Departamento ng Filipino - MSU-Zamboanga Sibugay

21/08/2026

𝐓𝐚𝐥𝐢𝐧𝐨 𝐚𝐭 𝐇𝐮𝐬𝐚𝐲, 𝐢𝐩𝐢𝐧𝐚𝐦𝐚𝐥𝐚𝐬 𝐧𝐠 𝐦𝐠𝐚 𝐌𝐒𝐔𝐚𝐧 𝐬𝐚 𝐁𝐮𝐰𝐚𝐧 𝐧𝐠 𝐖𝐢𝐤𝐚 𝟐𝟎𝟐𝟔

Sa patuloy na pagdiriwang ng Buwan ng Wika 2026, matagumpay na isinagawa ng Departamento ng Filipino ang mga paligsahang 𝗦𝘂𝗹𝗮𝘁-𝗦𝗶𝘄𝗮𝗹𝗮𝘁 at 𝗧𝗮𝗴𝗶𝘀𝗮𝗻 𝗻𝗴 𝗧𝗮𝗹𝗶𝗻𝗼 noong Agosto 19, 2026. Nilahukan ang mga gawain ng mga mag-aaral mula sa iba’t ibang departamento ng MSU-Zamboanga Sibugay.

Layunin ng mga paligsahang ito na linangin ang malikhaing pagpapahayag at kritikal na pag-iisip ng mga mag-aaral, gayundin ang higit na pagpapahalaga sa wikang Filipino bilang wika ng kaalaman, malikhaing pagpapahayag, at pagkakakilanlan.

Sa Tagisan ng Talino, nasungkit ni 𝗞𝗮𝘁𝗲 𝗪𝗲𝗻𝗹𝗲𝘆 𝗟. 𝗬𝗲𝗽𝗲𝘀, mag-aaral ng Bachelor of Science in Environmental Science (BSES), ang unang puwesto. Nakamit naman ni 𝗗𝗮𝗿𝗿𝗲𝗻 𝗗𝘆𝗹𝗮𝗻 𝗦. 𝗝𝗮𝗰𝗶𝗻𝗴 ng Bachelor of Science in Information Technology (BSIT) ang ikalawang puwesto, habang ikatlong puwesto naman si 𝗞𝗲𝘀𝘁𝗿𝗶𝗲𝗹 𝗦𝗵𝗮𝗻𝗲 𝗟. 𝗗𝗲𝘀𝗮𝗰𝗮 ng Bachelor of Secondary Education in English (BSED English).

Higit na naging makabuluhan ang mga paligsahan dahil sa aktibong pakikilahok ng mga mag-aaral. Nagsilbing pagkakataon ito upang maipakita hindi lamang ang kanilang kaalaman at husay, kundi maging ang kanilang pagpapahalaga sa wikang Filipino. Naging masiglang tagpuan ang mga ito ng talino, pagkamalikhain, at pagmamahal sa wika — mga pagpapahalagang patuloy na isinusulong ng Departamento ng Filipino. Samantala, matutunghayan naman sa nalalapit na kulminasyon ng Buwan ng Wika 2026 ang pagkilala sa mga nagwagi sa paligsahang Sulat-Siwalat.

Tunay ngang sa wika, may kaalaman; sa kaalaman, may kakayahan; at sa kabataan, may kinabukasang hinuhubog.

Mabuhay ang wikang Filipino!
Mabuhay ang mga kabataang MSUan!

19/08/2026

𝐃𝐚𝐧𝐜𝐞 𝐖𝐨𝐫𝐤𝐬𝐡𝐨𝐩, 𝐭𝐚𝐦𝐩𝐨𝐤 𝐬𝐚 𝐩𝐚𝐠𝐝𝐢𝐫𝐢𝐰𝐚𝐧𝐠 𝐧𝐠 𝐁𝐮𝐰𝐚𝐧 𝐧𝐠 𝐖𝐢𝐤𝐚 𝟐𝟎𝟐𝟔

Bilang bahagi ng pagdiriwang ng Buwan ng Wika 2026, matagumpay na isinagawa ang 𝗗𝗮𝗻𝗰𝗲 𝗪𝗼𝗿𝗸𝘀𝗵𝗼𝗽 sa pakikipagtulungan ng Departamento ng Filipino at Office of Culture and Arts. Ginanap ito noong Agosto 13, 2026 sa MSU-Zamboanga Sibugay Gymnasium. Layunin ng gawain na malinang ang kaalaman at kasanayan ng mga kalahok sa sayaw bilang mahalagang anyo ng pagpapahayag at bahagi ng kulturang Pilipino.

