Ang Tugatog

𝟎𝟔/𝟎𝟏/𝟐𝟔 | 𝐋𝐚𝐭𝐡𝐚𝐥𝐚𝐢𝐧

𝓦𝓪𝓵𝓪𝓷𝓰 𝓜𝓪𝓵𝓲 𝓢𝓪’𝔂𝓸 ✨

May mga ibon na buong buhay na ikinulong sa hawla hanggang sa makalimutan ng mga tao na kaya pala nilang lumipad.

Ganiyan ang buhay ng maraming LGBTQ+ na indibidwal—araw-araw ay may natatanggap silang pambabatikos mula sa kapwa, na para bang may mali sa kanilang pagkatao.

Bata pa lamang, may mga kahon na nakahanda para sa kanila. Kahon ng “dapat isuot”. Kahon ng “dapat ikilos”. Kahon ng “dapat mahalin”. At kapag sinubukan nilang lumabas sa mga kahon na iyon, para silang halamang pinipilit pabalik sa paso kahit halatang hindi na ito kasya sa mga ugat nito.

Ang iba ay natutong magtago. Parang mga bituing pinipilit magningning sa ilalim ng makapal na ulap. Parang mga awiting hindi inaawit ng malakas. Parang mga liham na paulit-ulit sinusulat ngunit hindi kailanman pinapadala.
Sapagkat sa mundong ito, ang simpleng “Mahal ko siya” ay hindi pare-pareho ang bigat para sa lahat.

Kapag lalaki ang nagmahal ng babae, tinatawag itong normal.
Kapag babae ang nagmahal ng lalaki, tinatawag itong normal.
Ngunit kapag ang puso ay tumibok para sa kapwa nito kasarian, bigla itong nagiging usapin. Nagiging debate. Nagiging sermon. Nagiging kasalanan sa paningin ng iba.

Napakasakit isipin na ang pag-ibig—isang damdaming kasing lambot ng unang patak ng ulan sa tuyong lupa—ay nagiging bato kapag ipinukol ng lipunan sa maling tao.

Marami ang naglakad sa buhay na parang may dalang lihim na sugat. Hindi ito nakikita sa balat ngunit nararamdaman sa bawat biro na kunwaring biro lamang. Sa bawat tingin na puno ng panghuhusga. Sa bawat pagkakataong kailangan nilang magkunwari upang manatiling tanggap.

May mga pusong natutong bumulong dahil natatakot sumigaw.

May mga ngiting natutong magsinungaling.

May mga pagmamahalang namatay hindi dahil nawala ang damdamin, kundi dahil mas malakas ang takot kaysa kalayaan.

Ngunit kahit ilang ulit putulin ang mga sanga, may mga punong pilit pa ring sumisibol. At marahil iyon ang pinakamatapang na anyo ng pag-ibig. Ang patuloy na pagmamahal sa kabila ng mga matang tumitingin na parang mali ka. Ang pagpiling maging totoo sa sarili kahit paulit-ulit kang pinapatahimik. Ang paghawak sa kamay ng taong mahal mo kahit alam mong may mga taong handang pakawalan ka dahil lamang doon.

Ngayong Pride Month, hindi lamang ito pagdiriwang ng pagkakakilanlan. Ito rin ay pagkilala sa mga laban na hindi nakikita—mga luha na itinatago, mga salitang nilunok, at mga pagmamahalang matagal na ipinagkait ng lipunan.

Sapagkat sa huli, walang mali sa pagsunod sa tunay na tibok ng puso. Dahil ang pag-ibig ay parang liwanag—hindi dapat ikulong sa iisang bintana lamang. At gaano man katagal itong takpan ng mga kamay, hahanap at hahanap ito ng siwang upang makapasok.

Walang mali sa pagmamahal, maging sa kaparehong kasarian man o hindi. Walang mali sa pagiging totoo sa sarili. At higit sa lahat, walang mali sa’yo.

