Shanti Adarsha Secondary School

बधाई तथा शुभकामना आदानप्रदान कार्यक्रम सम्पन्न ।

आज मिति २०८३ जेठ ११ गते शैक्षिक वर्ष २०८२ सालमा यस श्री शान्ति आदर्श माध्यमिक विद्यालय, बुद्धशान्ति - ६, शान्तिनगरबाट ग्रेडेड हुनुभएका विद्यार्थीहरू लगायत सेवा क्षेत्रका विद्यालयहरूबाट एस इ इ मा ग्रेडेड विद्यार्थीहरूलाई हार्दिक बधाई तथा शुभकामना साथै अभिमुखीकरण कार्यक्रमका साथमा आफ्नो विषयमा शतप्रतिशत नतिजा दिनुहुने विषय शिक्षकहरू अङ्ग्रेजी- श्री जीवन गौतम, नेपाली - श्री दीपक आचार्य र लेखा- श्री बालकृष्ण घिमिरे सरहरुलाई कदरपत्र सहित हार्दिक बधाई तथा शुभकामना साथै अभिमुखीकरण कार्यक्रम सम्पन्न भयो ।
विद्यार्थी भाइबहिनीहरलाई हार्दिक बधाई तथा शुभकामना साथै कदरपत्रबाट सम्बन्धित शिक्षकज्यूहरुमा शुभकामना सहित निरन्तरताको कामना ।

विद्यालयमा "आमा" कविता वाचन प्रतियोगिता भव्य रूपमा सम्पन्न ।

आज मिति २०८३ जेठ ८ गते यस श्री शान्ति आदर्श माध्यमिक विद्यालयमा विद्यार्थीहरूको साहित्यिक प्रतिभा प्रस्फुटन गराउने उद्देश्यका साथ कविता वाचन प्रतियोगिता सफलतापूर्वक सम्पन्न भएको छ।
विद्यालयका प्रधानाध्यापक श्री पूर्णबहादुर राई ज्यूको अध्यक्षतामा सञ्चालन भएको कार्यक्रममा विद्यालयका पूर्व शिक्षक तथा आदरणीय कवि मोक्ष खतिवडा ज्यू प्रमुख अतिथिका रूपमा उपस्थित हुनुहुन्थ्यो। कार्यक्रमको सञ्चालन विद्यालयका सहायक प्रधानाध्यापक श्री दीपक आचार्य ज्यूले गर्नुभएको थियो।
प्रतियोगितामा उत्कृष्ट प्रस्तुति दिँदै प्रथम, द्वितीय र तृतीय स्थान हासिल गर्न सफल विजेता विद्यार्थीहरूलाई नगद पुरस्कार तथा प्रमाणपत्रद्वारा पुरस्कृत गरियो।
विजेता विद्यार्थीहरूका लागि प्रदान गरिएको नगद पुरस्कारको सौजन्य स्वयं प्रमुख अतिथि कवि मोक्ष खतिवडा ज्यूबाट भएको थियो। विद्यालय परिवार उहाँको यस सहृदयता र साहित्यप्रतिको लगावका लागि हार्दिक आभार प्रकट गर्दछ।
पुरस्कृत विद्यार्थीहरूलाई बधाई तथा शुभकामना।

कक्षा १० एसइइ पूरक परीक्षाको परीक्षा फाराम भर्ने सम्बन्धी सूचना ।
माध्यमिक शिक्षा परीक्षा कक्षा १० एसइइ २०८२ को परीक्षामा नियमित समूहबाट परीक्षा दिई अवर्गीकृत नन ग्रेडेड भएका परीक्षार्थी मिति २०८३ असार १ गतेबाट सञ्चालन हुने पूरक परीक्षामा सहभागी हुनका लागि तपसिल बमोजिम परीक्षा आवेदन भर्न सम्बन्धित सबैका जानकारीका लागि यो सूचना प्रकाशन गरिएको छ।
१. २०८२ को नियमित समूहबाट सहभागी भई अवर्गीकृत र कुनै एक वा एकभन्दा बढी विषयमा अनुपस्थित भएका विद्यार्थी मात्र पूरक परीक्षाका लागि योग्य मानिनेछ।
२.२०८२ को परीक्षामा ग्रेड वृद्धि समूहबाट परीक्षा दिई अबर्गीकृत नन ग्रेडेड NG भएका विद्यार्थीले पूरक परीक्षाको आवेदन फारम भर्न पाउने छैन।
३.पूरक परीक्षाका लागि नियमित समूहकै प्रवेशपत्र र सिम्बल नम्बरबाट परीक्षा दिनुपर्ने भए तापनि विद्यालयमा सम्पर्क गरेर दुईवटा फारम पुन भर्नुपर्नेछ।।
४.फारम भर्ने अन्तिम मिति २०८३ जेठ ११ गते सोमबारसम्म ।
आवश्यक कागजातहरू:
हालसालै खिचिएको पासपोर्ट साइजको फोटो २ प्रति
प्रवेशपत्रको पत्रको प्रतिलिपि १
राजस्व दस्तुर- रू ५००
सम्पर्कका लागि विद्यालयमा निम्न सम्पर्क नम्बर सम्प'र्क गर्न सकिनेछ।
९७४६ ९८ १६३३
परीक्षा फारम भर्न विद्यार्थी स्वयं उपस्थित हुनुपर्नेछ।

