31/07/2026
CALINAN NATIONAL HIGHSCHOOL GIKLARONG WALA SILA’Y KONTROL SA REAKSYON SA ILANG MGA ESTUDYANTE
Nakakuha og managlahing reaksyon sa social media ang viral nga video nga giingong nagpakita sa pipila ka mga giingong estudyante sa Calinan National High School nga nanaway ug namalikas kang Pangulong Ferdinand "Bongbong" Marcos Jr. atol sa paglupad sa presidential helicopter sa ilang eskwelahan sa Calinan ning syudad sa Dabaw.
Gani, adunay miingon nga kini pagpakita sa freedom of expression, samtang ang uban mikondena sa paggamit og dili maayong mga pulong batok sa Pangulo ilabina sulod sa tulonghaan.
Sa eksklusibong pakighinabi sa 93.9 iFM News Davao kang Calinan National Highschool Principal Edgar Allan Bantigue, gibutyag niini nga dili sumala pa intensyon sa eskwelahan ang nahitabo apan gibarugan nga ang matag estudyante adunay managlahing panghuna-huna ug posisyon.
Dugang pa sa opisyal nga ila na usab karong ginasuta ang tinubdan sa maong video ug aron matumbok kung dili ba kini edited, sanglit advance na ang teknolohiya pinaagi sa pag-screen grab sa video dayon butangan og dili orihinal nga audio.
Kung ugaling tinuod ang maong video, ang tagdumala na matud pa sa tulonghaan ang mangayo og pasaylo sa Presidente ingon man ang pag-ako sa kinatibuk-ang responsibilidad sa nahitabo.
Kahinumduman nga gigamit ang maong lugar isip landing zone sa presidential helicopter samtang mibisita ang Presidente sa People's Ville sa Riverside, Calinan District aron susihon ang usa sa mga housing project ubos sa Pambansang Pabahay Para sa Pilipino (4PH) program.
Via || iDol Choy