—

✍️ Karylle Am-is
🎨 Vince Gatela

Abangan ang mga susunod pang anunsyo at balita sa opisyal na pahina ng Tugatog: https://www.facebook.com/angtugatogcvisc

𝙇𝙞𝙝𝙖𝙢 𝙥𝙖𝙧𝙖 𝙨𝙖 𝙖𝙢𝙞𝙣𝙜 𝙢𝙞𝙣𝙖𝙢𝙖𝙝𝙖𝙡 💌

Ngayong tapos na ang inyong kabanata sa paglalakbay na ito 🏁, nawa'y manatili sa inyo ang lahat ng alaala at pahalagahan ang mga samahang nabuo 🫂.

Lagi niyong tatandaan na kahit anong mangyari, bukas ang pinto🚪 ng Ang Tugatog para sa inyo🫵.

Lubos na nagmamahal,
𝐀𝐧𝐠 𝐓𝐮𝐠𝐚𝐭𝐨𝐠 ❤️‍🔥

𝙈𝙪𝙡𝙖 𝙣𝙜𝙖𝙮𝙤𝙣𝙜 𝙢𝙖𝙡𝙖𝙮𝙖 𝙠𝙖 𝙣𝙖~

Maligayang pagbati sa mga bagong graduates ng 𝐀𝐧𝐠 𝐓𝐮𝐠𝐚𝐭𝐨𝐠! 🎓🔥

Nag-iwan kayo ng bakas 👣 na hindi kailanman malilimutan—hindi lang sa pahina ng pahayagan, kundi sa puso ng bawat miyembro ❤️. Palaging dadalhin ng Ang Tugatog ang mga alaalang iyong iniwan sa gitna ng chikahan 🤭 tuwing DSPC o di kaya’y sa bawat oras na naghahabol🏃‍♀️ ng deadline ng school paper.

Sig**o ay masaya ang iba sa inyo ay dahil sa wakas ay graduate na rin kayo sa pagsusulat ng mga artikulo🤔. Ngunit, nawa’y baunin niyo ang mga aral na inyong natutuhan‼️. Patuloy niyong isabuhay ang tunay ng katangian ng isang mamamahayag🎤.

Maraming salamat sa lahat, seniors! Hanggang sa muli🫡

𝟎𝟓/𝟏𝟕/𝟐𝟔 | 𝐊𝐎𝐋𝐔𝐌

𝙋𝙖𝙖𝙡𝙖𝙡𝙖: 𝘼𝙣𝙜 𝙢𝙜𝙖 𝙥𝙖𝙣𝙖𝙣𝙖𝙬 𝙖𝙩 𝙤𝙥𝙞𝙣𝙮𝙤𝙣 𝙣𝙜 𝙢𝙜𝙖 𝙢𝙖𝙣𝙪𝙣𝙪𝙡𝙖𝙩 𝙖𝙮 𝙝𝙞𝙣𝙙𝙞 𝙨𝙪𝙢𝙖𝙨𝙖𝙡𝙖𝙢𝙞𝙣 𝙨𝙖 𝙢𝙜𝙖 𝙥𝙖𝙣𝙖𝙣𝙖𝙬 𝙣𝙜 𝙞𝙣𝙨𝙩𝙞𝙩𝙪𝙨𝙮𝙤𝙣 𝙖𝙩 𝙣𝙜 𝙥𝙖𝙝𝙖𝙮𝙖𝙜𝙖𝙣𝙜 𝙥𝙖𝙢𝙥𝙖𝙖𝙧𝙖𝙡𝙖𝙣.