विषय: कृतज्ञता तथा धन्यवाद ज्ञापन

आज मिति २०८३ साल जेठ ५ गते यस विद्यालयका पूर्व विद्यार्थी श्री अमृत भुजेलज्यू तथा उहाँकी अर्धाङ्गिनी श्रीमती उषा राईज्यूबाट विद्यालयप्रति देखाउनुभएको अगाध माया र सहयोगको लागि हार्दिक कृतज्ञता व्यक्त गर्दछौँ।
उहाँहरुद्वारा यस विद्यालयको 'बाल विकास कक्षा' का साना उ नानीबाबुहरूको सिकाइ प्रभावकारी बनाउन सामग्री खरिदका लागि उपलब्ध गराउनुभएको आर्थिक सहयोग रु. १०,०००/- (अक्षरेपी १० हजार) र थप रु. २,०००/- (अक्षरेपी दुई हजार) गरी जम्मा रु. १२,०००/- (अक्षरेपी बाह्र हजार रुपैयाँ) बाट आवश्यक सामग्री खरिद गरिएको छ।
उक्त खरिद गरिएको सामग्री आज एक संक्षिप्त कार्यक्रमका बीच आदरणीय उषा राईज्यूको समुपस्थितिमा विद्यालयलाई हस्तान्तरण गरिएको छ। सोही अवसरमा विद्यालय परिवारको तर्फबाट उहाँको सदाशयताको उच्च कदर गर्दै दोसल्ला ओढाएर सम्मान पत्रका साथ विद्यालयका प्रधानाध्यापक श्री पूर्णबहादुर राईद्वारा हार्दिक सम्मान तथा धन्यवाद ज्ञापन गरियो।
पूर्व विद्यार्थीहरू नै विद्यालयका वास्तविक खम्बा र गौरव हुन् भन्ने कुरा उहाँहरूले प्रमाणित गर्नुभएको छ। विद्यालयको शैक्षिक स्तरोन्नतिका लागि यहाँहरूले पुर्‍याउनुभएको यो उदाहरणीय योगदानको विद्यालय परिवार सधैँ ऋणी रहनेछ।
उहाँहरू सम्पूर्ण परिवारको सुस्वास्थ्य, दीर्घायु एवं उत्तरोत्तर प्रगतिको कामना गर्दछौँ।

#

चित्रकला प्रतियोगिताको नतिजा सार्वजनिक साथै पुरस्कार वितरण कार्यक्रम सम्पन्न ।

मिति २०८३ जेठ २ गते कक्षागत रूपमा सञ्चालित चित्रकला प्रतियोगिताको नतिजा आज मिति २०८३ जेठ ५ गते सोमबार सार्वजनिक गरी कक्षागत रूपमा उत्कृष्ट चित्र बनाउने छात्र तथा छात्राहरूको नतिजा सार्वजनिक गरी उत्कृष्ट विद्यार्थीलाई विद्यालयका प्रधानाध्यापक पूर्णबहादुर राईज्यूले पुरस्कार वितरण गर्नुभयो ।

बाल क्लबद्वारा भित्ते पत्रिका प्रकाशन ।

आज वैशाख ३१ गते यस शान्ति आदर्श माध्यमिक विद्यालय बुद्धशान्ति ६ मा बाल क्लबद्वारा प्रकाशित 'भित्ते पत्रिका' सार्वजनिक गरिएको छ। विद्यालयको रचनात्मक परिवेशलाई थप उर्जा प्रदान गर्दै यस पत्रिकाले आजबाट सफलतापूर्वक आफ्नो प्रकाशनको दोस्रो वर्षमा प्रवेश गरेको छ।
उक्त भित्ते पत्रिकालाई क्लबका संयोजक शिक्षक श्री नारायण अधिकारी, अध्यक्ष (कक्षा १० का छात्र) उमेश विश्वकर्मा र सदस्य सुमित तिम्सिना (कक्षा ११ का छात्र)ले संयुक्त रूपमा सार्वजनिक गर्नुभएको हो। विद्यार्थीहरूको अन्तर्निहित प्रतिभा प्रस्फुटन गर्ने र विद्यालयमा पठन–संस्कृति तथा सिर्जनशीलताको विकास गर्ने उद्देश्यका साथ यो पत्रिका नियमित रूपमा प्रकाशित हुँदै आएको छ। विद्यालय परिवार बाल क्लबप्रति हार्दिक बधाई तथा धन्यवाद ज्ञापन गर्दछ ।

