16/04/2024
Dear Next Host Batch,
Halu!
Manghud, nakadto ka ba san Karibhungan?
Mala waray ka man api sa nagkarawat san golden key of responsibility;
walo la an Batch 2000 nga nakadto sa picture, si Israel Tulipas lugod an printera.
Como masunod nga host batch,
tagpanginano san tiarabot nga grand alumni (tentative theme: Kirigta 2025),
ginkarawat niyo an responsibilidad ngan susi san kalipayan san bug-os nga UEP high school alumni nga tipangatendir san reunion
(natradisyon naman ini nga gintutuman gud nga Easter Sunday para makadamo kit) -
tikang sa kaarugan san CNAHS, SIT, VoAg, CPHS, UHS, api at nagkaarabutan sa ULHS ngan RSHS, abot sa mga millenials san presente nga UEPLHS.
Dire iton harumamay nga paghost, mapaunob nala ak.
Kami nga Batch ‘99, host san naglabay pala nga reunion (Karibhungan 2024),
grabe siton am gin-agian nga pagsari sa am pagkasarayo.
Tuyangi naman la ak magsaysay sa am kaagi-agi, bangin la makabulig in sa iyo unina,
antes in nga mga dumdumon mahiapi kaanod sa awas san kalagas ngan kalilimakon.
Aw, nakila ka man haon sa ak ano?
Ako gad la an ginkarag ni im kuya, tomboy san hayskul. 🙂
Balitaw, damo an nagsugad waray sa ak kikila;
dako gad man sin ak ginhugos nga pagtagareunion nyahaha.
Pero kay dire man ak sini officer talaga, inapi la ak sini san saranggumok na,
duha ka-bulan antes magreunion.
Kun ak mga kabatch im mapangutan-an, iba-iba siton ira baton.
May masugad ako an hinungdan san saramok
(nga antes ak sinulod “mamingaw man” an GC,
plastar na an ira mga larang, maupay na an kamada).
May man liwat masugad nga kun waray ak sulod,
dire sira mabulig, dire maamot, maboycott, bahala nala maaluhan am batch.
Pero all’s well that ends well, natuhay man kami gihapon -
waray na magkaaaluhi sa alumni, damo pa an nakaappreciate sa am paningkamot.
Dire man tinuyo nga magpabongga, ngani an amon la sadto mairaos la an paghost (sayo nala ngani kaadlaw kay di namon kaya igduha pa pareho sa dati),
pero an kinagawsan lugod, dara sa am pagburublig,
ngan alalay gihapon san mga alumni ngan sponsors,
nahingaupay lugod am programa.
Tikang man iton sa iba nga alumni, dire pag-alsa lugaring nga bangko, pero an sugad nira,
Karibhungan 2024 an pinakamaupay nga grand alumni homecoming nga ira naatendiran.
Waray na ada siton malahos pa nga pagdayaw, ngan balos sa am kapagalan.
Aliz well, sugad pa sa 3 idiots nga pelikula,
kay nagmara gud man liwat sini ak utak pag-inintindi san pride san iba-iba nga tawo nyahaha.
Sa amon section pala san Gold, may internal conflict na daan (damo la nga rasones nga iyo liwat haon pag-aagian).
Igtig-ub pa ngani an kabuka nga sections san Dahlia ngan Rose (nga sa ira nagtikang an katunga san officers), may internal ngan external conflict pa gud iton.
Sugad pa sin sayo nga bag-angan na pagtagareunion,
perfect recipe for disaster gud iton nga paghost sin grand alumni,
kay clash of ideas iton, clash of egos, clash of priorities -
may matutuman san karuyag, may mapiliw nala pagpabalunod suporta san karuyag san kaurugan,
ngan syempre dire mawawara an may gihapon magdudumot ngan maleave sa GC nyahaha.
Kamatuuran, inabot haon ganggang sa impyerno am saramok, aram iton pati sa am suppliers, labi si Juned, nga nakodakan pati an “kiss and make-up” san mga nadadabihan.
Opo, inabot kami sa move to oust the highest officer of the land
(pero gingreet ko gad man nguna happy birthday antes ak nagmotion,
ngan nagpaunob ak nga kinabuwasan na igtratar ak motion).
Kinabuwasan, nagkahimawmawan gad ta.
