Nepal Police School Samakhusi

नतिजा प्रकासन सम्बन्धमा ।

यस स्कुलका समादेशकज्यूबाट नवनियुक्त प्राचार्य डा. नारायण प्रसाद काफ्लेज्यूलाई स्वागत तथा शुभकामना !!

आदरणीय नवनियुक्त प्राचार्यज्यू, सहायक प्राचार्यज्यू,
सम्पूर्ण शिक्षक–शिक्षिका तथा उपस्थित प्रहरी कर्मचारी साथीहरू,
नेपाल प्रहरी विद्यालय, सामाखुसी स्कुल र समादेशकको तर्फबाट यहाँलाई हार्दिक स्वागत तथा सफल कार्यकालको शुभकामना व्यक्त गर्न पाउँदा म अत्यन्तै गौरवान्वित भएको छु । यहाँको आगमन केवल नेतृत्व परिवर्तन मात्र होइन, हाम्रो साझा लक्ष्य विद्यार्थीहरूको उज्ज्वल भविष्य निर्माणतर्फको नवीन ऊर्जा, स्पष्ट दृष्टिकोण र दृढ प्रतिबद्धताको प्रारम्भ हो भन्नेमा म पूर्ण विश्वस्त छु ।
हामीले पछिल्लो समयमा गरेका असल अभ्यासहरू हाम्रा सीमित सरोकार पक्षहरूसँग प्रिय बनेको अनुभूति भएको छ; अब यसलाई जोगाउँदै, विस्तार गर्दै र सबैका लागि प्रेरणाको स्रोत बनाउँदै अघि बढ्नु हाम्रो साझा जिम्मेवारी हो । अब बालबालिकाहरू विद्यालयबाट भागेर घर जाने होइन, घरबाट उत्साहका साथ विद्यालय जाने वातावरण तयार गर्नु छ । प्राचार्य सरले राजिनामा दिनुभएपछिको यस संक्रमणकालीन रिक्तता र अन्योलबीच पनि हाम्रो विद्यालयलाई सफल, सुव्यवस्थित र प्रभावकारी ढंगले अघि बढाउन निरन्तर साथ, सहयोग र मार्गदर्शन प्रदान गर्नुहुने निमित्त प्राचार्य सर तथा सम्पूर्ण शिक्षक शिक्षिका र प्रहरी कर्मचारी साथीहरु प्रति हार्दिक कृतज्ञता व्यक्त गर्दछु ।
यस्तो कठिन घडीमा समेत संस्थाको गरिमा जोगाउँदै, जिम्मेवारीलाई आत्मसात् गर्दै अघि बढ्ने तपाईँहरूको प्रतिबद्धता वास्तवमै प्रशंसनीय छ।
मलाई लाग्छ सपना अधुरो रहँदा कस्तो पीडा हुन्छ भन्ने अनुभूति त्यही व्यक्तिले मात्र गहिरो रूपमा गर्न सक्छ, जसले त्यसलाई हृदयदेखि देखेको हुन्छ। सपना केवल कल्पना होइन; त्यो त आशा, परिश्रम र विश्वासको संगम हो। त्यसैले जब त्यो पूरा हुन सक्दैन, त्यसको चोट पनि उत्तिकै गहिरो हुन्छ।
तर यही अपूरोपनले हामीलाई अझ बलियो बनाउने, अझ सचेत बनाउने र पुनः नयाँ ऊर्जा सहित अगाडि बढ्न प्रेरित गर्ने सामर्थ्य पनि राख्छ।
त्यसैले हामीले विद्यालयमा अनुशासन सुदृढ गर्ने, शिक्षण–सिकाइ प्रक्रियालाई थप प्रभावकारी बनाउने तथा विद्यार्थीहरूको समग्र व्यवहारमा सकारात्मक परिवर्तन ल्याउने उद्देश्यले निरन्तर प्रयास गर्दै आएका छौँ । यी प्रयासहरूले विद्यालयमा आशाजनक र ऊर्जावान वातावरण सिर्जना गरेको छ, जहाँ परिवर्तनको स्पष्ट आभास हुन थालेको छ । अब यहाँको दूरदर्शी नेतृत्वमा यी पहलहरू अझ व्यवस्थित, सशक्त र दीर्घकालीन रूपमा अघि बढ्नेछन् भन्ने मेरो दृढ विश्वास छ, र यही विश्वासले हामीलाई अझ जिम्मेवार, सक्रिय र प्रतिबद्ध बन्न प्रेरित गरिरहेको छ ।
यस विद्यालयका सम्पूर्ण शिक्षक–शिक्षिकाहरूको समर्पण, कर्तव्यनिष्ठा र व्यावसायिकताले नै आजको यो अवस्था सम्भव भएको हो । मन, वचन र कर्मले विद्यार्थीको हितमा निरन्तर लागि रहनु भएको यो समर्पित शिक्षकहरुको सहकार्यमा यहाँले विद्यालयलाई अझ उचाइमा पुर्‍याउनु हुनेछ भन्नेमा कुनै शङ्का छैन ।
एउटा सानो प्रसङ्ग जोड्न चाहन्छु । विद्यार्थीलाई शिक्षकले task दिने क्रममा दुई जना विद्यार्थीहरूलाई छनोट गरी गुरुले सानो टर्च दिए । एकले भन्यो “दुई कदम मात्र देखिन्छ, म कसरी घनघोर जङ्गलमा हिँडूँ ?” भन्दै ऊ अगाडि बढेन, किनकि ऊ कम मेहनती थियो । तर अर्को मेहनती विद्यार्थीले सोही टर्च प्रयोग गरी दुई–दुई कदम गर्दै निरन्तर अघि बढ्दै गयो र अन्ततः पुरै जङ्गल पार गर्‍यो ।

