17/09/2026
Mula sa pinakamataas na kolehiyo ng buong pamantasan, naninindigan ang UPLB Forestry Society sa panawagan para sa katarungan, pananagutan, at tunay na paglilingkod sa sambayanang Pilipino.
Sa paggunita natin sa ika-54 na taon noong itinatag ng rehime ni Marcos Sr. ang Batas Militar, hindi natin kinakalimutan ang kasaysayan ng pang-aabuso sa kapangyarihan, pagsikil sa karapatan, at pagtalikod sa interes ng mamamayan. Bilang mga iskolar ng bayan, dapat nating gamitin ang ating kamalayan at talino upang patuloy na lumaban upang matiyak na hindi na maulit ang mga pagkakamali at pang-aabusong dinanas ng bayan.
Kasabay ng aming panawagan sa pag-alaala sa ating masalimuot na nakaraan, kami, bilang manggugubat ng bayan ay nanawagan din sa kasalukuyang pamamaraan ng iilan na lipulin ang kanilang mga pansariling interes gamit ang pangalan ng kalikasan. Mga proyektong nakatago sa ngalan ng sustainability at development. Mga proyekto gaya ng Pax Silica na magbibigay daw ng trabaho at oportunidad sa ating ekonomiya o kaya naman ang Ahunan Dam na makatutulong sa ating paglipat sa renewable energy. Ngunit ang parehas na proyekto na ito, at iba pang mga gaya nito ay nagiging katwiran ng mga nasa kapangyarihan at ng mga dayuhan para kamkamin ang lupa ng ating mga katutubo, nagdudulot sa pagkawala ng kabuhayan, tirahan ng mga komunidad, at patuloy na pagsira sa kalikasan. Gayundin, hindi maaaring ihiwalay ang usapin ng ating kalikasan sa usapin ng paggamit ng kaban ng bayan. Ang mga flood control projects ay dapat magsilbi sa kaligtasan ng mga komunidad, hindi maging daan para sa iregularidad, pag-aaksaya, at pagkakamal ng yaman. At sa West Philippine Sea, malinaw ang usapin: nakataya ang ating soberanya, karapatan, at yamang-dagat.
Sa lahat ng ito, isang bagay ang dapat maging malinaw: ang likas-yaman, teritoryo, at yaman ng Pilipinas ay para sa sambayanang Pilipino. Hindi dapat manaig ang interes ng mga imperyalistang bansa gaya ng US at China, mga pribadong korporasyon sa ating mga likas yaman, o iilang naghaharing uri sa kapakanan ng nakararami.
Kaya aming inaanyayahan namin ang mga kapwa iskolar ng bayan sa Biyernes, ika-18 ng Setyembre, kung saan tayo ay dumalo at magpadalo upang ating ilantad, talakayin, at panagutin ang mga patakarang kumakalinga sa interes na hindi sa bayan. Mula sa kagubatan hanggang sa karagatan, mula sa mga kabundukan hanggang sa lahat ng komunidad na binabaha, ang ating kalikasan ay usapin ng bayan at hustisya, at ang pagtatanggol dito ay pagtatanggol sa sambayanan at sa susunod na henerasyon.
Humanay. Makibaka. Matuto.
Sumama sa pag-alpas sa mga tanikala
Para sa kalikasan. Para sa mamamayan. Para sa bayan.
