14/04/2026
अमेरिकी नाकाबन्दी लागू भएपछिसमेत प्रतिबन्धित ट्यांकरले होर्मुज जलडमरूमध्य पार गरेको तथ्य सार्वजनिक भएको छ। मंगलबार सार्वजनिक गरिएको जहाज आवागमनसम्बन्धी तथ्यांकअनुसार अमेरिकाद्वारा प्रतिबन्ध लगाइएको चिनियाँ ट्यांकर ‘रिच स्टार्री’ खाडी क्षेत्रबाट सफलतापूर्वक बाहिरिएको हो।
LSEG, MarineTraffic र Kpler का डाटाअनुसार उक्त ट्यांकर नाकाबन्दी सुरु भएयता होर्मुज पार गर्ने पहिलो जहाज बनेको छ। अमेरिकाले इरानसँग सम्बन्धित कारोबारका कारण यस ट्यांकर र यसको स्वामित्व कम्पनी शाङ्घाई श्वानरुन शिपिङ कम्पनीलाई प्रतिबन्ध लगाएको थियो। यद्यपि, प्रतिबन्धका बाबजुद जहाजले आफ्नो यात्रा जारी राख्न सफल भएको देखिएको छ।
‘रिच स्टार्री’ मध्यम आकारको ट्यांकर हो, जसले करिब २ लाख ५० हजार ब्यारेल मिथानोल बोकेको छ। उक्त कार्गो संयुक्त अरब इमिरेट्सको हमरियाह बन्दरगाहबाट लोड गरिएको तथ्यांकले देखाएको छ। जहाजमा चिनियाँ चालक दल रहेको पनि जनाइएको छ।
यसैबीच अर्को अमेरिकी प्रतिबन्धित ट्यांकर ‘मुरलिकिशन’ पनि मंगलबार होर्मुजतर्फ अघि बढेको डाटाले देखाएको छ। खाली अवस्थामा रहेको यो ट्यांकर अप्रिल १६ मा इराकमा इन्धन तेल लोड गर्ने योजनामा रहेको बताइएको छ। यस जहाजले विगतमा रुसी र इरानी तेल ढुवानी गरेको विवरण पनि सार्वजनिक भएको छ।
अमेरिकाले हालै इरानमाथि दबाब बढाउने रणनीतिअन्तर्गत होर्मुज जलडमरूमध्यमा कडा नाकाबन्दी लागू गरेको थियो। तर प्रतिबन्धित जहाजहरू नै सहज रूपमा आवागमन गर्न थालेपछि उक्त नाकाबन्दीको प्रभावकारितामाथि प्रश्न उठ्न थालेको छ।
विश्लेषकहरूले यो घटनालाई केवल एउटा जहाजको आवागमन मात्र नभई अमेरिकी रणनीतिक नियन्त्रणको परीक्षणका रूपमा लिएका छन्। विश्वको महत्वपूर्ण ऊर्जा मार्ग मानिने होर्मुज जलडमरूमध्यमा यस्तो गतिविधिले आगामी दिनमा थप भू-राजनीतिक तनाव बढाउने संकेत गरेको छ।