Nga kinahanglan may magtimon sa kabuka nga section, nga daan na mas “lose” an samahan kay duha nga sections an Dahlia Rose, ngan mga bukad pa gud an ngaran, perishables;
kami kay Gold man, one section la, solid element pa, mao nala an mamenor ngan maturos.
Kahuman sa buruybuyay, surungyaway, ngan burulaway;
Kahuman magpahingugmad an nagkababantad an kalag, nagkahimawmawan man ta.
Nga kun problema man adto sa leadership o problema sa pagsunod,
dire solusyon an pagburublag, kay sayo man la nga balay am uulian.
Homecoming ngani balitaw.
Am solusyon, nano man kunta? Haladaw, laksi, kun bright ka liwat?
Pagkwarenta na ngayan an tawo hano, mas exciting na an problema,
kay aradrig na lugod iton pagsulbar.
Aram na nga an problema dire iton terminal,
dire ka siton igdadara sin maupay nga destinasyon kun im la pagsinakayan.
Dire liwat siya waiting shed nga pwede ka magtinuyangko, tambayan,
magpahudlum san kapaso sa kalibutan.
Problema ngani, isip dayon solusyon, kay mapaso iton sa bubot kun at pagliningkuran.
Am solusyon balitaw para san magkaluyuan,
kay duha man la in nga magbugto nga nagiinaway sa sayo la nga balay
(ngan waray may plano layasan an balay, pareho nagkadidire maaluhan sa hosting),
nagkanya kanya na gud la kami kwarto para mamurayaw.
Tikang siton, nagkanya-kanya nala pitaka/treasurer, (surprise number la an kanya-kanya an president), nagkanya-kanya liwat gastos (ngan financial report unina).
May counterpart la sa big expenditures, pareho san Sounds & Lights ngan LED wall,
kay uso naman gud yana an padagkuay tunog san sound system, tuhos-tuhos palangit an spot light, ngan darako an screen sa stage para klaro sa ngatanan an multimedia,
gamit gud kaupay sa program.
Di na maaser an reunion nga larampiga la sa may baybay,
kanya-kanya parok suwak, bring-da-bring an sumsuman ngan tuba.
Ma’iton, nagsaragot nala nga tibway kanya-kanya solicit ngan audit,
labot la san pag-aaragmutan sa batch, nga pinanquotahan tag 10kyaw an kada abogado/doctor,ngan 5kyaw an kamaestrahan ngan iba nga professionals.
Napulo kami nga abogado sa Gold, kun nagtuman tanan, 100Kyaw ngayan adto dayon - pansound system na, pero iba-iba man an kamutangan ngan kadunga san tawo.
Di ka na siton magpapakapirit, say pa nga sahid na iton nagpakwarenta.
An “panukot” madugo iton nga trabaho, dire iton kaya san sayo nga treasurer la.
Kay sanglit ngani ginkurian kami makahanap volunteer treasurer nga makaopen bank account, kay damo an nadire san dugang nga trabahuon pag-inihap kwarta nga dire man ta nira magagasto nyahaha, ngan pagbinalay-balay panukot.
Pero kay high-tech naman yana, ini an waray sa panahon san VoAg.
Ngatanan instant, ngatanan pwede remote.
An “harampang” pwede na sa tawag nala sa telepono.
An “kirigta” pwede na sa video call.
An “kalipayan” pwede na gcash nala hehe.
An karibhungan gud man, kinahanglan magtirirok gud an alumni para siton.
Pero san nahibutang na nga treasurer am batch valedictorian, may sistema na nga masusundan, as suggested san am batch accountant.
Nga an physical money, treasurer dapat an may kapot/control, iba la kunta an sa planning ngan procurement.
Sanglit ngani nakabulig ak panginano sini nga hosting, bisan Holy Wednesday na ak nakauli, tungod nga may technology na -
may GC na, bisan Tacloban ak, an urog sa am Manila, an iba abroad.
Una, madali na panukot (magimik ka la sa GC, iba-iba la nga pakulo, pasangilan panukot,
kay di man uso sa Gold an tararhugay kay puros iton sira bright nga taga-Science, nasobrahan la uga an iba nyahaha).
Ikaduha, may mobile banking na yana, bisan on the go an treasurer
(ginvolunteer ko gud siton am batch valedictorian, si Doc Charmaine Ann Ching-Santos,
kay labot sa siya pinakamahusay sa am, siya liwat pinakamanyaman,
para umuli man o dire, nakaparticipate gihapon siya up to the last ganap san reunion,
ngan para dire kami awayon san nanay nyahaha).