Pinangunahan ang dance workshop ng direktor ng Office of Culture and Arts na si Asst. Prof. Charmaine Manon-og, katuwang ang mga miyembro ng Sining Ghendawan Ensemble (SGE). Sa pamamagitan ng mga pagsasanay at demonstrasyon, nabigyan ang mga kalahok ng pagkakataong matutuhan at maisagawa ang mga batayang galaw at teknik sa sayaw, gayundin ang kahalagahan ng disiplina, koordinasyon, at sama-samang pagkilos sa pagtatanghal.

Aktibong lumahok sa dance workshop ang mga kinatawan mula sa iba’t ibang kolehiyo ng MSU-Zamboanga Sibugay, kabilang ang College of Nursing (CON), Senior High School (SHS), College of Hospitality, Administration and Computing Studies (CHACS), at College of Agriculture and Fisheries (COAF). Ipinamalas ng mga kalahok ang kanilang pakikiisa at kahandaan sa mga gawaing nagtataguyod ng pagpapahalaga sa kultura at sining bilang bahagi ng pagdiriwang ng Buwan ng Wika.

18/08/2026

Ikinagagalak ng Departamento ng Filipino ang matagumpay na pagsasakatuparan sa isinagawang seminar-workshop na may temang, 𝐒𝐈𝐊𝐋𝐀𝐁-𝐖𝐈𝐊𝐀 𝟐𝟎𝟐𝟔: 𝐒𝐞𝐦𝐢𝐧𝐚𝐫-𝐖𝐨𝐫𝐤𝐬𝐡𝐨𝐩 𝐬𝐚 𝐏𝐚𝐠𝐥𝐢𝐧𝐚𝐧𝐠 𝐧𝐠 𝐊𝐚𝐚𝐥𝐚𝐦𝐚𝐧, 𝐊𝐚𝐬𝐚𝐧𝐚𝐲𝐚𝐧 𝐚𝐭 𝐏𝐚𝐠𝐩𝐚𝐩𝐚𝐡𝐚𝐥𝐚𝐠𝐚 𝐬𝐚 𝐖𝐢𝐤𝐚𝐧𝐠 𝐅𝐢𝐥𝐢𝐩𝐢𝐧𝐨. Ginanap ito noong Agosto 13, 2026 sa St. Paul School of Buug, Incorporated.

Bilang bahagi ng pagdiriwang ng Buwan ng Wika, layunin ng gawaing ekstensyon na mapalawak ang kaalaman ng mga mag-aaral hinggil sa wikang Filipino, katutubong wika at kultura, gayundin sa mga napapanahong usaping may kaugnayan sa paggamit ng wika sa konteksto ng teknolohiya. Isinagawa ito sa pangunguna ng tserperson ng departamento, Asst. Prof. Fatima T. Evangelista, katuwang ang mga fakulti ng Departamento ng Filipino. Nakiisa rin sa pagsasagawa ng programa ang mga opisyales ng Kabataang Mag-aaral ng Filipino at Panitikan (KAMFILAN) at Filipino Educators’ Society (FES).

