Banke Bardiya Update

नेपालगञ्ज। लामो समयदेखि प्राविधिक कारणले बन्द रहेको भेरी अस्पतालको CT Scan सेवा अब पुनः नियमित रूपमा सञ्चालनमा आएको छ।
अस्पतालले दिएको जानकारीअनुसार करिब दुई वर्षपछि सेवा पुनः सुरु भएसँगै विशेषज्ञ चिकित्सकको सिफारिसमा आवश्यक पर्ने CT Scan परीक्षण अब भेरी अस्पतालमै सहज, सुरक्षित र गुणस्तरीय रूपमा गर्न सकिनेछ।
यस सेवाको पुनः सञ्चालनसँगै बिरामीहरूले अन्य अस्पताल धाउनुपर्ने बाध्यता घट्ने, समयमै रोग पहिचान र उपचारमा सहज हुने तथा अनावश्यक आर्थिक भारसमेत कम हुने अपेक्षा गरिएको छ।
भेरी अस्पतालले आगामी दिनमा पनि आधुनिक स्वास्थ्य सेवा विस्तार, सेवा व्यवस्थापन सुधार, विशेषज्ञ सेवा सुदृढीकरण तथा बिरामीमैत्री वातावरण निर्माण गर्दै गुणस्तरीय र विश्वसनीय स्वास्थ्य सेवा प्रदान गर्न निरन्तर प्रतिबद्ध रहने जनाएको छ।

चितवनको इच्छाकामना गाउँपालिका–५ मा खसेको पहिरो हटाइएपछि नारायणगढ–मुग्लिन सडकखण्ड पुनः सञ्चालनमा आएको छ। डिभिजन सडक कार्यालय, भरतपुरका अनुसार पहिरो पन्छाउने कार्य सम्पन्न भएपछि दुवैतर्फको सवारी आवागमन सहज रूपमा सुचारु भएको हो।
सडक प्रयोगकर्तालाई भने यात्रा गर्दा सतर्कता अपनाउन सम्बन्धित निकायले आग्रह गरेको छ।

नेपालगञ्जमा सामाजिक सद्भावको सन्देश: आज बिहान बृहत् नागरिक र्‍याली

नेपालगञ्जमा आज बिहान विभिन्न समुदाय, संघ–संस्था तथा सर्वसाधारणको सहभागितामा बृहत् नागरिक र्‍याली आयोजना गरिएको छ। र्‍यालीमार्फत सामाजिक सद्भाव, आपसी सम्मान, शान्ति र राष्ट्रिय एकताको सन्देश प्रवाह गरिएको आयोजकले जनाएको छ। सहभागीहरूले समाजमा मेलमिलाप र सहिष्णुता कायम राख्न सबैलाई सकारात्मक भूमिका खेल्न आग्रह गरेका छन्।

अमेरिकाको बफेलो चिडियाखानामा नियमित स्वास्थ्य परीक्षणका क्रममा भएको एउटा भावुक क्षणले विश्वभरका मानिसहरूको ध्यान खिचेको छ। करिब १८१ किलो तौल भएको कोगा नामक गोरिल्लालाई मुटुको परीक्षणका लागि बेहोस बनाइएको बेला उसले छेउमै रहेकी नर्सको हात आफ्नो हातले समात्यो।
त्यो दृश्य यति मार्मिक थियो कि त्यहाँ उपस्थित एक फोटोग्राफरले तुरुन्तै आफ्नो क्यामेरामा कैद गरे। तस्बिर सार्वजनिक भएपछि सामाजिक सञ्जालमा तीव्र रूपमा फैलियो र लाखौँ मानिसहरूले यसलाई मानव र जनावरबीचको विश्वास, माया र आत्मीय सम्बन्धको अनुपम उदाहरणका रूपमा प्रशंसा गरे।
धेरैले प्रतिक्रिया दिँदै प्रेम, स्नेह र विश्वासको भाषा सबै जीवले बुझ्ने बताएका छन्। कोगाको यो मन छुने तस्बिर अहिले विश्वभर संवेदनशीलता, करुणा र मानवियताको प्रेरणादायी प्रतीक बनेको छ।
Hashtags:

अन्धविश्वासको नाममा महिलामाथि अमानवीय व्यवहार, ‘पाथीभरा माता’ भनेर चिनिने समिर थापा पक्राउ

सुर्खेत । महिलामाथि बोक्सीको आरोप लगाउँदै कुटपिट तथा अपमानजनक व्यवहार गरेको आरोपमा ‘पाथीभरा माता’ भनेर चिनिने समिर थापा पक्राउ परेका छन्।