यस प्रसङ्गले हामीलाई स्पष्ट सन्देश दिन्छ सफलता एकैचोटि सबै देखिने बाटो होइन, सानो उज्यालोलाई विश्वास गर्दै अघि बढ्ने साहस हो । त्यसैले आजैदेखि जहाँसम्म देखिन्छ त्यहाँसम्म निडर भएर निरन्तर अघि बढौँ; अब बहानाको कुनै ठाउँ छैन ।
हामीसँग अब हट्ने, भाग्ने वा बहाना गर्ने कुनै सुविधा बाँकी छैन । परिवर्तन सुरु भइसकेको छ, र परिवर्तनसँगै रूपान्तरण अनिवार्य हुन्छ । अब हामी मनले स्पष्ट सोचेर, वचनले दृढ प्रतिबद्धता जनाएर र कर्मले परिणाम देखाउने गरी काम गर्नुपर्छ । सही समय आएपछि हरेक कुराको हिसाब समयले आफैँ गर्नेछ, त्यसैले हामीले आज आफ्नो कर्तव्यबाट पछि हट्ने छुट छैन । हामी थाकेका छौँ भनेर यो यात्रा रोकिँदैन, हामी निराश छैनौँ भनेर साथ दिन ढिलाइ गरिँदैन । अब उठ्ने कि हार मान्ने भन्ने निर्णय अरूले होइन, हामीले नै गर्नुपर्छ । जिन्दगी कसैले सजाएर दिँदैन, र हामी कमजोर भएको दिन सबैभन्दा पहिले हामीलाई नै दोष लगाइन्छ । त्यसैले कमजोर होइन, जिम्मेवार बन्नु हाम्रो दायित्व हो, र डटेर अघि बढ्नु हाम्रो पहिचान हो ।
“सत्य, सेवा, सुरक्षणम्” भन्ने हाम्रो मूल मन्त्र केवल उच्चारण गर्ने शब्द मात्र होइन, हाम्रो जीवन र कर्तव्यको आधार हो । हामीले सधैं सम्झिनुपर्छ भौतिक संरचना मात्र हाम्रो सम्पत्ति होइन; हाम्रो सबैभन्दा बहुमूल्य सम्पत्ति भनेका यी नानीबाबुहरू हुन् । उनीहरूको उज्ज्वल भविष्य निर्माण गर्नु नै हाम्रो कर्म, हाम्रो धर्म र हाम्रो सबैभन्दा ठूलो जिम्मेवारी हो ।
आफ्नो व्यक्तिगत स्वार्थभन्दा माथि उठेर, अनेकौं समस्याहरूलाई थाती राख्दै, कमाण्डरको मार्गदर्शनलाई शिरमा धारण गरी मनदेखि खुशी र प्रेरणाका साथ निरन्तर खटिनु सजिलो कुरा होइन । तर तपाईंहरू समर्पित प्रहरी कर्मचारीहरू यही कठिन बाटोलाई आफ्नो कर्तव्य ठानी अहोरात्र नथाकी सेवा गरिरहनु भएको छ । तपाईंहरूको त्याग, समर्पण र इमान्दारितालाई शब्दहरूले पूर्ण रूपमा वर्णन गर्न सक्दैनन् । बिहान ६ बजेदेखि बेलुकासम्म जुत्ताको पट्टी कसेर नथाकी खटिनुहुने मेरा सहकर्मी प्रहरी साथीहरूको “हजुरलाई जे सहयोग चाहिन्छ, भन्नुहोस् शब्द होइन, काममै परिणत गर्छौँ” भन्ने प्रतिबद्धता केवल वाचा होइन, कर्ममा देखिएको विश्वास हो; यही समर्पणले मेरो आत्मविश्वास बढाउँछ र मन गर्वले भरिन्छ ।
