Isabela State University - Cauayan Campus

𝐎𝐏𝐈𝐒𝐘𝐀𝐋 𝐍𝐀 𝐏𝐀𝐁𝐀𝐓𝐈𝐃 | 𝐏𝐚𝐠𝐩𝐚𝐩𝐚𝐭𝐢𝐛𝐚𝐲 𝐧𝐠 𝐒𝐞𝐠𝐮𝐫𝐢𝐝𝐚𝐝 𝐬𝐚 𝐊𝐚𝐦𝐩𝐮𝐬

Bilang tugon sa mga kamakailang insidente ng karahasan sa ilang paaralan, hinihikayat ang buong pamayanan ng pamantasan na manatiling mapagmatyag at makipagtulungan sa pagpapatupad ng mga karagdagang hakbang pangseguridad sa kampus.

Simula Agosto 18, 2026, ipatutupad ang mga sumusunod:
• Inspeksiyon ng mga bag, personal na gamit, at sasakyang pumapasok sa kampus
• Pagsusuot at maayos na pagpapakita ng wastong Identification Card (ID)
• Mahigpit na pagbabawal sa pagdadala ng baril, armas, o anumang bagay na maaaring magdulot ng panganib
• Agarang pag-uulat sa security personnel ng anumang kahina-hinalang tao, bagay, o sitwasyon

Ang kaligtasan ng bawat isa ay sama-samang pananagutan. Hinihiling ang inyong pang-unawa, pakikipagtulungan, at patuloy na pagiging mapagmatyag upang mapanatili ang isang ligtas, maayos, at mapayapang kampus.

Kaligtasan at seguridad, sama-samang pananagutan.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐂𝐎𝐎𝐏| 𝐈𝐒𝐔-𝐂𝐚𝐮𝐚𝐲𝐚𝐧 𝐍𝐚𝐤𝐢𝐢𝐬𝐚 𝐬𝐚 𝐀𝐒𝐄𝐀𝐍 𝐌𝐨𝐧𝐭𝐡; 𝐍𝐚𝐭𝐚𝐭𝐚𝐧𝐠𝐢𝐧𝐠 𝐊𝐚𝐬𝐮𝐨𝐭𝐚𝐧 𝐊𝐢𝐧𝐢𝐥𝐚𝐥𝐚

Nagkaisa ang mga kawani ng Pamantasang Pampamahalaan ng Isabela–Cauayan Kampus sa pagsusuot ng ASEAN-inspired attire sa isinagawang flag ceremony bilang pakikiisa sa paggunita ng ASEAN Month 2026, Agosto 17.

Bilang bahagi ng pakikiisa ng pamantasan sa paggunita sa ika-59 na anibersaryo ng Association of Southeast Asian Nations (ASEAN), tumalima ang ISU-Cauayan sa panawagan ng Commission on Higher Education (CHED) Central Office na hikayatin ang mga stakeholder ng higher education sector na makiisa sa mga gawaing nagtatampok sa ASEAN at nagpapalawak ng kamalayan sa kahalagahan nito.

Hindi lamang naging pagpapakita ng suporta ang pagsusuot ng ASEAN attire, kundi nagsilbi rin itong paraan upang mailarawan ang diwa ng pagkakaisa at pakikiisa ng komunidad ng pamantasan sa paggunita sa ASEAN Month.

Bilang tampok na bahagi ng aktibidad, kinilala rin ang mga kawani na nagpakita ng natatanging kasuotang hango sa kultura ng ASEAN. Iginawad kay Gng. Marilyn Subido, Tagapamahala ng Aklatan ng Kampus, ang pagkilala bilang Pinakamahusay na Kasuotang ASEAN – Kategoryang Babae, habang itinanghal namang Pinakamahusay na Kasuotang ASEAN – Kategoryang Lalaki si G. Alfredo G. Mateo Jr., g**o sa Kolehiyo ng Edukasyon.