Ikatulo, kun waray ak siton buybuya nga puro la ak hiwa, puro la suggestion,
dire man makaburulig pag-implement kay waray sa Samar,
waray kunta ak siton mapiriti pag-inapi-api ngan sinamok-samok sa ira kamada nyahaha.
Remote work na kasi yana uso, iba nga opisina abroad, tag tulo ka-adlaw sa’ kasemana nala an sulod sa opisina,
kay naimod san pandemic nga cost-effective man an WFH set-up.
Sanglit, san natuhay na am sistema -
may treasurer nga kaya ig-mobile bank am account, may bago president (Atty. Franco Archie Tonog) nga mapahuram generator inkaso magbrown out, para makatipid 30K nga sukot san Roland-Calbayog para sa back-up power -
full throttle na am solicitation.
First-timer ak sa solicitation, makasiriud adto nga ak gintukdo, di na po ak tiutro.
(Bisan may talent ak haon siton kay inabot man 200K am section solicitation.)
Ngan may magsolicit ngani nga akon ngaran, dire po iton ako,
nahack po ak account siton nyahaha.
Number 1 stressor an solicitation, sanglit ngani ak sugad kan Emman Dato (kay siya man an gentle giant, am tulay, am connecting door sa duha nga kwarto),
nga dire nira pag-inawayon ira section presidente (Kristina Bulagnir Bactor),
kay mao nakabulig sa ira solicitation,
dire nira pag-inawayon kay ako la an pwede umaway nyahaha.
Pira katuig ak nga waray labot sa iba nga tawo, ak duha nga kabataan la ak ginpinanginano (an sayo taga-Pisay, an sayo man, ito ginninongan/ninangan san haros tanan san Gold, mao man an may autism - so does that make me a bipolar mom? slight hehe),
pero gintukdo ko po iton nga pagsolicit, iton nga orenola sa ak ulo.
Mangingidit ka gad pagtinukdo kay kun matapyahan ka ihi -
igseen zone ka sa im ginsolicitan, ignore message, o block pa gud, alahan nga scammer.
May pa gud gintarayan ak beauty, sugad niya sira ngani sa ira turno paghost naglurugaring man waray pagsolicit, pero push lang ‘te.
Pero sayo man la adto siya tawo (hindi siguro masarap ang ulam),
mas damo gihapon an binulig, binulig gud, bisan aram nga an ira ambag hingangada an onor sa host batch.
Sanglit ginpanhimulusan ko gud siton ak “network” kay waray man liwat ak mag-abusar dati sin talagdigtoy nga pabor.
Gintigda ko siton ak “withdrawal”, one time-big time withdrawal sa ak favor bank.
Sanglit next year, waray na po ak sa Facebook (deac la nguna) kay durudamo in sira nga mambubulos, labi am nasolicitan sa batch 2000 hehe.
Pero ayaw ka, dako siton an bulig nga “network” san samahang walang katulad, nga an patrono si San Miguel (San Mig Light).
Tungod siton, may linya kami sa UEP admin pagsarit san venue (nga nahan-o ba adto nga volleyball court man an una ginhatag, pero nabirik gihapon pakadto grandstand san nag mass revolt na an elder alumni sa batch reps GC, kay suruot kun sa court ngan mapaso, di makapabuot pagzumba).
Zumba gud man an wagi siton nga gabi, ma-LSS ka nala sito demuntres nga “Selos” nga kanta, nga first-time ko didto nabatian pero sobra an kasikatan sa mga paragzumba,
mao an bago nga budots, nasapawan lugod an theme song san Karibhungan.
Ngan tungod siton nga San Mig, madali kami nakaporma basketball teams para sa pocket tournament, unahon mo la ichat an igkasiparaghubog.
Hijos Senior para sa batches ahead sa host batch, Hijos Junior para sa batches younger sa host, IBP man nga invited team, ngan syempre am mga ogwaps sa Host Batch 99.
Naka-3rd placer gihapon an host batch, pasalamat gin-imbitar last minute mag-uyag si Justice Ampuan ngan an N. Samar judges, kay normalmente iton matahud an kabataan nga lawyers bisan pa varsity players, mapasa gud bola kan justice ngan kan judge hehe.
Guris gihapon am 3rd.