हार्दिक बधाई तथा शुभकामना ।
शैक्षिक वर्ष २०८२ को एसइइ परीक्षामा सहभागी भई माथिल्लो कक्षामा अध्ययन गर्न योग्य विद्यार्थी भाइबहिनीहरूलाई हार्दिक बधाई तथा शुभकामना साथै कुनै विषयमा आवश्यक ग्रेड प्राप्त नगरेका विद्यार्थीहरूलाई मौका परीक्षामा सहभागी भई राम्रो ग्रेड प्राप्त होस् भन्ने शुभकामना ।

नानी बाबुहरुको पोषण अवस्था बारे सूचना सङ्कलन गर्न राष्ट्रिय पोषण लेखाजोखा अभियान अन्तर्गत आज मिति २०८३ वैशाख २८ गते बुद्धशान्ति गाउँपालिका स्वास्थ्य शाखा बुधबारे झापाको आयोजनामा ६ महिनादेखि ५९ महिना सम्मका बालबालिकाहरूलाई आधारभूत स्वास्थ्य सेवा केन्द्र बुद्धशान्ति ६ का इन्चार्ज श्री इन्द्रप्रसाद कुइँकेल (अर्जुन), अनमी मनिषा काफ्ले, स्वास्थ्य स्वयंसेविका श्री गाएत्रा पौडेलद्वारा ननिबाबुहरुको स्वास्थ्य परीक्षण खोप केन्द्र लगायत यस विद्यालयमा सम्पन्न गरियो ।
आधारभूत स्वास्थ्य सेवा केन्द्र बुद्धशान्ति ६ प्रति विद्यालय हार्दिक आभार व्यक्त गर्दछ।

शैक्षिक पुरस्कार वितरण, स्वागत तथा अन्तर्राष्ट्रिय रेडक्रस दिवस कार्यक्रम सम्पन्न ।
आज मिति २०८३ वैशाख २५ गते शुक्रबार यस विद्यालयको शैक्षिक सत्र २०८२ को अन्तिम परीक्षामा प्रथम द्वितीय र तृतीय हुने विद्यार्थीहरूलाई यस विद्यालयका पूर्व शिक्षक स्वर्गीय युद्धको दाहालले स्थापना गर्नुभएको नरबहादुर- विष्णुमाया दाहाल पुरस्कार कोष साथै सोही कोषमा रकम थप गरी उहाँका छोरा बुहारी सरोज कुमार दाहाल र टिका पौडेलद्वारा स्थापित नरबहादुर- विष्णुमाया, युद्धकुमार-जमुना देवी दाहाल पुरस्कार कोषको ब्याजबाट प्राप्त पुरस्कार विद्यालयका प्रधानाध्यापक तथा कक्षा शिक्षकज्यूहरूबाट वितरण गरियो ।
त्यस्तै गरेर शैक्षिक वर्ष २०८३ मा नयाँ भर्ना तथा अन्य विद्यालयबाट स्थानान्तर भई आउने विद्यार्थीहरूलाई स्वागतका साथसाथै आज रेडक्रसका संस्थापक जाँ हेनरी ड्युनाको जन्मदिनको अवसरमा हरेक वर्ष मे ८ मा यो दिवस मानवीय सेवा, उद्धार र प्राथमिक उपचारको क्षेत्रमा रेडक्रसले पुर्‍याएको योगदानको सम्मान स्वरूप आज विद्यालयको जुनियर रेडक्रस सर्कलको आयोजनामा विविध कार्यक्रमका साथ कार्यक्रम सम्पन्न गरियो ।
नयाँ विद्यार्थीहरूलाई स्वागत कार्यक्रमको सञ्चालन विद्यालयका प्रधानाध्यापक श्री पूर्णबहादुर राईले गर्नुभएको थियो भने अन्तर्राष्ट्रिय रेडक्रस दिवसको कार्यक्रम जुनियर रेडक्रस सर्कलका संरक्षक रेशमनाथ पौडेल ज्यूले हेनरी डिउनाकाे संक्षिप्त जीवनी सहित सञ्चालन गर्नुभएको थियो साथै शैक्षिक पुरस्कार वितरण कार्यक्रम विद्यालयका सहायक प्रधानाध्यापक श्री दिपक आचार्यज्यूले गर्नुभएको थियो।
यसका साथसाथै विद्यालय परिसर सरसफाई, फूलबारी गोडमेल लगायत वृक्षारोपण कार्यक्रम पनि सम्पन्न भयो।

