22/08/2024
Tulay Sa Sityo Bario
Sa isang liblib na pook na tinatawag na Sityo Bario, nakatira sina Mara at ang kanyang Lola Maria sa isang munting barong-barong na malapit sa isang lumang tulay. Ito ay hindi na dinadaanan pa dahil sa isang trahedya.
Isang gabi, matapos ang kanilang hapunan, naikuwento ni Lola Maria kay Mara ang tungkol sa isang malagim na aksidente. Isang pangyayari kung saan nagbanggaan ang isang trak at bus na puno ng mga estudyante na mula sa field trip, na siyang nagdulot ng kanilang pagkasawi.
Matapos ang kwento, napagpasiyahan ni Lola Maria na matulog na habang si Mara naman ay naiwang nag-iisip nang malalim. Habang nakatanaw sa bintana, naaaninag niya ang tulay sa ilalim ng malamlam na buwan. Doon, parang may natanaw siyang anino na gumagalaw. Dahil sa takot, mabilis siyang nagtungo sa kanyang silid at pilit na pinatulog ang sarili.
Subalit, sa kalagitnaan ng gabi, nagising si Mara na nasa gitna ng tulay, napapalibutan ng mga batang may malulungkot at nakakakilabot na mukha. Natigilan siya at nakaramdam ng matinding lamig sa buong katawan. Sa isang iglap, may humawak sa kanyang balikat. Sa kanyang paglingon ay nasilayan niya ang liwanag at unti unti niyang naaninag ang mukha ng kaniyang lola. Natagpuan niya ang sarili sa kanyang k**a, nanginginig at gulong-gulo ang isip. Iniwan niyang nag-aalangan sa lahat ng nangyari at nakita niya sa gabing iyon.
