17/10/2025
एमाले केन्द्रीय कमिटी बैठक आज सकिँदै, अध्यक्ष ओलीको समापन सम्बोधन हुने
काठमाडौं — नेकपा (एमाले) को जारी दशौं केन्द्रीय कमिटी बैठक आज (मंगलवार) सकिने भएको छ। तेस्रो दिनको बैठकमा बाँकी रहेका केन्द्रीय सदस्य र पदाधिकारीहरूले आफ्ना धारणा राखेपछि बैठक समापन गरिनेछ।
प्रचार तथा प्रकाशन विभाग प्रमुख राजेन्द्र गौतमका अनुसार आजको बैठकमा करिब १५० जना केन्द्रीय सदस्यहरूले बोल्नेछन्, भने करिब ५० जना सदस्य अझै धारणा राख्न बाँकी छन्। गौतमले बताएअनुसार प्रत्येक नेतालाई बोल्न तीन मिनेट समय दिइनेछ।
बैठकको अन्त्यमा अध्यक्ष केपी शर्मा ओलीले केन्द्रीय सदस्यहरूले उठाएका जिज्ञासा र सुझावहरूको एकमुष्ट जवाफ दिनेछन्।
बैठकमा पोलिटब्युरो, स्थायी कमिटी र पदाधिकारीहरूका साथै विभिन्न विभागीय नेताहरू पनि सहभागी छन्।
गौतमका अनुसार बैठकमा अध्यक्ष ओलीको विशेष प्रस्तावमाथि छलफल भइरहेको छ। प्रस्तावमा वर्तमान राजनीतिक परिस्थिति, घोषित निर्वाचन, पार्टीको आगामी बाटो र नेता–कार्यकर्ताको भूमिकाबारे सुझाव संकलन भइरहेको छ।
ललितपुरको भनी मण्डलस्थित रामबाघ महलमा तीन दिनदेखि जारी बैठक जेन–जी आन्दोलनपछि उत्पन्न राजनीतिक अवस्थालाई मध्यनजर गर्दै बोलाइएको हो। बैठकले मंसिर २७ देखि २९ गतेसम्म पोखरामा ११औं महाधिवेशन गर्ने निर्णय गर्न लागेको छ।
आजको बैठकमा उपमहासचिव प्रदीप ज्ञवालीले समसामयिक प्रस्तावहरू पनि प्रस्तुत गर्नेछन्।
#एमाले #केपीशर्मा ओली #केन्द्रीयबैठक #राजेन्द्रगौतम #प्रदीपज्ञवाली #जेनजीविद्रोह #राजनीतिकसंकट #नेपालराजनीति #महाधिवेशन #नेपालसमाचार
