18/06/2026
SANAY SA SIRENA, SABLAY SA SAKUNA
Opinyon ni Ruby Verzosa
Digicartoon ni Matthew L. Ragot
Earthquake drill dito, earthquake drill doon na tila normal na ang tunog ng sirena. Bawat taon ay sinusubukan tayong ihanda ng mga earthquake drill kung sakaling magkaroon ng lindol. Handa ba talaga tayo, o nagiging palabas lang ang lahat?
Ang lindol ay maaring kumitil ng maraming buhay, tulad ng naganap sa katimugang bahagi ng Mindanao noong Hunyo 8, 2026, bandang 7:37 ng umaga. Ang makasaysayan at mapaminsalang lindol na ito na may 7.8 magnitude na lakas ay itinuturing ng DOST-PHIVOLCS na pinakamalakas at pinakamarahas na tumama sa rehiyon mula noong 1976 kung saan niyanig ang Moro Gulf.
Ang lindol ay nakakatakot at nakakapangilabot na natural disaster, kaya hindi dapat ito gawing biro. Kung pagbabasehan ang bilang ng mga earthquake drill na isinasagawa taon-taon sa mga paaralan, dapat isa tayo sa pinakahanda. Ngunit kapag niyanig na tayo ng lindol, tila walang paghahandang ginawa.
Ang earthquake drills ay nagtuturo ng awareness sa mga mag-aaral upang maiwasan ang trahedya sa mga ganitong uri ng sakuna. Hindi sapat ang pagsunod lang, kailangan din ng pang-unawa at pagsi-seryoso dito.
Isa sa mga pangunahing problema ng kawalan ng kahandaan ay dahil nakakasanayan na lamang nating “practice lang”, o hindi kaya naman ay “para lang sa documentation” ang drills. Ang hindi natin alam ay maaaring dumating ang tunay na sakunang ito anumang-segundo.
Sa earthquake drill hindi natin nararanasan ang biglaang pagkawala ng kuryente, ang pagguho ng mga gusali, ang kaba, takot at wala ring nagpa-panic. Ito ay isa rin sa dahilan kung bakit nasasanay ang utak natin sa “safe version” ng lindol.
Dapat ay baguhin natin ang mindset ng bawat isa, hindi ang palaging pagiging kampante sa paulit-ulit na routine. Maraming Pilipino rin ang kulang sa personal preparedness, kaya kapag ang sakuna ay tumama dapat, pamilya mismo ang unang may malinaw na plano sa mga dapat gawin.
Kapag iniwan lang sa paaralan, o sa trabaho ang paghahanda na dapat matutunan, ibig sabihin lang ginagawa natin ang drills dahil kailangan lang, hindi dahil sa nauunawaan natin ang halaga nito sa ating buhay. Sa aktuwal na lindol, maaring hindi na masunod ang duck, cover, and hold, kaya mahalaga na dapat ay alam mo kung paano at saan ka dapat mag-exit.
Ang kaligtasan at paghahanda ay hindi nasusukat sa kung gaano karami na ang drills na nagawa natin, ito ay masusukat sa lalim at lawak ng pang-unawa, pakikipagkaisa, responsableng aksyon, disiplina at pagsi-seryoso.
Hindi maikakaila na may kakulangan din ang gobyerno sa public accessibility ng disaster information. Ang ilan sa atin ay hindi aware sa mga hazard map, evacuation routes at maging ang mga fault line locations. Ang pagiging handa ay hindi dapat natatapos sa mga drills sa paaralan at trabaho, dapat ito ay sinasabayan ng konkretong edukasyon at accessible na impormasyon para sa lahat.
Isa lang ang malinaw, ang lindol ay hindi natin mapipigilan, ngunit maaring mabawasan ang pinsala nito. Ang Earthquake drill ay mahalagang maging unang hakbang, paalala na may responsibilidad tayong protektahan ang ating sarili. Hangga’t hindi ito siniseryoso mananatili itong walang saysay. Kaya panahon para gawin natin itong lifeline hindi protocol lang.
