02/12/2022
अर्को पृथ्वी
तिमी रिसाएपछि
बादलले बिदा माग्यो आकाशको डिलबाट
घुमिरहने पृथ्वीमा ओर्लिएर
एकोहोरो गुनासो गरिरह्यो जूनले
चराहरूले बदले उँड्ने आकाश
र,
बाटो बदले अनाम यात्रीहरूले।
शीत र आँसुले लछप्प भिजेर
कुहिरोमा यात्रा बिर्सिएको मानिस
हिँडेको हो, तिमी रिसाएकै दिन
अस्ताएको इन्द्रेणी हेरर रोएको हो, बालक
र ,
निर्वासित भएका हुन्, खुसीका हरफहरू।
सबै कुरा रोकिएको छ -
सदाबहार बजिरहने मनको बाँसुरी
मनकै मझेरीमा उदाउने कलिलो घाम
कसैले लगेको छ फूलको सुगन्ध
पहाडकै खोँचबाट हराएको छ, खोलाको सङ्गीत।
तिमी रिसाएपछि खोजिरहेछु -
हरदम चरा उँडिरहने अर्को आकाश
कहिल्यै नअस्ताउने प्रेमको इन्द्रेणी
र अर्को पृथ्वी।❣️