Ang paggunita sa ASEAN Month ay alinsunod sa Proclamation No. 282 na nag-amyenda sa Proclamation No. 1008 at nagtatakda sa Agosto bilang ASEAN Month, bilang pagkilala sa pagkakatatag ng ASEAN noong Agosto 8, 1967.

Sa pamamagitan ng pakikiisa sa mga ganitong gawain, patuloy na ipinakikita ng ISU-Cauayan ang suporta nito sa mga inisyatiba na nagtataguyod ng kamalayan, pagkakaisa, at ugnayan sa loob ng ASEAN community.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐏𝐄𝐂𝐈𝐀𝐋| 𝐌𝐚𝐥𝐢𝐠𝐚𝐲𝐚𝐧𝐠 𝐊𝐚𝐚𝐫𝐚𝐰𝐚𝐧, 𝐀𝐬𝐬𝐭. 𝐏𝐫𝐨𝐟. 𝐌𝐚𝐫𝐤-𝐉𝐡𝐨𝐧 𝐑. 𝐏𝐫𝐞𝐬𝐭𝐨𝐳𝐚, 𝐏𝐡𝐃, 𝐔𝐧𝐢𝐯𝐞𝐫𝐬𝐢𝐭𝐲 𝐃𝐢𝐫𝐞𝐜𝐭𝐨𝐫 𝐟𝐨𝐫 𝐒𝐞𝐧𝐭𝐫𝐨 𝐧𝐠 𝐖𝐢𝐤𝐚 𝐚𝐭 𝐊𝐮𝐥𝐭𝐮𝐫𝐚!

Sa patuloy ninyong pamumuno sa Sentro ng Wika at Kultura ng Pamantasang Pampamahalaan ng Isabela, hindi lamang ninyo itinataguyod ang paggamit ng wika, kundi pinananatili rin ninyong buhay ang mga kuwentong, kulturang, at pagkakakilanlang nagbibigay-kahulugan sa ating pagiging Isabeleño at Pilipino.

Sa bawat programa, talakayan, at inisyatibang inyong pinangungunahan, naipapaalala ninyo na ang wika ay higit pa sa kasangkapan ng komunikasyon. Ito ay sisidlan ng alaala, tagapagdala ng kultura, at tulay na nag-uugnay sa pamantasan at sa komunidad.

Nawa’y patuloy kayong pagkalooban ng lakas, inspirasyon, at mga bagong pagkakataon upang higit pang mapalawak ang puwang ng wika at kultura sa buong ISU System.

Hangad namin na ang panibagong taon ng inyong buhay ay mapuno ng mga bagong kuwentong mabubuo, mga wikang higit pang mapagyayaman, at mga kulturang patuloy ninyong mapangangalagaan.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐈𝐒𝐔-𝐂𝐚𝐮𝐚𝐲𝐚𝐧 𝐏𝐢𝐧𝐚𝐢𝐢𝐠𝐭𝐢𝐧𝐠 𝐚𝐧𝐠 𝐏𝐚𝐤𝐢𝐤𝐢𝐢𝐬𝐚 𝐬𝐚 𝐁𝐮𝐰𝐚𝐧 𝐧𝐠 𝐖𝐢𝐤𝐚𝐧𝐠 𝐏𝐚𝐦𝐛𝐚𝐧𝐬𝐚 𝟐𝟎𝟐𝟔

Nakikiisa ang Pamantasang Pampamahalaan ng Isabela–Cauayan Kampus sa pagdiriwang ng Buwan ng Wikang Pambansa ngayong Agosto 2026, na isinasagawa mula Agosto 1 hanggang 31 alinsunod sa Proklamasyon Blg. 1041, s. 1997.

Pinangunahan ng Komisyon sa Wikang Filipino (KWF) ang pambansang pagdiriwang ngayong taon na may temang “Wikang Filipino at AI: Kasangkapan sa Pananaliksik at Tulay sa Yaman ng Impormasyon.”

Itinatampok ng tema ang mahalagang papel ng wikang Filipino sa pananaliksik, edukasyon, pagkatuto, at paglikha ng kaalaman sa panahon ng mabilis na pag-unlad ng artificial intelligence (AI). Binibigyang-diin din nito ang Filipino bilang tulay sa mas madaling pagkuha at pag-unawa sa makabuluhan at mapagkakatiwalaang impormasyon sa kontekstong Pilipino.

