Gen-Z Continuum

जेन-जी विद्रोहको सन्देश जनस्तरसम्म पुर्याउनका लागि आयोजना गरिएको यस जनजागरण सभामा स्थानीय तथा राष्ट्रियस्तरमा सक्रिय युवा तथा जेन-जी अगुवाका साथमा हामी तपाईँहरू सामु उपस्थित हुँदैछौँ ।

तपाईँहरू सम्पूर्ण परिवर्तन पक्षधर नागरिकहरूलाई यस जनजागरण सभामा स्वागत गर्न हामी तयार छौँ । आउनुहोस् एक ठाउँमा उभिएर परिवर्तनको स्पष्ट सन्देश हामीबाट सुरू गरौँ ।

जेन-जी विद्रोह र यसपछिको घटनाक्रम अनुरूप यस विद्रोहलाई सफल अवतरण गर्न काम गर्दै आउनुभएका जेन-जी अगुवा एवम् अधिवक्ता यतिष ओझालाई यस जनजागरण सभामा हार्दिक स्वागत गर्दछौँ।

जेन-जी विद्रोह र यस विद्रोहले प्राप्त गरेका परिवर्तनलाई संस्थागत गर्न महत्वपूर्ण भूमिका खेल्दै आउनु भएका जेन-जी अभियन्ता, द काउन्सिल अफ जेन-जी नेपाल, प्रदेश १ संयोजक उपार्जुन चाम्लिङलाई यस जनजागरण सभामा हार्दिक स्वागत गर्दछौँ।

जेन-जी विद्रोह र त्यस पश्चात उत्पन्न परिस्थितिका बाबजुद यसको म्यान्डेटलाई संस्थागत गर्नका लागि अनवरत रूपमा काम गर्दै आउनुभएकी जेन-जी अभियन्ता, नेपाल जेन-जी फ्रन्टकी संयोजक Rakshya Bam लाई यस जन जागरण सभामा हार्दिक स्वागत गर्दछौँ।

!! सार्वजनिक जनअपिल !!

देशको पछिल्लो राजनीतिक घटनाक्रम र त्यसबाट सिर्जित आसन्न प्रतिनिधिसभा चुनावको परिप्रेक्षमा, जेन-जी विद्रोहको मर्मलाई सही रूपमा जनस्तरसम्म पुर्याउने उद्देश्यका साथ यहि मङ्सिर २८ गते आइतबारका दिन झापाको दमकमा जेन-जी फ्रन्ट (झापा) को आयोजना तथा अग्रगामी झापा–५ समूहको सहकार्यमा जनजागरण सभा गर्ने तय भएको छ।

यस कार्यक्रममा स्थानिय तथा राष्ट्रिय स्तरमा सक्रिय यूवा तथा जेन-जी अभियान्ताहरूको सक्रिय सहभागिता रहने छ। र, यस सभालाई भव्य रूपमा सफल पार्नाका लागी झापा जिल्ला निर्वाचन क्षेत्र न. ५ का परिवर्तन पक्षधर सम्पूर्ण नागरिकहरूलाई निम्न मिति, स्थान र समयमा उपस्थित भई परिवर्तनको पक्षमा उभिनका लागी हार्दिक अपिल गर्दछौँ।

मिती: २०८२ मङ्सिर २८ गते, आईतबार
स्थान: गोर्खा डिपार्टमेन्ट स्टोर अगाडि, दमक
समय: दिउँसो २ बजेदेखि

झापा निर्वाचन क्षेत्र नम्बर - ५ बाट संयुक्त नागरिक वक्तव्य

वर्षौंको भ्रष्टाचार र बेथितिबाट आक्रान्त नेपाली नागरिकबाट बारम्बार आफ्नो निराशा, आक्रोश र विरोध विभिन्न स्वरुपमा व्यक्त भइरह्यो । तर, शासनमा रहेका दल र तिनका नेतृत्व तथा प्रतिनिधिले नागरिकका आवाज र चासोलाई निरन्तर नजरअन्दाज गरिरहे ।