Nagsilbing susing tagapagsalita sa seminar-workshop ang ilang fakulti ng Departamento ng Filipino. Unang tinalakay ni Gng. Zey C. Torino ang paksang, "𝙒𝙞𝙠𝙖𝙣𝙜 𝙎𝙪𝙗𝙖𝙣𝙚𝙣: 𝙏𝙞𝙣𝙞𝙜 𝙣𝙜 𝙆𝙖𝙩𝙪𝙩𝙪𝙗𝙤𝙣𝙜 𝙆𝙖𝙧𝙪𝙣𝙪𝙣𝙜𝙖𝙣 𝙨𝙖 𝙋𝙖𝙜𝙥𝙖𝙥𝙖𝙩𝙞𝙗𝙖𝙮 𝙣𝙜 𝙒𝙞𝙠𝙖𝙣𝙜 𝙋𝙖𝙢𝙗𝙖𝙣𝙨𝙖." Nakatuon ang talakayan sa kahalagahan ng Wikang Subanen bilang bahagi ng katutubong wika at kultura at sa ambag nito sa pagpapalawak ng pag-unawa sa wikang pambansa. Sinundan naman ito ng lektyur ni G. Rico C. Tachado na pinamagatang,"𝙀𝙍𝙍𝙊𝙍 404: 𝙒𝙞𝙠𝙖 𝙉𝙤𝙩 𝙁𝙤𝙪𝙣𝙙? 𝙋𝙖𝙖𝙣𝙤 𝙉𝙖𝙩𝙞𝙣 𝙏𝙪𝙩𝙪𝙧𝙪𝙖𝙣 𝙖𝙣𝙜 𝘼𝙄 𝙈𝙖𝙜-𝙁𝙞𝙡𝙞𝙥𝙞𝙣𝙤?". Tinalakay sa lektyur ang ugnayan ng wikang Filipino at artificial intelligence, partikular ang mga posibilidad at hamon sa paggamit ng Filipino sa konteksto ng mga makabagong teknolohiya. Sa ginawang lektyur, aktibong nakilahok ang mga mag-aaral ng St. Paul sa talakayan at mga workshop na isinagawa.

Sa huling bahagi ng seminar-workshop, nagpaabot ng mensahe si G. Benedict E. Bais, Assistant Principal/Academic Coordinator ng St. Paul School of Buug, Incorporated. Nagbigay rin ng mensaheng pasasalamat sa departamento ang isa sa kanilang mag-aaral para sa isinagawang gawain.

Taos-pusong nagpapasalamat ang Departamento ng Filipino sa St. Paul School of Buug, Incorporated, sa pangunguna ni Sr. Maria Socorro Marcos, SPC sa mainit na pagtanggap at suporta sa pagsasagawa ng SIKLAB-WIKA 2026. Pinahahalagahan ng departamento ang pakikipagtulungan ng paaralan sa mga gawaing naglalayong mapalawak ang kaalaman, pag-unawa, at pagpapahalaga sa wikang Filipino at kultura, gayundin sa mga napapanahong usaping may kaugnayan sa wika at teknolohiya.

13/08/2026

𝗞𝗔𝗠𝗙𝗜𝗟𝗔𝗡 𝗮𝘁 𝗙𝗘𝗦, 𝗻𝗮𝗴𝗸𝗮𝗶𝘀𝗮 𝘀𝗮 𝗛𝗜𝗡𝗨𝗚𝗣𝗢𝗡𝗚 𝟮𝟬𝟮𝟲

Isang makabuluhan at masayang Team Building at Clean-Up Drive ang isinagawa ng Filipino Educators’ Society (FES) at Kabataang Mag-aaral ng Filipino at Panitikan (KAMFILAN) sa MSU-Zamboanga Sibugay noong Agosto 7, 2026.

Sa temang “𝙃𝙞𝙣𝙪𝙜𝙥𝙤𝙣𝙜 2026: 𝘿𝙞𝙬𝙖𝙣𝙜 𝙋𝙞𝙣𝙖𝙜𝙮𝙖𝙢𝙖𝙣𝙜 𝙏𝙪𝙣𝙜𝙤 𝙨𝙖 𝙈𝙖𝙩𝙖𝙩𝙖𝙜 𝙣𝙖 𝙎𝙖𝙢𝙖𝙝𝙖𝙣,” naging daan ang gawain upang higit na mapalalim ang pagkakaisa, pagtutulungan, at pagkakaibigan ng mga mag-aaral ng BA Filipino at BSEd Filipino. Sa pamamagitan ng team building, naipamalas ng bawat isa ang tunay na diwa ng pakikipagtulungan at bayanihan, lalo na ng mga bagong mag-aaral o freshies na aktibong nakilahok sa mga gawain.

Bukod dito, hindi lamang samahan ang pinatatag, kundi maging ang malasakit sa pamantasan at kapaligiran sa pamamagitan ng Clean-Up Drive. Sa gawaing ito, naipamalas ng mga mag-aaral na ang tunay na tatag ng isang samahan ay nasusukat hindi lamang sa pagkakaisa, kundi sa sama-samang pananagutan at pagkilos para sa kabutihang panlahat. Tunay ngang ang pagkakaisang may malasakit ay nagiging makabuluhan kapag isinasalin sa gawa — para sa kapwa, para sa pamantasan, at para sa kinabukasan.