Bilang pakikiisa sa pagdiriwang, sinimulan na ng ISU-Cauayan ang ilang mga programa at inisyatibang naglalayong itaguyod ang pagpapahalaga, paggamit, at pagpapaunlad ng wikang Filipino at iba pang mga wika sa bansa.

Hindi rito nagtatapos ang pakikiisa ng pamantasan. Abangan ang mga susunod pang programa, gawain, at hakbang ng ISU-Cauayan sa buong buwan ng Agosto bilang patuloy na ambag sa pagsusulong ng wika, kultura, at kaalamang Pilipino.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐂𝐎𝐎𝐏| 𝐈𝐒𝐔-𝐂𝐚𝐮𝐚𝐲𝐚𝐧 𝐊𝐚𝐭𝐮𝐰𝐚𝐧𝐠 𝐧𝐠 𝐑𝐄𝐒𝐂𝐎𝐌 𝐏𝐀 𝐬𝐚 𝟏𝟎𝐭𝐡 𝐒𝐢𝐦𝐮𝐥𝐭𝐚𝐧𝐞𝐨𝐮𝐬 𝐁𝐥𝐨𝐨𝐝 𝐃𝐨𝐧𝐚𝐭𝐢𝐨𝐧 𝐀𝐜𝐭𝐢𝐯𝐢𝐭𝐲

Nakiisa ang Pamantasang Pampamahalaan ng Isabela–Cauayan Kampus sa 10th RESCOM PA-Wide Simultaneous Blood Donation Activity na isinagawa sa Campus Gymnasium, Agosto 15.

Isinagawa ang aktibidad ng 202nd (Isabela) Community Defense Center, 2nd Regional Community Defense Group, Reserve Command, Philippine Army (RESCOM PA), katuwang ang 202nd Ready Reserve Infantry Battalion, bilang bahagi ng pagdiriwang ng 43rd RCPA Founding Anniversary.

Lumahok sa blood donation activity ang mga organic personnel, reservists, dependents, ROTC cadets, at iba pang stakeholders, na sama-samang naglaan ng oras at suporta para sa isang gawaing nakatuon sa pagtugon sa pangangailangan sa dugo.

Bilang katuwang ng RESCOM PA, sinuportahan ng ISU-Cauayan ang aktibidad sa pamamagitan ng paglalaan ng campus gymnaisum at mga kinakailangang pasilidad para sa maayos na pagsasagawa ng blood donation drive.

Sa pamamagitan ng pakikiisa sa mga ganitong inisyatiba, patuloy na isinasabuhay ng ISU-Cauayan ang diwa ng pakikilahok at paglilingkod sa komunidad, habang hinihikayat ang mga miyembro ng pamantasan at mga katuwang nito na makibahagi sa mga gawaing nakatutulong at nakapagliligtas ng buhay.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐂𝐎𝐎𝐏| 𝐈𝐒𝐔-𝐂𝐚𝐮𝐚𝐲𝐚𝐧, 𝐃𝐌𝐖 𝐌𝐚𝐠𝐭𝐮𝐭𝐮𝐥𝐮𝐧𝐠𝐚𝐧 𝐮𝐩𝐚𝐧𝐠 𝐈𝐥𝐚𝐩𝐢𝐭 𝐚𝐧𝐠 𝐄𝐦𝐩𝐥𝐨𝐲𝐦𝐞𝐧𝐭 𝐎𝐩𝐩𝐨𝐫𝐭𝐮𝐧𝐢𝐭𝐢𝐞𝐬 𝐬𝐚 𝐦𝐠𝐚 𝐌𝐚𝐠𝐬𝐢𝐬𝐢𝐩𝐚𝐠𝐭𝐚𝐩𝐨𝐬

Magtutulungan ang Pamantasang Pampamahalaan ng Isabela–Cauayan Kampus at Department of Migrant Workers (DMW) upang mailapit sa mga magsisipagtapos ang mga oportunidad at serbisyong makatutulong sa kanilang paghahanda para sa paghahanap ng trabaho sa loob at labas ng bansa, Agosto 13.