जिल्ला प्रहरी कार्यालय सुर्खेतका अनुसार वीरेन्द्रनगर नगरपालिका–३, एरिचोक निवासी २४ वर्षीय समिर थापाले झारफुक गर्ने बहानामा एक महिलामाथि बोक्सीको आरोप लगाई गालीगलौज, कुटपिट तथा अमानवीय व्यवहार गरेको आरोप लागेको हो।

सामाजिक सञ्जालमा सार्वजनिक भएको भिडियोमा पीडित महिलालाई अपमानजनक व्यवहार गर्न बाध्य पारिएको दृश्य देखिएपछि घटनाले व्यापक ध्यान तानेको छ। भिडियो सार्वजनिक भएपछि स्थानीयवासीले प्रहरीलाई जानकारी गराएका थिए।

त्यसपछि प्रहरी निरीक्षक दीपक मगरातीको नेतृत्वमा खटिएको ९ सदस्यीय टोलीले समिर थापालाई उनकै निवासबाट नियन्त्रणमा लिएको प्रहरीले जनाएको छ।

प्रहरीले घटनाबारे थप अनुसन्धान जारी रहेको जानकारी दिँदै अन्धविश्वासको आडमा कसैमाथि हिंसा, दुर्व्यवहार वा मानवअधिकारविपरीत कार्य गर्ने जोसुकैमाथि पनि कानुनबमोजिम कडा कारबाही गरिने स्पष्ट गरेको छ।

मुख्य राजमार्ग अबरोध हुने सम्बन्धि सूचना (मिति : २०८३|०४|१०)
Source: Nepal Police

सरकारले साउन १६ गतेदेखि 'उपभोक्ता प्रोत्साहन लट्री कार्यक्रम' सुरु गर्दैछ। अब १०० रुपैयाँ वा सोभन्दा बढीको सामान वा सेवा खरिद गर्दा भ्याट बिल लिने उपभोक्ताले दैनिक र बम्पर नगद पुरस्कार जित्न सक्नेछन्।
डिजिटल भुक्तानी (QR, कार्ड, eSewa, Khalti आदि) गर्दा कारोबार स्वतः लट्री प्रणालीमा दर्ता हुनेछ। नगद भुक्तानी गरेमा भने बिलको विवरण विभागको वेबसाइट वा मोबाइल एपमा दर्ता गर्नुपर्नेछ।
यस योजनाअन्तर्गत दैनिक १ लाख ३३ हजार ३३४ रुपैयाँ र हरेक १५ दिनमा १० लाख रुपैयाँ बम्पर पुरस्कार प्रदान गरिनेछ।
सरकारका अनुसार यो कार्यक्रमको उद्देश्य उपभोक्तालाई भ्याट बिल लिन प्रोत्साहित गर्नुका साथै कर प्रणालीलाई थप पारदर्शी बनाउनु हो।

पूरा जान्कारी बाँके बर्दिया अप्डेट्को युट्युब च्यानल मा उपलब्ध छ ।

११ नाल भरुवा बन्दुक बरामद,प्रहरी अनुसन्धान जारी
नेपाल प्रहरीले आज आफ्नो आधिकारिक फेसबुक पेजमार्फत दाङ जिल्लाको बङगलाचुली गाउँपालिका–८ स्थित घोरलभिर (पिपली जंगल) क्षेत्रबाट ११ नाल भरुवा बन्दुक बरामद गरिएको जानकारी सार्वजनिक गरेको छ।
प्रहरीका अनुसार बुधबार बिहान करिब ९ बजे जंगलको झाडीभित्र भरुवा बन्दुक लुकाएर राखिएको भन्ने गोप्य सूचनाका आधारमा प्रहरी चौकी रामपुरबाट प्रहरी सहायक निरीक्षकको नेतृत्वमा टोली परिचालन गरिएको थियो।
प्रहरी टोलीले उक्त क्षेत्रमा खोजतलास गर्ने क्रममा झाडीभित्र लुकाइराखिएको अवस्थामा १ नाल बेचालु र १० नाल चालु (लोड नगरिएको) गरी कुल ११ नाल भरुवा बन्दुक फेला पारी बरामद गरेको जनाएको छ।
घटनाबारे थप अनुसन्धान जारी रहेको नेपाल प्रहरीले जनाएको छ।

कर्णाली विकास बैंकमा बचतकर्ताको आन्दोलन, बैंक परिसरमा कडा सुरक्षा व्यवस्था

कर्णाली विकास बैंकमा रकम जम्मा गरेका बचतकर्ताहरूले आफ्नो बचत फिर्ताको माग गर्दै आन्दोलन गरेका छन्।
स्थिति तनावपूर्ण बनेपछि बैंक परिसरमा नेपाल प्रहरी परिचालन गरिएको छ। आन्दोलनका क्रममा केही बचतकर्ताहरू घाइते भएको जानकारी प्राप्त भएको छ।