08/04/2026
जापानको ओकिनावास्थित 'आन्सिन' (Anshin) नामक लजिस्टिक कम्पनीले ढुवानी क्षेत्रमा रहेको चालक अभावलाई कम गर्न पहिलो पटक एक नेपाली युवालाई चालकको रूपमा नियुक्त गरेको छ। नेपालका साजन रावलले आवश्यक प्रक्रिया पूरा गरी अप्रिल १ देखि उरासोए शहरमा रहेको उक्त कम्पनीमा आफ्नो कार्यभार सम्हालेका हुन्।
जापान सरकारले सन् २०२४ मा जनशक्ति अभाव टार्न 'निर्दिष्ट दक्ष कामदार' (SSW) भिसा अन्तर्गत मोटर वाहन यातायात व्यवसायलाई पनि समावेश गरेपछि यो सम्भव भएको हो। चार वर्षअघि जापान आएका साजनले कम्पनीको विशेष सहयोगमा जापानी भाषा परीक्षा, पहिलो श्रेणीको सवारी चालक अनुमति पत्र र दक्ष कामदार मूल्यांकन परीक्षा सफलतापूर्वक उत्तीर्ण गरेका थिए।
स्थानीय कम्पनीले जापानी भाषा विद्यालय र ड्राइभिङ सेन्टरसँग समन्वय गरी विदेशी चालकलाई तालिम दिएर नियुक्त गरेको यो ओकिनावा प्रान्तकै पहिलो उदाहरण हो। साजनले आफूले छिट्टै काम सिकेर कम्पनीको उन्नतिमा पूर्ण योगदान दिने प्रतिबद्धता व्यक्त गरेका छन्। यस प्रयासले जापानको ढुवानी उद्योगमा देखिएको संकट समाधान गर्न र नेपाली कामदारका लागि नयाँ अवसर सिर्जना गर्न महत्त्वपूर्ण भूमिका खेल्ने अपेक्षा गरिएको छ। (沖縄テレビ बाट )