Kaugnay nito, dumalaw sa pamantasan sina Dr. Laila Ruth Taguinod at Atty. Jozele Mariz Dalupang-Taguba mula sa DMW at nakipagpulong kay Prof. Marisol S. Foronda, Cluster Executive Officer ng ISU Cauayan, bilang bahagi ng paghahanda para sa isasagawang aktibidad sa ika-10 ng Setyembre.

Kabilang sa mga serbisyong ihahatid ang pagkakataong makapagtrabaho sa loob at labas ng bansa, gabay sa on-site application, tulong sa DMW e-Registration, Pre-Employment Orientation Seminar (PEOS), at Anti-Illegal Recruitment Orientation.

Magkakaroon din ng libreng serbisyo at konsultasyon mula sa iba't ibang ahensya ng pamahalaan upang mabigyan ang mga magsisipagtapos ng impormasyon hinggil sa kanilang mga susunod na hakbang sa paghahanap ng trabaho.

Sa pamamagitan ng pagtutulungan ng ISU-Cauayan at DMW, layunin ng aktibidad na mailapit sa mga magsisipagtapos ang mga lehitimong pagkakataon sa pagtatrabaho at mahahalagang serbisyo ng pamahalaan bilang paghahanda sa kanilang mga napiling propesyon.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐌𝐆𝐀 𝐁𝐀𝐊𝐀𝐍𝐓𝐄𝐍𝐆 𝐏𝐎𝐒𝐈𝐒𝐘𝐎𝐍⎮Inaanyayahan ng Pamantasang Pampamahalaan ng Isabela–Cauayan Kampus ang mga interesado at kwalipikadong indibidwal na magsumite ng aplikasyon para sa mga sumusunod na larangan:
𝐈𝐬𝐚𝐧𝐠 (𝟏) Aircraft Maintenance Technology
𝐈𝐬𝐚𝐧𝐠 (𝟏) Mechanical Engineering/Mechatronics
𝐈𝐬𝐚𝐧𝐠 (𝟏) Electrical Engineering/Electronics
𝐃𝐚𝐥𝐚𝐰𝐚𝐧𝐠 (𝟐) Computer Science/Engineering
𝐃𝐚𝐥𝐚𝐰𝐚𝐧𝐠 (𝟐) Entertainment and Multimedia Computing
𝐈𝐬𝐚𝐧𝐠 (𝟏) Criminology
𝐈𝐬𝐚𝐧𝐠 (𝟏) Elementary Education
𝐈𝐬𝐚𝐧𝐠 (𝟏) Science
𝐈𝐬𝐚𝐧𝐠 (𝟏) Entrepreneurship
𝐈𝐬𝐚𝐧𝐠 (𝟏) Tourism Management
𝐈𝐬𝐚𝐧𝐠 (𝟏) Hospitality Management
𝐈𝐬𝐚𝐧𝐠 (𝟏) Crop Science

𝐔𝐫𝐢 𝐧𝐠 𝐏𝐚𝐠𝐭𝐚𝐭𝐚𝐥𝐚𝐠𝐚: Permanente
𝐇𝐮𝐥𝐢𝐧𝐠 𝐀𝐫𝐚𝐰 𝐧𝐠 𝐀𝐩𝐥𝐢𝐤𝐚𝐬𝐲𝐨𝐧: Ika-21 ng Agosto 2026

𝐌𝐠𝐚 𝐊𝐰𝐚𝐥𝐢𝐩𝐢𝐤𝐚𝐬𝐲𝐨𝐧:
𝐄𝐝𝐮𝐤𝐚𝐬𝐲𝐨𝐧: Master’s Degree sa larangan ng espesyalisasyon o kaugnay na disiplina
𝐊𝐚𝐫𝐚𝐧𝐚𝐬𝐚𝐧: Mas mainam kung may karanasan sa pagtuturo sa kolehiyo.
𝐏𝐚𝐠𝐩𝐚𝐩𝐚𝐮𝐧𝐥𝐚𝐝 𝐧𝐠 𝐊𝐚𝐬𝐚𝐧𝐚𝐲𝐚𝐧: Hindi kinakailangan
𝐊𝐰𝐚𝐥𝐢𝐩𝐢𝐤𝐚𝐬𝐲𝐨𝐧: RA 1080 para sa mga posisyong nangangailangan ng Bar o Board Eligibility