Madali liwat nakahanap sponsor nga igkasi-patrono kan San Pedro (Sir Evan Rebadulla) para sa mga kagarastusan sa basketball referees, lamesa (scorer/timer/announcer), court, ngan food, durudako gihapon kay inabot 30K, api na an jersey san seniors.
Jerseys para sa iba nga teams ngan trophies, mahanap ka liwat siton sponsors, para maupay man imdon sa kodak,
kay uso naman yana an full sublimation nga bisan rush ig-order, kaya mahimo,
ngan makapabuot sa design (mapurupetrolyo la uga antes mabunakan, plastic gad man, iba gihapon an cotton).
Bisan balitaw at guest speaker, si Court of Appeals Associate Justice Alfredo Ampuan, gahum man iton ni San Pedro, sabay sa samahang wambaket ni Rei Echano.
Kay kan Rei Echano man iton dati nga agaron si justice san dati pa nga RTC judge,
mao man siton an pasimuno nga imbitaron si justice sa basketball kay player man liwat.
Mao naisip ko nala nga bugway direcho na guest speaker sa gabi,
patikangan ta may guest speaker (dumagko nga guest ha nga dire alumni,
kay alumni ngani always welcome iton sa homecoming, ngan dire iton sira guest nyahaha).
Dear next host batch, tagam kam.
Kay sa iyo panahon dire na ini pwede waray basketball.
Kay yana pala ngani, may nagdulo na nano waray hiapi ira batch sa pauyag.
Sunod sini, by batch gud haon an pauyag, kay damo an karuyag magpahulas.
Iton la karuyag burubatch gihapon an team (nadire sa timpo-timpo seniors o juniors),
para haon sigurado nga mapapasahan sira bola san katubay-tubay nga classmate nyahaha.
Dog Walk (Walk Fur Fun) naman kit.
Ini an naging pambungad, day starter sa am 1-day program of activities.
Kay tungod ngani nga limitado am pondo tikang sa batch contributions ngan pledges, gincompress na sa sayo kaadlaw an tanan activities.
An morning activities nga dog walk ngan basketball, sa amon section iton pag-undong,
bisan dire suportado san magkaluyuan nga officers.
Salamat sa am batch veterinarian, Doc Joel Viva, nga bisan taga-buka nga section (pero kay atud ko man in siya), nanguna gihapon sini nga pagpalakaw san kaeduan ngan kaayaman,
nga klaro kaupay an pagpaura ngan pag-ataman san mga agaron
(ada man sa pics ni Juned imda nala, kaupay sa am mga ngisi tanan).
Successful an dog walk opening san Karibhungan, bulig am major sponsor nga Pigrolac Visayas, nga mao naghatag sin 10kg sack san Yum Yum dog food para san first finisher nga pet dog ngan owner.
Tsamba la liwat iton nga pakapangaro bulig sa Pigrolac, kay si Ate Claire Diaz (vetmed) siton ak nachat pangutana kun alumni ba siya.
Sugad niya dire siya alumni pero api sa ira batch 96 gc (transferree ada).
Dear next host batch, may mabulig siton sa iyo bisan dire alumni,
basta nagtikang sa UEP high school, alma mater gihapon ira pag imod sa at eskwelahan.
Pasalamat nga nagpakatima kit pag-aram, nagpakatrabaho, ngan waray sistom! :-)
Ini nga Karibhungan 2024, damo sini an firsts.
Una nga solo host batch after pandemic (Katitirok 2023, upat gud adto nga host batches, 95, 96, 97 ngan 98).
Una nga Science stream products an kaapi sa host batch,
(mao confident ak nga an tipansunod kayang-kaya iton nira solo hosting kay may Science naman nga tipansunod). Pero ayaw ha, kay sa batch 99, lupig sa contributions san DahRose nga 268K an Science nga 238K la, nyahaha.
Ngan Science Stream pioneer batch 97 ngayan sadto an nagsagot nga speakers school donation, batch nira Ate Aileen Argenio (accountant) , May Adongay (engineer contractor), Ruthel Rudriguez (engineer expat) ngan Daisy Lily Mosacare (abogada);
pati an grand prize sa raffle nga TV tikang adto sa pioneer Science batch, kan Victor Dato (army doctor).
Una liwat am hosting nga may basketball (sure?) ngan dog walk (sure!).
Una nga may guest speaker nga bigatin.
