08/10/2025
पश्चिमाले विश्व भु-राजनीतिमा प्रभाव बढाइरहेको बेला हाम्रो मुलुकमा बढ्दै गइरहेको भ्रष्टाचार, कुशासन, राजनीतिक असमानता उनीहरुको लागि एउटा महत्वपूर्ण मसला बनिरहेको थियो। नेताहरुको शासन शैली र बढ्दो भ्रष्टाचार, कुशासनले जनता आक्रोशित थिए जो एउटा बारुदको थुप्रो बनेर बसिरहेको थियो यसलाई नै माध्यम बनाएर पश्चिमाहरुले बिष्फोट गराउन चाहन्थे। उनीहरु श्रीलंकाबाट सल्केको आगो बंगलादेश हुँदै विस्तारै नेपालमा पनि सल्काउन चाहन्थे। यही समयमा सामाजिक सञ्जाल बन्द गराएर यसलाई थप विष्फोटक बनाइयो। यसमा केपी ओली राम्रैसँग प्रयोग भए, सायद केपी ओलीले आफू प्रयोग भएको पत्तै पाएनन्। अझ उनका मन्त्रीको अभिव्यक्तिले आगोमा घिउ थप्ने काम गरिरहेको थियो। यही बारुदको थुप्रोमा आगो लगाउन सलाइको काँटि खोजिरहेका पश्चिमाहरुले जेन्जीहरुको आन्दोलनलाई प्रयोग गरेर केही हदसम्म सफलता हासिल गरे। नेपालको राजनीतिमा सधैंभरि निर्णायक भूमिकामा रहने छिमेकी मुलुक भारत र चिनले भने यो घट्नाको पत्तै पाएनन्। अहिले यो आगो नेपालका सिमा रहेका भारतको केही प्रान्तमा सल्किरहेको छ। केही प्रान्तमा सल्केको आगोको झिल्कोले पुरै भारतलाई नडडाउला भन्न सकिन्न। भाद्र २३ र २४ को घट्ना एउटा ट्रेलर मात्र हो फिल्म आउन बाँकी नै छ। यसका लागि पुराना दलका नेताहरुले दिदैँ आएका अभिव्यक्ति नै काफि छ। पुराना दल र दलका नेतालाई आजसम्म जसले प्रयोग गर्दै आयो उसैले सक्ने काम गर्यो। कसैको लागि प्रयोग हुनु यति घातक थियो कि जसको लागि प्रयोग भएको हो उसको स्वार्थ पुरा नभएमा त्यसैको शिकार बन्नुपर्छ भन्ने भेउ नपाएका र दिमाग नभएका राजनीतिक दलका नेताहरुले कपिलवस्तुका तत्कालीन रा.प्र.पा नेता मिर्जा दिल वेग साख अन्डरवल्र्डको शिकार बनेको नै स्मरण गरेनन्। त्यसैको परिणामस्वरूप अहिले पुराना दलका नेताहरु घर न घाटका बनेका छन्, र पनि यिनमा सद्बुद्धि पलाउने छाँटकाँट देखिदैन। अहिले मुलुक अत्यन्तै संकटको घडीमा उभिएको छ। मुलुकलाई बचाउन सबै पक्षले आग्रह, पूर्वाग्रह, दम्भ, अहंकार र व्यक्तिगत स्वार्थ त्यागेर एकै ठाउँमा उभिनुको विकल्प देखिदैन। सबै पक्षधर (शक्ति) मिलेमा मात्र मुलुक बचाउन सकिन्छ।