—

𝐁𝐨𝐭𝐨 𝐦𝐨, 𝐊𝐢𝐧𝐚𝐛𝐮𝐤𝐚𝐬𝐚𝐧 𝐧𝐠 𝐌𝐠𝐚 𝐏𝐢𝐥𝐢𝐩𝐢𝐧𝐨

“𝘔𝘢𝘯𝘺 𝘍𝘪𝘭𝘪𝘱𝘪𝘯𝘰𝘴 𝘢𝘳𝘦 𝘨𝘦𝘵𝘵𝘪𝘯𝘨 𝘧𝘳𝘶𝘴𝘵𝘳𝘢𝘵𝘦𝘥 𝘸𝘪𝘵𝘩 𝘵𝘩𝘦 𝘤𝘰𝘶𝘯𝘵𝘳𝘺. 𝘍𝘰𝘳 𝘺𝘰𝘶, 𝘸𝘩𝘺 𝘪𝘴 𝘪𝘵 𝘴𝘵𝘪𝘭𝘭 𝘸𝘰𝘳𝘵𝘩 𝘪𝘵 𝘵𝘰 𝘳𝘦𝘱𝘳𝘦𝘴𝘦𝘯𝘵 𝘵𝘩𝘦 𝘗𝘩𝘪𝘭𝘪𝘱𝘱𝘪𝘯𝘦𝘴 𝘰𝘯 𝘵𝘩𝘦 𝘨𝘭𝘰𝘣𝘢𝘭 𝘴𝘵𝘢𝘨𝘦?”

Kung ibabato sa’yo ang tanong na ito, tila ikaw mismo ay mahihirapang sagutin ito. Hindi dahil hindi karapat-dapat ipagmalaki ang Pilipinas, kundi dahil tayong mga mamamayan mismo ang naghalal sa mga taong puno ng bahid ng katiwalian at korapsyon. Sa isang bansang demokratiko, hindi masisisi na iba’t iba ang ating opinyon, lalo na sa politika. Ngunit sa panahon ngayon na nagkakagulo na mismo ang senado, ang boto ng isang tao ay maaring magbago sa kinabukasan ng mga Pilipino.

Sa panahon ngayon, maraming mga ‘sana’ at ‘paano kung’ na lumilinga sa paligid. Sa lantarang panlolokong ginagawa ng mga politiko, sampal ito sa bawat mamamayang Pilipino–nagpapaala na tigilan na ang pagiging panatiko sa kahit sinong kandidato. Sapagkat ang bawat boto ay may kaakibat na kahitnatnan.

Ang pagiging panatiko ay isang hadlang sa tunay na demokrasya. Paulit-ulit na mga apelyido ang matatagpuan sa mga terminong nakalipas. Mga pangalang may bahid na dungis dahil sa mga kasong nakatali sa kanilang dinastiya. Sapagkat tila ang mga papeles na nagpapatunay sa kanilang katiwalian ay binabalewala ng karamihan.

Ang dating pangulo na si Pangulong Rodrigo Roa Duterte ay sinampahan ng kaso ng International Criminal Court (ICC) ukol sa kanyang “war on drugs” na nagdulot ng libo-libong extrajudicial killings. Kasabay nito ay ang pag-apruba ng House Representatives sa kasong impeachment ni Vice President Sara Duterte. Sa kabila ng mga ito, marami pa rin ang naniniwala na ang pamilyang ito ay maaaring magdala ng mabuting pagbabago sa Pilipinas.

Dagdag pa rito, hindi magtatagumpay ang mga masasamang balak kung walang kasamang alagad na may matataas na position sa gobyerno. Isa sa mga Philippine National Police (PNP) na kaalyado ng dating pangulong Duterte sa usaping ‘war on drugs’ ay si Ronaldo Dela Rosa na mas kilala bilang “Bato”. Siya na sangkot din sa extrajudicial killings ay sinampahan din ng warrant ng ICC dahil sa kaniyang pangunguna sa “war on drugs” na nakapatay ng higit isang libong tao. Imbes na panagutan ang kasong hinain, mas pinili niyang tumakbo para mailigtas ang sariling reputasyon. Gawain ba iyan ng tunay na alagad ng bayan?

Maraming mga haka-haka ukol sa mga makabuluhang pangyayari sa senado. Ngunit, sino nga ba ang nagluwal sa mga politikong ito sa kanilang mga posisyon? Ang mamamayan, ang mga nalinlang ng matatamis na salita, ang mga taong nananawagan ng tulong, at ang mga taong naghahangad ng maayos na kinabukasan. Kung kaya ninyong ipagtanggol ang mga politikong ito, ipagtanggol din naman ninyo ang ating bayan laban sa kanilang kasakiman.