Una nga may pasidungog san older batches labi an jubilarian (50th golden, kay batch sa ak tatay nyahaha), next year pwede nyo ada iapi an 40th, 30th, 20th ganern.
Una nga duha an presidente san host batch, ngan duha an batch reps (1 for each stream).
Una nga may financial report katima reunion, labi sa am kay nagsolicit sa sponsors.
Una nga may theme song, Tara na (Karibhungan Na!), dire naman Selos ha.
Una nga may fireworks.
(Salamat ngay-an kan Leiss Gelera Desucatan, alumna in siya, Leiss Do It Events coordinator, nga mao nagtutdo diin mapalit fireworks sa Catarman, pira kabug-os an sakto la, ngan pati an pagset-up san LEDwall ngan graphix kay parapreho man kami nga batch siton irayanhon, mga bag-uhan).
Una nga batch nga nalibak san padi (monsenyor pa gud) sa homiliya sa Domingo de Ramos nga misa, mao una liwat nga batch nga sa Catarman Cathedral nag-thanksgiving mass, kaysa man mag-mass intention la an alumni sabay sa kadam-an, dire makaspecial mass.
Kanugon kunta hano kun mass intention la kit, kay kag-uupay san pictures lugod sa cathedral, burubatch backdrop an retablo, upod an celebrant nga si Fr. Jimmel Varela.
Grand alumni gud la.
Grand alumni ngani balitaw, grand pakaunon gud iton ngan grand problemahon.
Base sa registration, inabot 350+ an alumni attendance (300+ sa pre-registration).
Ngan laumi nala damo la siton an comment ngan “advice”.
May nagsugad nga mga ate (an iba mga batid gad la liwat hehe),
nga kampot na kun kami nagkiriwa, dapat harayo pa.
Nano nga Marso na waray pa kami klaro nga venue (nano kay waray mag-Langtaran damo man pwede magsponsor, ngan direcho ginvolunteer an daramo la nga alumni nga hayahay man an kamutangan).
Dire man madali an pagsolicit balitaw kun waray kam one or two degrees connection gud (urupod o sangkay mo o sangkay sa im asawa ngan kakilala ka gud personal - gawas siton kurian ka na).
Para mamurayaw, am naging patakaran, imo suggestion, imo pondo, imo kiwa.
Iton la, nagback fire man ta iton sa ak, kay haros ako naman la an nagpondo ngan nagkiwa nayahaha.
Labot san pipira gud man nga sinuporta gud tikang sa ak pag-intra sa eksena abot hinay-hinay naporma ngan nabug-os an mga plano.
Reunion hosting an nagsara san sangkay gud ngan classmate la,
an mabulig upod sa pagpiraw, pagsolicit, pagpagal, ngan pagpas-an kahon-kahon sin tubig.
Pan-ngaranan ko na in sira, ak core group - Si Ethel, Zandra, Charmaine, Mary Lynn, Joan, Rachelle,
ngan sira Diana, Daisy, Aina ngan Anthony.
Ngan iapi ko ak top fan syempre si Joyce, di man ak sin magmamaud kanya nga makasangkay ko in siya utro balik sa elementary,
kay si Loven man la sin an kanya sangkay san high school nyahaha.
Kun waray didi kangarani, paghimo naman la liwat kam post udi,
ito iyo man liwat grupo an bida, tapos ayaw man liwat kami panngarani nyahaha.
Dear next host batch, sasarihan gud an iyo pagsarangkay ngan pagklarasmeyt sin nga hosting.
I pray nga kun madara man kam san iyo mga emosyon (kay may makalalangot man gud talaga siton, kontrabida sa kinabuhi nga kanya-kanya liwat an bida nyahaha),
I pray nga in the end, bug-os kam nga mapapicture sa stage;
dire ngiaw an iyo mga katawa.
Hubog an ngatanan nga mangirinom.
Ngan gindayupakan kam san alumni nga nag-aratendir, kamo nga bug-os nga batch,
ngan an iyo artista gihapon pareho sa am home-grown man nga superstar nga si Mary Lynn Espina-Verano.
Dako sin am tipid kanya, kay nakatipid na kami 20K kan Vensor Domasig 3 songs (kay lupig pa man talaga sini niya an boses sito taga-Talolora), nakatipid pa kami san UPAO talents niya nga mao na am naging trainors sa batch presentation ngan ushers/usherettes sa Grand Night/main event, mao in sira am naging mga runners.