Ang mga aplikante ay pinapayuhang personal na isumite ang mga sumusunod na dokumento sa Office of the Campus HRMO, Administration Building, Isabela State University–Cauayan Campus, San Fermin, Cauayan City, Isabela:

1. Liham ng aplikasyon na naka-address kay:

PROF. BOYET L. BATANG, PhD
University President
Isabela State University
Echague, Isabela

Sa pamamagitan ni:

PROF. MARISOL S. FORONDA, PhD
Cluster Executive Officer
Isabela State University–Cauayan Campus
Cauayan City, Isabela

2. Kumpletong Personal Data Sheet (PDS) na may kalakip na kasalukuyang passport-sized na larawan (CS Form No. 212, Revised 2025), na maaaring i-download mula sa Civil Service Commission.
2. Photocopy ng Official Transcript of Records (OTR)
3. Photocopy ng Certificate of Eligibility o Professional License
Certificate of Employment o Service Record, kung dati nang nagkaroon ng trabaho
4. Mga sertipiko ng mga pagsasanay, seminar, at workshop na dinaluhan
5. Iba pang kaugnay na dokumento

𝙋𝙖𝙖𝙡𝙖𝙡𝙖: 𝙃𝙞𝙣𝙙𝙞 𝙞𝙨𝙖𝙨𝙖𝙞𝙡𝙖𝙡𝙞𝙢 𝙨𝙖 𝙥𝙧𝙤𝙨𝙚𝙨𝙤 𝙣𝙜 𝙥𝙖𝙜𝙨𝙪𝙨𝙪𝙧𝙞 𝙖𝙣𝙜 𝙢𝙜𝙖 𝙖𝙥𝙡𝙞𝙠𝙖𝙨𝙮𝙤𝙣𝙜 𝙝𝙞𝙣𝙙𝙞 𝙠𝙪𝙢𝙥𝙡𝙚𝙩𝙤 𝙖𝙣𝙜 𝙢𝙜𝙖 𝙠𝙞𝙣𝙖𝙠𝙖𝙞𝙡𝙖𝙣𝙜𝙖𝙣𝙜 𝙙𝙤𝙠𝙪𝙢𝙚𝙣𝙩𝙤.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐂𝐎𝐎𝐏 | 𝐁𝐮𝐰𝐚𝐧 𝐧𝐠 𝐀𝐒𝐄𝐀𝐍 𝟐𝟎𝟐𝟔, 𝐬𝐢𝐧𝐢𝐦𝐮𝐥𝐚𝐧 𝐬𝐚 𝐈𝐒𝐔 𝐂𝐚𝐮𝐚𝐲𝐚𝐧

Nagkaisa ang buong pamayanan ng Pamantasang Pampamahalaan ng Isabela–Cauayan Kampus sa pagsisimula ng pagdiriwang ng Buwan ng ASEAN, Agosto 10.

Sa temang “Sama-samang Pagtahak sa Ating Kinabukasan,” tampok sa pagdiriwang ang pakikiisa ng mga tagapamahala, g**o, kawani, at mag-aaral bilang pagpapakita ng pagkakaisa at pagpapahalaga sa kultura at pagkakaiba-iba ng mga bansa sa ASEAN.

Sinimulan ang programa sa isang makulay na parada kung saan kinatawan ng mga kalahok ang iba’t ibang bansa sa ASEAN sa pamamagitan ng kanilang mga kasuotan. Ipinamalas sa parada ang makukulay na disenyo, tradisyonal na pananamit, at mga elementong sumasalamin sa kultura ng bawat bansang kinatawan.