Bagong pilipinas, bagong mukha—mga katagang tila suntok sa buwan. Nasaan ang pagbabago kung ang politika ay tila ginagawang sabong ng mga nahalal na pinuno? Nasaan ang pagbabago kung ang mga salitang binitawan noong nakaraang eleksyon ay tinangay na ng simoy ng hangin? Ang tanging natira ay ang tiwaling pangalan at parehong sistema.

Hindi dapat tayo mawalan ng pag-asa dahil bilang mga botante, nasa kapalaran natin ang sagot sa mga katanungan. Tandaan: mas makapangyarihan tayo sa mga taong nilagay natin sa pwesto. Ang isang boto mo ay makapagbabago sa kinabukasan ng mga Pilipino.

✍️: 𝘼𝙣𝙩𝙝𝙤𝙣𝙚𝙩𝙩𝙚 𝙅𝙪𝙢𝙤𝙡𝙖 & 𝙀𝙢𝙢𝙖𝙣𝙪𝙚𝙡 𝘼𝙗𝙚𝙣𝙙𝙖𝙣
🎨: 𝙑𝙞𝙣𝙘𝙚 𝙂𝙖𝙩𝙚𝙡𝙖

—

Abangan ang mga susunod pang anunsyo at balita sa opisyal na pahina ng Tugatog: https://www.facebook.com/angtugatogcvisc

𝓝𝓪𝓴𝓾! 𝓘𝓵𝓪𝓷𝓰 𝓫𝓮𝓼𝓮𝓼 𝓴𝓪 𝓷𝓪 𝓫𝓪𝓷𝓰 𝓷𝓪𝓹𝓪𝓰𝓼𝓪𝓫𝓲𝓱𝓪𝓷 𝓷𝓰 𝓲𝔂𝓸𝓷𝓰 𝓷𝓪𝓷𝓪𝔂? 🤔

Sa kabila ng paulit-ulit na linya galing sa mga pinakamamahal nating mga ina, hindi ito nakakasawang pakinggan—dahil habang tumatanda ka, doon mo lang maiintindihang tanda pala ng pag-aaruga ang bawat paalala 🤍

Binabati ng Ang Tugatog ang lahat ng ilaw ng tahanan sa inyong espesyal na araw‼️🥳

Nawa'y hindi kayo magsawang suportahan kami, hanggang sa makamit naman naming masuklian ang lahat ng inyong sakripisyo🫂

Maligayang araw ng mga Nanay! 🌸

🎨: Vince Gatela
✍️: Anthonette Jumola

—

Abangan ang mga susunod pang anunsyo at balita sa opisyal na pahina ng Tugatog: https://www.facebook.com/angtugatogcvisc

𝟎𝟓/𝟎𝟗/𝟐𝟔 | 𝐋𝐚𝐭𝐡𝐚𝐥𝐚𝐢𝐧

𝓖𝓲𝓷𝓽𝓸 𝓟𝓪𝓻𝓪 𝓼𝓪 𝓑𝓪𝓱𝓪𝔂 𝓷𝓰 𝓖𝓲𝓷𝓽𝓸 🏆

Apat na bahay gamhanan—bawat isa ay tila apoy na nag-aagawan ng liwanag sa iisang entablado. Puno ng kakaibang talento, husay, at pangarap. Ngunit, sa bawat patimpalak, iisa lamang ang kinikilalang tunay na kampeon.

“Bahay ng Ginto, hindi kami susuko! M-A-N-G-G-A-D–That’s the way you spell Manggad. We’re the house no one can beat, Manggad! Manggad! Manggad!”

Hindi lamang ito simpleng cheer na paulit-ulit na sinisigaw hanggang mamalat ang lalamunan. Ito ang tibok ng pusong sabay-sabay na lumalaban. Ito ang apoy na patuloy na naglalagablab sa loob ng Temple of Manggad—ang bahay-gamhanang hindi basta-basta sumusuko kahit ilang beses pang madapa sa daan tungo sa tagumpay.