Kay an ungod, sini nga edad, labi nangagsilver anniversary na kami tikang makagraduate sa high school, makuri ka na gad makasugo-sugo classmate nyahaha.
Di ngani liparong an matapo sa im, pabungul-bungol o pabuta-buta, ngan syempre an dire mawawara nga pambansang libangan nga libak gihapon nyahaha.
Pero para sa hosting, waray ak siton labot nga libak, no emotions, kublan.
Sukot an waray pa aamot, baralanse san kaban ng bayan.
Bisan pa nagdurumutay sa una, basta umatendir la sa reunion,
kay kanugon kun dire hiapi sa karibhungan ngan pictures,
bisan di maulian sa dumot sa ak, haluag man an grandstand field para sa am ngatanan.
The end justifies the means.
Bisan damo inuba sa fireworks, nga misguided kun ak priorities, kay mao pa ak gin-una solicitan/pondohan kaysa sa raffle (kasi naman naimod ko nga kaya na itawid an raffle san dahrose section, nga an tuyo man la kunta san raffle para sa event,
nga mamungko an tawo sa kanira mga lingkuran dire magkinawara nyahaha).
Nga ampaw la kun iton nga fireworks, karag la siton an kwarta.
Kun karuyag niyo lampasan kan Atty. Marlon Broto pagrand prize nga motor san last katitirok, kadi kamo kunta an naniguro pagsolicit nyahaha.
Pero nano man an ending? Fireworks man gihapon di ba?
Fireworks an most anticipated, most captured on camera, ngan most shareable,
sabay san Karibhungan theme song (Tara Na) nga gincompose ni Atty. May Flor Carpio (waray kuskos balungos, tangdo dayon sa kanya manay pag-anga,
gratis na tanan, made with love and enthusiasm pa).
Syempre may gihapon ineksena nga tikang haon sin linya san “original hijos settlers san UEP”, entitled liwat sa katunaan san UEP, nga alarms and scandal kun an am pagpaputok fireworks alungaog sa gab-i.
Ginburubligan gad si indoy.
Pero, sorry, waray na ak siton energy asahan pa adto, bisan ginhinanap an genius behind sa pa-fireworks, sorry po, ubos naubos manggud ak energy sa pagtinukdo orenola nyahaha.
Bisan an pagrand prize raffle item nga iba nga tawo an nagclaim, waray na liwat ak energy mag-intindi, bisan ginhuring gud iton dayon ni Ma’am Liza Calixtro.
Una, dire iton amon section nga paraffle.
Ikaduha, dire daw ak officer.
Ikatulo, contributory negligence siton an host batch kay waray mag-aro ID antes inpaclaim an raffle item.
Ikaupat, an solusyon nga magdraft pa guidelines para sa sunod nga reunion pagtagaraffle, halaba pa iton nga proseso - alagad habula adto nga nagdara sa tv kay ditoy man la an uep hehe.
Maupay kay nanginano man an officers, nahimao an diskarte ni Tinay, solusyon nira magbugot bago nga grand prize winner, ngan ipahabol an TV sa nakadara nga fictitious winner.
Maupay nasusog gihapon an TV, aliz well sugad pa san 3 idiots.
Dear next host batch, may this be a lesson for you.
Kay dire daw ini first time, nahinabo na in sa dati nga mga reunion.
May talaga kabataan nga naclaim raffle prize bisan dire sira an gintawag ngan ginngaranan (nakauli na haon an classmate nga nagdaog kunta).
Iton, istriktuhi nala niyo, may ID pangilalal-an o bisan FB profile nala niya,
digital citizens naman yana an kaurugan.
Daramo an makontra, pero iyo kinahanglan man la para umusad gud an reunion,
nga may klaro nga progress sa kada adlaw labi sa tig-apiki na an D-Day,
mao an pipira nga tawo nga komitido gud bumulig -
maghatag oras, suporta pinansyal, ngan maprinte gud ngan manginlabot pag-iban sa trabahuon ngan kargada.
Tig-apiki an reunion day, tigbungol ka lat siton.
Kun suggestion la, o reminder sa hirimuon, bungol ka siton,
kay added noise la iton sira, dire makaburulig.
An tatagan mo nala siton sa im limitado nga oras ngan atensyon,
(labi kun pareho sa amon kamutangan nga waray ngani makagfinal meeting,
waray makag-tasking, mamingaw sa GC no takers,
mao haros pasan ko ang daigdig gihapon an drama bisan reunion day na),
im papansinon nala an mga tawo nga direcho mag-iiban sa im kargada.