राज्यका सम्पूर्ण निकायको चरम दलीयकरण र राजनीतिक दलभित्रको आन्तरिक लोकतन्त्र समेत अपहरण गरेर एक किसिमको राज्य कब्जाको स्थिति पुरानो नेतृत्वले सिर्जना गर्‍यो । राज्यका कतिपय निकाय, बौद्धिक, नागरिक समाज लगायतले बारम्बार सचेत गराउँदा समेत त्यसलाई खारेज गरेर सत्तासीनहरू आफ्नै धुनमा रमाइरहे । उल्टै नागरिकको अपमान र उपेक्षामा उत्रिए । हुँदा हुँदा नागरिकले आफ्नो आवाज राख्न उपयोग गरिरहेका सामाजिक सञ्जाल नियमन गर्ने अपारदर्शी र निरङ्कुश बहाना बनाएर बन्द गर्ने हदसम्म तत्कालिन राज्य उत्रियो ।

राज्यको बेथितिबाट आक्रान्त जेन-जी नवयुवा भ्रष्टाचारको अन्त्य र सामाजिक सञ्जालमाथिको बन्देज खुलाउनुपर्ने आफ्ना सरल दुई माग राखेर शान्तिपूर्ण आन्दोलनमा उत्रँदा आधुनिक नेपाली इतिहासकै सबैभन्दा ठूलो नागरिक हत्यामा तत्कालीन राज्य उत्रियो । त्यसमा आफ्नो जिम्मेवारी स्वीकार्नु वा आत्मालोचना गर्नुको साटो अझ कठोर बन्ने सन्देश प्रवाह गर्न थाल्यो ।

त्यसबाट उत्पन्न भएको परिस्थिति जगजाहेर नै छ । युवाहरुले स्पष्ट रूपमा भ्रष्टाचार नियन्त्रण र सुसाशनका लागि निर्मम संरचनात्मक सुधार र परिवर्तनको म्यान्डेट दिएका राजनीतिक दलहरू पुरानै ढर्रा, शैली र नेतृत्व सहित लाज पचाएर जनताको घर दैलोमा झुल्किन थालिसकेका छन् । उनीहरूले दशकौँदेखि संस्थागत गरेको बेथितिबाट उत्पन्न परिस्थितिको न स्वीकारोक्ति न आत्मालोचना नै गरेका छन् । न त त्यसको जिम्मेवारी लिने छाँटकाँट छ ।

वर्षौँ सम्मको बेथिति, भ्रष्टाचार, दण्डहीनता र कुशासनबाट आक्रान्त नेपाली समाजलाई किशोर तथा नवयुवाले आफ्नो बलिदानीबाट एउटा युगीन जिम्मेवारी सुम्पिएका छन् । यसलाई अत्यन्त संवेदनशील र गम्भीरताका साथ लिएर नेपाली समाजको वर्षौँको अपेक्षा पूरा गर्नु अग्रगामी परिवर्तनका पक्षधर आम नागरिक, युवा, वैकल्पिक राजनीतिक शक्ति तथा दलभित्रकै पनि परिवर्तनका सचेत पक्षधरको जिम्मेवारी हो ।

झापा निर्वाचन क्षेत्र नम्बर ५ का मतदाता र नागरिकसँग यसको अझै बढी जिम्मेवारी छ । हामी झापा क्षेत्र नम्बर ५ का सम्पूर्ण मतदाता र नागरिकलाई किशोर र नवयुवाको बलिदानीबाट प्राप्त देशलाई भ्रष्टाचार र कुशासनबाट मुक्त गराउने जिम्मेवारीलाई गम्भीरताका साथ आत्मसात् गरेर सम्पूर्ण परिवर्तन पक्षधर, युवा, नागरिक र वैकल्पिक शक्ति पक्षधरलाई गोलबद्ध भई इतिहासले दिएको युगीन जिम्मेवारी पूरा गर्नुहुन हार्दिक अपील गर्दछौँ ।

मिति: २०८२ कार्तिक १४
संयोजन: Gen-Z Continuum

परिवर्तनको म्यान्डेट जनताको हातमा सुम्पिने यस ऐतिहासिक घडीमा हामी सम्पूर्ण राजनीतिक दल, राजनीतिक शक्ति, नागरिक समाज, जेन-जी साथीहरू, युवा पुस्ता एवम् सम्पूर्ण नेपाली नागरिकहरूमा आह्वान गर्दछौँ – निर्वाचन आयोगले सार्वजनिक गरेको निर्वाचन कार्यतालिकालाई स्वीकार गर्दै त्यसै अनुसार आगामी निर्वाचनमा सक्रिय सहभागिता जनाउनुहोस् ।

निर्वाचनको विकल्प छैन ! Rakshya Bam