Sa kanilang mga ugat ay tila dumadaloy ang dugong may tapang, liksi, at wagas na pagmamahal sa kinabibilangan. Sapagkat ang tunay na Manggad, marunong bumangon mula sa lusak na tila bagyong paulit-ulit silang sinusubok.

Mula sa Buwan ng Wika hanggang sa Pisay’s Next Top Model, hindi matinag ang kanilang ningning. Sa bawat entabladong inaapakan, tila may dalang sariling sinag ang mga miyembro ng Manggad. Mga matang nag-aalab sa determinasyon, mga palad na nanginginig sa kaba, at mga tinig na buo pa ring sumisigaw para sa iisang pangalan—Manggad.

Naungkit nila ang unang gantimpala sa Buwan ng Wika at Academic Festival–mga tagumpay na hindi naipapanalo sa swerte kundi hinubog ng mga gabing puno ng puyat, pagod, at pagtutulungan ng bawat miyembro. At bagamat 2nd Runner Up lamang ang nakamit sa Sports Festival, hindi iyon naging sugat na nagpahina sa kanila. Sa halip, ginawa nila itong gatong upang mas lalong magliyab ang kanilang kagustuhang bumawi.

Ang Temple of Manggad ay matagal nang kilala bilang bahay-gamhanang puno ng talento at talino. Isa sa mga pinaka-dí-malilimutang alaala ay ang Academic Fest—ang araw kung kailan tila niyanig ng kanilang sigawan at hiyawan ang buong paligid. Bawat palakpak ay tila kulog ng suporta; bawat cheer ay tila alon na sabay-sabay humahampas upang itulak ang isa’t isa patungo sa tagumpay.

Hindi lamang simpleng panalo ang naganap; isa itong pagpapatunay na ang pagkakaisa ay higit na malakas kaysa sa anumang indibidwal na husay. Marami ang napaluha—hindi lamang dahil sa tropeong kanilang hawak, kundi dahil sa wakas ay nagkaroon ng saysay ang bawat patak ng pawis, bawat puyat, at bawat tahimik na pagod na walang ibang nakakita.

Hindi naging madali ang daan tungo sa tagumpay. Hindi sa lahat ng oras ay panalo, ngunit hindi rin sa lahat ng oras ay talo. Sa likod ng bawat panalo at paghihirap ay ang mga lider na hindi kailanman naniniwalang may imposible. Kabilang na rito ang General Athletics Manager ng Manggad na si Dexcy Yano. Ilang dugo, iyak, at pawis ang kanyang inalay para sa bahay na kanyang pinaglaban. Bilang isang graduating student, tangan niya hindi lamang ang karangalan ng tagumpay, kundi pati ang pasasalamat sa bawat taong naging bahagi ng pag-abot sa pangarap na matagal nilang inasam.

Sapagkat sa huli, ang tunay na gintong napanalunan ng Temple of Manggad ay hindi nasusukat sa dami ng gantimpalang naiuwi. Matatagpuan ito sa mga abot-tengang ngiting sabay-sabay na sumilay matapos ang nakakapagod na laban. Nasa pawis ng mga opisyal na tahimik na kumikilos sa likod ng entablado. Nasa mahigpit na samahang nabuo sa gitna ng pagod, kaba, at pagsubok.

Hindi biro ang lahat ng kanilang dinaanan. Ngunit, patuloy silang lumalaban kahit mahirap. Pinatunayan nila na walang imposible kapag nagkakaisa ang buong Temple of Manggad.

At marahil, iyon ang tunay na gintong hindi kailanman maaagaw ninuman.

—

✍️: Anthonette Jumola
🎨: Vince Gatela

Abangan ang mga susunod pang anunsyo at balita sa opisyal na pahina ng Ang Tugatog: https://www.facebook.com/angtugatogcvisc

03/27/26 | Balita

Tuklas-Sciya at Tuklas-Baybay, Hatid ng PSHS-CVisC in Cebu para sa mga Mag-aaral ng DepEd

Matagumpay na isinagawa ng Filipino Unit ng PSHS-CVisC in Cebu ang pagdiriwang ng Tuklas-Sciya at Tuklas-Baybay noong ika-27 ng Marso 2026 sa Audio-Visual Room at Conference Room ng nasabing paaralan.

