22/05/2020
घर पहिलो पाठशाला
बालबालिकाका लागि घर पहिलो पाठशाला हो । बाबा, आमा तथा अभिभावकहरु नै पहिलो गुरु हुन् । बच्चाले विद्यालय जानुपूर्व बाबा, आमा, मामा, काका, दादा, पापा, नाना, चाचा आदि जस्ता कैयौँ शब्दहरु घरपरिवारबाट सिकेको हुन्छ । त्यतिमात्र होइन पढेलेखेका अभिभावकहरुले क, ख, ग, ए, बी, सी, डी, वान, टु, थ्रीका साथै अन्य प्राथमिक कक्षा (नर्सरी) मा पढ्ने कुराहरु सिकाएका हुन्छन् । तिनै वातावरणका बीचमा विद्यालय गएपछि शिक्षक शिक्षिकाहरुले बालबालिकालाई अक्षर चिन्न, लेख्न, पढ्न सिकाउने गर्दछन् । त्यसैले बालबालिकाहरुको अध्ययनमा अभिभावकहरुको निकै ठूलो भूमिका विगतदेखि नै रहँदै आएको छ । अझ अहिलेको लकडाउनले विद्यालयहरु बन्द भएको अवस्थामा बालबालिकाहरुको अध्ययन र सिकाइ कार्यमा अभिभावकहरुले झनै जिम्मेवारपूर्ण भूमिका निर्वाह गर्दै लेखपढ गर्ने वातावरण मिलाइदिन अत्यन्त जरुरी छ ।
