21/09/2026
भविष्यका कर्णधारको उत्सव र इतिहासका निर्मातालाई नमन: ६२ औँ राष्ट्रिय बाल दिवस तथा सेवानिवृत्त शिक्षक सम्मान कार्यक्रमको परिदृश्य !🌏
आज हामीले ती आदरणीय गुरुहरूलाई सम्मान गर्ने अवसर पाएका छौं, जसले आफ्नो सम्पूर्ण जीवन शिक्षण पेशामा अर्पण गर्नुभयो। जसले कालोपाटीका अक्षरहरू मात्र होइन, हाम्रा सपनाहरूलाई पनि आकार दिनुभयो। जसको अथक परिश्रम, असीम धैर्य र प्रेरणादायी मार्गदर्शनले आज हामी यो समाजमा खुट्टा टेक्न सफल भएका छौं।
तपाईंहरूले छर्नुभएको ज्ञानको उज्यालो र दिएको संस्कार आज पनि हाम्रो जीवनको बलियो आधार बनिरहेको छ। सारा जीवन शिक्षण पेशामा समर्पित भई नयाँ पुस्ताको भविष्य कोर्नुहुने गुरुज्यूहरूको योगदान मेटेर मेटिने छैन बरु हाम्रा पुस्ताहरूको हृदयमा सधैँ अमर रहनेछ। आफ्नो कार्यव्यस्तता वा विशेष कारणवश आजको सम्मान कार्यक्रममा उपस्थित हुन नसक्नुभएका आदरणीय गुरुज्यूहरूलाई आगामी दिनहरूमा क्रमशः सम्मान गर्दै लैजाने प्रतिबद्धता व्यक्त गर्दछौँ। शिक्षा क्षेत्रमा यहाँहरूले पुर्याउनुभएको अतुलनीय योगदानप्रति हार्दिक आभार व्यक्त गर्दै सुस्वास्थ्य एवं दीर्घायुको कामना गर्दछौँ। तपाईंहरू हाम्रो प्रेरणाको स्रोत र गौरवको प्रतीक हिजो पनि हुनुहुन्थ्यो, आज पनि हुनुहुन्छ र भोलि पनि उत्तिकै रहनुहुनेछ।
यस कार्यक्रमको जन्मदाता वडा शिक्षा समिति हो। समितिको स्थापना वि.स. २०८० सालमा भएको थियो। यसअघि वडाभित्रका सम्पूर्ण सामुदायिक विद्यालयहरूमा शिक्षक तथा कर्मचारीहरूका लागि पाठ्यक्रम प्रबोधिकरण तालिम, प्रश्नपत्र निर्माण, विविध वडा स्तरीय अतिरिक्त क्रियाकलाप तथा सबै प्रकारका वडा स्तरीय परीक्षा सञ्चालन गर्दै आएको छ। यसै क्रममा समितिले आफ्नो कार्यसूचीमा रहेको सेवा निवृत्त शिक्षकलाई सम्मान गर्ने यो महत्वपूर्ण कार्यक्रम पनि साकार बनाएको छ। उक्त कार्यक्रमलाई जीवन्त बनाउन लागि पर्नुहुने वडा शिक्षा संयोजक तथा वडाध्यक्ष श्री लक्षुमन गुरुङ लगायत सम्पूर्ण समिति परिवारहरुप्रति मन, मस्तिष्क र हृदयबाट हार्दिक धन्यवाद व्यक्त गर्दछौं।