Sinundan ito ng seremonya ng pagtataas ng watawat, na nagsilbing simbolikong pagbubukas ng pagdiriwang. Matapos nito, sabay-sabay na inawit ng buong pamayanan ng kampus ang Himno ng ASEAN, na higit na nagbigay-diin sa diwa ng pagkakaisa sa kabila ng pagkakaiba-iba ng mga bansa at kultura sa rehiyon.

Binigyang-diin ni Prof. Marisol S. Foronda, PhD, Cluster Executive Officer, ang kahalagahan ng sama-samang pagkilos sa pagharap sa kinabukasan sa mensaheng inihatid ni Assoc. Prof. Ryan P. Salviejo, Director for Public Relations, External Linkages, and International Affairs, para sa kanya.

Sa kanyang mensahe, inihambing niya ang ASEAN sa isang malaking bangka na sama-samang tinatahak ng mga bansa sa rehiyon. Aniya, hindi sumusulong ang isang bangka dahil lamang sa lakas ng iisang sagwan, kundi dahil sa sama-samang pagkilos at iisang direksiyon.

Iniugnay rin niya ang tema ng pagdiriwang sa papel ng ISU Cauayan sa paghubog ng kinabukasan, kung saan ang bawat tagapamahala, g**o, kawani, at mag-aaral ay may mahalagang ambag sa pagtataguyod ng kaalaman, inobasyon, paglilingkod, at pag-unlad ng pamayanan.

Binigyang-diin din sa mensahe ang ASEAN Community Vision 2045, na naglalayong bumuo ng isang rehiyong matatag, makabago, at nakasentro sa mamamayan. Sa ganitong pananaw, ang mga institusyong pang-edukasyon ay may mahalagang papel sa paghahanda ng mga mamamayang may kakayahang makibahagi sa paghubog ng hinaharap.

Samantala, kinilala rin sa programa ang mga natatanging kasuotang ASEAN. Pinangunahan ni Prof. Freddie R. Cabrera, PhD, University Director for Socio-Cultural Affairs, ang paggawad ng mga parangal sa mga kalahok na nagpakita ng malikhaing interpretasyon at pagpapahalaga sa kultura sa pamamagitan ng kanilang mga kasuotan.

Bilang pangwakas sa programa, nagbigay ng mensahe si Assoc. Prof. Dionicio D. Gante, Director for Gender and Development at SSC Adviser, na binigyang-diin ang kahalagahan ng patuloy na pakikiisa ng buong pamayanan ng ISU Cauayan sa mga gawaing nagtataguyod ng pagkakaisa, kultura, at pagkakaunawaan.

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐔𝐖𝐀𝐍 𝐍𝐆 𝐀𝐒𝐄𝐀𝐍 𝐒𝐀 𝐈𝐒𝐔 𝐂𝐀𝐔𝐀𝐘𝐀𝐍

Sa diwa ng pagkakaisa, pagkakaibigan, at pagkakaugnay ng mga bansa sa Timog-Silangang Asya, sama-sama nating salubungin ang pagdiriwang ng 𝐁𝐮𝐰𝐚𝐧 𝐧𝐠 𝐀𝐒𝐄𝐀𝐍 sa 𝐏𝐚𝐦𝐚𝐧𝐭𝐚𝐬𝐚𝐧𝐠 𝐏𝐚𝐦𝐩𝐚𝐦𝐚𝐡𝐚𝐥𝐚𝐚𝐧 𝐧𝐠 𝐈𝐬𝐚𝐛𝐞𝐥𝐚 – 𝐂𝐚𝐮𝐚𝐲𝐚𝐧 𝐊𝐚𝐦𝐩𝐮𝐬!