यिनै साथ, यिनै विश्वास र यिनै समर्पणका आधारमा म दृढतापूर्वक भन्न चाहन्छु आजदेखि हामी सबैले उचित समन्वय, प्रभावकारी सहकार्य, आपसी एकता, निरन्तरता र लगनशीलतालाई आफ्नो मूल मन्त्र बनाऔँ । किनकि यही एकताबाट शक्ति जन्मिन्छ, यही निरन्तरताबाट परिवर्तन सम्भव हुन्छ, र यही साझा यात्राबाट हाम्रो लक्ष्य यथार्थ बन्छ ।
हामी सबै फरक–फरक जिम्मेवारीमा रहे पनि एउटै लक्ष्यतर्फ अघि बढिरहेका सहयात्री हौँ । हाम्रो गन्तव्य कुनै कल्पनाको सहर होइन, बरु हाम्रो सामूहिक मेहनत, अनुशासन, संवेदनशीलता र निरन्तर प्रयासले निर्माण गर्ने यथार्थ उपलब्धि हो जहाँ हाम्रा विद्यार्थीहरू सक्षम, जिम्मेवार र आत्मविश्वासी नागरिकका रूपमा उभिन सकून् ।
त्यो ढुङ्गा मात्र मूर्ति बन्छ, जसले छिनो र हतौडाको चोट सहन सक्छ । त्यसैले यदि तपाईंलाई चोट पुगेको छ, मन दुखेको छ भने निराश नहुनुहोस् तपाईं मूर्ति बन्ने प्रक्रियामै हुनुहुन्छ । समाजका हजारौँ कोपिलाहरूलाई हाम्रो प्रयास र समर्पणको सिञ्चनले फूलझैँ फुलाउँदै, तिनीहरूलाई समाजका हरेक कुनामा सुगन्धित उपस्थितिका रूपमा स्थापित गर्ने हाम्रो साझा उद्देश्य हो।
यी कोपिलाहरू केवल व्यक्तित्व होइनन्; तिनीहरू भविष्यका सम्भावना, आशा र परिवर्तनका वाहक हुन्। तसर्थ, तिनीहरूलाई सही मार्गदर्शन, माया र अवसर प्रदान गर्नु हाम्रो कर्तव्य मात्र नभई दायित्व पनि हो।
यस महान् यात्रालाई सार्थक बनाउन हामी सबैको एकता, सहकार्य र समर्पण अपरिहार्य छ। जब हामी हातेमालो गरेर अगाडि बढ्छौँ, तब मात्र यी कोपिलाहरू पूर्ण रूपमा प्रस्फुटित भई समाजलाई उज्यालो र समृद्ध बनाउन सक्षम हुन्छन् भन्दै
यहाँको नेतृत्वमा हामी अझ एकताबद्ध, प्रेरित र लक्ष्यप्रति प्रतिबद्ध हुँदै अघि बढ्नेछौँ भन्ने दृढ विश्वासका साथ, पुनः यहाँलाई हार्दिक स्वागत तथा सफल कार्यकालको शुभकामना व्यक्त गर्दछु ।
धन्यवाद ।
जय नेपाल !