Makablit nga nano ak mabubulig, nano pa at kulang?
Kay an kwarta ada naman, gin-ubos ko siton ak oras sa solicitation,
an magpupurot trabahuon an kulang na lugod takers
(urog Manila ak mga resbakers, waray magpakapanguli).
Waray man la nangutana kumusta kit buwas, all set na ba? Final drill.
Kay kanan officers kunta iton trabaho. (Utruhon ko, dire ak sini officer nyahaha).
Sanglit an kinagawsan, waray mga sarabutan nga duha am buffet table sa gold,
duha am lechon, ngan lima ka kahon am beer.
Kay pira kaadlaw antes gud sa reunion, tinuko na ak pagpara-update sa GC para may manginano na nga ungod.
Tinuko na ak pagsumat nga may sinulod nga 20K donation tikang kan Governor Ong,
bulig pagestimar san guest speaker nga di man pwede mani la am igtulod
(nga waray na ak ngani makapanginano kun nagpakakaon adto tungod late na liwat inabot ngan nalipat na ak sa kadamo san karibhungan huhu),
para kunta mangidit sira sa budget, bulos ko nala
(kay nagpasiguro la po kami sa catering, an iba nga batch bilao nala la an nabudgetan).
Waray man liwat nangutana (si Diana la ada, kay may ginpakaon nga bisita nga sangkay namon pareho, si Nathan Almendo).
Dako siton bulig ni Sir Nathan, siya am kontak sa Sangguniang Panlalawigan para madali matulis an mga board member, one time big time, kahuman gud san sesyon.
Ikaduha, kay taga-Mondragon man in siya, siya naghatag kontak kan Leiss Gelera nga mao an event organizer gud an trabaho, nagbeste sito homecoming concert ni Vensor Domasig.
Pero an nagpulos gud siton nga additional pagkaon (para la kunta magpakaginhawa man sin halarum nga dire pagkukulangon am pagkaon) mao an crew, an UPAO dancers, ngan an iba nga batches nga ginkulang o waray na ig-abot san bilao.
Kanya-kanya buffet table kunta an duha nga sections san host batch,
pero sa kadamo san nangaon waray na siton may nakapanginano pagtagapinggan.
May ngani gingutom intawon nga host batch, pero kay anhon man kay ugad na man an pagkaon sa at lamesa, ngan sarado an mga putahe sa kaluyo nga lamesa nyahaha,
katuyo pauru-urhi ka, naunahan ka lugod san daramo nga nagpakabusag. 🙂
Pero pakaimod ko nga upod san nagpakabusag an kan Kathy anak, ok nala iton,
si Kathy na gud iton.
Maupay man ngani liwat waray karag sa at pagkaon.
Sagdi iton nga pinangutom, 1 night man la iton, healthy man sa lawas an pagutom panalagsa.
Waray napatay sa gutom, sa sobra nga lala lugod yaon nyahaha.
Balitaw, sa reunion damo siton magtitrip sa host batch.
Bantay kam, kay iyo lamesa siton an target san mga sabid.
Pagpiricturay na sa host batch, sulong sa stage ngatanan,
pagbalik siton niyo sa lamesa waray na an Double Black nga irimnon,
kulang na an kahon san beer ngan tubig.
Tuyo man liwat, kamo la an may budget sa irignom nyahaha.
Pero, pasalamat gud ak sini nga duha nga tawo,
si Ma’am Aina (Liana Melissa Dela Rosa) ngan Prof Mary Lynn Espina-Verano,
kay sira gud sini an nagtabok nga program san dinner and dance party.
Bisan damo siton an nagkawaraan, nagkagugutom nga party,
sulit gud an gabi san nangag-atendir, sa energy ni Aina as emcee
(bulig gud la sa script si Mother Lydia ngan syempre kapartner pa si Sir Bren Fred Romero sa kropon).
Pakaagi man liwat namon batch emcee nga banggiitan na, dako pa gud an boses, mala-bokilya an ngalngagan.
Ngan syempre sa star-power ni Mary Lynn nga naghukon gud an “in memoriam” performance para sa at nanhiuna na nga kamaestru/a-han ngan mga alumni,
nga damo an maluha-luha pagdumdom san nagkawara na.