Isang diwang pinagyaman, isang samahang pinatatag!
Mabuhay ang KAMFILAN at FES! 💚

13/08/2026

𝗕𝗨𝗪𝗔𝗡 𝗡𝗚 𝗪𝗜𝗞𝗔 𝟮𝟬𝟮𝟲, 𝗣𝗢𝗥𝗠𝗔𝗟 𝗡𝗔 𝗕𝗜𝗡𝗨𝗞𝗦𝗔𝗡 𝗦𝗔 𝗠𝗦𝗨-𝗭𝗔𝗠𝗕𝗢𝗔𝗡𝗚𝗔 𝗦𝗜𝗕𝗨𝗚𝗔𝗬

Matagumpay na isinagawa ng Departamento ng Filipino ang pambukas na palatuntunan para sa pagdiriwang ng Buwan ng Wika 2026 noong Agosto 3, 2026. Tampok ang temang, “𝙒𝙞𝙠𝙖𝙣𝙜 𝙁𝙞𝙡𝙞𝙥𝙞𝙣𝙤 𝙖𝙩 𝘼𝙄: 𝙆𝙖𝙨𝙖𝙣𝙜𝙠𝙖𝙥𝙖𝙣 𝙨𝙖 𝙋𝙖𝙣𝙖𝙣𝙖𝙡𝙞𝙠𝙨𝙞𝙠 𝙖𝙩 𝙏𝙪𝙡𝙖𝙮 𝙨𝙖 𝙔𝙖𝙢𝙖𝙣 𝙣𝙜 𝙄𝙢𝙥𝙤𝙧𝙢𝙖𝙨𝙮𝙤𝙣,” na nagbigay-diin sa mahalagang papel ng wikang Filipino sa paglikha at pagpapalaganap ng kaalaman sa panahon ng makabagong teknolohiya. Malugod na nakiisa sa programa ang mga fakulti at kawani ng MSU-Zamboanga Sibugay, katuwang ang mga mag-aaral ng BA Filipino at BSEd Filipino.

Tampok sa programa ang paglalahad ng mga gawaing inihanda ng departamento para sa buong buwan ng Agosto. Naging masigla rin ang pagdiriwang sa pamamagitan ng Buwan ng Wika Trivia at Hularawan, na nagbigay ng pagkakataon sa mga kalahok na subukin at ibahagi ang kanilang kaalaman hinggil sa wika, kasaysayan, at panitikan.

Bilang bahagi ng pagdiriwang, kinilala rin ang mga fakulti at mag-aaral na namukod-tangi sa pagsusuot ng katutubong kasuotan, na nagpapakita ng pagpapahalaga sa yaman, pagkakaiba-iba, at kagandahan ng kulturang Pilipino.

Sa kabuuan, naging masigla at makabuluhan ang pagbubukas ng Buwan ng Wika 2026, na nagsilbing panimula sa serye ng mga gawaing naglalayong itaguyod ang wikang Filipino bilang mahalagang wika ng kaalaman, pananaliksik, kultura, at makabuluhang komunikasyon sa panahon ng makabagong teknolohiya.

29/07/2026

𝗠𝗮𝘁𝗮𝗴𝘂𝗺𝗽𝗮𝘆 𝗻𝗮 𝗣𝗮𝗴𝗱𝗶𝗿𝗶𝘄𝗮𝗻𝗴 𝗻𝗴 𝗟𝗶𝗻𝗴𝗴𝗼 𝗻𝗴 𝗠𝘂𝘀𝗶𝗸𝗮𝗻𝗴 𝗣𝗶𝗹𝗶𝗽𝗶𝗻𝗼 𝘀𝗮 𝗠𝗦𝗨–𝗭𝗮𝗺𝗯𝗼𝗮𝗻𝗴𝗮 𝗦𝗶𝗯𝘂𝗴𝗮𝘆

Matagumpay na pinangunahan ng Departamento ng Filipino, sa pakikipagtulungan sa Office of Culture Affairs, ang pagdiriwang ng Linggo ng Musikang Pilipino sa pamamagitan ng iba't ibang gawaing nagbigay-pugay sa mayamang pamana ng Original Pilipino Music (OPM).