आजदेखि नवनियुक्त प्राचार्य डा. नारायण प्रसाद काफ्लेज्यूले पद बहाली गर्नुभयो । उहाँको स्वागतका लागि आयोजना गरिएको कार्यक्रमका केही झलकहरू-

शैक्षिक सत्र २०८३ का लागि लिइएको नयाँ विद्यार्थी छनोट प्रक्रियाको क्रममा भएका गतिविधिहरूका केही झलकहरू:

प्राचार्यको अन्तिम नतिजा सम्बन्धमा।

शिक्षक तालिम तथा अभिमुखीकरण कार्यक्रमको केही झलकहरू !
*******************************************

नेपाल प्रहरी प्रधान कार्यालय कल्याण महाशाखाको समन्वयमा नेपाल पुलिस स्कुल, साँगामा आयोजित 'शिक्षक तालिम तथा अभिमुखीकरण' कार्यक्रममा नेपाल पुलिस स्कुल, सामाखुसीका शिक्षक टोलीको उत्साहजनक र सक्रिय सहभागिता रह्यो ।
"एक असल शिक्षक सधैँ जिज्ञासु विद्यार्थी पनि हुन्छ" भन्ने मान्यताका साथ आयोजित यस कार्यक्रममा ज्ञान आदानप्रदान र शिक्षणका नयाँ आयामहरूबारे बृहत् छलफल भयो । साँगाको सुन्दर शैक्षिक वातावरणमा सम्पन्न यस सत्रले हाम्रा शिक्षकहरूमा नयाँ ऊर्जा र थप व्यावसायिकता थपेको छ, जसले गर्दा भोलिका दिनमा हाम्रा विद्यार्थीहरूको सिकाइ अझ प्रभावकारी हुने विश्वास लिइएका छ।

सहकार्य र सिकाइका केही स्मरणीय क्षणहरू:

नयाँ नियुक्ति तथा स्वागत कार्यक्रम !
************************

नेपाल पुलिस स्कुल, सामाखुसीको शैक्षिक यात्रालाई अझ उचाइमा पुर्‍याउन शैक्षिक सत्र २०८३ का लागि विभिन्न विषयमा छनौट हुनुभएका शिक्षक साथीहरूलाई एक विशेष समारोहका बिच नियुक्ति पत्र हस्तान्तरण गरिएको छ ।
शिक्षक भेलाका बिच नवनियुक्त शिक्षकहरूलाई स्वागत गर्दै विद्यालयको शैक्षिक गुणस्तर, अनुशासन र भावी कार्ययोजनाका बारेमा समेत छलफल गरियो । नयाँ ऊर्जा र दक्ष शिक्षकहरूको आगमनले हाम्रो विद्यालयको प्राज्ञिक वातावरण अझ सुदृढ हुने विश्वास लिएका छौँ ।
नवनियुक्त सम्पूर्ण शिक्षक साथीहरूलाई नेपाल पुलिस स्कुल परिवारमा हार्दिक स्वागत गर्दै सफल कार्यकालको शुभकामना व्यक्त गर्दछौँ ।
सोही कार्यक्रमका केही झलकहरू:

शैक्षिक सत्र २०८३ को लागि बस रुट:

प्रवेश परीक्षा सञ्चालन सम्बन्धी सूचना !

राष्ट्रिय परीक्षा बोर्डले लिने परीक्षामा सहभागी हुँदै कक्षा १२ का विद्यार्थीहरू

आजदेखि राष्ट्रिय परीक्षा बोर्डले लिने कक्षा १२ को परीक्षा प्रारम्भ भएको छ । सोही परीक्षामा सहभागी हुने विद्यार्थीहरूलाई परीक्षाको शुभकामना दिने कार्यक्रम आयोजना गरियो । सोही कार्यक्रमका केही झलकहरू :

अन्तिम नतिजा प्रकाशन सम्बन्धमा ।

आदरणीय अभिभावकज्यूहरूमा विशेष अपिल,
आदरणीय अभिभावकज्यू र विद्यार्थी भाइबहिनीहरू,
नमस्कार ।