Sa temang 𝐒𝐚𝐦𝐚-𝐬𝐚𝐦𝐚𝐧𝐠 𝐏𝐚𝐠𝐭𝐚𝐡𝐚𝐤 𝐬𝐚 𝐀𝐭𝐢𝐧𝐠 𝐊𝐢𝐧𝐚𝐛𝐮𝐤𝐚𝐬𝐚𝐧, tunghayan ang makabuluhang pagsisimula ng ating pagdiriwang tampok ang:
🇵🇭 𝐏𝐚𝐠𝐭𝐚𝐭𝐚𝐚𝐬 𝐧𝐠 𝐁𝐚𝐧𝐝𝐢𝐥𝐚
🚶 𝐏𝐚𝐫𝐚𝐝𝐚
👘 𝐊𝐚𝐬𝐮𝐨𝐭𝐚𝐧𝐠 𝐀𝐒𝐄𝐀𝐍

Makikiisa sa pagdiriwang ang mga 𝐭𝐚𝐠𝐚𝐩𝐚𝐦𝐚𝐡𝐚𝐥𝐚, 𝐠𝐮𝐫𝐨, 𝐤𝐚𝐰𝐚𝐧𝐢, at 𝐦𝐚𝐠-𝐚𝐚𝐫𝐚𝐥.

📅 𝐀𝐠𝐨𝐬𝐭𝐨 𝟏𝟎, 𝟐𝟎𝟐𝟔
🕖 𝐈𝐤𝐚-𝟕 𝐧𝐠 𝐔𝐦𝐚𝐠𝐚

---
| | | | | | | | |

Alamin pa ang tungkol sa Pamantasang Pampamahalaan ng Isabela–Cauayan Kampus sa pamamagitan ng pagbisita sa aming opisyal na website: https://isucauayan.edu.ph

𝐁𝐀𝐌𝐁𝐎𝐎 𝐒𝐏𝐄𝐂𝐈𝐀𝐋| 𝐌𝐚𝐥𝐢𝐠𝐚𝐲𝐚𝐧𝐠 𝐊𝐚𝐚𝐫𝐚𝐰𝐚𝐧, 𝐏𝐫𝐨𝐟. 𝐇𝐢𝐥𝐝𝐚 𝐀. 𝐌𝐚𝐧𝐳𝐨𝐥𝐢𝐦, 𝐏𝐡𝐃, 𝐕𝐢𝐜𝐞 𝐏𝐫𝐞𝐬𝐢𝐝𝐞𝐧𝐭 𝐟𝐨𝐫 𝐀𝐝𝐦𝐢𝐧𝐢𝐬𝐭𝐫𝐚𝐭𝐢𝐯𝐞 𝐚𝐧𝐝 𝐅𝐢𝐧𝐚𝐧𝐜𝐞 𝐒𝐞𝐫𝐯𝐢𝐜𝐞𝐬!

Sa inyong pamumuno, buong husay ninyong ginagabayan ang unibersidad sa mga hamon ng pamamahalang institusyonal, tangan ang malalim na pag-unawa, maingat na pagpapasya, at malasakit sa mga taong patuloy na nagpapatakbo at nagpapasulong sa ating institusyon.

Ipinapaalala ng inyong pamumuno na ang pangangasiwa ay hindi lamang tungkol sa mga numero, patakaran, at proseso. Higit sa lahat, ito ay tungkol sa paglikha ng isang kapaligirang nagbibigay-daan sa bawat isa na gampanan ang tungkulin nang may layunin, sa mga programa na maisakatuparan nang maayos, at sa Unibersidad na patuloy na makapaglingkod sa pamayanan nang may integridad.

Nawa'y maghatid sa inyo ang kabanatang ito ng panibagong sigla, makabuluhang sandali kasama ang mga taong mahalaga sa inyong buhay, at higit pang pagkakataong masaksihan ang pangmatagalang bunga ng inyong mga pagsisikap at paglilingkod.

Dalangin namin ang inyong mabuting kalusugan, kasiyahan, at marami pang taon ng makabuluhang paglilingkod. Maligayang kaarawan, Dr. Manzolim!

---
| | | | | | | | |

Alamin pa ang higit pang impormasyon tungkol sa Isabela State University–Cauayan Campus sa pamamagitan ng pagbisita sa aming opisyal na website: https://isucauayan.edu.ph