Bilang bahagi ng isinagawang Flag Raising Ceremony, naging masigla ang umaga sa pamamagitan ng OPM Trivia at "Guess the Tune," kung saan buong siglang nakiisa ang mga administrador, g**o, kawani, at mga mag-aaral sa paghula ng mga tanyag na awiting Pilipino.

Sa hapon naman ay idinaos ang masayang OPM Presentation at Jamming Session sa MSU-ZS Gymnasium, tampok ang Himig Megayon at ang mga natatanging pagtatanghal ng mga mag-aaral. Naging daan ang programa upang higit pang mapalalim ang pagpapahalaga sa musikang Pilipino bilang mahalagang bahagi ng ating kultura, kasaysayan, identidad, at pambansang pagkakaisa.

Lubos na ipinahahayag ng Departamento ng Filipino at Office of Culture Affairs ang taos-pusong pasasalamat kay Chancellor Prof. Sheila G. Magolama, PhD sa kanyang walang sawang suporta at patuloy na pagsusulong ng mga programang pangkultura at pangsining ng pamantasan. Taos-pusong pasasalamat din sa mga bise tsanselor, dekana at dekano, mga pinuno ng tanggapan, mga g**o, kawani, at mga mag-aaral na naglaan ng kanilang panahon, suporta, at aktibong pakikilahok upang maging matagumpay at makabuluhan ang pagdiriwang na ito.

Nawa'y patuloy nating tangkilikin, ipagmalaki, at isabuhay ang musikang Pilipino bilang buhay na pagpapahayag ng ating pagka-Pilipino.

Mabuhay ang OPM! Mabuhay ang musikang Pilipino! 🎶

23/07/2026

Maalab na pagbati sa isa sa mga fakulti ng departamento - Maám Zey C. Torino, sa kanyang pagkakapili bilang isa sa mga kalahok sa 𝖨𝗄𝖺𝗅𝗂𝗆𝖺𝗇𝗀 𝖲𝖺𝗅𝗂𝗇𝗀 𝖯𝖺𝗇𝗂𝗍𝗂𝗄: 𝖡𝗂𝖾𝗇𝗏𝖾𝗇𝗂𝖽𝗈 𝖫𝗎𝗆𝖻𝖾𝗋𝖺 𝖲𝖾𝗆𝗂𝗇𝖺𝗋-𝖯𝖺𝗅𝗂𝗁𝖺𝗇. Nawa'y maging makabuluhan at mabunga ang karanasang ito, at magsilbi itong inspirasyon sa buong departamento.

Malugod na binabati ng Likhaan: UP Institute of Creative Writing ang mga napiling kalahok sa Ikalimang Saling Panitik: Bienvenido Lumbera Seminar-Palihan. Ang tema ngayong taon ay "Pagsasalin bilang Pedagohiya".

Inaasahan namin na magiging makabuluhang pagkakataon ang seminar-palihan upang higit na mapaunlad ang inyong kasanayan, makapagbahaginan ng mga pananaw, at makapag-ambag sa patuloy na pagyabong ng pagsasalin sa bansa.

Muli, pagbati sa mga kalahok:

• Abonales, Therese Padilla
• Abubakar, Abdullah Tabale
• Amorado, Jose Amado Correos
• Angara, Chezka Mayne Chavez• Apolonio, Jennelle Fabros•
Aquino, Friedrich Andres
• Aratea, Marko Lim
• Bagon-Faeldan, April Manalo
• Banagbanag, Rogelio Abayon
• Barcelon, Jessie Enabore
• Barquilla, Angelo Bercilla
• Basierto, Jill Cerbito
• Bonabon, Mark Pugnit
• Camba, Moreal Nagarit
• Collera, Mark Aaron Alaras
• Daquioag, Sherwin Duco
• Del Monte, Kent Bantilo
• Dela Cerna, Michael Angelo Estrella
• Dizo, Rommel Niala
• Edraga, Julie Ann De Asis
• Falcutila, Erdy Freian Parto
• Floquencio, Jarhyn Diaz
• Francisco, Karen Humpay
• Fuentes, Consuelo Celine Orogo
• Garces, Jan Kenneth Bautista
• Grumo, Peter Jr. Tipactipac
• Hinampas, Lourdes Zorilla
• Hugo, Benita Balla
• Jimenez, Trishia Kaye Dizon
• Katimbang, Rachel Del Rosario
•Lanzaderas, Cris Roxas
• Ledesma-Aves, Marrianne Salvador
• Luza, Jeslie del Ayre
• Macawili, Roland Abinal
• Mendoza-Lopez, Des Mendoza
• Rañosa Navarro, Alyssa Danielle
• Paderan, Mark Philip Castillo
•Pandapatan, Alican Mendez
• Revadulla, Mark John Anthony Capistrano
• Reyes, Jessica May San Agustin
• Rivera, Arjie Cargamento
• Rivera, Janet Ferrer
• Salcedo, Jedidiah Martin
• Sarandin, Marwin Dalisay
• Suelan, Liane Carlo Rala
• Tahir, Mubarak Maliga
• Tan, Krisnah Ann Miranda
• Torino, Zey Colita
• Valenzuela, Christian Loid
• Virador-Cagayan, Farah Aimee Serapio