विद्यालयको ७५औं स्थापना दिवस भव्यताका साथ सम्पन्न
बुद्धशान्ति-६, शान्तिनगर झापा ।
मिति: २०८३ वैशाख १० गते

आज यस शान्ति आदर्श माध्यमिक विद्यालयले आफ्नो स्थापनाको ७५औं वर्ष पूरा गरेको ऐतिहासिक अवसरमा एक भव्य समारोहका साथ विद्यालय व्यवस्थापन समिति अध्यक्ष श्री हरिप्रसाद तिम्सिना ज्यूको अध्यक्षता,नेपाल कृषि अनुसन्धान परिषद्का मुख्य वैज्ञानिक डा. भानुभक्त पोखरेलज्यूको प्रमुख आतिथ्य तथा बुद्धशान्ति गाउँपालिका वडा नं. ६ का वडा अध्यक्ष श्री शिवराज पौडेलज्यूको विशेष आतिथ्य साथै बुद्धशान्ति गाउँपालिका शिक्षा शाखा प्रमुख श्री कमलप्रसाद निरौला र शिक्षा अधिकृत श्री झल्का भट्टराईज्यू लगायत विशिष्ट व्यक्तित्वहरूको गरिमामय अतिथ्यमा कार्यक्रम सम्पन्न भयो।

विद्यालयका सहायक प्रधानाध्यापक श्री दीपक आचार्यज्यूले उपस्थित सम्पूर्णलाई हार्दिक शब्दद्वारा स्वागत गर्नुभयो भने प्रधानाध्यापक श्री पूर्णबहादुर राईज्यूले विद्यालयको वर्तमान अवस्था, शैक्षिक प्रगति र भावी कार्ययोजनाका बारेमा संक्षिप्त जानकारी गराउनुभयो।
विद्यालयका विद्यार्थीहरू लगायत लाप्चा जातिको सांस्कृतिक नृत्यद्वारा विविध सांस्कृतिक कार्यक्रम प्रस्तुत गरिँदा समारोह निकै उल्लासमय बनेको थियो।
कार्यक्रमको मुख्य आकर्षणका रूपमा विभिन्न सम्मान तथा पुरस्कार वितरण गरियो ।
छात्रवृत्ति कोषका संस्थापक तथा संरक्षकज्यूहरूबाट छनौट भएका विद्यार्थीहरूलाई विधानअनुसार छात्रवृत्ति नगद तथा शैक्षिक सामग्री प्रदान गरियो।
वर्ष उत्कृष्ट शिक्षक: विद्यालयको तर्फबाट यस वर्षको 'उत्कृष्ट शिक्षक'का रूपमा प्राथमिक तह द्वितीय श्रेणीका शिक्षक श्री सोमनाथ पौडेलज्यू सम्मानित हुनुभयो।

शिक्षक सम्मान: कर्ण प्रसाद खतिवडा शिक्षक कर्मचारी सम्मान कोष'का तर्फबाट शिक्षक श्री शेखर अधिकारीज्यू सम्मानित हुनुभयो। उक्त कोषको संस्थापक यस विद्यालयका पूर्व कर्मचारी श्री विष्णुप्रसाद अधिकारी हुनुहुन्छ।
विक्रम सम्वत २०२८ देखि २०३३ सम्मका पूर्व शिक्षक तथा कर्मचारीहरूलाई उहाँहरूको अतुलनीय योगदानको कदर गर्दै विशेष सम्मान गरियो।
एसएलसी ब्याच २०६६ लाई उक्त ब्याजका विद्यार्थी श्री दिनेश लाप्चा ज्यूको नेतृत्वमा विद्यालयलाई गर्नुभएको सहयोगको उच्च मूल्याङ्कन गर्दै प्रतिनिधिमूलक ढङ्गमा सम्मानपत्र प्रदान गरियो ।

विद्यालय परिवार यस ऐतिहासिक घडीमा उपस्थित हुनुहुने सम्पूर्ण चन्दादाता, छात्रवृत्ति कोष दाता, विभिन्न विद्यालयका प्रधानाध्यापकज्यूहरू, संघसंस्थाका प्रतिनिधिहरू, अभिभावक, पूर्व शिक्षकहरू र विद्यार्थीहरूमा हार्दिक आभार प्रकट गर्दछ।

आफ्नो जिम्मेवारी कुशलतापूर्वक निभाएर कार्यक्रम सफल पार्न अहोरात्र खट्नुहुने सम्पूर्ण शिक्षक-कर्मचारी र अन्तिम समयसम्म बसेर कार्यक्रमको पूर्णता दिनुहुने आमन्त्रित महानुभावहरूमा विद्यालय परिवार हार्दिक धन्यवाद ज्ञापन गर्दछ।

सम्मानित तथा पुरस्कृत सम्पूर्णमा हार्दिक बधाई तथा निरन्तर प्रगतिको शुभकामना!