Rhino muay thai

तेस्रो राष्ट्रिय मुवा थाई च्याम्पियनसिपमा गण्डकी प्रदेश तथा चितवन जिल्लाको प्रतिनिधित्व गर्दै काठमाडौंस्थित दशरथ रंगशालामा सम्पन्न प्रतियोगितामा उत्कृष्ट प्रदर्शन गर्दै स्पष्ट रूपमा जित हासिल गर्ने खेलाडी पूजा पाण्डेलाई स्वर्ण पदकबाट वञ्चित गरिएको घटनाप्रति सम्पूर्ण रूपमा घोर आपत्ति, गहिरो आक्रोश तथा कडा विरोध व्यक्त गर्दछु।

खेलको भिडियो प्रमाण र रिङभित्रको वास्तविक प्रदर्शन हेर्दा जित स्पष्ट रूपमा हासिल भएको देखिए पनि निर्णायक मण्डलको निर्णयप्रति गम्भीर प्रश्न उठेको छ। निष्पक्ष र न्यायपूर्ण निर्णय दिनुपर्ने ठाउँमा भएको यस्तो लापरवाही, सम्भावित पक्षपात र कमजोर मूल्याङ्कनले खेलाडीको मेहनत, समर्पण र भविष्यप्रति ठूलो अन्याय गरेको अनुभूति भएको छ।

यदि आफ्नै पक्ष वा व्यक्तिगत स्वार्थ अनुसार निर्णय गर्ने प्रवृत्ति नै रहने हो भने राष्ट्रिय स्तरको प्रतियोगिता सञ्चालन गर्नुको अर्थ के रहन्छ? आफ्नै घरमा आफ्नै घरको नाम दिएर खेलाएर जिताउदा हुन्थ्यो त् हजुर कि कसो । निष्पक्षता बिना खेलकुद केवल औपचारिकता मात्र बन्छ, खेलाडीको पसिना र मेहनतको कुनै मूल्य रहँदैन।

आज देशमा “जेन्जि” पुस्ताले न्याय, पारदर्शिता र योग्यताको आधारमा सिस्टम हुनुपर्छ भनेर आवाज उठाइरहेको छ। त्यही परिवर्तनको अपेक्षा गरिएको समयमा खेलकुदजस्तो अनुशासन, मेहनत र निष्पक्षताको क्षेत्रमा यस्ता घटनाहरू दोहोरिनु अत्यन्तै दुःखद र अस्वीकार्य हो।

अब यस्ता घटनालाई सामान्य गल्ती भनेर टार्ने अवस्था छैन। यस घटनामा संलग्न निर्णायक मण्डल, व्यवस्थापन तथा सम्बन्धित सम्पूर्ण पक्षमाथि निष्पक्ष, गहिरो र पारदर्शी छानबिन गरी कडा र उदाहरणीय कारबाही गरियोस् भन्ने जोडदार माग गर्दछु।

खेलकुदमा न्याय, पारदर्शिता र योग्यताको सम्मान अनिवार्य हो — नत्र यो खेल होइन, अन्यायको दोहोरिने कथा मात्र बन्छ।






गुरु विज्ञान दराई
संस्थापक प्रशिक्षक तथा अध्यक्ष
राइनो मुवा थाई चितवन