Magkita-kita tayo sa Ikalimang Saling Panitik: Bienvenido Lumbera Seminar-Palihan!

𝗩𝗶𝘀𝗶𝘁 𝗼𝘂𝗿 𝗦𝗼𝗰𝗶𝗮𝗹 𝗠𝗲𝗱𝗶𝗮 𝗣𝗹𝗮𝘁𝗳𝗼𝗿𝗺𝘀:
𝙒𝙚𝙗𝙨𝙞𝙩𝙚: https://panitikanph.com
𝙄𝙣𝙨𝙩𝙖𝙜𝙧𝙖𝙢: likhaan.upd.icw
𝙏𝙞𝙠𝙏𝙤𝙠: panitikanph
𝙎𝙥𝙤𝙩𝙞𝙛𝙮: Likhaan: UP Institute of Creative Writing https://rb.gy/jp5iw4
𝙔𝙤𝙪𝙏𝙪𝙗𝙚 𝘾𝙝𝙖𝙣𝙣𝙚𝙡: Likhaan: UP Institute of Creative Writing

20/07/2026

Bilang paghahanda sa pagdiriwang ng Linggo ng Musikang Pilipino, alinsunod sa CHED Memorandum No. 300, series of 2026 ng Commission on Higher Education (CHED), at sa nalalapit na pagdiriwang ng Buwan ng Wika 2026, nagsagawa ng pagpupulong ang Departamento ng Filipino upang pag-usapan ang mga plano at iba pang gawaing isasagawa sa buwan ng Agosto.

Kabilang sa mga pangunahing tinalakay ang mga panukalang aktibidad para sa Buwan ng Wika, ang pagbuo at paglinang ng mga workbook para sa programa, at iba pang mga gawaing pang-akademiko at pangkomunidad na nakahanay sa Sustainable Development Goals (SDGs).

Sa pamamagitan ng sama-samang pagpaplano at pagtutulungan, patuloy na isinusulong ng departamento ang pagtaguyod ng mga makabuluhang gawaing pang-akademiko at mga gawaing sumasalamin sa layunin ng departamento, habang patuloy na pinayayabong ang wikang Filipino bilang wika ng edukasyon, kultura, at pambansang identidad.

06/07/2026

📣 𝐀𝐍𝐔𝐍𝐒𝐘𝐎 | 𝐌𝐀𝐘 𝐍𝐀𝐓𝐈𝐓𝐈𝐑𝐀𝐍𝐆 𝐒𝐋𝐎𝐓𝐒 𝐏𝐀 𝐒𝐀 𝐁𝐀 𝐅𝐈𝐋𝐈𝐏𝐈𝐍𝐎!

Nais mo bang maging dalubhasa sa wikang Filipino, panitikan, kultura, pananaliksik, at komunikasyon?

Magandang balita!

Mayroon pang natitirang slots para sa Bachelor of Arts in Filipino (BA Filipino) para sa Academic Year 2026–2027.

✅ Bakit BA Filipino?

Malalim na pag-aaral sa wika, panitikan, at kulturang Filipino.
Pagsasanay sa pananaliksik, malikhaing pagsulat, at komunikasyon.
Naghahanda ng mga propesyonal para sa iba't ibang larangan tulad ng edukasyon, media, pananaliksik, pamahalaan, at iba pa.

📌 Huwag palampasin ang pagkakataon! Magpatala na habang may bakanteng slots pa.

📍 Para sa karagdagang impormasyon, makipag-ugnayan sa Departmento ng Filipino o bumisita sa Admission Office

22/04/2026