स्कुलका कोठा र प्राङ्गणहरू आज शान्त छन् । हाम्रा प्यारा विद्यार्थीहरूको पदचाप र हाँसोबिना विद्यालय एउटा निर्जीव संरचना मात्र बनेको छ । नेपाल सरकारको विद्यमान नीति र निर्णयका कारण स्कुलको औपचारिक पठनपाठन केही समयका लागि रोकिएको बेहोरा यहाँहरूलाई अवगत नै छ । यद्यपि स्कुलको भौतिक ढोका बन्द हुनुको अर्थ 'सिक्ने प्रक्रिया' नै रोकिएको भने पक्कै होइन ।
१. हाम्रो प्रतिबद्धता
यस असामान्य परिस्थितिमा पनि हामी शिक्षकहरू हात बाँधेर बसेका छैनौँ । वैशाख २ गतेदेखि नै हामी विद्यालयमा उपस्थित भई विभिन्न शैक्षिक तालिम र योजनाहरूमा केन्द्रित छौँ । विद्यालयले सधैँ विद्यार्थीको भविष्यलाई सर्वोपरि ठानेको छ र यो दूरी हामीले चाहेर नभई बाध्यात्मक परिस्थितिले सिर्जना गरेको हो । विद्यार्थीहरूको शैक्षिक अभिभावक हुनुको नाताले हामी पुनः उहाँहरूलाई स्वागत गर्न आतुर छौँ ।
२. जीवनको वास्तविक पाठशाला
किताबका पानाहरू पल्टाएर र परीक्षाका पानाहरू भरेर मात्र शिक्षा पूर्ण हुँदैन । शिक्षा त व्यवहारमा झल्किनुपर्छ । अहिले हाम्रा विद्यार्थीहरू घरमै हुनुहुन्छ । घर सबैभन्दा पहिलो र ठुलो पाठशाला हो । औपचारिक पठनपाठन टुटेको यो समयलाई हामीले 'व्यावहारिक र जीवनोपयोगी शिक्षा' दिने स्वर्ण अवसरको रूपमा लिनु आवश्यक छ:
* श्रमको सम्मान: घरमा पाक्ने अन्न खेतदेखि भान्सासम्म कसरी आइपुग्छ, त्यसको कथा उनीहरूलाई सुनाउनुहोस् । अभिभावकले बगाएको पसिनाको मूल्य बुझाउनुहोस् ।
* डिजिटल नियन्त्रण: मोबाइललगायत डिजिटल ग्याजेटको अस्वाभाविक प्रयोगले उनीहरूको सिर्जनशीलता मर्दैछ । त्यसको सट्टा पुस्तक, पत्रपत्रिका र पुराना कथाहरूमा उनीहरूको रुचि जगाउनुहोस् ।
* स्वस्थ जीवनशैली: समयमा सुत्ने, समयमा उठ्ने र सामान्य शारीरिक कसरत गर्ने बानीले उनीहरूलाई अनुशासित बनाउँछ ।
* स्वावलम्बन: भान्सामा आमाबुबालाई सघाउने, आफैँ खाना बनाउन सिक्ने र घरका साना कामहरू आफैँ गर्ने बानीले उनीहरूलाई आफ्नो खुट्टामा उभिन सिकाउँछ ।
३. हृदयको सम्बन्ध र संस्कार
अभिभावकज्यू, यहाँका नानीबाबुहरू विद्यार्थीसँगै भोलिका सामाजिक खम्बा हुनुहुन्छ। उहाँहरूले गणितका सूत्रभन्दा पहिले परिवारको 'पीडा र मर्का' बुझ्न सिक्नुपर्छ । अग्रजहरूसँग बसेर पुराना कुरा सुन्ने, सामाजिक सम्बन्धको गहिराइ बुझ्ने र अरूप्रति सहानुभूति राख्ने संस्कार नै वास्तविक शिक्षा हो ।
स्कुल र विद्यार्थीबिचको भौतिक सम्बन्ध केही समयका लागि टुटेको होला, तर आत्मिक सम्बन्ध सदैव प्रगाढ छ । आज नानीबाबुहरूको हात समातेर 'जीवन कसरी बाँच्ने' भनेर सिकाउने जिम्मेवारी यहाँहरूको काँधमा आएको छ ।

अन्त्यमा घर एउटा मन्दिर हो र अभिभावक पहिलो गुरु । यो कठिन समयमा आफ्ना सन्ततिको आनीबानी, आहारविहार र संस्कारमा विशेष ध्यान दिनुहुने छ भन्ने पूर्ण विश्वासका साथ हामी यहाँहरूको पूर्ण सहयोगको अपेक्षा गर्दछौँ ।

धन्यवाद ।
स्कुल प्रशासन
(२०८३ वैशाख ०८)