Kaupay kay durungan ta nga nadayupakan at kamaestra/u-han, abot sa langit ira ngisi.
Sugad pa sin comment, kami gud la kuno nga batch siton an nakaisip.
Well, an credit po siton kan Mary Lynn tanan, ak bulig la siton, pagpondo ngan pagsiguro nga may total artistic freedom siya, waray objection sa sections magkaluyuan.
Ngan nagbunga man am pagal, ngan kanira kulba (sa una man la iton).
Sugad pa ni Aina, pagsukmata ko kay nano nagsugad siya nga first time niya pag-atendir sin grand alumni iton nga am hosting, nga batch rep man siya namon sin maiha nga panahon.
Sugad niya, “Pinagbayaran ko na po ng isang gabi.”
Well said, mem. Well said.
Tungod kan Ma’am Aina ngan Prof Mary Lynn,
akus ko magpabungul bungol siton nga gabi, magkawara-wara,
ngan panalagsa sitting pretty nala, with a bottle in hand,
waray labot sa nanhihinabo sa libong,
ngan sayo gud la an panuyuan siton nga gab-i,
mahubog antes mag-alas dose nyahaha.
Salamat pagbasa, manghud; salamat inse.
Chat nala kun mangonsulta kam, basta last bugot nala ak sa solicit ha.
Paningkamot kam nguna pagplastar sa iyo program, gamit iyo lugaring nga aragmot ngan pledges.
Ayaw paglaum sa solicitations, kay makuri yana an panahon.
Mao damo siton nagdire san Crack Thy Sound, banda nga taga-Palo, dire local kay mahal an transpo ngan accommodation, bisan pantay la 25K an talent fee san local bands.
Mao damo nagpuna san fireworks, kay raffle ngan pagkaon kun an unahon (pero sugad pa sa ak sangkay nga wedding industry an raket, kahuman siton niyo magpabongga sa pagkaon ngan set-up, pictures ngan videos na gud la siton iyo makakaptan paglabay san panahon).
Mao may mga nagdire kunta san Roland Lights and Sounds, kay sayo ini san amon pinakadako nga expense, halos 100K ini, mao ngurutub gud si MBM Audio Concept/Mervyn Martires kay kaya man kunta kun niya iton nga set-up makatawad pa kay waray na krudo paghakot gamit.
Mao paduguay sa am an venue set-up ni Ay-ay nga 40K (pero maupay man gud liwat an kinagawsan) bisan busy ura-ura iton nga tawo, damo raket, ngan sige tago sa BIR
(ginpaedit in ni Ay-ay, dire kun siya nagtatago sa BIR, caterer kun siya ngani sa BIR, ngan good tax payer nyahaha).
Mao sige siton am saramok sa una pagtaga-budget magkaluyuan sections,
kay tungod nga makuri yana an panahon, makuri panhanap kwarta.
Ngan bisan daramo an may salapi sa am, mas daramo gihapon an putkuri,
parapreho nagkadidire magbahug amot, magsecond collection.
Kay dire kit pareho sa St. Michael nga an galante mao an sikat;
sa kultura san UEP, an galante sa at, mao pa lugod an uwat nyahaha.
Mao ginhugtan na gud la an pagawas nga pondo, kay bisan man nano kadako san matirok balitaw, kun di ta mahimao an paggasto, waray ta iton hingadtuan.
Salamat sa amon sponsors platinum, gold, silver, ngan bronze.
Salamat Kathy sa mga huring sa katutnga san gabi, ginpaagi mo sa inop an solusyon sa am talagdigtoy nga problema.
Salamat batchmates, salamat classmates, salamat sa mga sangkay nga waray gud bumuhi.
Salamat UEP High School, aton Alma Mater, san higayon pakahost sini nga grand alumni.
Nga waray kami magpadara sa kahulop, o magpadaog san kapungot, ngan magbuhi sa tagsa-tagsa, abot natima nga manilampuson an Karibhungan 2024,
tungod man ta sa am pagburublig nga host batch 99.
Dear next host batch, andam na kam!
Iyo na turno, kamo na an masunod.
Ngan kun maghataas man iyo BP sa iyo tatrabaho sa hosting,
pagpareseta nala po sa iyo mga doktor.
Good luck and enjoy! :-)
Mabulig pero dire mapasolicit,
Karibhungan 2024 Host Batch ‘99
16/04/2024