Dinaluhan ang nasabing programa ng mga mag-aaral mula sa Argao National High School, Bulasa National High School, at Talaga National High School.

Sinimulan ang mga gawain sa umaga sa pamamagitan ng pambungad na panalangin at pambansang awit na pinamunuan ng VOPS, sinundan ng pambungad na pananalita mula sa Campus Director na si Dr. Rachel Luz V. Rica, at pagbibigay ng rasyonal ng programa mula kay Gng. Gee Elle Carumba.

Isinagawa rin ang isang campus tour kung saan ipinakita ang iba’t ibang pasilidad ng paaralan. Pinangunahan ng Chem Soc ang pagbisita sa Chemistry Laboratory, ng PIONEER ang Physics Laboratory, ni G. Alco Tolentino ang Biology Laboratory, at E.A.G.L.E.S. ang Maker Space. Ginabayan naman ang mga kalahok ng mga mag-aaral mula sa Ang Tugatog.

Sa hapon, isinagawa ang Tuklas-Baybay kung saan tinuruan nina Gurong Jed Michael Fuentes, Unit Head ng Filipino, at Gng. Ailene Ramos, tagapayo ng Ang Tugatog, ang mga mag-aaral ng wastong pagsulat ng Baybayin.

Nagkaroon din ng mga palaro upang higit pang mapalalim ang pagkatuto at mahasa ang kakayahan ng mga kalahok. Ayon sa isang miyembro ng Ang Tugatog, “Ngayon ko lamang po lubos na natutunan ang Baybayin. Maraming salamat po sa mga g**o at sa aming Campus Director sa pagsasagawa ng isang makabuluhang programa.”

Tinapos ang programa sa pamamagitan ng seremonya ng pagbibigay-parangal sa lahat ng mga dumalo.

03/28/26 | Balita

Mga Bahay-Gamhanan, Nagtagisan sa Programming Competition

Idinaos ang Programming Competition sa loob ng Computer Lab 2 noong ika-26 ng Marso 2026 bilang bahagi ng Academic Festival ng Philippine Science High School – Central Visayas Campus in Cebu (PSHS-CVisCC). Sinalihan ito ng walong kalahok mula sa apat na bahay-gamhanan, kung saan sila ay nagpadala ng tig-dalawang kinatawan upang makipagtagisan sa larangan ng coding at problem-solving.

Nagsimula ang paligsahan bandang ala-una ng hapon at binigyan ang mga kalahok ng dalawang oras upang tapusin ang ibinigay na programming prompt mula sa mga hurado na sina Sir Ralph Jason Corrales at Mrs. Mona Lina Albarracin.

Tinanghal na kampeon ang Temple of Manggad na kinatawan nina Aaron Ravina at Obadiah Romel, matapos makakuha ng pinakamataas na 290 house points. Ipinakita nila ang kahusayan sa lohikal na pag-iisip at teknikal na kakayahan na nagbigay sa kanila ng kalamangan laban sa ibang mga kalahok.

Pumangalawa naman ang Abode of Behemoth na binubuo nina Jaino Cabrera at GC Zyanathanjho Laboñete, na nakapagtala ng 275 house points. Sinundan ito ng Casa di Vivace sa ikatlong puwesto, na kinatawan nina Jakhob Amoyo at Maxwell Figueroa, na may 265 house points.

Samantala, nakuha ng Balay ni Lakan ang ikaapat na puwesto sa pangunguna nina Carl Joseph Nacar at Jodia Catada, na nakakuha ng 255 house points.

Sa kabuuan, hindi lamang bilis sa pag-code ang nasubok sa kompetisyon kundi pati ang kakayahan ng bawat kalahok na mag-isip nang kritikal sa ilalim ng limitadong oras. Ipinakita nito na ang programming ay hindi lamang isang teknikal na kasanayan, kundi isang paraan ng paglikha ng solusyon sa mga hamon sa tunay na buhay.

