ng Unang Pwesto sina Alfiella C. Attep (Grade 3) at Diana Mae A. Ammog (Grade 4).
Para naman sa mga mag-aaral mula Grade 5 hanggang Grade 6, isinagawa ang Nutrition Month Quiz Bee na sumubok sa kanilang kaalaman tungkol sa nutrisyon, kalusugan, wastong pagkain, at malusog na pamumuhay at wagi sina Leeyan Jae A. Ogana (Grade 5) at Kennedy P. Dulnuan (Grade 6).
Layunin ng mga gawaing ito na hikayatin ang aktibong pakikilahok ng mga mag-aaral at higit na mapalalim ang kanilang kamalayan sa kahalagahan ng wastong nutrisyon bilang bahagi ng isang malusog at produktibong pamumuhay.
Sa pamamagitan ng mga makabuluhan at masayang aktibidad, naging pagkakataon ang pagdiriwang upang pagsamahin ang pagkatuto, pagkamalikhain, at kompetisyon habang isinusulong ang mensahe ng malusog na pagkain at wastong nutrisyon sa buong komunidad ng AES.