03/26/26

Pagdiriwang ng Talino at Talento: Matagumpay na Pagbubukas ng AcadFest 2026

Opisyal nang binuksan ang Academic Festival 2026 sa Gymnasium ng PSHS-CVisCC noong Marso 26, 2026 sa pamamagitan ng isang makulay at makabuluhang programa.

Sinimulan ang programa sa isang kahanga-hangang opening salvo mula sa ARYO, Voice of Pisay Scholars (VOPS), at Peak Dance Troupe na nagbigay sigla at enerhiya sa mga dumalo. Sinundan ito ng isang taimtim na panalangin at pag-awit ng pambansang awit ng Pilipinas at DOST Hymn, na pinangunahan ng VOPS.

Nagbigay naman ng mainit na pagtanggap si Dr. Rachel Luz V. Rica, ang campus director, sa pamamagitan ng kanyang welcome remarks. Binigyang-diin niya ang kahalagahan ng pagdiriwang ng akademikong kahusayan at pakikilahok ng bawat mag-aaral sa mga gawain ng festival.

Inilahad din ang rationale ng programa ni Gng. Mary Joy M. Villamora, CID Chief, kung saan ipinaliwanag ang layunin at kahalagahan ng Academic Festival. Kasunod nito, ipinresenta ni Gng. Princess Garnet Q. Albiso ang mga pangkalahatang alituntunin at kalendaryo ng mga aktibidad.

Sa huli, pormal na idineklara ni Dr. Rica ang pagbubukas ng Academic Festival 2026. Tinapos ang programa sa isang kapana-panabik na pagtatanghal ng Pisay Marching Band na lalong nagpasigla sa buong okasyon.

03/28/26 | Balita

Temple of Manggad, Nagpakitang Gilas sa mga Makabuluhang Inobasyon

Nagtagumpay ang Temple of Manggad sa pagsungkit ng una at ikalawang gantimpala sa Science for Society Pitching Competition. Ginanap ang project pitching sa PSHS-CVisCC Gymnasium noong ika-26 ng Marso 2026. Binubuo ito ng dalawang pangkat ng bawat bahay-gamhanan na may tig-apat na miyembro mula sa iba’t ibang baitang.

Ang nagwagi ng unang gantimpala ay ang ikalawang pangkat ng Manggad na kinabibilangan nina Vince Gatela, Anthonette Jumola, Mary Saldo, at Mikhaela Bajenting. Ipinrisinta nila ang inobasyong S.U.K.A.T: A Sensor-based Unified Kit for Analytics of Leftover Food. Itinalakay nila ang kahalagahan ng Zero Leftover Policy sa canteen ng campus at gumawa ng gadget upang makatulong na masolusyunan ang isyung ito. Gumawa sila ng isang mapakikinabangang prototype na tumutukoy sa klase at sukat ng natitirang pagkain. Sa paraang ito, naiiwasan ang pag-aaksaya ng pagkain araw-araw.

Hindi rin nagpahuli ang unang pangkat ng Manggad na binubuo nina Hannah Guinita, Himaya Acedo, Rhane Entice, at Ella Escatron. Gumawa sila ng paraan upang magamit muli ang aluminum layer ng mga tetra packs ng juice upang maging insulators sa loob ng mga silid-aralan. Ang kanilang proyektong tinatawag na PreskoPak ay nagpapahiwatig na kahit ang mga simpleng bagay na hindi masyadong napapansin ay maaaring magkaroon ng malaking epekto sa ating kapaligiran.

Nagwagi rin ang Balay ni Lakan at Casa di Vivace sa pagsungkit ng ikatlo at ikaapat na pwesto sa nasabing kompetisyon. Ang mga inobasyon ng bawat pangkat ay nagbunga dahil tinagurian itong isang major competition na may katumbas na house points. Ayon sa ibang mga kalahok, kahit minsan ay nakakapagod ang karanasan, nag-enjoy pa rin naman sila dahil sa nabuong samahan at sa mga nagawang solusyon na nakatutulong sa paaralan.